Messiah Cu An Hmuh Cang!

“Messiah cu kan hmuh cang.”—JOHAN 1:41.

1. Andru nih “Messiah cu kan hmuh cang” tiah zeiruangah a ti?

TIPIL PETU JOHAN cu a zultu pahnih he an dir. Jesuh an pawng a phanh tikah Johan nih “Pathian Tuufa khi zohhmanh u” tiah a ti. Tipil petu Johan zultu a simi Andru le Johan nih Jesuh hnu an zulh colh i mah ni cu a sin ah an um. A hnu ah Andru nih a u Simon Piter kha a kawl i a hmuh tikah lungtho ngai in, “Messiah cu kan hmuh cang” tiah a ti. Cun Piter cu Jesuh sinah a ratpi.—Johan 1:35-41.

2. Messiah kong chimchungbia i ruahnak in zei ṭhatnak dah kan hmuh lai?

² Caan a hun liam tikah Andru, Piter le midang nih Cathiang kha ṭha tein hlathlai in Nazareth khuami Jesuh cu biakammi Messiah a si kha fiang tein an chim khawh lai. Atu ah Messiah kong chimchungbia tam deuh in kan i ruah lai. Mah nih Baibal le Jehovah thimmi Messiah kan zumh hnanak a fehter chin lai.

‘Zohhmanh, Na Siangpahrang cu a Ra Lio’

3. Jesuh siangpahrang in Jerusalem khua a luh tikah zei chimchungbia dah a tling?

³ Messiah cu siangpahrang in Jerusalem ah a lut lai. Zekhariah nih hitin a chimchung: “I lawm tuah, i lawm tuah, Zion fanu, fakpi in au tuah, Jerusalem fanu, zeicahtiah zohhmanh na siangpahrang cu na sinah a ra lio, Amah cu teitu a si, teinak cu amah ta a si, toidor tein laa cungah i cit in, laa fa note cungah i cit in a ra.” (Zek. 9:9) Salm caṭialtu nih hitin a ṭial: “BAWIPA min in a rami cu Pathian nih thluachuah a pek.” (Salm 118:26) Jesuh cu Jerusalem khua a luh tikah mibu nganpi cu lunglawmhnak he an au. Mah cu Jesuh nih a fialmi hna a si lo, chimchungbia tlinnak caah a si. A tanglei Baibal cang na rel tikah thil sining a hmu i lunglawm in mi an au thawng a theimi bantukin i ruat.—Matthai 21:4-9 rel.

4. Salm 118:22, 23 cu zeitindah a tlin?

⁴ Jesuh kha mi tampi nih Messiah in an cohlang lo nain Pathian nih cun a sunsak. Chimchungbia bang in zumhnak a ngeilomi nih Jesuh cu an huat i zei ah an rel lo. (Isa. 53:3; Mar. 9:12) Asinain Baibal nih hitin a chim: “Inn satu pawl nih santlailo ah an rel i an hlawtmi lung cu, santlai bik lung a rak si ziar ko! Cucu BAWIPA tuahmi a si.” (Salm 118:22, 23) Mah chimchungbia kha Jesuh nih biaknak hruaitu pawl sinah a rak chim. Piter nih mah bia cu Khrih cung ah a tling tiah a ti. (Mar. 12:10, 11; Lam. 4:8-11) Jesuh cu Khrihfabu i “a hram lung” a hung si taktak. A zum lomi hna nih Jesuh cu an hlawt nain Pathian caah “a sungmi” a si i ‘a thimmi’ zong a si.—1 Pit. 2:4-6.

Rawinak le Zaamtaknak

5, 6. Messiah rawi a si lainak kong zeitindah chimchung a si i zeitindah a tlin?

⁵ Messiah cu a hawi pakhat nih a rawi lai. David nih hitin a chimchung: “Ka hawiṭha bik, ka zumh bikmi, rawl a ka hrawng lengmangmi hmanh kha ka ral ah a cang.” (Salm 41:9) Baibal chan ah rawl a ei ṭimi pahnih cu hawikom in hmuh an si. (Gen. 31:54) Chimchungbia bang in Jesuh cu a hawi nih a rawi lai, a rawitu ding kong kha a zultu hna sinah hitin a chim: “Hi ka chimmi hi nan dihlak in kan ti duh hnanak a si lo; ka thimmi cu ka hngalh ko hna. Sihmanhsehlaw ‘Ka rawl a eimi kha ka ral ah a cang’ tiah cathiang nih a timi kha a tlin awk a herh.” (Johan 13:18) Jesuh nih a zultu le a hawi a simi Judas Iskariot kong a chimmi a si. Judas nih Jesuh a rawi tikah David chimchungbia cu a tling.

⁶ Messiah cu sal man he aa tlukmi ngun tangka sawm thum in zuar a si lai. Judas nih Jesuh kha ngun tangka 30 ah a zuar tiah Matthai nih a ti, mah cu Zekhariah 11:12, 13 chimchungbia tlinnak a si. Cu a si ah Matthai nih “profet Jeremiah nih a rak chimmi cu a hung tling” tiah zeicah a ti kun? Matthai chan ah, Zekhariah cauk aa telmi Baibal cauk fonhmi ah Jeremiah cauk cu a hramthawk bik ah an chiah caah a si men lai. (Luka 24:44 he tahchunh.) Judas nih tangka 30 kha a hmang lo. Hmunthiang chungah khan a hlonh, “cun a chuak i a vaa awk.”—Matt. 26:14-16; 27:3-10.

7. Zekhariah 13:7 cu zeitindah a tlin?

⁷ Messiah cu a zultu pawl nih an zaamtak lai. Zekhariah nih “Tuukhal kha tu law tuu cu i ṭhek hna seh” tiah a ṭial: (Zek. 13:7) C.E., 33, Nisan 14 ah Jesuh nih a zultu hna kha “Cathiang nih, ‘Pathian nih tuukhal kha a thah lai i tuurun chung tuu kha an i ṭhek dih lai,’ a ti caah, tuzan hrimhrim ah hin nan dihlak in nan ka zaamtak lai” tiah a ti hna. A chim bantuk in a si taktak, ‘a zultu dihlak nih an zaamtak’ tiah Matthai nih a ṭial.—Matt. 26:31, 56.

Sual Puhnak le Tuknak

8. Isaiah 53:8 cu zeitindah a tlin?

⁸ Messiah cu zung ah chuahpi in thah awk biakhiah a si lai. (Isaiah 53:8 rel.) Nisan 14, zinglei ah Sanhedrin upa dihlak cu an i pum, Jesuh kha an tlaih i Rom Mangki bawi Pontius Pilat kut ah an ap. Pilat nih Jesuh cu bia a ceih tikah a sualnak zeihmanh a hmu lo. Mibu kha Jesuh kan thlahpiak hna lai maw tiah a hal hna tikah annih nih “that ko,” lainawngpa Barabbas tu kan thlahpiak tiah an au. Cucaah Pilat nih mibu lungton a duh caah Barabbas kha a thlah. Jesuh cu fung in a tukter hna i tung ah thah awkah a pek hna.—Mar. 15:1-15.

9. Salm 35:11 nih a chimchung bang in Jesuh chan ah zeidah a cang?

⁹ Messiah a ralchanhmi a hmaanlomi tehte an um lai. David nih “[a hmaanlomi tehte] nih sual an ka phawt i ka hngalh hrimhrim lomi sualnak kha an ka puh” tiah a ti. (Salm 35:11) Mah chimchungbia cu a tling taktak, “tlangbawi upa pawl le biaceihtu pawl nih khan an thah khawh nakhnga, an dihlak in [a hmaanlomi tehte] an kawl.” (Matt. 26:59) “Tehte tampi nih Jesuh kong ah khan lih an chim len cio, sihmanhsehlaw an bia kha an i kheng kho lo.” (Mar. 14:56) Tehte pawl lih an chim, chim lo kha Jesuh a huatu hna nih zei ah an rel lo, an duhmi cu Jesuh thah lawng a si.

10. Isaiah 53:7 cu zeitindah a tlin?

¹⁰ Messiah cu sualpuhtu hna hmai ah dai tein a um lai. Isaiah nih hitin a chimchung: “Fakpi in an hrem, asinain dai tein aa in ko; bia kaa khat hmanh a chim lo. Thah awkah an kalpimi tuufa bantuk le a hmul meh awkah an hruaimi tuu bantukin, awn au lo tein a um.” (Isa. 53:7) ‘Tlangbawi upa le Judah upa hna nih sual an puh’ tikah Jesuh nih “zeihmanh a let hna lo.” Pilat nih “sual an in puhmi vialte hi na thei lo maw?” tiah a hal tikah “bia kaa khat hmanh a let duh lo i mangki bawipa cu a khuaruah a har ngaingai.” (Matt. 27:12-14) A ral pawl nih serhsatnak bia in an ti tikah serhsatnak bia in a let hna lo.—Rom 12:17-21; 1 Pit. 2:23.

11. Isaiah 50:6 le Mikah 5:1 cu zeitindah a tlin?

¹¹ Isaiah nih Messiah cu fakpi in an tuk lai tiah a chimchung. Hitin a ṭial: “A ka tumi kha ka keng ka chit ko hna, an ka serhsat tikah ka kham hna lo, ka khahmul an ka phawipiak i ka hmai i cil an ka chak ah khan zeihmanh ka ti hna lo.” (Isa. 50:6) Mikah nih hitin a chimchung: “Israel uktu cu a bel ah fung in an tuk lai.” (Mik. 5:1) Marka nih mah chimchungbia Jesuh cungah a tlin kha hitin a ṭial: “Mi cheukhat nih Jesuh cu cil an chak i a mit an huh i an bengh. ‘Ahodah an beng, kan chim fam tuah ngat,’ an ti. Cun ralvengtu pawl nih khan an kalpi i an bengh.” Ralkap pawl nih, “a lu ah cun fung in an tuk i an cil an chak i [capo saihnak ah] an khuk an i bil i a hmai ah cun an kun.” (Mar. 14:65; 15:19) A taktak ti ahcun cutin nihsawh awk in Jesuh nih zeihmanh a tuahmi a um lo.

A Thih Tiang Zumhfek tein a um

12. Salm 22:16 le Isaiah 53:12 cu zeitindah a tlin?

¹² Messiah cu tung cungah a thi lai. David nih hitin a ti: “Miṭhalo bu nih an ka kulh, . . . ka kut le ka ke ah an ka seh.” (Salm 22:16) Mah chimchungbia cu a tling taktak. Baibal a relmi nih an hngalhmi kong kha Marka nih hitin a ṭial: “Vailam i an khenh chih kha zinglei suimilam pakua ah a si.” Jesuh a kut le a ke cu tung ah an khenh taktak. (Mar. 15:25) A dang chimchungbia pakhat nih Messiah cu misual mi hna he thahṭi an si lai tiah a ti. “A nunnak kha i awṭawm lo tein pek a sian i misual mi kha an in ding cu a inpi hna” tiah Isaiah nih a ṭial. (Isa. 53:12) Chimchungbia bantukin “Jesuh sinah cun mifir pahnih an tah ve hna; pakhat a orhlei ah pakhat a kehlei ah.”—Matt. 27:38.

13. Salm 22:7, 8 cu zeitindah a tlin?

¹³ Messiah cu mi nih an nihsawh lai tiah David nih a chimchung. (Salm 22:7, 8 rel.) Jesuh cu hremnak tung cung thlai a si lioah mi nih an nihsawh kha Matthai nih hitin a ṭial: “Aa chawkmi paoh nih khan an lu an thinhnawh i an bia-eng in, ‘Biakinnpi hmanh pei ka ṭheh lai i nithum ah ka sak ṭhan dih lai, na rak ti kha. Pathian Fapa na si ahcun nangmah cu i khamh kun ngat. Vailam tahnak cung khan ta na rung ṭum kun,’ an ti.” Cu bantukin tlangbawi upa hna, phungbia cawnpiaktu saya hna le upa hna nih an cawhdeh ve i hitin an ti: “Midang cu a khamh ṭung hna, amah vial aa khamh kho ṭung lo. Israel Siangpahrang cu a si kun lo maw? Vailam tahnak cung khan atu te ah hin rung ṭum sehlaw cu kan zumh ko hnga. Pathian kha aa bochan i Pathian Fapa ka si a ti. Pathian nih a khamh le khamh lo kan zoh fam lai ta.” (Matt. 27:39-43) Jesuh cu cu bantuk nihsawhnak a tong nain dai tein a um. Kan caah zohchunhawk ṭha taktak a si.

14, 15. Messiah a hnipuan kong le mitsur hang thor pek a si lainak kong chimchungbia zeitindah a tlin?

¹⁴ Messiah a hnipuan caah camcawhfung an zuh lai. David nih “ka hnipuan kha an i phaw i ka puan caah khan voihfung an zuh” tiah a ṭial. (Salm 22:18) Mah chimchungbia cu a tling. Rom ralkap nih “[Jesuh cu] vailam ah cun an khenh chih i a thilpuan kha phe ah an i kah i an i ṭhen.”—Matt. 27:35; Johan 19:23, 24 rel.

¹⁵ Messiah cu a khami mitsur hang le ti thor an pek lai. “Ka rawl a ṭam tikah sivai tu an ka pek, ka ti a haal tikah ti thor an ka dinh” tiah salm caṭialtu nih a ti. (Salm 69:21) Ti thor timi cu mitsur hang thor a si. Mah bia a tlin kha Matthai bia ah kan hmuh: “[Jesuh cu] mitsur hang hnitkha he cawhmi kha an pek; a vun teh i a ding duh lo.” Cu hnuah “pakhatpa cu khulrang in a va tli i puanchia kha aa lak i mitsur hang [a thormi] ah a hnim i fung par ah a ṭemh i dawpter a hun zalh.”—Matt. 27:34, 48.

16. Salm 22:1 cu zeitindah a tlin?

¹⁶ Messiah cu Pathian nih a hlawtmi a lo lai. (Salm 22:1 rel.) Mah chimchungbia cu a tling. “Zanlei suimilam pathum ah Jesuh cu fakpi in a ai i, ‘Eloi, Eloi, lema sabakthani,’ tiah a ti, a sullam cu, ‘Ka Pathian, ka Pathian, zeicahdah na ka kaltak,’ ti a si.” (Mar. 15:34) Cuti a au cu vancung a Pa a zumhnak a tlau tinak a si maw? A si lo. Jesuh nih a ral kut in thih lo awkah Pathian nih a ka huhphenh lai lo ti a hngalh. Mah cu Jesuh caah Pathian cung zumhfek tein a um langhternak caanṭha a si. A aunak thawng in Salm 22:1 bia cu a tling.

17. Zekhariah 12:10 le Salm 34:20 cu zeitindah a tlin?

¹⁷ Messiah cu fei in chunh a si lai nain a ruh pakhat hmanh a kiak lai lo. Jerusalem khuami nih “an rak ka chunhmi keimah kha an ka zoh lai.” (Zek. 12:10) Salm 34:20 nih “BAWIPA nih him tein a zohkhenh i a ruh pakhat hmanh a kiak lo” tiah a ti. Mah chimchungbia tlinnak kha lamkaltu Johan nih hitin a ṭial: “Ralkap pakhat nih [Jesuh] a hnak kha fei in a hun chunh i thi le ti kha an chuak. Hi thil a hmutu [Johan] nih . . . a chimmi cu biatak a si i biatak ka chim tiah a hngalh. Cathiang nih, ‘A ruh pakhat hmanh khiah a si lai lo,’ tiah a rak timi tlinnak caah khan a si. Cun, ‘An chunhmi cu mi nih an zoh lai,’ tiah a chimtu Cathiang bia zong a um fawn.”—Johan 19:33-37.

18. Jesuh cu mirumpa thlan ah vui a si lai timi bia cu zeitindah a tlin?

¹⁸ Messiah cu mirumpa thlan ah vui a si lai. (Isaiah 53:5, 8, 9 rel.) Nisan 14 zanlei ah ‘Arimathea khua mirumpa Josef’ nih Pilat kha Jesuh ruak a hal i Pilat nih a pek. Matthai nih hitin a ṭial: “Josef nih cun a lak i khiangrang puan tharte in a tuam i amah thlan ca i lungkua ah a cawhmi thlan tharte ahcun a vui. Cun lung nganpi kha thlan khar ah cun a khar i a kal.”—Matt. 27:57-60.

Messiah Siangpahrang kha Thangṭhat

19. Salm 16:10 chimchungbia cu zeitindah a tlin?

¹⁹ Messiah cu a tho ṭhan lai. David nih “Mithi khua ah khan na ka kaltak lai lo” tiah a ṭial. (Salm 16:10) Nisan 16 ah nu cheukhat cu Jesuh thlan ah an kal. Thlan chung ah vancungmi a ṭhut an hmuh tikah an lau lai ning khi na mitthlam ah cuanter hmanh. Vancungmi nih nu pawl cu “nan thinphang hlah u. Vailam ah an tahmi Jesuh, Nazareth khuami kha nan kawl ti kha ka hngalh. Sihmanhsehlaw hika ah hin a um ti lo, a tho cang! An vuinak hmun hi zoh hmanh u” tiah a ti hna. (Mar. 16:6) C.E. 33, Pentekos ni ah Jerusalem i aa pummi mibu kha lamkaltu Piter nih hitin a ti hna: “David nih cun Pathian nih zeidah a tuah lai ti kha a rak hmuh i cucaah, ‘Amah cu mithi khua ah a kaltak lo, a titsa cu thutnak a hmu lo,’ tiah a rak ti tikah hin, Messiah a thawh ṭhan lainak kong kha a chimmi cu a si.” (Lam. 2:29-31) Pathian nih a Fapa dawt a titsa thutter cu a duh lai lo. Cucaah khuaruahhar thil a tuah i Jesuh cu thlarau pum in a thawhter.—1 Pit. 3:18.

20. Messiah uknak he aa tlai in zeitindah chimchung a si?

²⁰ Pathian nih Jesuh cu ka fapa a si tiah a thanh lai. (Salm 2:7; Matthai 3:17 rel.) Cun mibu zong nih Jesuh Jerusalem khua a luh lio ah amah le a Pennak caah an thangṭhat, kannih zong nih midang kha Jesuh le a Pennak kong lunglawm in kan chimh hna. (Mar. 11:7-10) A rauhhlan ah Jesuh nih ‘biatak, nemnak le dinnak’ in a ral vialte a hrawh dih hna lai. (Salm 2:8, 9; 45:1-6, Judson) A Pennak nih vawlei pumpi ah daihnak le rumnak a chuahter lai. (Salm 72:1, 3, 12, 16; Isa. 9:6, 7) Jehovah dawtmi Fapa, Jesuh Khrih cu van ah siangpahrang a ṭuan cang. Jehovah Tehte in mah biatak kong mi sin chimnak nawl kan hmuh cu tinvo sung a si.

Zeitindah Na Leh Lai?

• Jesuh cu zeitindah rawi le zaamtak a si?

• Jesuh a thihnak kong chimchungbia cheukhat cu zeidah an si?

• Jesuh cu chimchungmi Messiah a si tiah zeicah na zumh?

[Cahmai 13nak i hmanthlak]

Jesuh cu siangpahrang in Jerusalem ah a luhmi nih zei chimchungbia dah a tlinter?

[Cahmai 15nak i hmanthlak]

Jesuh cu kan sualnak caah a thi nain atu cu Messiah Siangpahrang a si cang