Nan Innchungkhar Pehtlaihnak Na Ṭhatter Khawh
“Aa ṭhium ciami caah hi bia hi chim awk ka ngei, keimah bia hmanh a si lo, Bawipa bia tu a si.”—1 KOR. 7:10.
NA FIANTER KHO MAW?
Pathian nih aa ṭhiummi kha zeitindah a fonh hna?
Chungkhar pehtlaihnak a ṭhalomi kha Khrihfa upa nih zeitindah an bawmh khawh hna?
Ṭhitumnak kha zeitindah hmuh awk a si?
1. Jehovah salle nih ṭhitumnak kha zeitindah an hmuh? Zeiruangah?
KHRIHFA hna cu an i ṭhitum lioah Pathian sinah a biapimi tukmi biakamnak an tuah. (Pct. 5:4-6) Jehovah cu ṭhitumnak a Thawktu a si, cucaah aa ṭhiummi cu Pathian “fonhmi” an si. (Mar. 10:9) Ram cheukhat ah ṭhitumnak he aa tlaimi cozah upadi cu Jehovah nawlbia he aa lo lo. Jehovah nih ṭhitumnak kha zungzal ca in a hmuh. Cucaah Khrihfa hna nih an rak i um lioah Jehovah a biami an rak si rih lo hmanh ah ṭhitumnak kha zungzal ca in an hmuh ve awk a si.
2. Hi capar ah zei kong dah kan i ruah lai?
2 Ṭhitumnak nih nuamhnak a chuahter khawh. Asinain a nuamh lo ahcun zeidah tuah awk a si? Chungkhar pehtlaihnak ṭhatter ṭhan khawh a si maw? An i pehtlaihnak a ṭha lomi nuva hna kha zeinihdah a bawmh khawh hna?
An i Nuam lai Maw, Nuam lai lo dah?
3, 4. Ṭhitvat ding ṭha tein kan i thim lo ahcun zeidah kan ton lai?
3 Khrihfa a simi nuva hna cu an i pehtlaihnak a ṭhat ahcun an i nuam lai i Jehovah thang zong a ṭha lai. Asinain an i pehtlaihnak a ṭhat lo ahcun ngaihchia le lungfak in an um lai. Khrihfa ngaknu tlangval nih Pathian lamhruainak an zulh ahcun chungkhar kha ṭha tein an dirh khawh lai. Asinain ṭhitvat ding ṭha tein an i thim lo ahcun ngaihchia le awlokchong in an um lai. Tahchunhnak ah, mino cheukhat cu nupi, va ngeih ding timhcia an si hlan ah nungak, tlangval an ngei. A cheu cu ṭhitvat ding kha Internet in an kawl. An i um colh i a rauhhlan ah an innchungkhar cu a nuam ti lo. Cheukhat cu an i duh lioah sualnak ngan an tuah caah an i um tikah pakhat le pakhat an i upat ti lo.
4 Unau cheukhat cu zumlotu he an i um caah lungrethei in an um. (1 Kor. 7:39) Nang zong cutin na um ahcun Pathian sinah thla cam law ngaihthiamnak le bawmhnak hal. Jehovah nih hlan i na tuahmi palhnak ruang ah a chuakmi harnak cu aan lakpiak lai lo nain na palhnak lungtak in naa ngaihchih ahcun inkhawhnak ngeih awk aan bawmh lai. (Salm 130:1-4) Cucaah na si khawh chung in Pathian lungton i zuam law Pathian pekmi lawmhnak cu na caah “thazaang” a si lai.—Neh. 8:10.
Chungkhar Pehtlaihnak a Ṭhatlo tikah
5. Nuva hna cu an i pehtlaihnak a ṭhat lo tikah zeitindah khua an ruah awk a si lo?
5 Nuva hna cu an i pehtlaihnak a ṭhat lo tikah hitin khua an ruat men lai: ‘Kan i pehtlaihnak ṭhatter kaa zuam hmanh ah man a ngei theng hnga maw? Nupi dang, va dang hei ngei ning law kaa nuam deuh men lai.’ Nupi, va kaltak awkah hitin khua an ruat men lai: ‘Zalon ka duh ṭhan! Cucaah ka nupi, ka va hi ka ṭhen kho hnga maw? Ṭhen khawhnak ding Baibal chimmi a ruang a um lo hmanh ah a dangdang in um khawh a si ko i kaa nuam ṭhan ko lai.’ Khrihfa nih cun cu bantuk in ruah awk a si lo, an i pehtlaihnak a ṭhat ṭhan nakhnga Pathian lamhruainak tu kawl in zulh an i zuam awk a si.
6. Jesuh chimmi Matthai 19:9 kha fianter.
6 Unau pakhat cu a nupi, a va he an i ṭhen ahcun nupi dang, va dang ngeih ṭhan awkah Baibal nih a awnh men lai lo. Jesuh nih hitin a chim: “Ahohmanh nih a nupi kha, zumhawktlak loin a um ti ṭung lo ahcun, a mak i nu dang a ṭhit ahcun, nu le pa sualnak a tuah a si.” (Matt. 19:9) Mah Baibal cang i zumhawktlak loin um timi ah zuanzamnak le nupa sualnak phun dangdang zong aa tel. Khrihfa pakhat cu a nupi asiloah a va a zuangzam lo nain ṭhen duhnak lungthin a ngeih ahcun Pathian sinah fakpi’n thla a cam awk a si.
7. Khrihfa nuva hna cu an i pehtlaihnak a ṭhat lo ahcun mi nih zeitindah an ti hna lai?
7 Nuva hna an i pehtlaihnak a ṭhat lo cu Pathian he an i pehtlaihnak a ṭhat setsai lo caah a si kho men. Lamkaltu Paul nih a biapimi hi biahalnak hi a tuah: “Mah innchungkhar hmanh ṭha tein a zohkhenh kho lo mi nih cun zeitindah Pathian khrihfabu cu a zohkhenh khawh lai?” (1 Tim. 3:5) Khrihfa kan si aa timi nuva hna cu an i pehtlaihnak a ṭhat lo ahcun phung an chimmi ning in an nung lo tiah mi nih an ti hna lai.—Rom 2:21-24.
8. Khrihfa nuva hna a dangdang in um asiloah ṭhen an i timh cu zeiruang ah a si?
8 Khrihfa nuva hna cu Baibal chimmi a ruang um lo in a dangdang in um asiloah ṭhen an i timh ahcun Jehovah he an i pehtlaihnak a ṭhat lo caah a si. A nupi maw, a va maw asiloah an pahnih in Baibal phunglam an zulh lo caah a si kho men. An pahnih in an lungthin dihlak in Jehovah an i bochan ahcun an i pehtlaihnak a ṭhat ṭhan nakhnga an tuah khawh ko lai.—Phungthlukbia 3:5, 6 rel.
9. Innchung hawi a kaltak lomi unau cheukhat cu zei thluachuah dah an hmuh?
9 A hramthawk ah an i pehtlaihnak ṭhat dawh a lo lomi nuva tampi cu aa nuammi chungkhar an hung si ṭhan. An i pehtlaihnak a ṭha lo nain nupi, va a kaltak colh lomi unau cu a hnuah ṭhatnak an hmu ṭhan. Zumhnak aa khat lomi chungkhar ah zeidah a cang kho ti kha zoh hmanh. Lamkaltu Piter nih hitin a ṭial: “Nu nih nan vale kha an nawl nan ngaih hna awk a si. Cuti nan tuah ahcun, nan vale pawl lak i Pathian bia a zum lomi hna nih khan, nan ziaza a ṭhami thawng cun Pathian bia cu an zumh lai. Nan caah bia ka khat chim zong a herh lai lo, zeicahtiah zeitluk nun thiang in dah nan nun ti le zeitluk in dah nan upat hna kha anmah nih an hmuh ko lai.” (1 Pit. 3:1, 2) Zumlotu nih a innchung hawi tuahsernak a ṭhat ruangah biatak a cohlan men lai. Chungkhar pehtlaihnak ṭhatter aa zuammi hna nih Pathian thang an ṭhatter caah an innchungkhar dihlak in thluachuah an hmu lai.
10, 11. Chungkhar ah zei harnak dah a chuak kho, asinain Khrihfa pakhat nih zei bawmhnak dah aa ruahchan khawh?
10 Unau tam deuh cu Jehovah lungton an duh caah ṭhitvat ding ah tipil a ing cangmi unau kha an thim hna. Asinain mah hnu hmanh ah thil sining cu ruah loin aa thleng kho. Tahchunhnak ah, a innchung hawi cu a zual ngaimi lungthinlei zawtnak a hung ngei men lai. Asiloah phungchim ah kal ti lo in a cawlcang ti lomi thawngthanhtu a hung si men lai. Cu bantuk thil kha phungchim a ṭang i dawtnak a ngeimi unaunu Linda nih a rak ton.a An pa nih thil ṭhalo a tuah tikah Linda cu bochan awk a ngei ti lomi a lo. An pa cu a tuahmi thil ruangah a ngaihchih lo caah bu chung in an chuah. Cu bantuk thil a tongmi unau pawl nih kan innchungkhar a nuam kho ti lai lo tiah an ruah men lai. Cu tikah zeidah an tuah awk a si?
11 ‘Zei a si hmanh ah kan i pehtlaihnak a ṭhat ṭhan nakhnga i zuam zungzal cu a hau hnga maw?’ tiah khua na ruat men lai. Mah kong ah ahohmanh nih na caah biakhiahpiak khawh a si lo, an khiah awk zong a si lo. Asinain kan innchungkhar cu a nuam kho ti lai lo tiah na ruah hmanh ah lungdongh awk a si lonak a ruang a um. An chiaṭha thleidannak lungthin ruangah an innchung hawi kaltak lo in inkhawh aa zuammi hna cu Pathian caah a sung tukmi an si. (1 Piter 2:19, 20 rel.) Chungkhar pehtlaihnak ṭhatter ṭhan awk an si khawh chung in aa zuammi unau pawl kha Jehovah nih Baibal le a thlarau in a bawmh hna lai.
Bawmh awkah Timhcia in an Um
12. Khrihfa upa kha bawmhnak kan hal hna tikah zeitindah a kan hmuh lai?
12 Chungkhar buaibainak nan ton ahcun hmuhtonnak a ngeimi unau pawl kha bawmhnak hal hna. Khrihfa upa cu Khrihfabu tuukhal an si i Baibal ruahnak cheuhmi kha an in hmuhsak lai. (Lam. 20:28; Jeim 5:14, 15) Nan innchungkhar buainak na chimh hna le bawmhnak na hal hna ruangah Khrihfa upa nih nangmah le na innchung hawi kha an in zohchuk hna lai lo. Pathian lungton na duh taktak kha an hngalh caah hlannak hmanh in an in dawt deuh lai i an in upat deuh lai.
13. 1 Korin 7:10-16 ah zei ruahnak cheuhnak dah kan hmuh?
13 Zumlotu innchung hawi a ngeimi unau pakhat nih Khrihfa upa bawmhnak a hal hna tikah Khrihfa upa nih Paul chimmi hi bia hi an hman khawh: “Aa ṭhium ciami caah hi bia hi chim awk ka ngei, keimah bia hmanh a si lo, Bawipa bia tu a si: nu nih a va kha a kirtak hrimhrim lai lo; a kirtak ahcun va ngei lo in um lan ko seh, asilole a va he cun i rem ṭhan ko hna seh; cun pa nih a nupi kha ma hrimhrim hlah seh. . . . Khrihfa nu, ka va cu ka khamh kho hrimhrim lai lo tiah zeitindah na ti khawh lai? Khrihfa pa, ka nupi cu ka khamh kho hrimhrim lai lo, tiah zeitindah na ti khawh lai?” (1 Kor. 7:10-16) Unaunu asiloah unaupa cu zumlotu a innchung hawi Jehovah a biami a hung si tikah zeitluk in dah aa nuamh lai.
14, 15. Unaunu nih zei thil ruangah dah an pa kirtak aa timh men lai? Khrihfa pakhat cu zeiruang ah dah thlacam in a lungput ṭha te’n aa check awk a si?
14 Unaunu pakhat nih a vapa kha zei thil ruangah dah “a kirtak” khawh? Chungkhar cawm a duh lo, fakpi in a velh lengmang le Pathian biak a khenkham tuk ti bantuk ṭih a nungmi thil a ton ruangah a innchung hawi kirtak aa tim men lai.
15 Innchung hawi kaltak lai le kaltak lai lo cu mahte in biakhiah dingmi a si. Asinain Khrihfa nih cun mah kong kha thlacam in kan lungput ṭha te’n i check awk a si. Tahchunhnak ah, biaknak he aa tlaimi thil kan tuah khawh lo cu zumlotu kan innchung hawi ruang lawng ah maw a si? Asiloah Baibal hlathlainak kan tuah lomi, hmaan tein kan i pumh lomi le phungchim ah kan kal lomi hi kanmah daithlan ruang zong ah dah a si?
16. Innchung hawi he i ṭhen awk kha zeicah a rannak in bia kan khiah awk a si lo?
16 I ṭhen awkah a rannak in biakhiah colh ding a si lo. Pathian he kan i pehtlaihnak kan sunsak caah a kan pekmi laksawng ṭhitumnak kha kan upat. Jehovah sal kan si caah a min thianter kan duh. Cucaah midang ṭhitvat duh ah kan innchung hawi cung zumhawktlak lo in um le kaltak cu kan duh lai lo.—Jer. 17:9; Mal. 2:13-16.
17. Zeitikah dah “Pathian nih daihnak in um awkah nannih cu an auh hna” tiah ti khawh a si?
17 A innchung hawi zumlotu a simi Khrihfa nih an innchungkhar a feh nakhnga a si khawh chung in aa zuam awk a si. Aa zuam ko buin zumlotu a innchung hawi nih ṭhen a duh ahcun Khrihfa a simi nih ka sual tiah aa ruah awk a si lo. Paul nih hitin a ṭial: “A zummi a si lomi nih khan, ṭhen a duh ahcun i ṭhen ko hna seh. Cu bantuk thil ahcun Khrihfa mi kha nupi a si ah pasal a si ah hnek awk a si lo. Pathian nih daihnak in um awkah nannih cu an auh hna.”—1 Kor. 7:15.b
Jehovah kha i Bochan
18. Kan i zuam buin chungkhar pehtlaihnak a ṭhat hlei lo hmanh ah zei ṭhatnak dah a chuak kho?
18 Chungkhar pehtlaihnak a ṭhat lo tikah Jehovah kha i bochan in zumhnak asiloah ralṭhatnak hal ding a si. (Salm 27:14 rel.) A cunglei i a kong kan chimmi Linda kong hi ruat ṭhan hmanh. An pa he pehtlaihnak ṭha ngeih ṭhan awkah kum tampi chung fakpi’n aa zuam nain a donghnak ah an i ṭhen ṭhiamṭhiam. Cutikah aa zuammi kha caan lam a pam tiah a ruat maw? A ruat lo. Hitin a chim: “Kaa zuammi cu midang caah tehtekhaannak ṭha a si. Ka chiaṭha thleidannak lungthin zong a thiang. Man a ngei bikmi cu ka fanu zumhnak a fehtermi hi a si. Ka fanu cu Jehovah sinah aa pumpemi le a thlarau ngaimi a hung si.”
19. Chungkhar pehtlaihnak ṭhatter ṭhan awk kan i zuam ahcun zei thil dah a chuak lai?
19 Merilin timi unaunu cu Pathian i bochan in an pa he pehtlaihnak ṭha ngeih ṭhan awk fakpi’n aa zuam caah aa nuam ṭhan. Kan pa nih a ka cawm lo lengah Jehovah he kan i pehtlaihnak zong a hnorsuan caah a dangdang in um ah a ṭha lai tiah khua ka rak ruat tiah a ti. Hlan ahcun an pa cu Khrihfa upa a si. A hnuah sipuazi a tuah i a sung. Pumh a hung bau i an nuva in an i chawn ti lo. An khua ah a cangmi thil ṭihnung pakhat ruang ah unaunu cu a lau tuk i mi he i chawnhbiak a duh ti lo. A hnuah an innchungkhar buainak cu amah ruang zongah a si kha a hun hngalh. An nuva in an i chawn ṭhan i chungkhar Baibal hlathlainak an tuah ṭhan i hmaan tein an i pum ṭhan. Khrihfa upa cu zaangfahnak an ngei i an bawmh hna. A rauhhlan ah aa ṭhiumka bantuk an si ṭhan i an i nuam tuk. A hnuah an pa cu Khrihfabu ah tinvo a hmu ṭhan. Unaunu nih kan tonmi cu tuar a har tuk nain mah in fimnak kan i lak i atu cu kan i nuam cang tiah a ti.
20, 21. Chungkhar ah zei tuah awk dah bia kan khiah ding a si?
20 Nupi, va a ngeimi kan si zong si lo zong ah ralṭhat le Jehovah i bochan zungzal a hau. Chungkhar pehtlaihnak a ṭha lomi nuva hna nih kannih cu ‘pahnih si ti lo in pakhat kan si cang’ ti i cinken in a si khawh chung in pehtlaihnak ṭhatter ṭhan an i zuam awk a si. (Matt. 19:6) Zumlotu na innchung hawi he umṭi cu a har ko lai nain Jehovah a biami a hung si ve ahcun naa nuam tuk te lai.
21 Kan tuahmi thil paoh kha zumlotu pawl caah tehtekhaannak ṭha a simi lam in kan tuah awk a si. Kan innchung hawi he kan i pehtlaihnak a ṭhat lo tuk i kaltak kan duh ahcun zeiruang ah a si kha ṭha tein kan ruah awk a si. Cun fakpi’n thlacam le Baibal chimmi ṭha tein ruah le Khrihfa upa sinah bawmh hal zong a hau. A bik in, zei thil kan tuah paoh ah Jehovah lunglawmhter awk le a kan pekmi laksawng ṭhitumnak kan upat langhter awk biakhiah ding a si.
[A Tanglei Fianternak]
a An min thlen a si.
b ‘Pathian Dawtnak Chungah Hmun’ cauk, cahmai 219-221 [Kawl]; Vennak Innsang, 1989, November 1, cahmai 20-21 [Kawl] le 1975, September 15, cahmai 575 [Mirang] zoh.
[Cahmai 9nak i hmanthlak]
Chungkhar pehtlaihnak ṭhatter ṭhan aa zuammi unau pawl kha Jehovah nih thluachuah a pek hna
[Cahmai 10nak i hmanthlak]
An i pehtlaihnak a ṭha lo nain nupi, va a kaltak colh lomi unau cu a hnuah ṭhatnak an hmu ṭhan
[Cahmai 11nak i hmanthlak]
Khrihfabu cu hnemhnak le thlaraulei bawmhnak hmuh khawhnak hmun a si
[Cahmai 12nak i hmanthlak]
Jehovah kha i bochan law ralṭhatnak hal