A scienza hè d’accunsentu cù a Bìbbia ?

Risposta di a Bìbbia

Iè, perchè ancu sè a Bìbbia ùn hè micca un libru di scienza, hè esatta quand’ella parla di tema scientìfichi. Pigliemu qualchi esèmpii chì mòstranu chì a scienza è a Bìbbia ùn si cuntradìscenu micca. Vi rinderete contu da per voi chì i fatti scientìfichi chì a Bìbbia parla sò belli sferenti di ciò chì a ghjente cridìa quand’ella hè stata scritta.

• L’universu hà avutu un princìpiu (Gènesi 1:1). Parechji miti di l’Antichità ùn dìcenu micca chì l’universu hè statu creatu, ma ch’ellu s’hè messu in ballu à partesi d’un gran disòrdine dighjà quì. I Babiluniani cridìanu chì i dii chì anu creatu l’universu vinìanu di dui uceani. D’altre legende còntanu chì l’universu ghjè natu d’un ovu gigante.

• Sò e lege di a natura chì guvèrnanu l’universu ogni ghjornu, è micca l’estri di divinità (Ghjobbe 38:33 ; Ghjerèmia 33:25). In lu mondu sanu, miti dìcenu chì l’umani ùn pònu francassila d’atti inaspettati, certe volte crudeli, di dii.

• A terra hè cullucata nant’à u nunda (Ghjobbe 26:7). Per parechji pòpuli di l’antichità, u mondu era un discu cullucatu nant’à un gigante o un animale, cum’è un bùfalu o una cuppulata.

• I fiumi è e surghjente sò trattenuti da l’acqua svapurata di l’uceani, eppo chì rifala nant’à a terra sìa in piossa, in neve o in gràndina (Ghjobbe 36:27, 28 ; Ecclesiasta 1:7 ; Esàia 55:10 ; Amossu 9:6). L’anziani grechi pensàvanu chì l’acqua di i fiumi è di i fiumicelli vinìa d’un uceanu sutterraniu ; st’idea hè stata sin’à u sèculu XVIII.

• E muntagne s’inàlzanu è s’affàlanu ; e muntagne d’oghje eranu tempi fà sottu à l’uceani (Salmu 104:6, 8). Secondu diversi miti, e muntagne sò state create da i dii cum’è elle sò oghje.

• E dispusizione sanitàrie pàranu a salute. Ind’a lege chì a nazione d’Israèle hà ricivutu ci eranu règule nant’à l’igiène da rispettà dopu avè toccu un cadàveru, a messa in quarantana in casu di malatìa appiccicaticcia è l’eliminazione di l’escrementi umani (Levìticu 11:28 ; 13:1-5 ; Deuterònumu 23:13). À l’èpica chì sti cumandamenti sò stati dati, l’Egizziani si ghjuvàvanu di un rimèdiu da mette nant’à una piaca aperta fattu d’un mischju cù escrementi umani.

Dappressu à a scienza, ci hè sbaglii ind’a Bìbbia ?

Un esàme ughjettivu di a Bìbbia mostra chì a risposta hè nò. Eccu idee farze chì parechji anu nant’à a Bìbbia :

Certi dìcenu : A Bìbbia dice chì l’universu hè statu creatu in sei ghjorni di 24 ore.

In realità : Secondu a Bìbbia, Diu hà creatu l’universu mentre un’èpica di u passatu micca precisata (Gènesi 1:1). È i ghjorni di creazione menziunati à u capìtulu 1 di Gènesi sò èpiche chì a durata ùn hè micca precisata manch’ella. D’altronde, l’èpica sana mentre chì a terra è i celi sò stati fatti ghjè ancu chjamata un « ghjornu » (Gènesi 2:4).

Certi dìcenu : A Bìbbia dice chì a vegetazione hè stata creata prima chì u sole sìa, è dunque nanzu chì a fotosìntesa sìa pussìbule (Gènesi 1:11, 16).

In realità : A Bìbbia mostra chì u sole, una di e stelle chì fàcenu « u celu », hè statu creatu nanz’à a vegetazione (Gènesi 1:1). U lume profusu di u sole tuccava l’aghja di a terra mentre u primu « ghjornu », o èpica, di creazione. Allora chì l’atmusfera si schjarìa, à u terzu « ghjornu » di creazione, ci era abbastanza lume per chì a fotosìntesa si fessi (Gènesi 1:3-5, 12, 13). Ùn hè chè più tardi chì u Sole s’hè fattu vede chjaru da l’aghja di a Terra (Gènesi 1:16).

Certi dìcenu : A Bìbbia dice chì u Sole gira intornu à a Terra.

In realità  : Si leghje in Ecclesiasta 1:5 : « U sole si pesa, u sole si chjina, brama di turnà da duv’ellu vene è da duv’ellu torna à pisassi. » Ma ste parolle discrìvenu solu u muvimentu di u Sole percepitu da a Terra. Oghje torna, adupremu spressione cum’è « pisata di u sole » o « ciuttata di u sole » ancu s’è no sapemu bè chì ghjè a Terra chì gira intornu à u Sole.

Certi dìcenu : A Bìbbia dice chì a terra hè piana.

In realità : A Bìbbia adopra a spressione « l’estremità di a terra » per parlà di u locu u più luntanu di a terra (Atti 1:8). Ùn vole micca dì chì a terra hè piana o ch’ella hà un orlu. Di listessa manera, a spressione « quattru estremità di a terra » hè una figura di retorica chì indetta l’aghja sana di a terra (Esàia 11:12 ; Lucca 13:29). Oghje, ci ghjuvemu di a listessa figura quandu parlemu di i quattru canti di a pianeta.

Certi dìcenu : A Bìbbia dice chì a circunferenza d’un chjerchju hè uguale à trè volte u so diàmetru, allora chì u nùmaru precisu hè pi (π), vale à dì circa 3,1416.

In realità : Secondu à 1 Rè 7:23 è 2 Cròniche 4:2, « u mare di metallu fusu » avìa un diàmetru di dece bracce è « una circunferenza misurata da un curdone di trenta bracce ». Pò dassi chì ùn eranu chì i nùmari tondi i più vicini di i valori reali. Ghjè dinù pussìbule chì a circunferenza currispundessi à e misure interiore di a vasca, è u diàmetru à e misure esteriore.