Cume avvicinassi da Diu ?

1. Diu stà à sente tutte e preghere ?

Diu invita tutti l’umani à avvicinassi da ellu cù a preghera (Salmu 65:3). Ma ùn stà micca à sente, vale à dì ch’ellu ùn accetta micca, tutte e preghere. E preghere di un omu chì maltratta a so mòglia ponu esse ricusate (1 Petru 3:7). Quandu l’Israèliti ùn vulìanu fermà di fà gattive cose, Diu ùn stava micca à sente e so preghere. Intantu, Diu accetta e preghere di qualchissìa chì hà fattu peccatu ma chì si pente (vole dì ch’ellu si ramenta cù dispiacè di ciò ch’ellu hà fattu), ancu s’ellu hà fattu peccatacciu. A preghera hè pròpiu un’onore chì ci face Diu. — Leghje Esàia 1:15 ; 55:7.

Fighjà a vìdeo Diu stà à sente tutte e preghere ?

2. Cume ci vole à pregà ?

A preghera hè un attu chì face parte di l’adurazione. Dunque, ci tocca à pregà solu u nostru Creatore, Ghjehova (Matteu 4:10 ; 6:9). Di più, simu imperfetti, ci tocca à pregà à nome di Ghjesù perchè hè mortu pè i nostri peccati (Ghjuvanni 14:6). Ghjehova ùn vole micca chè no ribicchinèssimu preghere scritte o amparate. Vole chì e nostre preghere vènghinu da u core. — Leghje Matteu 6:7 ; Filippesi 4:6, 7.

U nostru Creatore ci sente ancu quandu u prighemu à silenziu (1 Samuellu 1:12, 13). Ci invita à pregallu à ogni mumentu, per esèmpiu à u princìpiu è à a fine di a ghjurnata, à i pasti, quandu riscuntremu prublemi. — Leghje Salmu 55:23 ; Matteu 15:36.

3. Perchè i cristiani s’adunìscenu ?

Ùn hè micca fàciule d’avvicinassi da Diu perchè ingiru à noi, a ghjente ùn hà micca fede in ellu è si ne ride di a so prumessa di mette a pace nant’à a terra (2 Timuteu 3:1, 4 ; 2 Petru 3:3, 13). Avemu dunque bisognu d’esse aduniti cun altri servitori di Diu per esse incuraghjiti, è anch’elli anu bisognu di noi. — Leghje Ebrei 10:24, 25.

Quandu ci adunimu cù quelli chì tènenu caru à Diu, ci aiuta à avvicinassi da ellu. L’adunite di i Testimoni di Ghjehova sò mumenti di prima trinca per esse incuraghjiti da a fede di l’altri. — Leghje Rumani 1:11, 12.

4. Cume pudete avvicinavvi da Diu ?

Vi pudete avvicinà da Ghjehova à piglià tempu per riflette à ciò chì vo amparate indè a so Parolla. Riflittite à i so atti, à i so cunsigli è à e so prumesse. A preghera è a meditazione v’aiuteranu à avè di più in più ricunnuscenza per l’amore è a saviezza di Diu. — Leghje Ghjosuè 1:8 ; Salmu 1:1-3.

Per esse vicinu à Diu, vi tocca sopratuttu à avè cunfidenza in ellu, avè fede in ellu. Ma a fede ghjè cum’è una pianta chì ci vole à mantene. Vi tocca sempre sempre à mantene a vostra fede riflittendu à ciò chè vo cridite è perchè ci cridite. — Leghje Matteu 4:4 ; Ebrei 11:1, 6.

5. Sè vo v’avvicinate da Diu, chì benfatti riciverete ?

Ghjehova si primureghja di quelli chì u tènenu caru. Vi pò custudì di tuttu ciò chì puderìa indebulì a vostra fede è favvi perde a speranza di campà per sempre (Salmu 91:1, 2, 7-10). Vi prevene d’esse attenti à manere di campà chì minàccianu a vostra salute è u vostru benestà. V’ampara cume avè a vita a più bona chì sìa. — Leghje Salmu 73:27, 28 ; Ghjàcumu 4:4, 8.