Pennak Dirh A Si Cang!

1. Zeidah kan zumh i zeicah?

TUCHAN vawlei i buaibainak hna na hmuh tikah thil sining cu a ṭha deuh te lai tiah zumh awkah naa harh maw? Chungkhar mi pawl cu pakhat le pakhat an i daw ti lo. Mi pawl cu zaangen a hmangmi, anmah zawn lawng aa ruatmi le a puarhrangmi an hung si. Mi tampi nih nawlngeitu pawl kha an zum kho ti hna lo. Asinain mah nih thil sining hna cu a ṭha deuh te lai timi zumhnak aan ngeihter khawh. Zeicah? A ruang cu mi pawl cu “ni hmanung bik” caan he aa tlaimi chimchungbia ningin an nun caah a si. (2 Tim. 3:1-5) Mah chimchungbia a tlinmi kha lungthin ṭha a ngeimi nih an cohlan. Cun Pathian Pennak ah Jesuh Khrih cu Siangpahrang a ṭuan cang ti kha chimchungbia tlinnak nih a langhter. Asinain mah cu Pennak kong he aa tlaimi chimchungbia tampi lakah pakhat lawng a si. Nai kum hna ah a tlingmi a dang chimchungbia pawl i ruahnak nih kan zumhnak a fehter chin lai.

2. Hi capar ah zei kong dah kan i ruah hna lai, zeicah? (A phaw hmanthlak in a phi pe.)

² Hi capar ah (1) zeitik ah dah Pennak dirh a si ti hngalh awkah a kan bawmmi chimchungbia, (2) vancung ah Jesuh cu Pathian Pennak i Siangpahrang a si cang ti hngalh awkah a kan bawmmi chimchungbia hna le (3) Pathian Pennak i ral pawl hrawh an si lai ning a langhtermi chimchungbia hna kha kan i ruah hna lai. Hmanthlak pehmi a cheuchum tete cu an i rup dih bantukin Daniel le Biathlam cauk i chimchungbia hna zong pakhat le pakhat an i rup dih, mah nih Jehovah rikhiahmi caan hna i khoika zawn ah dah kan nung ti kha hngalh awkah a kan bawmh.

Pennak Dirh A Si Caan Hngalh Khawh Ning

3. Daniel 7:13, 14 i chimchungbia nih Pathian Pennak i Siangpahrang kong he a tlaiin zeidah a langhter?

³ Daniel 7:13, 14 i chimchungbia nih Jesuh Khrih cu Pathian Pennak ah a ṭha bikmi Uktu a si lai ti kha a langhter. Miphun kip chungin mi hna nih lunglawm tein “a rian kha an ṭuan” lai i ahohmanh nih Uktu cu an airolh lai lo. Daniel cauk i a dang chimchungbia pakhat nih caan sarih a dih hnuah Jesuh nih mah Pennak ah uk hram a thawk lai tiah a chimchung. Jesuh Siangpahrang a hung si caan cu hngalh khawh a si maw?

4. Khrih Siangpahrang a hung si kum hngalh awkah Daniel 4:10-17 nih zeitindah a kan bawmh? (A tanglei fianternak zong zoh.)

⁴ Daniel 4:10-17 rel. “Kum sarih” asiloah caan sarih nih kum 2,520 kha a aiawh. Mah caan cu Babilon nih Jerusalem i Jehovah bawiṭhutdan ah a ṭhumi hmanung bik siangpahrang a ṭhumhnak BC 607 in aa thawk. Cun mah caan cu Jehovah nih “siangpahrang a si ding taktak” Jesuh kha Pathian Pennak Siangpahrang in rian a pek kum, AD 1914 ah a dong.b—Ezek. 21:25-27.

5. “Kum sarih” kong chimchungbia in ṭhatnak kan hmuhmi pakhat cu zeidah a si?

⁵ Mah chimchungbia in zeitindah ṭhatnak kan hmuh khawh? “Kum sarih” kong hngalhnak nih Jehovah cu a biakam kha amahle caante ah a tlinter ti kha a kan zumhter. Jehovah nih a Pennak dirh awkah a caan ri a khiah bantukin a dang chimchungbia vialte zong ri a khiahmi caante ah a tlinter lai. A si, Jehovah ni cu “pel loin a ra hrimhrim ko lai!”—Heb. 2:3.

Khrih Cu Pathian Pennak Siangpahrang A Hung Si Ti Hngalh Khawh Ning

6. (a) Vancung ah Khrih nih a uk cang ti a langhtermi zei thil sining hna dah vawleicung ah kan hmuh? (b) Biathlam 6:2-8 i chimchungbia nih mah thil sining hna kha zeitindah a fehter?

⁶ Jesuh nih vawleicung a phungchimnak rian a dih lai ah a zultu pawl nih van ah uktu a ṭuan cang ti an hngalh nakhnga a bawmmi vawleicung thil sining kong cheukhat kha a rak chimchung. Jesuh chimmi a kong cheukhat cu raldohnak, mangṭam le lihnin hna an si. Cun “a kenkip ah” ngal-eu zawtnak asiloah zawtnak a tlung lai tiah a chimchung. Mah cu nai ah a tlungmi COVID-19 pulrai nih a hmaan ti kha a langhter. Mah thil sining hna cu Baibal nih Khrih a phanhnak “hmelchunhnak” tiah a timi lakah aa telmi an si. (Matt. 24:3, 7; Luka 21:7, 10, 11) Jesuh nih a thih i vancung a kir hnu, kum 60 leng a rauh hnuah lamkaltu Johan sinah mah thil sining hna a cang lai ti fehter awkah langhnak a pek chap. (Biathlam 6:2-8 rel.) 1914 ah Jesuh Siangpahrang a hung si tikah mah thil sining vialte cu a rak tling.

7. Jesuh Siangpahrang a hun si thawkin zeicah vawleicung ah thilṭhalo a tam tuk?

⁷ Jesuh Siangpahrang a hung si tikah vawleicung thil sining hna cu zeicah a chiat chin? Biathlam 6:2 nih a biapimi kong pakhat a langhter. Jesuh nih Pathian Pennak Siangpahrang a hung si tikah a tuah hmasa bikmi cu ral a dohmi kha a si. Aho he dah an i doh? Satan le a khuachia pawl he an i do. Biathlam dal 12 ningin Satan cu raldohnak ah a sung i a khuachia pawl he vawlei ah thlak an si. Satan cu a thin a hun tuk caah mi pawl kha a doh hna, mah nih vawleicung ah thil “ṭihnung” a chuahter.—Biat. 12:7-12.

8. Pennak kong chimchungbia a tlinmi kan hmuh tikah zeitindah ṭhatnak kan hmuh khawh?

⁸ Mah chimchungbia in zeitindah ṭhatnak kan hmuh khawh? Vawleicung thil sining le minung lungput aa thlen tukmi nih Jesuh cu Siangpahrang a ṭuan cang ti kha hngalh awkah a kan bawmh. Cucaah anmah zawn lawng aa ruatmi le aa huami hna kan hmuh hna tikah lungdongh loin an tuahsernak cu Baibal chimchungbia tlinnak a si ti kha kan i cinken. Pennak cu dirh a si cang! (Salm 37:1) Armageddon a naih chin bantukin vawleicung ah thil ṭihnung a tam chinchin lai tiah kan i ruahchan. (Marka 13:8; 2 Tim. 3:13) Vawleicung ah thil ṭihnung a tamnak a ruang kha hngalh awkah dawtnak a ngeimi vancung kan Pa nih a kan bawmh caah kan i lawm tuk.

Pathian Pennak I Ral Pawl Hrawh An Si Lai Ning

9. Daniel 2:28, 31-35 i chimchungbia nih hmanung bik vawleicung nawlngeitu kong kha zeitindah a langhter, mah cu zeitik ah dah a chuah?

⁹ Daniel 2:28, 31-35 rel. Tuchan ah mah chimchungbia a tlinmi kha kan hmuh. Nebukhadnezzar mang nih Khrih uknak aa thawk hnu, “hmailei ah zei thil dah a um lai” ti kha a langhter. Jesuh i vawlei lei a ral ah Baibal nih a chimchungmi, “a kepha cu a cheu thir, a cheu tlak” a aiawhmi hmanung bik vawleicung nawlngeitu zong aa tel lai. Mah vawleicung nawlngeitu cu a chuak cang. Vawlei Ralpi Inak lioah Britain le United States cu a ṭangṭimi Anglo-American in rian an ṭuanṭinak thawngin a hung chuak. Nebukhadnezzar mang i milem nih a hmasa pennak hna he aa thleidangmi mah vawleicung nawlngeitu he aa tlaimi a kong pahnih zong a chimchung.

10. (a) Daniel chimchungbia nih a ṭangṭimi Anglo-American kong kha zeitindah fiang tein a langhter? (b) Zei bantuk thil ṭihnung dah kan hrial awk a si? (“Tlak Kha I Ralring!” timi rinli kulh ah zoh.)

¹⁰ Pakhatnak, langhnak ah langhtermi a hlan vawleicung nawlngeitu hna he i lo loin Anglo-American ṭanṭinak cu sui asiloah ngun bantukin a hakmi thil in si loin thir le tlak aa cawhmi in langhter a si. Tlak nih zaran mi kha a aiawh. (Dan. 2:43) Tuchan ah thimfung thlaknak, ram mi tinvo hmuh ding i zuamnak, mipi nih duhlonak langhternak, rianṭuantu hna tinvo hmuhnak ti bantuk mipi huham nih mah vawleicung nawlngeitu hruaitu hna kha an duhmi tuah awkah a harter ti kha fiang tein kan hmuh khawh.

11. Vawleicung Nawlngeitu Anglo-American uknak nih donghnak caan ah kan nung timi kan zumhnak kha zeitindah a fehter?

¹¹ Pahnihnak, milem nganpi i a ke nih a aiawhmi Anglo-America cu hmanung bik vawleicung nawlngeitu a si tiah Baibal nih a chimchung. Amah a changtu a dang ramkhel lei nawlngeitu an um ti lai lo. Mah canah Armageddon ah Pathian Pennak nih a dang minung cozah vialte he a hrawh dih cikcek hna lai.c—Biat. 16:13, 14, 16; 19:19, 20.

12. Daniel chimchungbia i zei a dang langhtertu thil nih dah hnemhnak le ruahchannak a kan pek?

¹² Mah chimchungbia in zeitindah ṭhatnak kan hmuh khawh? Daniel chimchungbia nih donghnak caan ah kan nung ti a langhtermi a dang langhtertu thil zong a kan hngalhter. A luancia kum 2,500 ah Daniel nih Babilon hnuah a dang vawleicung nawlngeitu pali cu Pathian miphun cungah huham an ngei lai tiah a chimchung. Mah hnuah Vawleicung Nawlngeitu Anglo-American cu a donghnak a si lai ti zong a langhter. Mah nih hnemhnak a kan pek i a rauhhlan ah Pathian Pennak nih minung cozah vialte a hrawh dih cang lai i vawleicung pumpi a uk cang lai timi ruahchannak zong a kan pek.—Dan. 2:44.

13. Biathlam 17:9-12 i langhtermi “siangpahrang pariatnak” le “siangpahrang pahra” nih zeidah an aiawh, mah chimchungbia cu zeitindah a tlin?

¹³ Biathlam 17:9-12 rel. Vawlei Ralpi Inak nih rawhralnak tampi a chuahter caah donghnak caan he aa tlaimi a dang Baibal chimchungbia zong a tling. Vawlei hruaitu pawl nih vawleicung ah daihnak chuahter an duh. Cucaah 1920, January ah Ramkomh Bu an dirh i 1945, October ah United Nations (UN) in an airolh ṭhan. Mah bu cu “siangpahrang pariatnak” tiah auh a si. Asinain anih cu vawleicung nawlngeitu a si lo. A ṭhawnnak le a huham ngeihnak cu ramkhel lei ṭhawnnak le bawmhnak cungah aa hngat. Baibal nih mah cozah hna kha “siangpahrang pahra” in a langhter.

14-15. (a) Biathlam 17:3-5 nih “a Liannganmi Babilon” kong he aa tlaiin zeidah a langhter? (b) A hmaan lomi biaknak a bawmmi hna cu zeitindah an um lai?

¹⁴ Biathlam 17:3-5 rel. Johan nih Pathian sinin a hmuhmi langhnak ah hlawhhlangnu pakhat kha a hmuh, mah nih vawleicung i a hmaan lomi biaknak a aiawhmi “a Liannganmi Babilon” kha a langhter. Mah langhnak cu zeitindah a tlin? Kum tampi chung a hmaan lomi biaknak cu vawleicung i cozah pawl he naih tein rian an ṭuanṭi i bawmhnak an pek hna. Asinain a rauhhlan ah Jehovah nih ramkhel lei nawlngeitu pawl lungthin chungah ‘aa tinhmi tuah duhnak kha a chiah lai.’ Zeidah a cang lai? Mah ramkhel lei ṭhawnnak a aiawhmi “siangpahrang pahra” nih a hmaan lomi biaknak vialte kha a doh lai i a hrawh lai.—Biat. 17:1, 2, 16, 17.

¹⁵ A Liannganmi Babilon donghnak a nai cang ti kha zeitindah kan hngalh? A phi hngalh awkah hlanlio Babilon khua caah Zufrates Tiva nganpi cu hupphengtu a si timi kong i cinken cu bawmtu a si. Biathlam cauk nih a Liannganmi Babilon a bawmmi mi nuai tampi kha hupphengtu “rilipi” he a tahchunh. (Biat. 17:15) Asinain rilipi cu “a kao” lai ti zongin a langhter, mah nih vawleicung i a hmaan lomi biaknak cu bawmtu a ngei tuk ti lai lo ti kha a langhter. (Biat. 16:12) Tuchan ah mi tampi nih a hmaan lomi biaknak kha an kaltak i an buaibainak tawnghtham awkah hmundang ah bawmhnak an kawlnak thawngin mah chimchungbia cu a tling.

16. UN dirh a sinak le a Liannganmi Babilon hrawh a si lainak kong chimchungbia hngalhthiamnak in zeitindah ṭhatnak kan hmuh khawh?

¹⁶ Mah chimchungbia in zeitindah ṭhatnak kan hmuh khawh? UN dirh a sinak le mi tampi nih a hmaan lomi biaknak an bawmh ti lomi nih donghnak caan ah kan nung ti a langhter. Mi tampi nih a Liannganmi Babilon cu an bawm ti lo nain mah cu a hmaan lomi biaknak hrawhnak a si rih lo. A hmasa ah langhter a si bantukin Jehovah nih UN a bawmmi ramkhel lei ṭhawnnak a aiawhmi “siangpahrang pahra” i lungthin chungah ‘aa tinhmi tuah duhnak kha a chiah lai.’ Mah bu nih a Liannganmi Babilon kha ruahlopi in a hrawh lai caah vawlei mi pawl cu an khuaruah a har lai.d (Biat. 18:8-10) A Liannganmi Babilon hrawhnak nih vawlei a hninh lai i harnak a chuahter lai, asinain Pathian miphun cu i lawmh awkah a tlawm bik a ruang pahnih an ngei lai. Kum tampi chung Jehovah ral a simi a hmaan lomi biaknak cu hrawh a si cang lai i hi chan ṭhalo in kan luat lainak cu a nai cang!—Luka 21:28.

Jehovah Nih Hmailei Ah A Mi A Khamh Hna Lai Timi Zumhnak Ngei

17-18. (a) Zeitindah kan zumhnak kha kan fehter peng khawh? (b) A hnu capar ah zei kong dah kan i ruah hna lai?

¹⁷ Daniel nih “a hmaanmi hngalhnak a karh lai” tiah a rak chimchung. Cutin a si taktak! Kan caan kong he aa tlaimi chimchungbia hna kha atu ah kan hngalhthiam cang. (Dan. 12:4, NW, 9, 10) Mah chimchungbia pawl cu an hmaan tuk caah Jehovah le a Bia Baibal kan upatnak a karh chin. (Isa. 46:10; 55:11) Cucaah Baibal kha teima tein hlathlainak thawngin le midang kha Jehovah he pehtlaihnak ṭha ngeih dingin bawmhnak thawngin na zumhnak kha fehter chin. Jehovah nih amah fek tein aa tlaihmi le aa bochanmi hna kha a huhphenh hna lai i “a tlingmi daihnak” a pek hna lai.—Isa. 26:3.

¹⁸ A hnu capar ah donghnak caan chung i Khrihfabu he aa tlaimi chimchungbia pawl kan i ruah hna lai. Mah chimchungbia pawl a tlinmi nih donghnak caan ah kan nung ti a langhtermi kong zong kan i ruah lai. Kan Siangpahrang Jesuh nih zumhfekmi a zultu pawl a hruai hna ti a langhtermi kong zong kan i ruah lai.