Chì ne pensa a Bìbbia di l’omosessualità ?

Risposta di a Bìbbia

Quandu Diu hà creatu l’umani, hà privistu chì i raporti sessuali sìanu solu trà un omu è una donna uniti da u matrimòniu (Gènesi 1:27, 28 ; Levìticu 18:22 ; Pruvèrbii 5:18, 19). Fora di i raporti sessuali trà un maritu è a so moglia, a Bìbbia cundanna ogni attività sessuale, ch’ella sìa omosessuale o eterosessuale (1 Curintini 6:18). Per attività sessuale, ci vole à capì qualsìasi i raporti sessuali, ancu e carezze di l’organi genitali di un’altra persona, è i raporti cù a bocca è a sudumìa.

A Bìbbia cundanna l’atti omosessuali. Però, hè contr’à l’omofobìa, vale à dì l’òdiu di l’omosessuali. I cristiani dèvenu « rispett[à] tutt’ognunu » (1 Petru 2:17, Bible des peuples).

Si pò nasce omosessuale ?

A Bìbbia ùn parla micca di l’orìgine biulògica di e brame omosessuale. Però, ella dice chì simu tutti nati cù a vòglia di fà u cuntràriu di ciò chì dumanda Diu (Rumani 7:21-25). Ancu sè a Bìbbia ùn spiega micca d’induve vènenu e brame omosessuale, pruibìsce l’atti omosessuali.

Cume aggarbà à Diu quandu si hà brame omosessuale ?

A Bìbbia dice : « Chì u vostru corpu ùn piglii a suprana nant’à voi. Fate more ogni brama pè i raporti sessuali brutti » (Culussesi 3:5, Contemporary English Version). Per « fà more » e gattive brame, chì pòrtanu sin’à atti gattivi, ci vole à ammaestrà u nostru pensà. Sè ogni ghjornu vi mettite in capu pinsamenti puri, ci la ferete à sbarazzavvi di e vostre gattive brame (Filippesi 4:8 ; Ghjàcumu 1:14, 15). Prima, forse, vi ci vulerà à scumbatte assai, ma cù u tempu serà podassi più fàciule. Diu prumette d’aiutavvi à esse « rinnuvati in lu vostru core è in lu vostru spìritu » (Efesini 4:22-24, Bible en français courant).

Ci hè milioni di ghjente chì scumbàttenu anch’elle per ammaestrà e so brame eterosessuale, perchè vòlenu seguità e règule di a Bìbbia. Per esèmpiu, i figli chì ùn tròvanu à maritassi o quelli chì u cunghjuntu ùn pò avè raporti sessuali fàcenu a scelta d’ammaestrà e so brame, qualsìasi e tentazione chì li càscanu. Què ùn l’impedìsce micca d’esse felici. Quelli chì anu brame omosessuale ma chì vòlenu pròpiu aggarbà à Diu ponu anch’elli campà felici (Deuterònumu 30:19).