Vancungmi Bawi Bik Mikhael Cu Ahodah A Si?

MIKHAEL timi vancungmi kong hi Baibal nih atu le atu a chim lo. A kong a chim belte ahcun a tuahmi pakhatkhat he a chim chih tawn. Daniel cauk ah Mikhael nih vancungmi ṭhalo pawl kha a doh hna; Judas chungah Satan he bia an i al; Biathlam chungah Khuachia le a vancungmi ṭhalo hna he ral an i do. Makhael nih “Ahodah Pathian He Aa Lo?” timi min ningin Jehovah uknak kha a ven i Pathian ral pawl kha a doh hna. Sihmanhsehlaw Mikhael cu ahodah a si?

A caancaan ah mi pakhat cu min tampi a ngei tawn. Tahchunhnak ah, Jakob cu Israel ti zong in theih a si i lamkaltu Piter cu Simon ti zong in theih a si. (Genesis 49:1, 2; Matthai 10:2) Cu bantuk cun Baibal nih Mikhael cu Jesuh Khrih vawlei cung a rat hlan le vawlei cung a nunnak a dih hnu i a min a si tiah a langhter. Cutin ti a sinak Baibal fianternak kha zoh u sih.

Vancung Mi Lak i Upa Bik. Pathian Bia nih Mikhael kha “Vancung Mi Lak i Upa Bik” ti zong in a langhter. (Judas 9) Mikhael kha vancung mi lak i upa bik tiah ti a si kha ṭha tein i chingchiah. Mah nih khan cu bantuk vancungmi pakhat lawng a um ti kha a langhter. A taktak ahcun Baibal chungah hmuhmi “vancung mi lak i upa bik” timi biafang hi tamrelnak (plural) ca ah hmang loin pakrelnak (singular) ca lawngah hman a si. Mah lengah Jesuh kha vancungmi lak i upa bik timi reng he pehtlai in a langhter. A thoṭhanmi Bawipa Jesuh Khrih he pehtlai in 1 Thesalon 4:16 nih hitin a ti: “Vancungmi bawi bik au thawng, Pathian muko aw thawng cu a hung thang lai.” Jesuh au thawng kha vancungmi bawi bik au thawng in a langhter. Cucaah mah Baibal cang nih Jesuh thengte kha vancungmi bawi bik Mikhael tiah a langhter.

Ralkapbu Hruaitu. Baibal nih “Mikhael le a vancungmi hna nih khan limkeng cu an doh i limkeng nih cun a vancungmi hna he a rak doh ve hna” tiah a ti. (Biathlam 12:7) Cucaah Mikhael cu zumhawktlak vancungmi ralkap Hruaitu a si. Biathlam ah Jesuh kha zumhawktlak vancungmi ralkap Hruaitu ti zong in a langhter. (Biathlam 19:14-16) Cun lamkaltu Paul nih “Bawi Jesuh” le “a vancungmi ṭhawng hna” kong kha fiang tein a rak langhter. (2 Thesalon 1:7; Matthai 16:27; 24:31; 1 Piter 3:22) Cucaah Baibal nih Mikhael le “a vancungmi hna” le Jesuh le ‘a vancungmi hna’ kong kha a rak langhter. (Matthai 13:41) Baibal i khua zei ka hmanh ah zumhawktlak vancungmi ralkapbu bu hnih—Mikhael hruaimi bu le Jesuh hruaimi bu—kong kha a langhter lo caah Mikhael cu vancung lei rian a ṭuanmi Jesuh Khrih dah ti lo cun midang a si kho lo tiah ti cu aa dawh tlakmi a si.a