A Liannganmi Cawnpiaktu Kha I Zohchunh

“Cucaah khuazakip ah va kal u law miphun vialte kha ka zultu ah va ser hna u; . . .  kan fialmi vialte hna hi an zulh nakhnga va cawnpiak hna u.”​—⁠MATTHAI 28:​19, 20.

1, 2. (a) Phundang in, zeitindah kan dihlak in cawnpiaktu kan si? (b) Cawnpiaknak kong he aa tlai in, a hmaanmi Khrihfa hna nih aa thleidangmi zei ṭuanvo dah an ngeih?

NANGMAH cu cawnpiaktu pakhat na si maw? Phundang incun, kan dihlak in cawnpiaktu kan si dih. Khual a tlawngmi pakhat kha lam na hmuhsak tikah, rian pakhat kha zeitindah ṭuan awk a si tikha na rianṭuan hawi kha na hmuhsak tikah, asiloah a kedan kha zeitindah a hri ṭem awk a si tikha ngakchia cu na chimh tik paohah mi na cawnpiak. Cubantuk lam in midang bawmhnak nih lungtlinnak zeimaw tal kha a chuahter, asi ko lo maw?

² Cawnpiaknak konghe aa tlai in, a hmaanmi Khrihfa hna nih aa thleidangmi ṭuanvo pakhat an ngei. ‘Miphun vialte kha zultu ser in va cawnpiak’ awkah rian fial kan si. (Matthai 28:​19, 20) Khrihfabu chung zongah, cawnpiaknak caan kan ngei. Thiamnak a ngeimi upa hna cu khrihfabu ṭhanchoter awkah, “tuukhal le cawnpiaktu” in rianṭuan awkah rianpek an si. (Efesa 4:​11-13, NW) Nifate an Khrihfa rianṭuannak hna ah, nutling asimi nu hna cu nu no deuh pawl sinah ‘thilṭha cawnpiaktu’ an si awk a si. (Titas 2:​3-5) Kan dihlak in zumtu hawi kha thazang pek awkah forh kan si i, Baibal hmangin midang thazang kha fehternak thawngin mah chimhhrinhnak kha kan zulh khawh. (1 Thesalon 5:11) Pathian Bia cawnpiaktu si in zungzal in a hmunmi ṭhathnemnak a chuahter khomi thlarau lei a man a sungmi thil kha mi a chimtu si cu tinvo ṭha a va si dah!

3. Hmual a ngeimi cawnpiaktu in zeitindah kan ṭhancho khawh?

³ Asinain, hmual ngei ngaiin mi a cawnpiaktu in zeitindah kan ṭhancho khawh lai? A hrampi in, hi cu a Liangnganmi Cawnpiaktu, Jesuh kan i zohchunhnak in a si. ‘Asinain Jesuh cu zeitindah kan i zohchunh khawh lai?’ ‘Amah cu mitling pei a si cu,’ tiah a cheukhat nih an ruah ko lai. A hmaan ko, kannih cu a tlingmi cawnpiaktu kan si kho lai lo. A si nain, kan thil ti khawhnak cu zeizat hmanh a va si ah, Jesuh a cawnpiak ning kha a si khawh chungin kan i zohchunh khawh. A hmanmi lam pali​—⁠a fiang tein chimnak, hmual a ngeimi biahalnak hna, aa tlakmi khua tuaktannak le, bianabia hna kha aa tlak tein hmannak timi hna kha zeitindah kan zulh khawh tikha kan i ruah hna hmanh lai.

A Fiang tein Chimnak kha Hmangin Cawnpiak

4, 5. (a) Zeiruang ahdah a fiang tein chimmi bia hna cu Baibal biatak i a biapi bikmi muihmel a si? (b) A fiang tein chimnak he cawnpiak awkah, zeiruang ahdah na holhfang hna i ralrin cu biapi a si?

⁴ Pathian Bia biatak a hrampi cu hngalh a har ngaimi a si lo. Thlacamnak ah, Jesuh nih hitin a rak ti: “Maw ka pa, . . . A fimmi le cathiammi hna sinin na thuhmi kha cathiam lomi hna sinah na langhter caah na cungah ka lawm.” (Matthai 11:25) Jehovah nih a timhnak kha mi sawhsawh mi hna sinah le mi toidawrmi hna sinah a rak phuan. (1 Korin 1:​26-28) Cuticun, a fiangtein chimnak cu Baibal biatak i a biapi bikmi muihmel pakhat a si.

⁵ Innchung Baibal cawnpiaknak na tuah tikah asiloah lungthawhnak a ngeimi hna sinah lennolh na va tuah tikah, zeitindah a fiang tein na chimh khawh lai? A ṭha, a Liannganmi Cawnpiaktu sinin zeidah kan rak cawn? “Fimthiamnak zeihmanh a ngei lomi, mi sawhsawh menmen” a simi tampi nih an lung a fian nakhnga, an i lak khawhmi a tliangmi holh kha Jesuh nih a rak hman. (Lamkaltu 4:13) A fiang tein chimmi bia in cawnpiak awkah, a pakhatnak ah a herhmi cu na hmanmi holhfang i ralring kha a si. Pathian Bia kha midang sinah lung fiang lakin chim awkah rumra a tuah ngaimi biafang hna asiloah holhfang hna kha hman a herh lo. Cubantuk “biathluan sausau le cathiam sang pawl nih an hmanmi bia” hna nih mi kha a lauter kho, a hlei in fimthiamnak le hngalhkhawhnak tlawmpal lawng a ngeimi hna sinah a si khun. (1 Korin 2:​1, 2) Cu bantuk a fiangtein chimmi bia ralring tein hmannak nih biatak kha a hmual a ngeihter deuh tikha Jesuh tahchunnak nih a langhter.

6. Baibal a cawng liomi pakhat kha a kong tamtuk in chimhnak kha zeitindah kan hrial khawh?

⁶ A fiangmi holh in cawnpiak awkah, Baibal a cawng liomi pakhat kha a kong tam tuk in chimnak zong kha ralring tein kan hrial awk a si. Jesuh cu a zultu hna i an tlamtlinlonak kha a rak ruahpiak hna. (Johan 16:12) Kanmah zong, kan cawnpiakmi hna an zawn kha kan ruah piak ve hrimhrim hna awk a si. Tahchunhnak ah, Zungzal Nunnak ah a Hruaimi Hngalhnak cauk kha kan cawnpiak tikah, a dikhlir in kan chimh dih cikcek a hau lo.a A kong zeizat dah a cawn cang tikha a biapi bikmi thil siseh law cubang, cawnnak kha a hnawh in hnawh a hau lo. Mah nakin, siangngakchia nih a herhmi le a thil ti khawhnak zat in cawnpiak kha a ṭha bikmi a si. Kan hmuitinh cu a cawng liomi pakhat hi Khrih a zultu si ve in Jehovah a biami pakhat a si nakhnga bawmh kha a si. Lungtho tein a cawng liomi nih a cawnmi kha fiang tein aa lak khawh nakhnga a caan pek in bawmh a herh. Cuticun, biatak nih a lungthin kha a suk lai i tuahsernak in langhter awkah a lung a thawhter lai.​—⁠Rom 12:⁠2.

7. Khrihfabu chungah phungchimnak caanṭha kan hmuh tikah, a fiang tein kan chim khawh nakhnga zeibantuk ruahnak cheuhnak hna nihdah a kan bawmh khawh?

⁷ Khrihfabu ah phungchimnak caanṭha kan hmuh tikah, a hlei in aa pummi lakah mithar an i tel tikah, “fawi tein hngalhthiam” asimi holh kha zeitindah kan chim khawh lai? (1 Korin 14:​9, NW) A kan bawm khomi ruahnak cheuhnak pathum hi ruat hmanh. A pakhatnak ah, na hman hnga dingmi zapi nih theihbal theng lomi bia kha a sullam fianter hmasa. Pathian Bia kan hngalhthiamnak nih aa thleidangmi holhfang hna kha a kan hngalhter. “Zumh awk a tlakmi le a fimmi sal,” “tuu dang,” le “Babilon khualipi” ti bantuk bia kha kan hman a si ahcun, a sullam kha a fiantermi holh in kan fianter a hau lai. A pahnihnak ah, bia tamtuk in chimnak kha hrial. Bia tamtuk in chimnak, a kauhnak in chimnak nih aa pummi hna i an lung a thawhnak kha a tlauter khawh. A herh lomi biafang hna le holhfang hna kha hlawtnak nih bia kha a pianter. A pathumnak ah, a konglam tampi hman awkah i zuam hlah. Hlathlainak kan tuahnak nih lung tho ngai a simi thil tampi a kan hmuhter ko lai. Sihmanhsehlaw a kongpi pakhat kha a biapimi a kong tlawmte in chim in, mah a kong a bawm kho taktakmi le kan ngeihmi caan tlawmpal ah a fiang tein chim manh dingmi lawnglawng kha hman cu a ṭhabikmi a si.

Biahalnak Hna Kha Hmualngei tein Hmannak

8, 9. Inn ngeitu a lungthawhnak he aa tlakmi biahalnak kha zeitindah kan i thim khawh? Tahchunhnak pe.

⁸ Jesuh cu a zultu hna nih an lungthin chungah a ummi kha an langhter nakhnga le an ruahnak kha cawnpiak awkah biahalnak hna hmannak ah a thiam bikmi a si ti kha philh hlah. Biahalnak kha hmangin, Jesuh nih an lungthin kha a rak purh khawh i an lung a suk ter ngaingai hna. (Matthai 16:​13, 15; Johan 11:26) Jesuh bantuk in, biahalnak hna kha hmual ngei ngaiin zeitindah kan hman khawh lai?

⁹ Innkhat hnu innkhat phung kan chim tikah, Pathian Pennak kong kan chim khawh nakhnga, mi lung a thawhtermi biahalnak hna kha kan hman khawh. Innngeitu i a lungthawhnak he aa tlak in biahalnak pakhat kha zeitindah kan i thim khawh? Ṭha tein ngia. Inn pakhat na naih tikah, a pawngkam kha zoh. Innchungkhar ah ngakchia an um ti a langhtermi, lente celhnak hna an um maw? Cutin a si ahcun, hitin kan hal khawh, ‘Na fale upa an hung si tikah vawlei hi zeidah a lawh lai ti na ruat bal maw?’ (Salm 37:​10, 11) Innhmai innka ah tawh tampi aa hrenh a si ahcun, asiloah inn kha a cawngmi an um ahcun tah? Hitin kan hal khawh, ‘kan inn le kan lam ah him tein kan um caan a ra te lai tiah na ruat bal maw?’ (Mikah 4:​3, 4) Innchung ah mizaw a um ti a langhtermi thil pakhat khat a um a si ahcun tah? Hitin kan hal khawh, ‘Mikip ngandam tein an umnak caan a um te hnga maw?’ (Isaiah 33:24) Ruahnak cheuhnak tampi cu Biabal In Ruahnak cauk ah hmuh khawh an si.b

10. Baibal a cawng liomi i a lungthin le a ruahnak kha “than khawh” awkah zeitindah biahalnak hna kha kan hman khawh, sihmanhsehlaw zeidah kan lungchung ah kan i chiah awk a si?

¹⁰ Baibal cawnpiaknak kan tuah tikah biahalnak kha zeitindah ṭha tein kan hman khawh? Jesuh bantuk in, mi lungthin kan pur kho lai lo. Asinain, thil sining theihthiam in hngalhthiamnak a ngeimi biahalnak hna nih a cawng liomi lungthin ruahnak hna kha “than khawh” awkah a kan bawmh khawh. (Phungthlukbia 20:⁠5) Tahchunhnak ah, Hngalhnak cauk chung ah, “Pathian Upatnak In Nunnak Nih Lunglawmhnak A Chuahternak Kong” kan cawn hei ti hmanh u sih. Mah nih khan dinfellonak, nu le pa sualnak, le a dangdang kong hna i Pathian hmuhnak kha a kan ruah. Ca chung i biahalnak hna kha a cawng liomi nih a hmaan tein a leh khawh ko lai nain, a cawnmi kha a hna a tla maw? Hitin kan hal khawh: ‘Hi bantuk kongah Jehovah a hmuhning cu na caah aa tlakmi a si tiah na ruat maw?’ ‘Hi Baibal phunglam hi na nunnak ah zeitindah na zulh khawh lai?’ Asinain, a cawngmi kha hmaizahnak in upat awk a si tikha philh hlah. Baibal a cawng liomi a si a vanghtermi asiloah a ning a zahtermi biahalnak kha kan hal duh awk a si lo.​—⁠Phungthlukbia 12:⁠18.

11. Zapi hmai i phung a chimmi hna nih hmual a ngeimi biahalnak hna kha zeiti lam indah an hman khawh?

¹¹ Zapi lakah phung a chimmi hna zong nih hmual a ngeimi biahalnak hna kha an hal khawh ve. Lung a thawhtermi biahalnak hna​—⁠kan bia a ngaimi nih aw chuah in leh a hau lomi biahalnak hna​—⁠nih aa pummi kha khua a tuaktanter khawh hna. Jesuh nih cubantuk biahalnak hna kha amah le a caante ah a rak hman tawn. (Matthai 11:​7-9) Mah lengah, biahram a hun domh hnu ah, phungchimtu nih a chim hngadingmi a biapimi a kong kha langhter awkah biahalnak hna a tuah khawh. Hitin a chim khawh, “nihin ah . . . timi biahalnak i a lehnak kha kan i ruah hna lai.” Cun, a donghnak ah, a biapimi a kong kha hngalhter ṭhan awkah mah biahalnak kha a langhter ṭhan khawh.

12. Pathian Bia in hnangamnak an i lak khawh nakhnga zumtu hawi hna kha bawmh awkah khrihfa upa hna nih zeitindah biahalnak hna an tuah khawh hna timi kha tahchunhnak pe.

¹² An tuukhalhnak rian ah, Khrihfa upa hna nih “thazang a dermi” hna nih Jehovah a Bia in hnangamnak an i lak nakhnga bawmh awkah biahalnak hna kha an hman khawh. (1 Thesalon 5:14) Tahchunhnak ah, a lung a dongmi hna kha bawmh awkah, khrihfa upa hna nih Salm 34:18 kha an hman khawh. Hitin a ti: “Lung a dongmi kha BAWIPA nih a umpi hna i ruahchannak a ngei lomi kha a khamh hna.” Kha a hnabei a dongmi nih amah pumpak he zeitindah aa pehtlaih timi kha aa fian nakhnga, khrihfa upa nih hitin a hal khawh: ‘Jehovah nih ahodah a umpi? A caan caan ah ‘ka lung a dong’ ti in asiloah ‘ruahchannak ka ngei ti lo’ tiah na ruat bal maw? Cutin na ruah ahcun, Baibal nih a chim bantuk in, Jehovah nih cu bantuk cu a umpi hna a ti, mah nih hin nangmah kha an umpi a ti duhnak a si ko lo maw?’ Cubantuk in zangfahnak lungthin he thazang peknak nih a lung a dongmi kha a tha a thawhter ṭhan kho.​—⁠Isaiah 57:⁠15.

Aa Tlakmi Khuaruahnak

13, 14. (a) Hmuh khawh lomi Pathian pakhat cu ka zum kho lo tiah a timi pakhat kha zeitindah khua kan tuaktanter khawh? (b) Mikip nih an zumh lai ti in zeiruang ahdah kan i ruahchan awk a si lo?

¹³ Kan phungchim rianṭuannak ah, zumh khawh a simi khua ruahter in, ṭha tein an lungthin chungah phan seh ti kan duh. (Lam 19:8; 28:​23, 24) Mah nih khan Pathian Bia biatak kong midang sinah phuan awkah a hnawk ngaimi khua ruahning kha kan hman thiam awk a si tinak a si maw? A si hrimhrim lo. A ṭhami khuaruahnak cu a buai ngaimi a si a herh lo. Aa tlakmi khuaruahnak he aa ruangmi a kong pakhat kha fiang tein chim cu hmual a ngeibikmi a si lengmang tawn. Tahchunhnak pakhat in ruat hmanh.

¹⁴ Mi pakhat nih a hmuh khawh lomi Pathian pakhat cu ka zum kho lo tiah a ti tikah zeitindah kan leh lai? A cangmi le a chuahtermi thil sining in kan ruah khawh. A cangmi thil kha kan zoh tikah, a chuahtermi thil a um tikha kan cohlan. Hitin kan ti khawh: ‘Lam hlapi na hei kal hnga i mah ka ah ṭha tein sakmi inn pakhat, rawl tampi a um (a cangmi) kha na hmuh tikah, fawi tein kha inn kha a sa i rawl chiahnak bizu ah a chiatu pakhat khat (a chuahter tu) a um ti kha chimh hau loin na cohlan ko lai. Cu bantuk te cun, a cangmi thil muisam le vawlei i “bizu” chungah rawl tampi a ummi (a cangmi) kha kan hmuh tikah, Pakhat khat (a chuahter tu) nih hi thil hna hi ṭuanvo a lak ti kha kan cohlan ve awk a si lo maw?’ Baibal nih a fiangbikmi in a leh: “Nan hngalh cio bangin inn cu mi nih an sak taktak- zeizong vialte a satu bel Pathian a si.” (Hebru 3:⁠4) Asinain, zeibantuk khuaruahning ṭha ṭha a si ah, mikip nih an cohlang dih lo. Baibal nih “thim a simi” hna lawnglawng kha zumtu an hung si lai tiah a kan hngalhter.​—⁠Lamkaltu 13:48; 2 Thesalon 3:⁠2.

15. Jehovah a ziaza le a lam hna kha langhter awkah zeibantuk khua tuaktanternak lam khadah kan hman khawh i, zeibantuk tahchunhnak pahnih nihdah cu bantuk khua tuaktanternak kan hman khawh tikha a langhter?

¹⁵ Lohmun rianṭuannak ah asiloah khrihfabu ah siseh, kan cawnpiak tik hna ah, Jehovah a sining le a lam hna kha langhter awkah aa tlakmi khua tuaktanternak kha kan hman khawh. A hlei in hmual a ngeimi cu Jesuh nih amah he aa tlak ningte in a rak hmanmi ‘zei tluk indah a pek chinchin lai’ timi khua tuaktanning kha a si. (Luka 11:13; 12:24) Aa thleidannak ah khan i hngat in, hi khua tuaktanternak nih hin an lungchung ah a luhter deuh khawh. Hell mei zumhnak i a si khawh lonak kha langhter awkah, hitin kan ti khawh: ‘Dawtnak a ngeimi pa pakhat nih a fa kha a kutdong pakhat meiah hremnak in dan a tat lai lo. A kan dawtu vancung kan Pa caah hell mei i hrem timi ruahnak cu zeitluk indah a si kho lomi a si chinchin!’ (Jeremiah 7:31) Jehovah nih a salle pakhat cio kha kan zawn a kan ruah timi kha cawnpiak awkah, hitin kan chim khawh: ‘Jehovah nih arfi nuai thong tampi kha an min in a hngalh dih hna a si ahcun, amah a dawmi le a man a sungmi a Fapa thisen in a rak cawkmi hna kha zeitluk indah an zawn a ruah chinchin hna lai!’ Cubantuk a hmual a ṭhawngmi khua tuaktanternak nih midang an lungthin kha purh khawh awkah a kan bawmh.

Aa Tlakmi Bianabia

16. Bianabia hna cu cawnpiaknak ah zeiruang ahdah man a ngeimi an si?

¹⁶ Hmual a ngeimi bianabia hna cu kan cawnpiaknak kha midang caah ngaihnuam a siter khomi bia a ṭamhtu an si. Zeiruang ahdah bianabia hna cu cawnpiaknak ah man a ngeimi an si? Cawnpiaktu pakhat nih hitin a rak ti: “Mitthlam ah cuanter awk a um lomi ruah cu minung caah a har bikmi a si.” Bianabia hna nih sullam a ngeimi hmantlak kha kan lung chungah a kan suaiter i, ruahnak thar kha tam deuh in a kan hngalhter khawh. Jesuh cu bianabia hna kha khuaruahhar awktlak in a rak hman. (Marka 4:​33, 34) Hi cawnpiaknak lam hi zeitindah kan hman khawh ve tikha ruat hna hmanh u sih.

17. Bianabia kha hmual a ngeih termi a kong pali cu zeidah an si?

¹⁷ Zeinihdah bianabia hna kha hmual a ngeihter? A pakhatnak ah, kan hmanmi bianabia cu kan bia a ngaimi hna nih fawi tein an hngalhthiam khawhmi thil sining ah aa hngatmi, aa tlakmi bianabia a si awk a si. Jesuh bianabia tampi cu amah a bia a theimi hna nih nifate an nunnak i an tonmi hna kha a hman ti cu kan i cinken ko. A pahnihnak ah, bianabia pakhat cu chimmi a kong he aa tlakmi a si awk a si. Thlaichunnak cu a sullam a pial a si ahcun, bianabia nih khan kan bia a ngaimi hna kha an lung a vaihter lai. A pathumnak ah, bianabia pakhat cu a herh tuk lomi a tetuai tampi he cawh hnuk awk a si lo. Jesuh nih a herhmi thengte lawngah a rak hman i a herh tuk lomi kha cu a rak kaltak tikha i cinken. A palinak ah, bianabia pakhat kan hman tikah, aa pehtlaihning cu a fiangmi a si awk a si. Cu ti a si lo ahcun, bianabia le chimmi a kong aa pehtlaihnak kha micheu nih an hngalthiam sual lai lo.

18. Zeitindah aa tlakmi bianabia hna cu kan ser khawh?

¹⁸ Aa tlakmi bianabia hna kha zeitindah kan ser khawh? A sau pi in le tlamtling khitkhet tein kan ruah a hau lo. Bianabia tawite hna nih hmual tampi an ngei kho ko. I ruah hnga dingmi a kong he aa tlaimi tahchunhnak lawng kha ruat. Tahchunhnak ah, Pathian ngaihthiamnak kong kan hei i ruah i, Jehovah nih kan sualnak kha a kan “hnawhpiak” timi Lamkaltu 3:19 kong kha bianabia ser kan duh hei ti hmanh u sih. Mah Baibal cang theng kha a fiang tukmi a si ko, sihmanhsehlaw a chim duhmi kha langhter awkah a si taktakmi zeibantuk tahchunhnak dah kan hman khawh​—⁠hnawhnak (eraser) maw​—⁠ti a dawp khomi thil (sponge) dah? Hitin kan ti khawh: ‘Jehovah nih kan sualnak kha a kan ngaihthiam tikah, ti a dawp khomi thil (sponge) (asiloah eraser) in a hnawh dih bantuk khi a si.’ Cubantuk a fiangmi bianabia pakhat nih a chim duhmi kha hngalhthiam loin a umter lai lo.

19, 20. (a) A ṭhami bianabia hna kha khoika ahdah kan hmuh khawh hna? (b)  Kan cauk hna ah an chuahmi hmual a ngeimi tahchunhnak cheukhat hna cu zeidah an si? (Rinli kulh zongkha zoh.)

¹⁹ Kan nunnak i a um taktakmi tahchuhnak hna i tel in, aa tlak ngaimi bianabia hna kha khoika ahdah na hmuh khawh lai? Nangmah na nunnak theng asiloah hmuhtonnak a phunphun a ngeimi zumtu hawi hna i an hmuhtonnak kha zoh hna. Nunnak a ngeimi le ngei lomi, innchungkhar thilri hna, asiloah mi tampi nih hngalhmi a nai i a cangmi thil kong hna kha i tel in, a dang a hrampi tampi chungin bianabia caah thim khawh an si. A ṭhami bianabia hna kha hmuh khawh awkah hmual a ngeimi tawhfung cu kan pawngkam i nifate thil sining hna kha hliphlau te le, “ralring tein ngiatnak” in a si. (Lamkaltu 17:​22, 23, NW) Zapi lak i phungchimnak kong he aa tlai in cauk pakhat nih hitin a fianter: “Minung nunnak le rianṭuannak kong a ngia mi, mi kip he aa biachawnmi, thil hna kha naihte in a hlathlai i a theihthiam tiang a halmi phungchimtu pakhat nih a herh tikah a caah bawmtu taktak a simi bianabia tampi kha aa khon hna lai.”

²⁰ Hmual a ngeimi bianabia tampi a umnak adang a hrampi pakhat cu​—⁠Jehovah Hngaltu hna nih an chuahmi Vennak Innsang, I hlau!, le adang cauk hna kha an si. Hi cauk hna nih bianabia hna kha zeitindah an hman tikha na cawn khawh.c Tahchunhnak ah, Hngalhnak cauk chungah, cawnnak 17 i catlangbu 11nak ah an hmanmi bianabia kha ruat hmanh. Mah ka ahkhan khrihfabu chung i mihring sining a phunphun aa thleidannak kha na pawng i lam pakhat cungah motor a phun phun an kalmi he a tahchunh. Mah nih khan zeitindah hmual a ngeihter? Hi cu ni fate a cangmi thil umtuning ah aa hngatmi a si kha i chingchiah, hi cu chimduhmi he aa tlak taktakmi a si i, aa petlaihning zong a fiang tuk ko. Kan cawnpiak tik hna ah ca in chuahmi bianabia hna kha kan hman khawh, Baibal a cawng liomi i a herhnak he kan pehtlaihter khawh asiloah phung kan chim tikah remh pah in kan hman khawh hna.

21. Hmual a ngeimi Pathian Bia cawnpiaktu pakhat sinak in zei laksawng hnadah hmuh a si?

²¹ Hmual ngei tein mi a cawnpiaktu pakhat i laksawng cu a ngantukmi a si. Kan cawnpiak tik hnaah, midang kha kan hrawmmi hna a si; anmah kha bawmh awkah kan i pe. Cubantuk i peknak nih lunglawmhnak a chuahter, zeitintiah Baibal nih hitin a ti: “Pek lei ah hin hmuh lei nakin lunglawmhnak a um deuh.” (Lamkaltu 20:35) Pathian Bia cawnpiaktu hna caah, mah lunglawmnak cu Jehovah kong biatak​—⁠a hmaan i a hmunmi thil kha kan hrawm hna ti kan i hngalhnak lunglawmhnak kha a si.

[A Tanglei Fianternak Hna]

Na Cinken Maw?

• Inn chung Baibal cawnnak kan tuah tikah. Khrihfabu chungah phung kan chim tikah a fiang tein zeitindah kan cawnpiak khawh hna?

• Innkhat hnu innkhat phung kan chim tikah hmual a ngeimi biahalnak hna kha zeitindah kan tuah khawh?

• Jehovah a ziaza hna le a lam hna kha langhter awkah aa tlak ngaimi khua tuaktanternak kha zeitindah kan hman khawh?

• Khoika ahdah aa tlak ngaimi bianabia hna kha kan hmuh khawh?

[Cahmai 15nak i Hmanthlak]

Hi Bianabia Hna Hi Na Cinken Maw?

A tanglei i hmual a ngeimi bianabia hna cu tlawmpal lawng an si. Cherhchanmi ah zoh law bianabia nih Bia i ruahnak hna kha zeitindah hmual a ngeihter tikha zoh hna.

• Thil sertupa sin in cawnpiaknak cauk bantuk in, Baibal cu a kan sertu sinin cawnpiaknak le lamhruainak cauk pakhat a si.​—⁠Zungzal nunnak ah a Hruaimi Hngalhnak, cahmai 7.

• Na ruahnak langhter cu bawlung pakhat hlawnh bantuk a si. Din tein na hlonh khawh asiloah fahnak a chuahter khomi in fakpiin na cheh khawh.​—⁠Zungzal nunnak ah a Hruaimi Hngalhnak, cahmai 144.

• Na pum an in hlai hnu ah, an in ṭhitnak hri hna cu na hma pehnak i timhnak pakhat kha an tlin ter. A caan a zat hlanin phoihnak nih harnak a chuahter khawh. Cubantukin, minung cozah nawlngeihnak cu Pathian Pennak nih vawlei kha tlamtling tein a uk dih hlan tiang, minung bu hna kha hmunkhat ah komhnak timi timhnak caah rian a ṭuan ve. Anmah kha ralchanh cu a caan a zat hlan in hma ṭhitnak hri phoih he tahchunh khawh a si.​—⁠Zungzal nunnak ah a Hruaimi Hngalhnak, cahmai 133.

• Lung cung i an ṭialmi lungca bantukin, sualnak cu hmasa bik kan nu le kan pa an ci chungah thukpiin khenhchih a si cang.​—⁠Zungzal nunnak ah a Hruaimi Hngalhnak, cahmai 58.

• Coktarh cu ramvaipa caah san a tlaih bantukin thlarau thiamnak cu khuachia pawl caah san a tlai ve. Coktarh nih saram kha an thinlung an lak hna.​—⁠Zungzal nunnak ah a Hruaimi Hngalhnak, cahmai 111.

• Electrik dah cu a kalter i rian a ṭuantermi thilri a sining kha a ngeih lo bantukin, nunnak thazang zong cu amah nih a nunter i a cawlcanghtermi thilnung a sining zeihmanh a ngei ve lo.​—⁠Zungzal nunnak ah a Hruaimi Hngalhnak, cahmai 82.

• Dawtnak langhter awkah cawn cu holh thar pakhat cawn bantuk a si.​—⁠Vennak Innsang, February 15, 1999, cahmai 18, 22-3.