CAWN AWK CAPAR 23
Nulepa Hna—Jehovah Dawt Awkah Nan Fale Kha Bawm Hna U
“Bawipa na Pathian cu na lungthin dihlak le na ruahnak dihlak le na nunnak dihlak in na dawt lai.”—MATT. 22:37.
HLA 134 Pathian Pekmi Fale
LANGHTERNAKa
1-2. Thil sining aa thlen tikah Baibal phunglam cheukhat cu kan caah zeicah sullam a hun ngeih deuh?
ṬHITUMNAK ni ah aa dawh tukmi monu le mopa cu ṭhitumnak kong he aa tlaiin Baibal hrambunhmi phungchimnak kha an ngai. Mah phungchimnak ah an theihmi Baibal phunglam hna cu an caah a thar a si lo. Asinain atu thawkin mah phunglam hna cu an caah a biapi tuk. Zeicah? Aa ṭhiummi nuva in mah phunglam kha an zulh a hauh caah a si.
2 Khrihfa nuva hna zong nulepa an hun si tikah cutin a si ve. Kum tampi chung fale zohkhenhnak kong he aa tlaimi phungchimnak tampi kha an theih ko lai. Asinain atu ah mah phunglam hna cu an caah a biapi tuk cang. Anmah theng nih fa an hun ngei lai i an zohkhenh cang hna lai. Mah cu rian ngan taktak a si! Cucaah kan nunnak ah thil sining aa thlen tikah mah Baibal phunglam hna cu kan caah a biapi tukmi an hung si. Mah cu Jehovah a biami hna nih Baibal an relnak a ruang pakhat a si. Israel siangpahrang hna cu an “nun chung vialte” Baibal phunglam kong ṭha tein ruah awkah fial an si.—Deut. 17:19, 20.
3. Hi capar ah zei kong dah kan i ruah hna lai?
3 Nulepa hna, Khrihfa pakhat nih a ngeih khawhmi, a sunglawi tukmi tinvo sung hna lakah pakhat cu Jehovah kong fale cawnpiak kha a si. Asinain Pathian kong he aa tlaimi biatak kong cawnpiak lawng si loin lungtak tein Pathian an dawt nakhnga bawmh nan duh ko hna lai. Nan fale nih duhsah tein Jehovah an dawt nakhnga zeidah nan tuah khawh? Hi capar ah nulepa caah bawmtu a simi Baibal phunglam pali kong kan i ruah hna lai. (2 Tim. 3:16) Cun Khrihfa nulepa cheukhat nih Baibal ruahnak cheuhnak an zulhnak thawngin ṭhathnemhnak an hmuh ning kong zong kan i ruah hna lai.
Nulepa A Bawm Khomi Baibal Phunglam Pali
Jehovah lamhruainak kawl in zohchunh awk ṭha na chiah peng ahcun na fale cungah zei ṭhatnak dah a um lai? (Catlangbu 4, 8 zoh)
4. Fale nih lungtak tein Jehovah an dawt nakhnga nulepa caah bawmtu a simi Baibal phunglam pakhat cu zeidah a si? (Jeim 1:5)
4 Phunglam 1: Jehovah lamhruainak kha kawl. Na fa nih Jehovah a dawt nakhnga bawmh awkah na herhmi fimnak kha Pathian sinah hal. (Jeim 1:5 rel.) Pathian cu a ṭha bikmi ruahnak cheutu a si. Cutin kan chim khawhnak a ruang ṭha tampi a um. A kong pahnih in kan i ruah hna lai. Pakhatnak, Jehovah cu nulepa dirhmun ah hmuhtonnak a ngei bikmi a si. (Salm 36:9) Pahnihnak, Pathian pekmi ruahnak cheuhnak nih a zungzal in ṭhatnak a chuahter.—Isa. 48:17.
5. (a) Jehovah bupi nih nulepa kha zeitindah a bawmh hna? (b) Video ah kan hmuh bantukin fale cawnpiaknak kong he aa tlaiin Unaupa Amorim le a nupi sinin zeidah na cawn khawh?
5 Fale nih Jehovah an dawt nakhnga cawnpiaknak ah nulepa a bawm khomi Baibal hrambunhmi thlarau rawl tampi kha Jehovah nih Baibal le a bupi hmangin a pek hna. (Matt. 24:45) Tahchunhnak ah, kum tampi chung I Hlau! mekazin ah chuahmi “Chungkhar Caah Bawmtu” timi aa tlaimi capar ah a ṭhami ruahnak cheuhnak hmuh khawh a si i atu ahcun kan website ah rel khawh a si cang. Cun jw.org/cnh ah a ummi video tampi nih nulepa kha Jehovah ruahnak cheuhnak ningin fale cawnpiak awkah a bawmh khawh hna.b—Ptb. 2:4-6.
6. Pa pakhat nih a nupi he Jehovah bupi sinin an hmuhmi lamhruainak kong he aa tlaiin zeitindah a hmuh?
6 Jehovah nih a bupi hmangin a bawmh hna caah nulepa tampi nih an i lawmhnak kha an langhter. Joe timi pa pakhat nih hitin a ti: “Ka fale pathum biatak chung um dingin bawmh cu a fawimi rian a si lo. Jehovah nih a kan bawmh nakhnga ka nupi he thla kan cam peng. Mah tikah kan tonmi thil sining tawnghtham awkah a kan bawmmi capar pakhat asiloah video pakhat kha amahle caante kan hmuh lengmang. A zungzal in Jehovah lamhruainak kha kan i bochan.” Joe le a nupi nih an fale kha Jehovah he pehtlaihnak ṭha ngeih awkah mah capar le video hna nih a bawmh hna ti kha an hngalh.
7. Nulepa nih zohchunh awk ṭha chiah cu zeicah a biapit? (Rom 2:21)
7 Phunglam 2: Zohchunh awk ṭha si. Fale nih nulepa kha ṭha tein an zoh hna i an i zohchunh hna. A tlingmi nulepa an um lo ti cu a hmaan ko. (Rom 3:23) Asinain nulepa nih an fale caah zohchunh awk ṭha an chiah awk a si. (Rom 2:21 rel.) Fale kong he aa tlaiin pa pakhat nih hitin a ti: “Fale cu zei paoh a dawp khomi thil bantuk an si.” Hitin a ti chap: “Kan cawnpiakmi hna ningin thil kan tuah lo tikah an kan ti men lai.” Cucaah kan fale nih Jehovah daw hna seh ti kan duh ahcun kanmah theng nih Jehovah kan dawtnak kha fehter in kan langhter a hau.
8-9. Andrew le Emma chimmi in zeidah na cawn khawh?
8 Fale nih Jehovah an dawt nakhnga nulepa nih cawnpiak khawh ning lam tampi a um. Kum 17 a simi unaupa Andrew chimmi bia hi zohhmanh: “Ka nu le ka pa nih thlacam a biapit kha a zungzal in an ka cawnpiak. Keimah tein thla ka cam cang tiah ka ti hmanhah ka Pa nih zan fatin thla a ka campi. Ka nu le ka pa nih ka naunu he ‘Jehovah sinah nan duh tik paohah thla nan cam kho’ tiah an kan ti. Mah ruangah thlacamnak cu ka caah a biapi tukmi a hung si. Atu ah Jehovah cu a ka dawmi Pa pakhat in hmuh le a sinah thlacam cu kaa fawih cang.” Nulepa hna, Jehovah nan dawtnak nih nan fale kha Jehovah dawt dingin a bawmh khawh hna ti kha philhhlah u.
9 Emma kong hi ruathmanh. A pa nih a kaltak hna lioah leiba tampi zong a chiahtak hna. Emma nih hitin a ti: “Ka nu cu tangkalei ah a chambau caan tampi a um ko nain Jehovah nih a salle a zohkhenh hna ning kong kha a chim zungzal. Ka nu nih a zumh taktakmi ningin a nunmi kha ka hmuh. Ka nu cu a ka cawnpiakmi ningin a nung.” Mah in zeidah kan cawn khawh? Thil sining a har caan hmanhah nulepa nih an fale kha tuahsernak in an cawnpiak khawh hna.—Gal. 6:9.
10. Israel nulepa hna nih an fale he Jehovah kong kha zeitik ah dah an i ruah khawh? (Deuteronomi 6:6, 7)
10 Phunglam 3: Na fale kha hmaan tein chawnbia hna. Jehovah nih hlanlio Israel mi kha hmaan tein an fale amah kong cawnpiak awkah lamhruainak a pek hna. (Deuteronomi 6:6, 7 rel.) Nulepa hna nih an fale chawnhbiak awk le an fale nih lungthin takin Jehovah an dawt nakhnga bawmh awkah caanṭha tampi an ngei. Tahchunhnak ah, Israel mino pa pakhat nih a pa kha rawl ṭuan rian bawmh awkah a caan tampi a hman men lai. Cun a farnu zong nih a caan tampi hmangin a nu kha thilṭhit, thiam tah le a dang inn rian ti bantuk kha a bawmh men lai. Nulepa le fale cu rian an ṭuanṭi caah a biapimi a kong tampi an i ruah kho. Tahchunhnak ah, Jehovah a ṭhat ning le an chungkhar a bawmh hna ning kong an i ruah kho.
11. Khrihfa nulepa caah an fale he i chawnhbiak khawhnak caanṭha pakhat cu zeidah a si?
11 Tuchan thil sining cu a hlan thil sining he aa thleidang tuk. Ram tampi ah nulepa le fale cu caan an hmangṭi kho hna lo. Nulepa cu rian an ṭuan i an fale cu sianginn an kai. Cucaah nulepa nih an fale he i chawnh awkah a caan an kawl a hau. (Efe. 5:15, 16; Fil. 1:10) Cutin tuah khawh awkah chungkhar pumhnak cu caanṭha a si. Mino unaupa Alexander nih hitin a ti: “Ka pa cu chungkhar pumhnak caah timhtuahnak a ngei peng i mah ah kan bau laimi zong a duh lo. Kan dih tikah bia kan i ruah hna.”
12. Chungkhar lu nih chungkhar pumhnak a tuah tikah zeidah aa cinken awk a si?
12 Chungkhar lu na si ahcun na fale nih chungkhar pumhnak ah an i nuamh nakhnga zeidah na tuah khawh? Nunnak Kha Zungzal In I Nuamhpi! timi cauk thar kha nan cawn khawh. Mah cauk nih na fale he ṭha tein bia i ruah awkah aan bawmh lai. Na fale nih an intuarnak le an ruahnak kha zalong tein chim hna seh ti na duh ahcun chungkhar pumhnak kha cawnpiaknak asiloah chimhhrinhnak caan ah hmang hlah. Cun na fale nih Baibal phunglam he aa tlak lomi an hmuh ning kong an chim tik zongah a hleihluat tuk in lehrulh hna hlah. Mah canah lungthiang tein an intuarnak an in chimh caah i lawm law zalong tein cutin an chim peng nakhnga thape hna. Na fale intuarnak taktak na theih lawngah a ṭha bik in na bawmh khawh hna lai.
Nulepa nih Jehovah sining kong he aa tlaiin an fale an cawnpiak hna tikah sernak kong kha zeitindah an hman khawh? (Catlangbu 13 zoh)
13. An fale nih Jehovah he a ṭhami pehtlaihnak an ngeih nakhnga bawmh awkah nulepa nih a dang zei caanṭha dah an ngeih?
13 Nulepa hna, nan fale nih Jehovah he a ṭhami pehtlaihnak an ngeih nakhnga bawmh awkah caanṭha kawl u. Dawtnak a ngeimi kan Pathian kong chimh awkah Baibal cawnpiaknak caan theng kan hngah a hau lo. Lisa timi nu pakhat nih hitin a ti: “Jehovah kong kan fale cawnpiak awkah kan pawngkam ah a ummi thil vialte kha kan hman. Tahchunhnak ah, kan uico nih kan fale a nuamhter tik hna ah kan fale kha Jehovah cu aa nuammi Pathian a si i kan i nuamh nakhnga thil a kan tuahpiak ti kha mah nih a langhter tiah kan chimh hna.”
Nulepa hna, nan fale hawile kha nan hngal hna maw? (Catlangbu 14 zoh)d
14. An fale nih a ṭhami hawikom an i thim khawh nakhnga bawmh cu nulepa caah zeicah a biapit? (Phungthlukbia 13:20)
14 Phunglam 4: Na fale kha hawikom ṭha thim awkah bawm hna. Kan hawile nih a ṭhatnak he, a chiatnak he kan cungah huham an ngei ti kha Baibal nih fiang tein a langhter. (Phungthlukbia 13:20 rel.) Nulepa hna, nan fale hawikom kha nan hngal hna maw? Anmah he i tong in caan nan hmangṭi bal maw? Jehovah a dawmi hna he nan fale nih an i komh nakhnga bawmh awkah zeidah nan tuah khawh? (1 Kor. 15:33) Jehovah he a ṭhami pehtlaihnak a ngeimi unau cheukhat kha nan chungkhar he caan hmanṭi dingin nan sawm hnanak thawngin nan bawmh khawh hna.—Salm 119:63.
15. Fale nih a ṭhami hawikom an ngeih nakhnga bawmh awkah nulepa nih zeidah an tuah khawh?
15 Tony timi pa pakhat hmuhtonnak kong hi ruathmanh. An fale nih a ṭhami hawikom an hmuh nakhnga a nupi he an bawmh hnanak kong kha hitin a chim: “Kum tampi chungah kumkhua le hnulei sining aa khat lomi unau hna kha kan inn ah len kan sawm hna. Rawl kan eiṭi hna i chungkhar pumhnak zong kan tuahṭi hna. Mah cu Jehovah a dawmi le lunglawm tein a rian a ṭuanmi hna he i hngalh khawhnak lam ṭha pakhat a si. Kan sawmmi hna cu peng zohkhenhtu, missionary le a dang unau pawl an si. An chimmi hmuhtonnak, lungthawhnak an langhtermi le Jehovah rian ah an i zuamnak hna in kan fale nih Jehovah he a ṭhami pehtlaihnak an ngeih nakhnga tampi an cawn. Mah nih Jehovah naih awkah a bawmh hna.” Nulepa hna, nan fale nih a ṭhami hawikom an ngeih nakhnga bawmh awkah biakhiahnak tuah u.
Naa Ruahchannak Kha Hlaw Hlah!
16. Na fa nih Jehovah biak ka duh lo tiah a ti ah tah zeitin?
16 A ṭha bik in naa zuam ko nain na fa nih Jehovah biak ka duh lo a ti ah tah zeitin? Nulepa pakhat in ka hlawh a tling lo tiah ruat hlah. Jehovah nih na fale i telin kan dihlak in Jehovah kan bia lai maw, bia lai lo timi kongah zalong tein thimnak nawl a kan pek. Na fa nih Jehovah kaltak dingin bia a khiah hmanhah nikhatkhat ah a kir ṭhan te lai timi naa ruahchannak kha hlaw hlah. Fapa tlau tahchunhnak kong kha i cinken. (Luka 15:11-19, 22-24) Mah mino pa nih thil ṭhalo tampi a tuah ko nain a donghnak ah a rak kir ṭhan. Mi cheu nih “mah cu tuanbia men a si” tiah an ti men lai. “Mah cu a taktak ah a cang khomi a si maw?” A cang khomi a si! Minopa Elie zong cutin a rak si.
17. Elie hmuhtonnak nih zeitindah tha aan pek?
17 A nu le a pa kong he aa tlaiin Elie nih hitin a ti: “Ka nu le ka pa nih Jehovah dawt awk le Baibal sunsak awkah an si khawh chungin an ka bawmh. Asinain kumhra fai ka si tikah ka rak ralchanh hna.” Elie cu nunning pahnih in a nung i a nu le a pa nih thlaraulei bawmh awk an i zuammi vialte kha a rak cohlang lo. Inn in a chuah hnuah thil ṭhalo pawl a hun tuah. Cutin a si ko nain a caan ah a hawikom pakhat he Baibal kong an i ruah tawn. Elie nih hitin a ti: “Ka hawipa sin Jehovah kong ka chim deuhdeuh tikah Jehovah kong tam deuh in ka ruahmi kha ka hun i hngalh. Ka nu le ka pa nih ka lungthin chungah an rak tuhmi Baibal biatak thlaici cu duhsah duhsah in a hung ṭhang.” A hnuah Elie cu biatak ah a kir ṭhan.c A ngakchiat lio tein Jehovah dawt awkah an rak cawnpiak caah a nu le a pa cu zeitluk in dah an i lawmh lai!—2 Tim. 3:14, 15.
18. Fale nih Jehovah an dawt nakhnga fakpi in aa zuammi nulepa kha zeitindah na hmuh hna?
18 Nulepa hna, Jehovah nih amah a biatu ding chanthar minung zohkhenh ding timi a sunglawi tukmi laksawng aan pek hna. (Salm 78:4-6) Mah cu a fawimi rian a si lo. Na fa bawmhnak caah na si khawh chungin naa zuamnak cungah thangṭhat kan in duh! Na fale kha Jehovah dawt awk le a nawl ngaih awkah na si khawh chungin na bawmh peng hna ahcun dawtnak a ngeimi vancung kan Pa aa lawm tuk lai ti kha na zumh khawh.—Efe. 6:4.
HLA 135 Jehovah Nawlnak: Ka Fapa Fim Tuah
a Khrihfa nulepa nih an fale kha an dawt tuk hna. An fale nih an herhmi pumsalei le lungthinlei zohkhenh awkah fakpi in an i zuam. A biapi deuhmi cu an fale nih Jehovah an dawt nakhnga an si khawh chungin an i zuam. Cutin tuah khawh awkah nulepa caah bawmtu a simi Baibal phunglam pali kong kha hi capar ah kan i ruah hna lai.
b Jehovah Cawnpiaknak Ningin Innchungkhar Dirhnak timi video kha jw.org/cnh ah zoh.
c 2012, April 1, Vennak Innsang capar i “Baibal Nih An Nunning A Thlen” timi ah zoh.
d HMANTHLAK FIANTERNAK: Pa pakhat nih a fa hawile kong hngalh awkah a fapa le a hawipa he basketball aa celh lio.