Cume i princìpii di a Bìbbia ci ponu aiutà ?

1. Perchè l’umani anu bisognu d’esse instradati ?

U nostru Creatore hè più sàviu cà noi. Ghjè u nostru Babbu : ci tene caru è si primureghja di noi. Di più, ùn hà micca privistu chè no sìamu indipendenti da ellu (Ghjerèmia 10:23). Dunque, avemu tutti bisognu d’esse instradati da ellu, cum’è un zitellu hà bisognu d’esse instradatu da i so parenti (Esàia 48:17, 18). Ghjè per quessa chì Diu ci hà fattu un rigalu : ci hà datu i princìpii di a Bìbbia per instradacci. — Leghje 2 Timuteu 3:16.

E legge è i princìpii di Ghjehova ci ampàranu cume avè a più bella vita chì sìa oghje. Di più, ci mòstranu cume ottene benedizzione eterne à l’avvene. Postu chì Diu ci hà creati, hè nurmale chè no seguitèssimu di tuttu u nostru core a direzzione ch’ellu ci dà. — Leghje Salmu 19:8, 12 ; Apocàlisi 4:11.

2. Chì ghjè un princìpiu ?

I princìpii sò verità fundamentale. E legge, elle, si fàcenu valè indè situazione precise (Deuterònumu 22:8). Per sapè cume mette in pràtica un princìpiu di a Bìbbia in una situazione data, ci vole à riflette (Pruvèrbii 2:10-12). Per indettu, a Bìbbia ci ampara chì a vita hè un rigalu di Diu. Stu princìpiu impurtante ci pò instradà à u travàgliu, in casa nostra è indè i nostri spiazzamenti. Ci incuragisce à piglià precauzione. — Leghje Atti 17:27.

3. Qualessi sò i dui princìpii i più impurtanti ?

Ghjesù hà parlatu di dui princìpii di prima impurtanza. U primu princìpiu svela u scopu di a vita : cunnosce à Diu, tenelu caru è servelu cù fideltà. Ci vulerìa à tene contu di stu princìpiu in tutte e nostre decisione (Pruvèrbii 3:6). Quelli chì u pìglianu pròpiu à core divèntanu l’amichi di Diu, sò pròpiu felici è averanu a vita eterna. — Leghje Matteu 22:36-38.

U secondu princìpiu ci permette d’esse in pace cù l’altri (1 Curintini 13:4-7). Ssu princìpiu u mittimu in pràtica quandu trattemu l’altri cum’è Diu i tratta. — Leghje Matteu 7:12 ; 22:39, 40.

4. Cume i princìpii di a Bìbbia ci ponu aiutà ?

A Bìbbia cuntene princìpii chì ampàranu à e famìglie ciò chì li tocca à fà per esse unite gràzia à l’amore (Efesini 4:32 ; Culussesi 3:12, 14). Ella pruteghje ancu e famìglie insegnènduli ssu princìpiu : u matrimòniu deve perdurà a vita sana. — Leghje Gènesi 2:24.

Quandu mittimu in pràtica i princìpii di a Bìbbia, simu prutetti per ciò chì tocca u necessàriu per campà è i sentimenti. Spessu, i patroni preferìscenu l’impiegati chì rispèttanu i princìpii di a Bìbbia perchè ss’impiegati sò onesti è travagliuschi (Pruvèrbii 10:4, 26 ; Ebrei 13:18). A Bìbbia ci ampara dinù à cuntentacci di ciò chì hè necessàriu è à dà più primura à a nostra amicìzia cù Diu cà a robba. — Leghje Matteu 6:24, 25, 33 ; 1 Timuteu 6:8-10.

I princìpii di a Bìbbia prutèghjenu a nostra salute (Pruvèrbii 14:30 ; 22:24, 25). Per indettu, quandu rispittemu a legge di Diu contr’à l’imbriacatoghja simu prutetti di malatìe chì tòmbanu è d’accidenti (Pruvèrbii 23:20). Ghjehova ci permette di beie, ma senza trapassà a misura (Salmu 104:15 ; 1 Curintini 6:10). I princìpii di Diu ci fàcenu prò : ci ampàranu à esse attenti à ciò chè no femu, ma ancu à u nostru pensà (Salmu 119:97-100). Sè i veri cristiani rispèttanu e legge di Diu, ùn hè micca solu pè u so tornacontu. Ghjè per unurà à Ghjehova. — Leghje Matteu 5:14-16.