Fate a scelta di sustene u reame di Diu avale !
Fate contu, una sfurianata chì scèmpia tuttu s’avvicina d’induve vo site. L’auturità fàcenu ssa chjama : « SCAPPATE ! CIRCATE SÙBITU SÙBITU UN AGGROTTU ! » Cume reagìsce cù saviezza ? Scappà sùbitu vers’un locu sicuru !
D’una certa manera, campemu tutti nant’à strada d’una « timpesta » scempiadora, chì Ghjesù hà chjamatu a « tribulazione maiò » (Matteu 24:21, nwt-F). Scartassi di a strada di ssa tribulazione, ghjè impussìbule. Ma mettesi à l’aggrottu, ghjè pussìbule. Chì ci tocca à fà ?
Ind’u so Sermone nant’à a muntagna Ghjesù hà datu ssa règula di securità : « Circate anzituttu u regnu è a ghjustìzia di Diu » (Matteu 6:33). Cume seguità sse struzzione ?
Circate anzituttu u regnu di Diu. Vole dì chì ci vole à vede u reame di Diu cum’è a cosa a più impurtanta di tutte (Matteu 6:25, 32, 33). Perchè vedelu cusì ? Perchè l’umani anu fattu a prova ch’elli sò incapaci di scioglie i prublemi di l’umanità. Ùn ci hè chè u reame di Diu chì pò fà ssu travaglione.
Circate a ghjustìzia di Diu. Ci vole ch’o fèssimu di u nostru megliu per rispettà a legge è i princìpii ghjusti dati da Diu. Perchè ? Perchè quandu dicidimu da per noi ciò chì hè bè o ciò chì hè male sò catastròfe chì ci aspèttanu (Pruvèrbii 16:25). Ma quandu campemu in accordu cù e so struzzione femu piacè à Diu, è ne ricivimu benfatte tamante (Esàia 48:17, 18).
Cuntinuate à circà anzituttu u Reame è a ghjustìzia di Diu. Ghjesù hà dettu chì certi lascerìanu cascà ssa priurità pensendu mettesi à l’aggrottu guadagnandu solli à palittate. D’astri si lascerìanu chjappà da i penseri di a vita sinu à ùn avè più tempu di « circà » u Reame di Diu (Matteu 6:19-21, 25-32).
Orbè, Ghjesù hà prumessu chì quelli chì sustenerìanu u reame di Diu averìanu oghje tuttu ciò ch’elli anu bisognu per campà, è indè l’avvene benfatte più ca più (Matteu 6:33).
Benchì i discìpuli di Ghjesù di u primu sèculu àbbianu circatu anzituttu u Reame è a ghjustìzia di Diu, quand’elli campàvanu ùn anu micca vistu a suffrenza umana smarì. Intantu, sò stati prutetti. Ma cume ?
Rispettàvanu e struzzione ghjuste di Diu, è cusì a si francàvanu di e difficultà chì a ghjente ch’ùn stava à sente à Diu patìa. In più, èranu cunvinti chì u Reame venerìa, ciò chì l’aiutava à suppurtà e prove, ancu e più fastidiose. Infine, Diu li dava una « gran putenza » per ch’elli pòssinu fà fronte à sse difficultà (2 Curintini 4:7-9).
VOI, U CIRCHERETE ANZITUTTU U REAME ?
I cristiani di u sèculu unu sò stati à sente l’òrdine di Ghjesù : anu circatu anzituttu u reame. Anu predicatu a bona nova di u Reame indè tutti i lochi induv’elli campàvanu (Culussesi 1:23). Oghje, ci n’hè chì fàcenu què ?
Iè ! I Testimoni di Ghjehova capìscenu chì, tempu ùn ci n’hè più tantu, prima chì u reame di Diu metti fine à u mondu oghjincu. Allora, mèttenu tuttu in ballu per riempie ssa missione data in càrica da Ghjesù : « Ista bona nova di u regnu sarà pridicata in lu mondu interu, pè serve di tistimunianza à tutte e nazioni. Tandu vinarà a fine » (Matteu 24:14).
È voi, chì ne ferete di ssa bona nova ? V’incuragimu di core à fà cum’è a ghjente chì campava à u sèculu unu : l’abitanti di Berea, una cità di Macedonia. Quandu l’apòstulu Pàulu li hà parlati di a bona nova di u Reame, anu ricivutu a parolla « cun assai primura ». Eppò, ‘esaminàvanu ogni ghjornu e Scritture’ per vede sè ciò chì era scrittu era ciò ch’elli avìanu intesu. Dopu, anu messu in pràtica ciò ch’elli avìanu amparatu (Atti 17:11, 12).
Pudete fà cum’è elli. À circà anzituttu u Reame è a ghjustìzia di Diu, truverete un aggrottu avale, è indè l’avvene a pace è a securità per sempre.