Nupi, Va A Ngeimi Le A Ngeilomi Hna Ca Fimchimhnak

‘Hi ti bia ka chim hi . . . a hmaanmi le a ṭhami kha tuah u law Bawipa rian ah hin nan lungthin a dih-umnak tein i pe u ti kaan duh hna caah a si.’—1 KOR. 7:35.

1, 2. Nupi, va a ngeimi zong a ngeilomi zong zeicahdah Baibal lamhruainak kawl awk a si?

NUNGAK le tlangval asiloah nuleva pehtlaihnak ah nuamhnak, lungrawhnak le lungretheihnak a um tawn. Cu bantuk caan ah a ṭhami thil tuah khawh awkah Pathian sinah lamhruainak hal a hau. Pathian lamhruainak kan herhnak a ruang dang zong a um rih. Nungak, tlangval in um rih a duhmi unau pakhat cu a chungkhar le a hawile nih nupi, va ngeih an hnek men lai. Cheukhat cu nupi, va ngeih an duh nain an caah a ṭhami an hmu rih men lai lo. Ṭhitum aa timmi hna zong nih nupi rian, vale rian timhlamhnak caah lamhruainak an herh. Nungak, tlangval zong nutung patung zong nulepa sualnak tuah awkah hneksaknak an tong.

² Cu bantuk thil sining hna nih kan i nuamhnak le Jehovah he kan i pehtlaihnak a hnorsuan khawh. Lamkaltu Paul nih 1 Korin a ngan 7 ah nupi, va a ngeimi le a ngeilomi caah fimchimhnak a ṭial. Aa tinhmi cu a ca a relmi hna kha a hmaanmi thil tuah awk le Bawipa rian ah lungthin dih-umnak in i pek awk forh kha a si. (1 Kor. 7:35) Paul fimchimhnak kan i ruah tikah nupi, va a ngeimi na si zongah a ngeilomi na si zongah Jehovah rian zeitindah tam deuh in ka ṭuan khawh lai ti hngalh i zuam.

Mah Te’n Tuah Dingmi Biakhiahnak

3, 4. (a) Hawikom le chungkhar nih nupi, va ngeih ding hnek tikah zei thil dah a chuak kho? (b) Paul nih zei bantuk ruahnak ngeih awk dah a kan bawmh?

³ Kumzabu pakhatnak Judah mi hna bantukin tuchan zongah mi tampi nih nupi, va ngeih kha biapi tuk ah an chiah. Nupi, va ngeih ding ah a kum a luan cang tiah an ruahmi hna kha an hawikom le an rualchan nih innchung hawi na kawl ding a si cang tiah an forh hna. Na caah amah khi a ṭha ti zong in an ti hna i, i ton awk khua an khanpiak hna. Mah tuahsernak nih a caan ah pehtlaihnak a rawhter khawh i ningzahnak le lungfahnak a chuahter khawh.

⁴ Paul nih mi kha nupi, va ngei u asiloah ngei hlah u tiah a forh bal hna lo. (1 Kor. 7:7) Anih cu nupi ngeih loin Jehovah rian ṭuan a duhmi a si nain nupi, va ngeih a duhmi kha a mawhchiat hna lo. Tuchan zong ah nupi, va ngeih lai le ngeih lai lo cu mahte in biakhiah khawh a si. Ahohmanh nih cutin um, khatin um tiah hnek awk a si lo.

Nupi, va Ngeih Loin Hlawhtlinnak

5, 6. Paul nih nupi, va ngeihlo in um a ṭhatnak kha zeicah a chim?

⁵ Paul nih Korin khuami sinah nupi, va ngeih lo in um a ṭhatnak kha a ṭial. (1 Korin 7:8 rel.) Nupi a ngei lomi Khrihfaram biaknaklei hruaitu cheukhat nih nupi a ngeimi hna nakin kan ṭha deuh tiah an i ruat. Paul cu nupi a ngei lomi a si ve nain cutin aa ruat lo. Pathian rian ṭuannak ah nupi, va a ngei lomi hna hmuhmi tinvo tu cu a chim. Mah cu zeidah a si?

⁶ Jehovah rian ṭuannak ah nupi, va a ngeilomi nih a ngeimi hna ṭuan khawh lomi kha an ṭuan khawh. Paul cu “Jentail mi sin lamkaltu” si awkah thlah a si. (Rom 11:13) Lamkaltu a ngan 13 in 20 ah a hmuhtonnak kong kan hmuh. Paul le missionary a ṭuan hawi pawl cu phungchim awkah hmun thar ah an kal i Khrihfabu thar tampi an dirh khawh. Paul nih phungchimnak ah tuchan mi tam deuh ton lomi harnak a ton. (2 Kor. 11:23-27, 32, 33) Asinain midang zultu siternak rian ah aa nuamh caah harnak kha a in khawh. (1 Thes. 1:2-7, 9; 2:19) Paul cu nupi le fa hei ngei sehlaw cu thil vialte cu a tuah kho theng hnga lo.

7. Va a ngeilomi unaunu pahnih nih an caan kha phungchimnak ah zeitindah an hman?

⁷ Nupi, va a ngeilomi Khrihfa hna nih an caan kha phungchimnak caah tam deuh in an hman. Bolivia ah a ummi Sara le Limbania cu va a ngei lomi hmaikal an si. Annih cu kum tampi chung unau pawl an phanhlonak khuate ah an i ṭhial. Cuka ah elektrik mei a um lo. Hitin an chim: “TV le radio a um lo caah khuami cu ca lawng an rel.” Khuami cheukhat nih atu tiang an relmi, Jehovah Tehte pawl chuahmi cauk hlun pawl kha an hmuhsak hna. Mah cauk cu chuah a si lonak a sau cang. Thawngṭha kha innkip ti awk tlak nih ngaih an duh caah sang khat liim awkah saupi an rau. Nu pakhat nih hitin a ti hna: “Jehovah Tehte pawl kan sin nan phanh caah caan hi a dong deng taktak cang ko lai.” A rauh hlan ah, khuami cheukhat cu an i pum ve.

8, 9. (a) Paul nih nupi, va ngeih loin Jehovah rian ṭuan a ṭhatnak kha zeicah a chim? (b) Nupi, va a ngeilomi nih zei ṭhatnak dah an hmuh?

⁸ Nupi, va a ngeimi zong nih hmun har ah phung an chim tikah thei an tlai ve ti cu a hmaan ko. Asinain nupi, va a ngeilomi nih an ṭuan khawhmi cheukhat cu nupi, va a ngeimi le fa a ngeimi caah cun ṭuan a har men lai. Paul nih Khrihfabu sin cakuat a ṭial lioah thawngṭha chim awk tampi a um kha a hngalh. Amah bantukin phungchimnak in nuamhnak hmu ve hna seh ti a duh. Cucaah nupi, va ngeih lo in Jehovah rian ṭuan a ṭhatnak kha a chimmi a si.

⁹ U.S. ah a ummi va a ngeilomi hmaikal pakhat nih hitin a ṭial: “Mi cheukhat nih nupi, va ngeih lo ahcun nuamhnak hmuh khawh a si lo tiah an ruah. Asinain Jehovah he pehtlaihnak ṭha ngeih lawngah nuamhnak taktak hmuh khawh a si kha ka hngalh. Nupi, va ngeih lo cu a har caan a um ko nain hman thiam ahcun laksawng sung a si.” Nupi, va ngeih loin um zong ah i nuamh khawh a si ko. “Jehovah nih nupi, va a ngeimi he a ngeilomi he ahopaoh a dawt ko hna ti ka hngalh” tiah a chimchap. Atu ah, unaunu cu phungchim a herh deuhnak hmun ah thanuam tein a ṭuan. Nangtah nupi, va a ngeilomi na si ahcun, phungchimnak ah tam deuh in naa tel kho lai maw? Naa tel ahcun na sining cu Jehovah pekmi laksawng sung a si kha na hmuh ko lai.

Nupi, va Ngeih a Duhmi Hna

10, 11. Nupi, va ngeih a duh nain a caah a ṭhami a hmu rih lomi kha Jehovah nih zeitindah a bawmh?

¹⁰ Jehovah salle tampi cu zeimaw caan tiang nupi, va ngeih loin an um hnu ah innchung hawi kawl an i tim. Cutikah Jehovah sinah ka caah a ṭhami ka hmuh khawh nakhnga ka bawm tiah thla an cam.—1 Korin 7:36 rel.

¹¹ Lungthin dihlak in Jehovah a biami kha ṭhitvat na duh ahcun Pathian sinah mah kong kha thla cam lengmang. (Fil. 4:6, 7) Na thlacam a tlin colh lo hmanh ah, na lungdong hlah. Na herhmi a hngaltu Jehovah naa bochan ahcun na sining tawnghtham khawh awk aan bawmh lai.—Heb. 13:6.

12. Pakhatkhat nih an in duh ahcun zeidah ṭha tein na ruah awk a si?

¹² Nupi, va ngeih a duhmi unau pakhat kha thlaraulei a ṭhawnglomi asiloah zumlotu nih a duh men lai. Cu thil na ton ve ahcun, innchung hawi thim i palh ruangah a chuak khomi lungfahnak cu nupi, va ngeih hlan intuarmi nakin a fah deuh lai kha philhhlah. Innchung hawi naa thimmi cu a ṭhat zong, a chiat zongah nunchung umṭi ding a si zong philhhlah. (1 Kor. 7:27) A hnu ah hi bantuk caanṭha hi ka hmu kho ti lai lo ti ruat in nupi, va ngeih kha i hnawhnam hlah. A hnu ah naa ngaichih sual lai.—1 Korin 7:39 rel.

Nupi, va Ngeihnak ca Timhtuahnak

13-15. I ṭhitum hlan ah zei kong hna dah i ruahceih awk a si?

¹³ Paul nih nupi, va ngeih loin Jehovah rian ṭuan kha a ṭha a ti nain nupi, va ngeih aa timmi kha a zohchuk hlei hna lo. An i um hnu ah zei thil an ton lai le an innchungkhar a feh nakhnga zeidah tuah a herh ti tu hngalh awk a bawmh hna.

¹⁴ Aa ummi hna nih an rak i ruahchanmi ningin thil a si dih lai lo kha an hngalh a hau. An rak i duh lio ah, kanmah bantukin aa duhmi an um lai lo tiah an rak ruah men lai. An i umka zongah cu bantuk ruahnak an ngei i kan i nuam zungzal lai tiah an ruah. Asinain a taktak ahcun cutin a si lo. Duhnak nih chikkhat cu a nuamhter ko hna, asinain nuva kip tonmi buaibainak tawnghtham khawh awkah duhnak lawng in a za lo.—1 Korin 7:28 rel.a

¹⁵ Cheukhat nuleva cu a biapimi kongah an lung aa khah lo tikah an khuaruah a har i an lung a rawk. Tahchunhnak ah, tangka hmannak le nuamhnak i thimnak, um an duhnak le chungkhar voi zeizat len ding timi kongah an lung aa khat men lai lo. Pakhat chambaunak nih pakhat a thin a hunter khawh. An i duh lio ahcun cu bantuk kong cu biapi ah an ruat lo nain an i um tikah mah thil ruangah buainak a chuak kho. Cucaah i ṭhitum hlan ah mah kong kha ṭha tein i ruahceih awk a si.

16. Chungkhar buainak kha nuva nih zeicah an tawnghthamṭi awk a si?

¹⁶ A nuammi chungkhar si awkah buainak kha hmunkhat ah tawnghthamṭi a hau. Fale cawnpiaknak le an nu le an pa zohkhenhnak kong ah an lung aa khah a hau. Chungkhar tonmi buainak ruangah i chawnh duh loin an um awk a si lo. Baibal chimmi an zulh ahcun buainak tampi an tawnghtham khawh lai, an tawnghtham khawh lomi kha an inkhawh lai i nuam tein khua an sa kho lai.—1 Kor. 7:10, 11.

17. Nupi, va a ngeimi hna cu zeicah ‘vawleicung thilri ah an lung a um’?

¹⁷ 1 Korin 7:32-34 (rel) ah Paul nih nuva kong kha a chimchap. Nuva hna cu ei awk, thilpuan, umnak le a dangdang ti bantuk ‘vawleicung thilri ah an lung a um.’ Zeicah cutin an um? Unaupa pakhat cu a tlanval lio ahcun phungchimnak ah caan tampi aa tel kho men lai. Nupi a ngeih hnu cun a caan le a thazaang cheukhat kha a nupi zohkhenhnak caah hman a hau cang. Nu ca zongah cutin a si ve. Nupi, va a ngeimi nih an nungak, an tlanval lio bantukin ka rian an ṭuan kho ti lai lo ti kha Jehovah nih a hngalh. A nuammi chungkhar si awkah an caan le thazaang cheukhat kha an nupi, an vale caah hman a hau cang.

18. Nuva hna nih nuamhnak ca an rak hmanmi caan he aa tlaiin zei thlennak dah tuah a herh?

¹⁸ Nuva hna nih Jehovah rian ṭuannak ca i an rak hmanmi caan cheukhat kha an innchungkhar fehternak caah an hman a si ahcun nuamhnak ca i an rak hmanmi caan cheukhat zong chungkhar ca hman awk a si hnga lo maw? A va cu a hawile he lentecelhnak ah caan tampi a hman ṭhiam ahcun a nupi zeitindah a um lai? Asiloah a nupi zong cutin um ve sehlaw a va zeitindah a um lai? An pahnih in an i nuam lai lo, an um a har lai i a ka daw lo tiah an i ruat kho. Cuti si lo awkah nuva hna nih an chungkhar a feh nakhnga an tuah khawhmi vialte an tuah a hau.—Efe. 5:31.

Jehovah nih Ziazalei Thian awk A Kan Hal

19, 20. (a) Nuva hna zong nupa sualnak kha zeicah hrial an i zuam a herh? (b) Nuva cu saupi kaa dangdang ah an um ahcun zeidah a chuak kho?

¹⁹ Jehovah salle cu ziazalei thian zungzal an i zuam. Cheukhat cu nupa sualnak hrial awkah nupi an ṭhi, va an ngei. Asinain nupi, va a ngeimi cu nupa sualnak in huhphenh an si cang tinak cu a si lo. Ziazalei thian awk an i zuam zungzal a hau. Baibal chan ah a fekmi ralhau nih mi kha a huhphenh hna, asinain him tein um an duh ahcun a chung ah an um a hau. Mi pakhat cu ralhau leng a chuah ahcun thil chuh le thah a tong kho. Cu bantukin nuva hna nih nupa umṭinak he aa tlaiin ṭhitumnak a thawktu Jehovah phunglam an zulh lawngah ziaza rawhralnak an hrial khawh lai.

²⁰ Paul nih 1 Korin 7:2-5 ah nu le pa umṭinak kong a chim. Pa cu a nupi he lawng ihṭinak nawl a ngeih bantukin nu zong a va he lawng ihṭinak nawl a ngei. Pathian nih pakhat le pakhat cungah an tuah awk a simi nupa ihṭinak, an “rian” kha an tuah awk a si tiah a ti. An nu asiloah an pa cu saupi khual a tlawn asiloah pawcawmnak rian ruangah kaadang ah saupi a um ahcun nu le pa ihṭinak an “rian” kha an tuah kho ti lai lo. Mah kha Satan nih caanṭha ah aa lak lai i ‘aa sum kho lomi’ kha midang he nupa sualnak tuah awk a forh hna lai. Cu bantuk buainak a chuahter lomi le chungkhar ṭha tein a zohkhenh khomi pa pawl kha Jehovah nih thluachuah a pek hna.—Salm 37:25.

Baibal Fimchimhnak Zul

21. (a) Nupi, va ngeih ding asiloah ngeih lo ding timi biakhiahnak tuah cu zeicah a har? (b) 1 Korin a ngan 7 fimchimhnak cu zeicah man a ngeih?

²¹ Nupi, va ngeih ding asiloah ngeih lo ding timi biakhiahnak tuah cu a har ngaimi a si. Mitlinglo kan si caah nupi, va a ngeimi zong a ngeilomi zong harnak kan tong. Jehovah thluachuah a hmumi hna zong an lung a dongh caan a um. 1 Korin a ngan 7 fimchimhnak zulh ahcun buainak tampi hrial khawh a si lai. Nupi, va na ngeih zong ngeih lo zongah Jehovah hmai ah “thil ṭha” na tuah a si ko. (1 Korin 7:37, 38 rel.) Pathian mithmai ṭha hmuh cu a biapi bikmi a si. Atu zong, vawlei thar zongah Pathian mithmai ṭha hmuh khawh a si. Vawlei thar ahcun atu bantukin nu le pa kar ah buainak a um ti lai lo.

[A Tanglei Fianternak]

Na Let Kho Lai Maw?

• Midang kha nupi, va ngeih awk zeicah hnek ding a si lo?

• Nupi, va a ngeilomi hna, nan caan kha zeitindah a ṭha bik in nan hman khawh?

• Nupi, va ngeih aa timmi hna nih i um hnu ton laimi thil kongah zeitindah an i timhlamh khawh?

• Nuva hna zong nih nupa sualnak kha zeicah hrial an i zuam awk a si?

[Cahmai 14nak i hmanthlak]

Nupi, va a ngeilomi pawl nih Pathian rian tam deuh in ṭuannak ah an caan an hman tikah an i nuam

[Cahmai 16nak i hmanthlak]

Cheukhat cu nupi, va an ngeih hnu ah zei bantuk thil ah dah thlennak an tuah a herh?