Messiah Kha An Rak Hngah

“Mizapi cu an i ruahchannak kha a hung ṭhang i Johan hi aho ko dah a si hnga, amah hi Messiah cu a si sual hnga maw, tiah an ruat lengmang.”—LUKA 3:15.

1. Vancungmi nih tuukhal pawl kha zeidah a chimh hna?

KHUA a hung mui cang. Mah lio ah tuukhal pawl nih an tuurun kha ramlak ah an zohkhenh hna. Ruahlopi in Jehovah vancungmi cu an pawng ah a hung lang i Pathian sunparnak cu an velchum ah a ceu tikah an thin a phang tuk hringhran. Cun vancungmi nih lungthawh awk ngai a simi hi bia a chimmi zong an theih: “Nan thinphang hlah u; zeicahtiah nan sin i ka ratnak cu nan ca i thawngṭha he a si, cu thawngṭha nih cun mi vialte sin ah lunglawmhnak a tlunter lai. Tu zan hrimhrim ah hin . . . Khamhtu kha a chuak cang, Khrih Bawipa cu!” Mah ngakchiate cu Messiah a si hngami a si. Amah cu hika in aa naihmi khua i caw rawl einak kuang ah nan hmuh lai tiah a ti hna. Cun vancungmi tampi cu an hung lang i Jehovah kha hitin an thangṭhat: “A sang bik van ah khin Pathian cu thangṭhat si ko seh. Cun a dawtmi hna umnak vawlei ah hin remnak um ko seh.”—Luka 2:8-14.

2. “Messiah” timi cu zeidah a si, Messiah cu zeitindah hngalh khawh a si?

² ‘Mah ngakchia cu Messiah a si taktak hnga maw?’ tiah tuukhal pawl cu khua an ruat ko lai. Annih nih “Messiah” asiloah “Khrih” timi cu Pathian “Chiti Thuhmi” a si ti kha an hngalh. (Ex. 29:5-7) Asinain vancungmi chimmi ngakchiapa cu zeitindah Jehovah thimmi Messiah a si an hngalh khawh lai i midang zong an chimh khawh hna lai? Hebru Cathiang ah a ummi chimchungbia ṭha te’n hlathlai in ngakchiapa a nunning he tahchunhnak thawng in a si.

Messiah cu Zeicah Mi nih an i Ruahchan?

3, 4. Daniel 9:24, 25 kha zeitindah kan hngalhthiam?

³ Kum tam nawn a rauh hnu ah Tipil petu Johan cu phungchim hram a thawk, a chimmi le a tuahmi ruangah mi cheukhat nih Messiah a si men lai tiah an ruah. (Luka 3:15 rel.) Baibal ah “zarh sawm sarih” kong chimchungbia a um i mah nih zeitikah Messiah a chuah lai hngalh awkah mi kha a bawmh hna. Baibal nih hitin a chimchung: “Jerusalem . . . sak a si ṭhan lai ti bia a chuah ri in Pathian thimmi bawi a chuah tiangah, zarh sarih a rau lai; cun zarh sawm ruk le zarh hnih chung cu hmasa a sining ah khan siter ṭhan a si lai.” (Dan. 9:24, 25) Baibal lei mifim pawl nih ni khat kha kum khat in an lak. Cucaah zarh khat cu kum sarih a si.

⁴ Tuchan Jehovah miphun nih Daniel 9:25 i zarh 69 cu kum 483 he aa tluk i mah kum cu B.C.E. 455 in aa thawk ti kha an hngalh. Mah kum ah Persia Siangpahrang Artazaksis nih Nehemiah kha Jerusalem khua sak le remh awk nawl a pek. (Neh. 2:1-8) Kum 483 cu Nazareth khuami Jesuh tipil a in kum, C.E. 29 ah a dih, mah lio ah thiang thlarau in chiti thuh a si i Messiah a hung si.—Matt. 3:13-17.a

5. Zei chimchungbia kong dah kan i ruah lai?

⁵ Baibal ah Messiah kong chimchungbia a dang tampi a um rih, mah lakah Jesuh a chuah lio, a ngakchiat lio le phung a chim lioah a tlingmi chimchungbia kong i ruah u sih. Mah nih Pathian kan zumhnak kha a fehter lai. Cun Jesuh cu mi nih hlanpi in an rak hngahmi Messiah a si zong a langhter lai.

A Ngakchiat lio Kong Chimchungbia

6. Genesis 49:10 cu zeitindah a tlin, fianter.

⁶ Messiah cu Israel mi Judah phun chung in a chuak lai. Jakob nih a thih lai ah a fale thluachuah a pek hna i Judah kong ah hitin a ti: “A bawifung kha a hler i a ke le a ke karlak ah a chiah; a lianhngannak cu, a ngeitu taktak a rat i cu nih cun mi vialte a uk hna hlan tiang amah nih aa chiah ko lai.” (Gen. 49:10) Mah bia cu Messiah he aa pehtlai ti kha Judah mi Baibal lei mifim pawl nih an zumh. Judah Siangpahrang David bawi a ṭuan thawk in bawifung nih a langhtermi uknak le nawlngeihnak cu Judah phun ah a rak um. Asinain Jakob nih a chimchungmi cu hmanung bik Judah siangpahrang Zedekiah hnu in a chuak laimi zungzal siangpahrang kong a si. Anih cu siangpahrang a si ding taktak a si tiah Pathian nih Zedekiah sinah a chim. (Ezek. 21:26, 27) David hrinsor a simi, chimchungmi siangpahrang cu Jesuh a si. Jesuh chuah hlan ah vancungmi nih Mari sinah, “amah a hringsortu Siangpahrang David bawiṭhutdan kha Pathian nih amah cu a pek i Jakob tefa hna siangpahrang zungzal in a si lai, a pennak cu zeitikhmanh ah a dong lai lo” tiah a ti. (Luka 1:32, 33) Judah le David tefa a simi Jesuh cu a ngeitu taktak a si.—Matt. 1:1-3, 6; Luka 3:23, 31-34.

7. Messiah chuahnak kong chimchungbia cu zeitindah a tlin?

⁷ Messiah cu Bethlehem khua ah a chuak lai. “Bethlehem Efrath, nangmah cu Judah ram chungah a hme bik khua hna lakah naa tel ve nain, Nangmah chungin Israel uktu a chuak lai. Amah a hram cu kan hnuleipi caan, a luan cangmi caan chungah khan a um cangmi a si.” (Mik. 5:2) Messiah cu hlan ah Efrath tiah rak auhmi Judea ram, Bethlehem khua ah a chuak lai. Jesuh a cawmtu a pa Josef le a nu Mari cu Nazareth khua ah an um nain Rom uktu nih an chuahkehnak khua ah min khumh awk nawl a chuah caah Bethlehem ah an kal i B.C.E. 2 ah Jesuh cu cuka khua ah a chuak. (Matt. 2:1, 5, 6) Messiah chuahnak kong chimchungbia cu a tling taktak.

8, 9. Messiah chuahnak kong le mah hnu i a cang dingmi kong zeitindah chimchung a si?

⁸ Messiah cu ngaknu thiang nih a hrin lai. (Isaiah 7:14, rel.) Ngaknu thiang nih Messiah a hrin lai tiah Isaiah nih a chimchung. Jesuh hrin a si tikah Isaiah 7:14 bia a tling ti ṭial awkah Pathian thiang thlarau nih Matthai kha a fial. Thawngṭha cauk ṭialtu Matthai le Luka nih Mari cu ngaknu thiang a si i Pathian thiang thlarau thawng in fa a pawi tiah an ṭial.—Matt. 1:18-25; Luka 1:26-35.b

⁹ Messiah a chuah hnuah ngakchia thah an si lai. Hlanlio ah Izipt siangpahrang Faraoh nih Hebru ngakchia pa paohpaoh a rak thah hna i Nile Tiva ah a rak hlonh hna. (Ex. 1:22) Cu bantukin Messiah a chuah hnuah ngakchia thah an si lai kha Jeremiah 31:15, 16 nih a chimchung. Mah Baibal ah Rachel cu a fale “an ral hna ram” ah kalpi an si caah a ṭap tiah kan hmuh. A ṭah thawng cu Jerusalem chaklei Benjamin peng, Ramah khua tiang a thang. Herod nih Bethlehem le a pawngkam khua hna i ngakchia pa paohpaoh thah awk nawl a chuah tikah mah chimchungbia cu a tling tiah Matthai nih a ti. (Matthai 2:16-18 rel.) Cuka hrawng ummi an ngaih a chiat lai ning khi ruathmanh!

10. Hosea 11:1 chimchungbia cu Jesuh ah zeitindah a tlin?

¹⁰ Israel mi bantukin Messiah cu Izipt ram in chuah awkah auh a si lai. (Hos. 11:1) Herod nih nawlbia a chuah hlan ah vancungmi nih Josef, Mari le Jesuh kha Izipt ram i zaam awkah a fial hna. “Cuka ahcun Herod a thih tiang kha an um. Hi thil cu Bawipa nih profet [Hosea] kaa in, ‘Ka Fapa cu Izipt ram in chuah awkah ka auh,’ a timi bia tlinnak caah khan a si.” (Matt. 2:13-15) Jesuh nih a chuahnak le a ngakchiat lio kong chimchungbia tlin ding in amah tein a tuah khawhmi a si lo.

Messiah nih Rian Ṭuan Hram A Thawk

11. Messiah kha aho nih dah lam a sialpiak?

¹¹ Messiah caah lamsialtu pakhat a um lai. Mah lamsialtu cu “profet Elijah” a si lai tiah Malakhi nih a chimchung, amah nih mi kha Messiah a rat tik i cohlan awkah a bawmh hna lai. (Malakhi 4:5, 6 rel.) Jesuh nih profet “Elijah” cu Tipil petu Johan a si tiah a ti. (Matt. 11:12-14) Johan nih Messiah caah lam a sial, cucaah Isaiah chimchungbia cu a tling tiah Marka nih a ti. (Isa. 40:3; Mar. 1:1-4) Jesuh nih Johan kha ka lam ka sialpiak tiah a ti lo. Pathian nih Messiah aho a si mi nih hngal hna seh ti a duh caah Johan kha Elijah bantuk in rian a ṭuanter i lamsialtu rian a pekmi a si.

12. Pathian nih Messiah kha zei rian sung dah a pek?

¹² Pathian nih Messiah kha rian sung a pek lai. Jesuh cu a rak ṭhannak Nazareth khua pumhnak inn ah a kal i Isaiah cazual kha a samh. Hitin a rel: “Bawipa Thlarau cu ka cungah a um. Sifakmi hna sin i thawngṭha chim awkah chiti a ka thuh i Saltangmi hna sin i luatnak thanh awkah a ka thlah. Mitcaw mi hna sin i khuahmuh ṭhannak pek awk le hremmi hna luatter dingah khan a ka thlah, Bawipa nih a mi hna a khamh hna lai ding kum cu va thanh awkah a ka thlah!” Jesuh nih mah chimchungbia hi keimah kong a si tiah a ti. Messiah a si taktak caah Jesuh nih “Hika Cathiang cang hi, . . . nihin ni ah hin a tling cang” tiah a chim khawh.—Luka 4:16-21.

13. Galili ah Jesuh phung a chim lainak kong zeitindah chimchung a si?

¹³ Messiah cu Galili ah phung a chim lai tiah chimchung a si. Isaiah nih “Zebulun le Naftali” le “Galili ram” kong he aa tlai in hitin a chimchung: “Mui lak i a rak i chawkmi hna nih khan ceunak nganpi an hmuh cang! Thihnak thladem tangah an rak um, sihmanhsehlaw atu cu ceunak nih a ceuh cang hna.” (Isa. 9:1, 2) Jesuh nih phungchim rian kha Galili ram, Kapernuam khua in a thawk. Cun Zebulun le Naftali peng ah a ummi hna zong a cawnpiak hna i thlaraulei ceunak in ṭhathemnak an hmu. (Matt. 4:12-16) Jesuh nih Galili ah Tlangcung Cawnpiaknak a chim, lamkaltu a thim hna i hmasa bik khuaruahhar thil a tuah. Cun thihnak in a thawh hnu, zultu 500 ring lo sin a langh zong Galili ah a si men lai. (Matt. 5:1–7:27; 28:16-20; Mar. 3:13, 14; Johan 2:8-11; 1 Kor. 15:6) Jesuh nih “Zebulun le Naftali phun umnak ram” ah phung a chimnak thawng in Isaiah chimchungbia a tlinter. Cun Israel ram chung hmun dang zongah Pennak kong a chim.

Messiah Kong Chimchungbia Dang

14. Salm 78:2 bia cu zeitindah a tlin?

¹⁴ Messiah nih mi a cawnpiak hna tikah bianabia a hman lai. Salm caṭialtu Asaf cu hitin hla a sa: ‘Bia ka chim tikah tahchunhnak bia ka hman lai i hlanlio thil khuaruahhar kha ka chim lai.’ (Salm 78:2, Judson) Mah chimchungbia kha Jesuh nih a tlinter tiah Matthai nih a chim. Jesuh nih phungchimnak ah bianabia asiloah tahchunhnak a hman zungzal. Jesuh nih Pathian Pennak kong cawnpiaknak ca ah anṭam ci le thilnu bianabia a hmannak kong Matthai nih a ṭial hnuah “[Jesuh nih] tahchunhnak hmang loin an sinah zeihmanh a chim duh lo. Hiti in a chimh hna cu, profet nih a rak chimmi tlinternak caah khan a si. Profet nih a rak chimmi cu: ‘An sin i bia ka chim tikah tahchunhnak bia ka hman lai; Vawlei ser hramthawk in hngalh bal lomi thil cu ka chimh hna lai,’ ti hi a si” tiah a ṭial chap. (Matt. 13:31-35) Jesuh nih bianabia le tahchunhnak a hman caah a phungchimnak cu hmual a ngei.

15. Isaiah 53:4 chimchungbia cu zeitindah a tlin?

¹⁵ Messiah nih mi a damter hna lai. Isaiah nih hitin a chimchung: “Zawtnak a inmi cu kanmah nih kan rak in hngami kha a si i nganfahnak a tuarmi cu kanmah nih kan rak tuar hngami kha a si.” (Isa. 53:4) Jesuh nih Piter nupi a nu a damter hnuah midang zong a damter hna tiah Matthai nih a ṭial hnuah “hi a tuahmi hi, profet Isaiah nih, ‘Amah hrimhrim nih kan zawtnak kha a phorh i kan dam lonak kha a kalpi’ ti in a rak chimmi tlinternak caah khan a si” tiah a ṭial chap. (Matt. 8:14-17) Jesuh nih mizaw dang tampi zong a damter hna.

16. Isaiah 53:1 bia Jesuh ah a tlin kha lamkaltu Johan nih zeitindah a langhter?

¹⁶ Messiah nih thil ṭha tampi a tuah ko nain mi tampi nih an zum lai lo. (Isaiah 53:1 rel.) Mah chimchungbia a tlinnak kong kha lamkaltu Johan nih hitin a ṭial: “[Jesuh nih] hmelchunhnak tampi kha an mit hmuh hrimhrim ah a ser ko nain an zum lo, cucu profet Isaiah nih, ‘Kan chimmi bia cu aho nih dah an zumh? Aho sinah dah Bawipa nih a lianhngannak cu a langhter?’ tiah a rak chimmi kha a tlin nakhnga caah a si.” (Johan 12:37, 38) Lamkaltu Paul nih phung a chim lio zongah Jesuh cu Messiah a si ti a zummi an tlawmte.—Rom 10:16, 17.

17. Salm 69:4 chimchungbia cu zeitindah a tlin?

¹⁷ Messiah cu zei ruang lo ah mi nih an huat lai. (Salm 69:4) Lamkaltu Johan nih Jesuh chimmi kha hitin a ṭial: “Ahohmanh nih an tuah bal lomi ka tuahmi hi an lakah tuah loin rak um ning law cu an cungah sualnak a um hnga lo, asinain atu ning ahcun ka tuahmi kha an hmuh ko i keimah he ka Pa he an kan huat. Cucu a si awk a si ko, zeicahtiah cuticun pei an Phung chung i, ‘Zei ruang lo ah an ka huat,’ tiah aa ṭialmi kha a tlin khawh ding a si cu.” (Johan 15:24, 25) Hika i “Phung” timi cu mah lio chan ah a ummi Baibal ca dihlak a si. (Johan 10:34; 12:34) Jesuh cu mi tampi nih an huat, a hlei in Judah biaknak hruaitu pawl nih an huat ti kha Thawngṭha cauk ah ka hmuh. Cun Khrih nih hitin a chim: “Nannih cu vawlei nih hin an hua kho hna lo, sihmanhsehlaw kei cu a ka huat, zeicahtiah na umtu ningcang a ṭha lo tiah ka chimh lengmang caah a si.”—Johan 7:7.

18. A hnu capar ah zei kong dah kan i ruah lai?

¹⁸ Kumzabu pakhatnak Jesuh zultu pawl nih Jesuh cu Messiah a si hrimhrim tiah an zumh. Zeicahtiah Hebru Baibal i Messiah kong chimchungbia vialte Jesuh ah a tlin caah a si. (Matt. 16:16) Hi capar ah Jesuh a ngakchiat lio le phung a chim lioah a tlingmi chimchungbia cheukhat kan i ruah cang. Messiah kong chimchungbia a dang kha a hnu capar ah kan i ruah lai. Mah chimchungbia ṭha tein kan ruah ahcun Jesuh cu Jehovah thimmi Messiah a si ti kan zumhnak a fek chin lai.

[A Tanglei Fianternak]

Zeitindah Na Leh Lai?

• Jesuh chuahnak kong chimchungbia cheukhat cu zeidah an si?

• Messiah kha aho nih dah lam a sialpiak?

• Isaiah a ngan 53 chimchungbia hna cu Jesuh ah zeitindah a tlin?