Salmos

57 Pincavintsayena Notasorentsite, pincavintsayena,

tempa avirotaque naventari.

Nocoaque pojocaacoventena pitasorencaqui,

irosati avisantanajeari covencatatsiri.

 2 Noncajemeri Tasorentsi Inquitequiniri, naventeari,

tempa icantani yamitacotana.

 3 Intasoncaventena isaviquinta inquitequi,

tempa icantani inintanti;

iroavisaacotena eiro yoantanatsi jaanicarica quisajeivetenane.

 4 Nonareaca quipatsiqui ishoncajeitaquena atiri coatsiri iroyena,

iquempetacari anteariite maniti oantachari,

ora iraajipee oquempetacaro sataamentotsi jero chacopi.

Aisati ineaveeti, oquempetacaro sataamentotsi amecachari.

 5 Notasorentsite, tempa pisaviqui inquitequi.

¡Ora pitasorenca otsoteaquero maaroni quipatsi!

 6 Yora quisajeitanari yamatavitapinitaquena iroashinoncantenari,

irotaque noashiretantacari;

oquempetaca iquiashitaquena omoro iroariantenari,

iro cantaincha irisati pariantajaro.

 7 Notasorentsite nocoasanotaque nompampoyempiro pampoyeantsi.

 8 Meeca noquimoshiretasanoti,

nompampoyeantearo arpa aisati salterio;

¡ariorica onquitaiteamane nompampoyeacoventempi!

 9 Notasorentsite, nompampoyempiro pampoyeantsi,

inquemajeitena pashinisatipee atiri.

10 Tempa pinintasanotiri catsini atiripee

aisati picantani piqueariotasanoti.

11 Notasorentsite, tempa pisaviqui inquitequi.

¡Ora pitasorenca otsoteaquero maaroni quipatsi!