Baibal Chimchungbia A Tlintermi Ramkhellei Tuai Urnak
Tuchan mipawl cu ramkhellei he aa tlaiin lung i khah lonak a phunphun an ngei. Nifatin an nunnak a hnorsuangmi upadi hna kha cohlan an duh lo i an ruahnak kha puarhrang ngai in an langhter. Cozah ah upadi sertu hna le a dang nawlngeitu hna cu an lung aa khah lo caah pakhat le pakhat an ruahnak kha cohlan an duh lo. Mah bantuk lung i khah lonak nih ramkhel tuai urnak kha a chuahter i cozah rianṭuan khawhnak kha ri a ngeihter.
United States le Britain (United Kingdom) cu a hleiin aa tuai ur tuk. Zeicah tiah Baibal nih mah ram pahnih ah tuai urnak a um lai i, cun mah caan ah Pathian cozah nih vawleicung thil sining vialte a thlen dih lai tiah a chimchung.
“Ni hmanung bik” ah ramkhellei tuai urnak
Daniel Baibal ah lung cawlcangh awk ngai a simi chimchungbia aa tel. Mah chimchungbia ah Pathian nih “hmailei ah zei thil dah a um lai” ti kha a rak phuan, Daniel nih mah bia a rak ṭial tikah hmailei ah minung caah a biapimi thlennak a um hngami caan kha a chim duhmi a si.—Daniel 2:28.
Mah chimchungbia cu Pathian nih Babilon siangpahrang mang ah a rak langhtermi a si. A mang ah siangpahrang nih thil a phunphun in sermi milem nganpi kha a hmuh. A hnuah profet Daniel nih mah milem cu a lu in a ke tiang zei sullam dah a ngeih ti kha a fianter. Mah milem nih minung tuanbia ah a rak um i a tlau ṭhan dingmi vawleicung i nawl a ngei bikmi uknak pawl kha a aiawh hna ti zong in a fianter.a A donghnak ah milem cu Pathian dirhmi Pennak asiloah cozah a aiawhmi lungpi nih a den lai i hrawh dih cikcek a si lai.—Daniel 2:36-45.
Chimchungbia ning in Pathian Pennak nih minung cozah vialte kha a airolh lai. Mah Pennak cu Jesuh nih “na Pennak tlung ko seh” tiah thlacam ding in a zultu pawl a cawnpiakmi Pennak he aa khat.—Matthai 6:10.
Asinain Baibal i khoika zawn ah dah ramkhellei tuai urnak kong a chimchung? Milem i a ke cu “thir le tlak aa cawhmi” a si ti kha i cinken. (Daniel 2:33) Mah aa cawhmi cu milem i a dang a pum cheubang ser a sining he aa khat lo—phunhnih cawh in sermi a si. Mah nih a dang uknak phun hna he aa dangmi uknak pakhat a um lai ti kha a langhter. Zeitin lam in dah a si khawh? Daniel chimchunbia nih hitin a fianter:
Chimchungbia ning in milem ke nih a aiawhmi vawlei nawlngeitu cu ramkhel buaibainak a tong lai. A uknak tang i a ummi hna ruang ah a ṭhawnnak cu a chunglei in a der lai, bochan khawh a si lai lo.
Daniel chimchungbia tuchan ah a tling
Milem i a ke nih tuchan kan vawlei ah nawl a ngei bikmi uknak, phundang in cun a ṭangṭimi US le Britain uknak kha a aiawh. Tuchan thil sining nih mah bia cu a hmaan ti kha zeitindah a langhter?
Milem i a ke cu “a cheu thir, a cheu tlak” in ser a si caah a fek lo. (Daniel 2:42) Tuchan ah US le Britain cu an ram chungmi pawl an lung aa khah lo caah an nawl ngeihnak cu a hun der thluahmah. Tahchunhnak ah, mah ram hna ah ram chung buaibainak a um i mipi nih an covo caah fakpi in duhlonak an langhter. Mipi nih an thimmi nawlngeitu hna zong a biapimi thil sining hna ah hnatlaknak an hmu kho lo. An rammi pawl cu an lung aa rual lo caah kaphnih cozah ning in tuah an i timhmi thil hna an tuah kho lo.
Daniel dal 2 ah vawleicung nawl a ngei bikmi ram hna kha a chimchung
Daniel chimchungbia kong a dikthliar in le tuchan ah a tlin ning kha tamdeuh in i ruah hna u sih:
Chimchungbia: “Cu pennak cu aa ṭhenmi pennak a si lai . . . thir ṭhawnnak a tlawmpal cu a ngei lai.”—Daniel 2:41.
A Sullam: US le UK cu an ram chung ah ramkhellei ṭhencheunak a tam tuk nain a ṭhawng bikmi ralkapbu an ngei. Cucaah a fek ngaimi thir bantuk in an tuahmi thil vialte nih vawleicung pumpi a hnorsuan khawh.
A Tlinning
2023 ah ram pakhat cio nih raldohnak timhtuahnak ah tangka zeizat dah an hman timi cazin an tuah. Cazin ning in US le UK nih an hmanmi tangka cu anmah a changtu ram 12 nih an hmanmi tangka fonhmi nakin a tam deuh.—Stockholm International Peace Research Institute.
“UK le US kar i pehtlaihnak cu . . . vawleicung pumpi ah a ummi ram vialte lakah a fek bikmi a si. . . . Rian kan ṭuanṭi, pakhat le pakhat kan i bawm i ral zong kan doṭi.”—Strategic Command, U.K. Ministry of Defence, 2024, April.
Chimchungbia: “A kedong cu a cheu thir, a cheu tlak an si bantuk khan cu pennak cu a ṭhawng lai nain fawi tein den khawh a si lai.”—Daniel 2:42.
A Sullam: US le UK ralkapbu cu zeitluk in an ṭhawn hmanh ah an cozah nih a chiahmi dingrep (democracy) ruang ah duh paoh in rian an ṭuan kho lo. Rammi tam deuh sinin hnatlaknak an hmuh lo ahcun cozah nih aa tinhmi ning in a tuah kho lo.
A Tlinning
“Ramkhellei kong hlathlaitu cheukhat nih US cu mi nih an i ruahchan tluk in rian a ṭuan kho lo tiah an ti. Tahchunhnak ah, vawleicung pumpi ah himnak a chuahter kho lo i chawlehnak zong a ṭhanchoter kho lo.”—“The Wall Street Journal.”
“UK ah ramkhellei buaibainak cu a hlan nakin a karh chinchin. Cucaah nawlngeitu pawl cu an lung a vaivuan i rammi pawl bawmh awkah a herh ning in rian an ṭuan kho lo.”—Institute for Government.
Chimchungbia: “Ram uktu hna nih cun . . . pakhat le pakhat i fonh kha an i zuam lai, sihmanhsehlaw . . . an i fonh kho ve lai lo.”—Daniel 2:43.
A Sullam: Rammi pawl cu cozah cung ah huham an ngei men lai nain nawlngeitu pawl siseh, rammi pawl siseh hna ngamnak taktak an hmu lo.
A Tlinning
“Tuchan ah US mi nih ramkhellei le nawlngeitu pawl kha a chiatnaklei in an hmuh hna.”—Pew Research Center.
“A luancia kum 50 lio bantuk in UK rammi pawl cu an cozah le nawlngeitu pawl cung ah zumhnak an ngei ti lo.”—“National Centre for Social Research.”
Hmailei Kong Daniel Chimchungbia
Daniel chimchungbia ning in a ṭangṭimi US le UK cu vawleicung ah nawl a ngei bikmi uktu an si lioah Pathian Pennak nih minung cozah vialte a airolh lai.—Daniel 2:44.
Biathlam Baibal i a dang chimchungbia ning in “vawleicung pumpi siangpahrang hna” cu Armageddon timi a “A Ṭhawng Bik Pathian ni lianngan ni i raldohnak” ah Jehovahb Pathian doh awkah an i pum lai. (Biathlam 16:14, 16; 19:19-21) Mah raldohnak ah Jehovah nih minung cozah vialte a hrawh hna lai. Mah tikah Daniel chimchungbia i milem nganpi nih a aiawhmi uknak pawl cu pakhat hmanh a taang ti lai lo.
Tam deuh in hngalh awkah “Armageddon Raldohnak Timi Cu Zeidah A Si?” timi capar kha zoh.
Ramkhellei Tuai Urnak Kong Daniel Chimchungbia In Ṭhatnak Hmu
Baibal nih US le UK ah a chuak hngami ramkhellei tuai urnak kha hmaan tein a chimchung. Mah kong na hngalhmi nih tuchan i na theihmi thawngpang cung ah a tlarimi hmuhnak ngeih awkah aan bawmh lai.
Jesuh nih a zultu pawl kha ramkhellei i khoikalei hmanh ah ṭan lo ding in zeicah nawl a pek hna ti kha na hun i fiang lai. (Johan 17:16) Cun Pathian nih a Pennak caah a thimmi Siangpahrang Jesuh nih “ka Pennak cu hi vawlei he aa pehtlai lo” tiah a chimnak a ruang zong na hun hngalh lai.—Johan 18:36.
A rauhhlan ah Pennak nih sifah harnak a donghter lai i daihnak a chuahter lai timi Pathian biakam in hnemhnak taktak na hmu lai.—Biathlam 21:3, 4.
Ramkhellei buaibainak ruang ah hi vawlei a rawk lai tiin lungretheih a hau ti lai lo. Hmailei ruahchannak zong na ngei lai.—Salm 37:11, 29.
Daniel Chimchungbia ah milem nganpi a ke nih a ṭangṭimi US-UK uknak kha a aiawh. Mah cu hmanung bik minung cozah a si lai. Mah cozah hrawh a si tikah a tlingmi Pathian Pennak nih vancung in a uk lai.
Pathian Pennak cu minung caah zei sullam dah a ngeih ti kha tam deuh in hngalh awkah Pathian Pennak Cu Zeidah A Si? timi video kha zoh.
a “Daniel Chimchungbia Nih A Langhtermi Vawleicung Nawl A Ngei Bikmi Uknak Hna” timi rinli kulh kha zoh.
b Jehovah timi cu Pathian i pumpak min a si. (Salm 83:18) “Jehovah Cu Ahodah A Si?” timi capar kha zoh.