Cawnpiak Thiam Deuh Awkah Tuah Khawhmi Thil Pathum
1. Zeicah cawnpiak kan thiam nakhnga kan i zuam a herh?
1 Thawngthanhtu a simi paoh cawnpiaktu kan si. Innkhat hnu innkhat phung kan chim ah siseh, lennolh kan tuah ah siseh, Baibal kan cawnpiak hna ah siseh a kong pakhatkhat kan chim. Kan chimmi kong cu a sawhsawh a si lo. “Cathiang” ah aa ṭialmi kong a si i mah nih mi kha ‘khamhnak i a kalpi khotu fimnak’ a ngeihter khawh hna. (2 Tim. 3:15) Mah cu tinvo sung taktak a si. A tanglei ah cawnpiak kan thiam nakhnga a kan bawm khomi ruahnak cheuhnak pathum a um.
2. Hngalh fawi tein zeitindah cawnpiak khawh a si?
2 Hngalh Fawimi: A kong pakhat kha ṭha tein kan hngalhthiam ahcun mah kong cu a hngal lomi caah zeitluk in dah hngalhthiam a har ti kha philh sual a fawite. Cucaah Baibal na cawnpiak tik hna ah a herh lomi kong tampi chim hlah. Cu nakcha cun a biapitnak tete kha langhter. Cawnpiak a thiammi si awkah bia tampi chim a hau lo. (Ptb. 10:19) Tam deuh cu a kong he aa pehtlai bikmi Baibal cang tete rel hi a ṭha bik a si. Rel dih hnuah nan i ruahmi kong he aa tlaimi zawnte kha langhter khun. Matthai a ngan 5 in 7 ah aa ṭialmi Tlangcung Cawnpiaknak ah a thuk ngaimi biatak aa tel nain mah kha Jesuh nih hngalh a fawimi le ṭha tein thimmi biafang tlawmte in a rak chim.
3. Tahchunhnak hman le hmanthlak suai cu zeicah a ṭhat, zei bantuk tahchunhnak hman dah a ṭha bik a si tawn?
3 Tahchunhnak le hmanthlak suaimi: Tahchunhnak nih tuaktan awk a bawmh, lung a thawhter i cinken zong a fawiter. Tahchunhnak ṭhaṭha chim awkah biachim thiam a hau tiah ruat hlah. Jesuh nih a tawi i hngalh a fawimi tahchunhnak a hman tawn. (Matt. 7:3-5; 18:2-4) Catlap cung ah sawhsawh te’n hmanthlak na suaimi zong man a ngei kho. Tlawmpal in na ruah chung ahcun a ṭhami tahchunhnak le suai awk hmanthlak na lung ah a hung chuak ko lai.
4. Biahalnak kha zeitindah hmual ngei tein hman khawh a si?
4 Biahalnak: Biahalnak nih Baibal na cawnpiakmi kha khua a ruahter. Cucaah biahalnak na tuah tikah hngak ta. Nangmah nih a phi na chim colh ahcun Baibal a cawngmi nih zeitindah a hngalhthiam kha na hngal kho lai lo. A phi a chimmi a palh ahcun remhpiak sawhsawh loin a phi hmaan hngalh awk a bawmmi biahalnak tuah chap ah a ṭha. (Matt. 17:24-27) Ahohmanh a tlingmi cawnpiaktu kan si kho lo ti cu a hmaan ko. Cucaah Baibal nih mi kan cawnpiak hna tikah i ralrin zungzal awk a kan forh. Cutin kan tuah ahcun kanmah zong kan bia a ngaimi zong zungzal in a hmunmi thluachuah kan hmu lai.—1 Tim. 4:16.