Zumhfek Tein Kal Hna U Sih!

‘Kei cu zumhfek tein ka kal lai.’—SALM 26:11, NW.

1, 2. Job nih a zumhfehnak kong zeitindah a chim, Job kong kha Job a ngan 31 nih zeitindah a chim?

TUCHAN bantuk in hlan lioah thilri pawl kha cuai in an thlai tawn. Cuai kheng khatlei ah thilri an chiah i a dang khatlei ah cuai lung an chiah. Pathian mi hna nih cun cuai deu hman awk a si lo.—Ptb. 11:1.

² Pathian a ṭihmi Job nih Satan ruang i harnak a ton lioah hitin a chim: “Pathian nih dinnak cuai thlainak ah cun ka thlai sehlaw ka [“zumhfehnak,” NW] kha a hngalh ko lai.” (Job 31:6) Mah he aa tlai in Job nih zumhfek tein a ummi hna ton khawhmi hneksaknak kha a langhter. Asinain Job a ngan 31 ah aa ṭial bantuk in Job nih hneksaknak kha a tei khawh. Job zohchunhawk ṭha nih a nawl i cawn awk a kan forh i salm caṭialtupa David bantuk in ‘kei cu zumhfek tein ka kal lai’ tiah a kan chimter khawh ve lai.—Salm 26:11, NW.

3. Thil hmete le thil ngan ah Pathian cung zumhawktlakmi si zeicah a biapit?

³ Job cu a fakmi hneksaknak a tong nain Pathian cungah zumhawktlak in a um peng. Zumhfek tein a um caah mi cheukhat nih zohchunhawk ṭha taktak a si tiah an ti. Job tonmi harnak bantuk te cu kan tong men lai lo. Asinain zumhfek tein kan um le Jehovah cungnung bik a sinak kan ṭanh langhter awkah thil hmete le thil ngan ah zumhawktlakmi kan si a hau.—Luka 16:10 rel.

Ziazalei Thian A Biapi

4, 5. Zumhfekmi Job nih zeidah a hrial?

⁴ Jehovah cung zumhfek tein um awkah Job bantuk in ziazalei ah Pathian phunglam kan i tlaih zungzal a hau. “Ka mit kha, ngaknu na ngia hrimhrim lai lo, tiah ka ti. . . . Cun nu dang nih ka lungthin kha a ka lak i ka innpa innka in ka hngah ko a si ahcun, ka nupi cu midang sal ah cang sehlaw midang nih ihpi ko hna seh.”— Job 31:1, 9, 10.

⁵ Job nih Pathian cung zumhfek tein um zungzal awk bia a khiah caah ngaknu kha sual duhpinak tiang in saupi zoh kha a hrial. Nupi a ngei cangmi Job nih ngaknu pakhat cungah duhhle hlennak a tuah lo i mi nupi zong duh phunphai in a um lo. Jesuh nih Tlangcung Cawnpiaknak ah zumhfekmi hna nih an i cinken awk a simi nu le pa sualnak he aa tlaimi kha fiang tein a chim.—Matthai 5:27, 28 rel.

Lihchim In Rian Ṭuan Hlah

6, 7. (a) Pathian nih Job bantuk in kan zumhfehnak thlai awkah zeidah a hman? (b) Zeicah lihchim le hlen kan hman awk a si lo?

⁶ Mi nih zumhfekmi in kan hmu hna seh ti kan duh ahcun lihchim in rian ṭuan awk a si lo. (Salm 5:6 rel.) Job nih hitin a chim: “Lih in rian ṭuannak ah kaa tel lo i hlennak lam kha ka zul lo, tiah chiat ka ser. Pathian nih dinnak cuai thlainak ah cun ka thlai sehlaw ka [“zumhfehnak,” NW] kha a hngalh ko lai.” (Job 31:5, 6) Jehovah nih mi vialte kha “dinnak cuai” ah a thlai hna. Pathian nih Job bantuk in zumhfekmi kan si le si lo hngalh awkah a dingmi a phunglam in a kan thlai.

⁷ Lihchim le mihlen a hmangmi kan si ahcun Pathian cungah zumhfekmi kan si kho lai lo. Zumhfekmi nih cun “a thli tein tuahmi thil vialte” kha a hlawt i ‘ahohmanh a hleng’ hna lo. (2 Kor. 4:1, 2) Asinain unau kha kan hlen hna i unau nih Pathian sin ah bawmhnak an hal ah tah zeitin? Mah cu kan caah a ṭha lo ngai. Salm caṭialtu nih hitin hla a sak: “Harnak chung ka um tikah BAWIPA cu ka auh i a ka leh. Maw BAWIPA, lihchim hmangmi hna le hlen hmangmi hna sin hin ka khamh ko.” (Salm 120:1, 2) Pathian nih ‘minung lungthin le duhnak vialte a hngalh’ dih caah zumhfekmi kan si le si lo a hngalh kha kan i cinken awk a si.—Salm 7:8, 9. 

Midang Pehtlaihnak ah Zohchunhawkṭha si

8. Job nih zeitindah mi a pehtlaih hna?

⁸ Zumhfekmi si awkah miding, toidormi le mi zawn a ruatmi Job bantuk kan si a herh. Hitin a chim: “Ka salpa siseh, ka salnu siseh, ka cung i an phunzai tikah an bia ka lakpiak hna lo ahcun, Pathian a langh tikah zeidah ka tuah kun lai? Biahalnak a ser tikah zei in dah ka leh lai? Paw chung i a ka sertu nih cun anmah cu a ser ve hna lo maw? Pathian pakhat nih paw chungah a kan ser cio a si lo maw?”—Job 31:13-15.

9. Job nih a salle a pehtlaih hna tikah zei ziaza dah a langhter, kannih zong zeidah kan langhter awk a si?

⁹ Job chan ahcun bia an ceih tikah fawi tein an ceih khawh. Biaceihnak kha ningcang tein an tuah i biaceihnak zung nih sal pawl zong kha an bia an ceihpiak hna. Job nih a salle kha ding tein le zaangfahnak he a pehtlaih hna. Zumhfekmi si kan duh ahcun cu bantuk ziaza kan langhter awk a si, a hlei in Khrihfa upa nih langhter a herh.

Siang Law Na Hakkau Hlah

10, 11. (a) Job cu a siangmi le bawmh a hmangmi a si zeitindah kan hngalh khawh? (b) Job 31:16-25 nih zei Baibal cang hna dah a kan hngalhter ṭhan?

¹⁰ Job cu a siang i mi bawmh a hmang, amah zawnlawng aa ruat lo i a hak a kau lo. Hitin a chim: “Nuhmei mit kha ka zetter i, ngakṭah kha pek ve loin keimah lawng nih ka rawl kha ka ei i, . . . puan ngeih lo ruangah a thimi ka hmuh i cu pa cu ka tuhmul in lumnak a hmuh lo . . . ahcun, zung ah mi nih an ka bawmh sawk lai ti in ngakṭah cungah ka kut ka hler ahcun, ka liang hi a hram in tlong sehlaw, ka baan cu a hliahhlok in i phawi seh.” Cun Job nih sui kha “ka hnangamnak” na si a ti ahcun zumhfekmi a si lai lo.—Job 31:16-25.

¹¹ Biazai a lomi mah bia hna nih zultu Jeim bia hi a kan theihter ṭhan: “Nuhmei ngakṭah ṭha tein zohkhenh le vawlei cungah thurhnawm lo tein um tu hi Pathian kan Pa nih biaknak thiang le biaknak taktak i a ruahmi cu a si.” (Jeim 1:27) Jesuh ralrin peknak bia zong hi kan lung ah a chuak men lai: “Ralring tein um u, hakkauhnak kha i veng u; zeicahtiah mi a nunnak taktak cu, zeitluk hmanh in rum seh law, a thilri hi a si lo.” Cu hnu ah Jesuh nih a hak a kaumi mirumpa kong bianabia a chimh hna, mah pa cu “Pathian hmuhnak i a rum” lomi in a thi. (Luka 12:15-21) Zumhfekmi si awkah hakkauhnak le duhfahnak kan ngeih awk a si lo. A hak a kaumi cu a duh tukmi thil nih Jehovah sin in lam a pialter khawh caah hakkauhnak cu siasal biak a si. (Kol. 3:5) Zumhfehnak le hakkauhnak cu ti le chiti bantuk in cawh khawh an si lo.

A Hmaanmi Biaknak Pialtak Hlah

12, 13. Job nih siasal biaknak hrialnak ah zeitindah zohchunhawkṭha a chiah?

¹² Zumhfekmi cu a hmaanmi biaknak in a pial lo. Job zong a pial lo i hitin a chim: “Ni cu a tlan tikah ka zoh i thlapa cu a sunparnak in a kal tikah ka zoh i, ka lung cu a ping ah kalpi a si i anmah upatnak in ka kut ka hler hna ahcun, hi hna hi, biaceihtu hna nih dan an tat awk ṭhatlonak an si ko hnga, zeicahtiah cunglei Pathian sinah zumh awk talk loin ka rak um a si hnga.”—Job 31:26-28.

¹³ Job nih nunnak a ngeilomi thil a bia lo. Thlapa tibantuk van ah a ummi thil kha a lungthli in a hun tlaihchan le upatnak caah ‘a kut a hler’ ahcun Pathian a pialtak i siasal a biami a hung si lai. (Deut. 4:15, 19) Pathian cung zumhfek tein um kan duh ahcun siasal biaknak phun vialte kan hrial a herh.—1 Johan 5:21 rel.

Lungthli Uamnak asiloah Titernak kha Hrial

14. Job cu mi cungah ṭhatlonak a tuah lo tiah zeicah kan chim khawh?

¹⁴ Job cu mi cung ah ṭhatlonak a tuahmi le a puarhrangmi a si lo. Cu bantuk ziaza a ngeimi cu zumhfekmi an si lo ti a hngalh i hitin a chim: “A nunnak kha chiatserh awkah ka lei cu sualnak zeihmanh ka tuah-​ter lo nain, a ka huatu rawhralnak ah kaa lawm i ṭhatlonak nih a phak tikah ka tha a nuam bal maw?”—Job 31:29, 30.

15. A kan huatu hna harnak an ton tikah i lawmh cu zeicah a ṭhatlo?

¹⁵ Miding Job cu a huatu hna harnak an ton tikah aa lawm bal lo. Phungthlukbia nih hitin ralrin a kan pek: “Na ral kha a tluk tikah i lawm hlah, a rilh tikah na di riam hlah, cu bantukin na um ahcun BAWIPA nih a hngalh lai i na cungah a lung aa lawm lai lo i amah kha dantatnak in a luatter sual lai.” (Ptb. 24:17, 18) Jehovah nih lungthin a hmuh khawh caah mi harnak an ton tik a thli tein kan i lawmhmi a hngalh i mah bantuk lungput ngeih a duh lai lo ti cu a fiang. (Ptb. 17:5) Pathian nih “phuhlamnak le teirul chamnak cu keimah ta an si” a ti caah kan tonmi kha ṭhatein a kan tonghtham piak khawh.—Deut. 32:35.

16. Mirum kan si lo hmanh ah zeitindah khual dawtnak langhter khawh a si?

¹⁶ Job cu khual a dawmi a si. (Job 31:31, 32) Mirum kan si lo hmanh ah “khual kha tluninn onh” hna u sih asiloah daw hna u sih. (Rom 12:13) “Dawtnak aa telnak zanriah cu an hringso he lawng hmanh siseh law, a thaumi caw sa in tuahmi zanriah, huatnak aa telmi nakin a ṭha deuh” timi bia i cinken in mi kha meh sawhsawh te he dangh khawh a si ko. (Ptb. 15:17) Rawl sawhsawh te a si hmanh ah Khrihfa unau hna he dawtnak in eiṭi cu a nuam i thazang petu a si.

17. Sualnak ngan zeicah thuh i zuam awk a si lo?

¹⁷ Job cu titer a hmanlo caah a khual pawl cu an i nuam ko lai. Job cu kumzabu pakhatnak Khrihfabu chung ah a lutmi, ‘anmah duhning paoh in thil a kal khawh nakhnga midang a fakmi,’ Pathian a ṭihlomi hna bantuk a si lo. (Judas 3, 4, 16) Mi nih an ka nautat lai ti phan in Job nih a sualnak kha a thup lo asiloah ‘amah theih awk lawng ah a chiami’ a si lo. Pathian hneksaknak kha a duh i a sualnak kha a phuan. (Job 31:33-37) Sualnak ngan kan tuah sual ahcun kan min a chia lai ti ṭih in thuh i zuam hlah u sih. Zumhfek tein um kan i zuam kha zeitindah langhter khawh a si? Ka sual ti cohlan in i ngaihchih, thlarau lei bawmhnak hmuh i zuam le a herhmi thlennak tuahnak thawng in a si.—Ptb. 28:13; Jeim 5:13-15.

Zumhfekmi nih Hneksak an Duh

18, 19. (a) Job nih ahohmanh a hleng hna lo tiah zeicah kan chim khawh? (b) Job nih a palh a si ahcun zeidah in a duh?

¹⁸ Job cu miding le mifel a si. Cuca’h hitin a chim khawh: “Ka vawlei nih khan keimah cu a ka chalh i a lei rinkuar hna nih khan an ṭahpi i, man pek lo in a chung chuakmi thil kha ka ei hna i tangka a ka coihtu kha lungsi loin ka tuah hna ahcun, changvut can ah hling kho hna sehlaw barli can ah belh kho ko hna seh.” (Job 31:38-40) Job nih midang vawlei kha a chut bal hna lo i a rian a ṭuanmi hna kha a hleng bal hna lo. Job bantuk in kannih zong thil hme le thil ngan ah Jehovah cung zumhfek tein um a herh.

¹⁹ Job nih a hawile pathum le Elihu hmai ah a nunning kong a rak chim. A ‘minthut’ aa telmi a nunning kong ṭialmi ca a palh tiah a chim khomi paoh chim awkah a sawm hna. A palhnak an chim khawh ahcun dantatnak kha lungtho tein in a duh. Cucaah a sining kong kha Pathian sinah a phuan i Pathian biaceihnak kha a hngak. Cuticun ‘Job bia cu a dong.’—Job 31:35, 40, Judson.

Zumhfek tein Na Um Kho

20, 21. (a) Job cu zeicah zumhfek tein a um khawh? (b) Pathian kan dawtnak zeitindah kan hmunhter khawh?

²⁰ Job zumhfek tein a um khawhnak cu Pathian kha a dawt i Jehovah nih a dawt ve i a bawmh caah a si. Hitin a chim: “Nangmah nih nunnak le a fekmi dawtnak [dawt-zaangfahnak] na ka pek i na zohkhenhnak nih ka thlarau kha a nunter.” (Job 10:12) Mi cungah dawtnak a ngei lomi cu Lian Ngan Bik ṭihnak a hlawmi an si a hngalh caah Job nih mi kha a dawt hna. (Job 6:14) Zumhfek tein a ummi nih Pathian le innpa kha an dawt hna.—Matt. 22:37-40.

²¹ Baibal nifate kan rel le kan relmi ṭha tein ruah ṭhannak thawngin Pathian kan dawtnak kan hmunhter khawh. Lungtak in thlacamnak in Jehovah kan thangṭhat khawh i a ṭhatnak caah kan i lawmh kan langhter khawh. (Fil. 4:6, 7) Jehovah kha hla in kan thangṭhat khawh i a miphun he i komh lengmangnak in ṭhatnak kan hmu kho. (Heb. 10:23-25) Cun phungchim ah kan kal i “khamhnak thawngṭha” kan thanhnak in Pathian kan dawtnak a ngan kho. (Salm 96:1-3) Cuticun hitin hla a sami salm caṭialtupa bantuk in zumhfek tein kan um kho lai: “Pathian pawng um cu a va nuam hring-​hran dah! BAWIPA chungah khan himnak ka hmuh.”—Salm 73:28.

22, 23. Jehovah, cungnung bik a si a ṭanhmi in kan rian le hmasa zumhfek tein a ummi hna rian cu zeitindah aa lawh?

²² Kum tampi chung ah Jehovah nih zumhfekmi hna kha rian phunphun a pek hna. Noah cu lawng satu le “dinnak kong a chimtu” a si. (2 Pit. 2:5) Joshua nih Israel mi kha Biakammi Ram ah a hruai hna. Asinain a hlawhtlinnak cu “phungbia cauk . . . chun zan in” a rel i mah ning in a tuah caah a si. (Josh. 1:7, 8) Kumzabu pakhatnak Khrihfa hna cu zultu siternak ah an i tel i Baibal hlathlai awkah an i pum lengmang.—Matt. 28:19, 20.

²³ Dinnak kong kan chim, zultu siternak rian kan ṭuan, Baibal cawnpiakmi kan zulh i pumhnak le civui hna ah zumtu khat hna he kan i pumh ṭinak thawngin Jehovah, cungnung bik a sinak kan ṭanh le zumhfekmi kan si kan langhter. Mah kan tuahnak nih ralṭhat awk, thlaraulei ṭhawn awk le Pathian duhnak tuahnak ah hlawhtlin awk a kan bawmh. Mah rian ṭuan cu kan caah a har tuk lo. Zeicahtiah vancung kan Pa le a Fapa nih an kan bawmh caah a si. (Deut. 30:11-14; 1 Si. 8:57) Cu leng ah, zumhfek tein a ummi le Jehovah kha Cungnung Bik Bawipa in a upatmi “unau” zong nih a kan bawmh.—1 Pit. 2:17.

Zeitindah Na Leh Lai?

• Jehovah i ziazalei phunglam kha zeitindah kan hmuh awk a si?

• Job a ziaza ah zeikhadah na duh bik?

• Job zumhfehnak kha Job 31:29-37 nih zeitindah a langhter?

• Zeicah Pathian cung ah zumhfek tein kan um khawh?

[Cahmai 29 Hmanthlak]

Job cu Jehovah cung ah zumhfek tein a um.

Kannih zong kan um kho ve.

[Cahmai 32 Hmanthlak]

Zumhfek tein kan um kho.