Kan Zung Web Site kha Phungchimnak ah Hmang

Kan Web Site Zoh awk Forh hna: Kanmah he biaruah le kan cauk lak a duh tuk lomi cheukhat cu an inn ah jw.org in Jehovah Tehte Hna kong kherhhlai an duh. Cucaah caan aa rem tik paoh ah mi kha kan Web site kong chim hna.

Biahalnak Lehnak: A caan ah inn-ngeitu le biatak hngalh a duhmi asiloah kan theihhngalh nih Jehovah Tehte Hna kong asiloah kan zumhnak kong a kan hal ko lai. Mah tikah mobile phone asiloah computer hmang in a phi kha hmuhsak colh. Cherhchanmi Baibal cang kha Baibal cauk in rel cu a ṭha bik a si tawn. Internet rawnmi mobile thilri na ngeih lo ahcun hngalh a duhmi kha amah tein jw.org ah zeitindah a phi kawl khawh a si kha chim.—“Baibal Cawnpiakmi” timi na awn hnuah “Baibal Biahalnak A Phi” kha awng asiloah “Kan Kong” timi na awn hnuah “Atu le Atu an Halmi Biahalnak” kha awng.

Na Theihhngalh kha Capar asiloah Cauk Kua: Download tuahmi PDF asiloah EPUB kha e-mail ah rawng. Asiloah cauk awkhumhmi kha CD ah download tuah. Tipil a ing rih lomi pakhatkhat kha electronic cauk, brochure asiloah mekazin a uk tling in na kuat fatinte mah kha report na pek tikah telh khawh a si. Asinain kan min chim lo in le tampipi in cun kuat awk a si lo. Cun Internet Web site dang zong ah rawn awk a si lo.—“Cauk” timi kha awng.

Jehovah Tehte Hna kong Hmanung bik Thawngpang kha Hmunsak: Mah nih Baibal a cawngmi le na lenmi hna kha vawleicung pumpi kan rianṭuannak le kan lungrualnak sunsak chin awk a bawmh hna lai. (Salm 133:1)—“News” kha awng.

[Cahmai 5 i Hmanthlak]

Hitin Tuah Chun

1 “Cauk” timi kha hmet law download tuah na duhmi kha thim, cun rel awk asiloah ngaih awkah na duhning kha thim law hmet.

2 MP3 kha na hmeh ahcun awkhumhmi capar pawl a lang lai. Capar pakhat download tuah awkah a biatlangpi kha hmet asiloah online in ngaih awkah ▸ kha hmet.

3 Cauk kha holh phun dang in download tuah na duh ahcun hika ah holh i thim.