Perchè Diu permette u male è e suffrenze ?

1. Cume hà cuminciatu u male ?

U male hà cuminciatu nant’à a terra quandu Satanassu hà dettu a prima bugìa. À l’inìziu, Satanassu era un ànghjulu perfettu, ma « ùn s’[hè] t[inutu] in la verità » (Ghjuvanni 8:44). Hà vulsutu riceve l’adurazione, allora chì Diu solu deve esse aduratu. Hà dettu una bugìa à a prima donna, Eva, è hà riisciutu à cunvincela d’ubbidilli à ellu piuttostu chè à Diu. Àdamu hà fattu cum’è Eva : hà disubbiditu à Diu. A so decisione hà avutu cume cunsequenze e suffrenze è a morte. — Leghje Gènesi 3:1-6, 19.

Quandu hà instigatu à Eva à disubbidì, Satanassu hà fattu nasce una rivolta contr’à a suvranità di Diu (u so dirittu di supranà a so creazione). A maiò parte di l’umani seguita à Satanassu : cum’è ellu, Diu da Capu ùn ne vòlenu. Ghjè cusì chì Satanassu hè diventatu « u prìncipe di u mondu ». — Leghje Ghjuvanni 14:30 ; 1 Ghjuvanni 5:19.

2. Serà chì a creazione di Diu avìa un difettu ?

Tuttu ciò chì Ghjehova face hè perfettu. L’umani è l’ànghjuli ch’ellu hà creatu eranu capaci d’ubbidilli di manera perfetta (Deuterònumu 32:4, 5). Diu ci hà datu a libertà di sceglie trà fà ciò chì hè bè è fà ciò chì hè male. Sta libertà ci permette di mustralli u nostru amore. — Leghje Ghjàcumu 1:13-15 ; 1 Ghjuvanni 5:3.

3. Perchè Diu hà permessu e suffrenze fin’à oghje ?

Fin’à oghje, Ghjehova permette a ribellione di fronte à a so suvranità. Perchè ? Per dà a prova chì quandu l’umani cèrcanu di guvernassi senza ellu, ùn arreca nunda di bonu (Ecclesiasta 7:29 ; 8:9). L’umani si dirègenu da per elli dapoi 6 000 anni, è ghjè chjaru : i capizzoni umani ùn anu micca riisciutu à caccià e guerre, i crìmini, l’inghjustìzia è e malatìe. — Leghje Ghjerèmia 10:23 ; Rumani 9:17.

À l’oppostu di i guverni umani, u guvernu di Diu arreca benfatti à quelli chì u sustènenu (Esàia 48:17, 18). Frà pocu, Ghjehova hà da sterpà tutti i guverni umani. Solu camperanu nant’à a terra l’umani chì scèglienu d’esse guvernati da Diu (Esàia 11:9). — Leghje Daniellu 2:44.

Fighjà a vìdeo Perchè Diu permette e suffrenze ?

4. Chì ci permette di fà a pacienza di Diu ?

Satanassu dice chì l’umani sèrvenu à Ghjehova per interessu, è micca perchè u tènenu caru. Vulerìate dà a prova chì ghjè una bugìa ? U pudete ! A pacienza di Diu ci permette di mustrà sè no preferimu esse diretti da ellu o da l’umani. A nostra manera di campà face vede qualessa hè a nostra scelta. — Leghje Ghjobbe 1:8-12 ; Pruvèrbii 27:11.

5. Cume pudemu sceglie Diu da Capu ?

Cume sceglie Diu da Capu ? À cercà cume adurallu di a bona manera è à praticà u veru cultu chì s’appoghja nant’à a so Parolla, a Bìbbia (Ghjuvanni 4:23). Cum’è Ghjesù, femu vede chì ùn sciglimu micca à Satanassu da capu sè ùn femu micca pulìtica è sè ùn pigliemu micca parte indè e guerre. — Leghje Ghjuvanni 17:14.

Satanassu si ghjova di u so putere per instigà l’umani à cummette peccati sessuali è à praticà d’altre cose gattive. Sè no righjittemu sse cose, forse amichi o parenti ci ghjucaranu à a risa o s’oppuneranu à noi (1 Petru 4:3, 4). Ci vole dunque à fà una scelta : Sciglieremu cume amichi ghjente chì tènenu caru à Diu ? Ubbidisceremu à e so legge sàvie è piene d’amore ? Sè no femu cusì, deremu a prova chì Satanassu hà bugiardatu quand’ellu hà dettu chì l’umani ùn ubbidiscerìanu micca à Diu indè e situazione diffìciule. — Leghje 1 Curintini 6:9, 10 ; 15:33.

Diu tene caru à l’umani, è u so amore guarantisce chì u male è e suffrenze anu da esse sradicati. Quelli chì anu fede in Diu è chì pìglianu parte pè u so guvernu camperanu per sempre nant’à a terra. — Leghje Ghjuvanni 3:16.