ᑳ ᑮ ᒥᓯ ᐃᐢᑭᐯᐠ ​ ᐊᐑᓇ ​ ᑮ ᓂᑐᐦᑕᒼ? ​ ᐊᐑᓇ ​ ᐁᑳ ​ ᑳ ᓂᑐᐦᑕᕽ?

ᐅᓵᒼ ​ ᐳᑯ ​ ᑲᐦᑭᔭᐤ ​ ᑮ ᒪᒋ ᐃᑑᑕᒷᐠ ​ ᒣᒁᐨ ​ ᐁ ᑮᓯᑳᐏᐦᐟ ​ ᓄᐊ᙮ ​ ᒉᓂᓯᐢ 6:5

ᐋᑕᒼ ​ ᐁᑿ ​ ᐃᑊ ​ ᑮ ᐊᔮᐍᐘᐠ ​ ᐊᐚᓯᓴ, ​ ᒦᓇ ​ ᐊᔨᓯᔨᓂᐘᐠ ​ ᑮ ᐊᑎ ᒥᐦᒉᑎᐘᐠ ​ ᐆᑕ ​ ᐊᐢᑮᕽ᙮ ​ ᐱᔨᐢᐠ, ​ ᐋᑎᐦᐟ ​ ᐅᑮᓯᑯᐘᐠ ​ ᑮ ᐑᒋᐦᐁᐘᐠ ​ ᒪᒋ ᒪᓂᑐᐘ ​ ᐅᒫᔦᒧᐏᓂᕽ᙮

ᑮ ᐯ ᐃᑐᐦᑌᐘᐠ ​ ᐊᐢᑮᕽ ​ ᒦᓇ ​ ᑮ ᐅᓰᐦᑕᒫᓱᐘᐠ ​ ᓈᐯᐤ ᐏᔭᐘ ​ ᑲ ᐑᑭᒫᒋᐠ ​ ᐃᐢᑵᐘ᙮ ​ ᐃᐢᑵᐘᐠ ​ ᑮ ᐅᑯᓯᓯᐘᐠ ​ ᐁ ᒥᐢᑖᐯᐏᔨᐟ᙮ ​ ᐊᓂᑭ ​ ᑮ ᑯᐢᑖᑎᑯᓯᐘᐠ ​ ᐁᑿ ​ ᒦᓇ ​ ᒣᑐᓂ ​ ᑮ ᒪᐢᑲᐏᓰᐘᐠ᙮

ᐊᐢᑭᐩ ​ ᑮ ᐊᑎ ᓵᑲᐢᑭᓀᐤ ​ ᐊᔨᓯᔨᓂᐘᐠ ​ ᑳ ᐃᑑᑕᐦᑭᐠ ​ ᒪᒋ ᑮᑿᔭ᙮ ​ ᑭᐦᒋ ᒪᓯᓇᐦᐃᑲᐣ ​ ᐃᑘᒪᑲᐣ: ​ “ᑭᓭᒪᓂᑐ ​ ᒫᑲ ​ ᑭ ᐚᐸᐦᑕᒼ ​ ᐁ ᐃᓯ ᒥᓵᔨᐠ ​ ᐊᔨᓯᔨᓂᐘ ​ ᐅ ᒪᒋᑐᑕᒧᐏᓂᔨᐤ ​ ᐊᐢᑭᕽ, ​ ᒥᓇ ​ ᑲᐦᑭᔭᐤ ​ ᐅᐟ ᐃᑌᔨᑕᒧᐏᓂᔨᐤ ​ ᑳ ᐃᓯ ᒫᒥᑐᓀᔨᑕᒥᔨᐟ ​ ᐅᑌᐦᐃᔨᕽ ​ ᑕᐦᑭᓀ ​ ᐱᑯ ​ ᐁ ᒪᒑᔨᐘᓂᔨᐠ᙮”

ᓄᐊ ​ ᑮ ᓂᑐᐦᑕᐍᐤ ​ ᑭᓭᒪᓂᑐᐘ ​ ᒦᓇ ​ ᑮ ᐅᓰᐦᑖᐤ ​ ᑳ ᒥᓵᐠ ​ ᓈᐱᐦᒁᐣ᙮ ​ ᒉᓂᓯᐢ 6:13, 14, 18, 19, 22

ᓄᐊ ​ ᑮ ᒥᔼᑎᓯᐤ᙮ ​ ᒋᐦᐋᐘ ​ ᑮ ᐑᐦᑕᒪᐍᐤ ​ ᓄᐊᐘ ​ ᐁ ᐑ ᒥᓯᐘᓈᒋᐦᐋᐟ ​ ᒪᒑᔨᓯᔨᓂᐘ ​ ᒥᓯ ᐃᐢᑭᐯᐏᓂᕽ ​ ᐅᐦᒋ᙮

ᑭᓭᒪᓂᑐᐤ ​ ᑮ ᐑᐦᑕᒪᐍᐤ ​ ᓄᐊᐘ ​ ᑲ ᐅᓰᐦᑖᐟ ​ ᐁ ᒥᓵᐠ ​ ᓈᐱᐦᒁᐣ, ​ ᐊᕒᐠ ​ ᐁ ᐃᓯᔨᐦᑳᑌᐠ, ​ ᐁᑿ ​ ᑲ ᐊᓯᐘᐦᐋᐟ ​ ᐑᐘ, ​ ᐅᑯᓯᓴ, ​ ᒦᓇ ​ ᐅᐑᑭᒫᑲᓂᐚᐘ, ​ ᒦᓇ ​ ᐱᑹᑐᐘᕽ ​ ᐱᓯᐢᑭᐘᐠ᙮

ᓄᐊ ​ ᑮ ᑭᑕᐦᐊᒪᐍᐤ ​ ᐊᔨᓯᔨᓂᐘ ​ ᑳ ᐯ ᓅᑿᓂᔨᐠ ​ ᒥᓯ ᐃᐢᑭᐯᐏᐣ᙮ ​ ᒫᑲ ​ ᓇᒹᐨ ​ ᑮ ᓈᑲᑐᐦᑫᐘᐠ᙮ ​ ᐋᑎᐦᐟ ​ ᑮ ᐹᐦᐱᐦᐁᐘᐠ ​ ᓄᐊᐘ, ​ ᒦᓇ ​ ᑯᑕᑲᐠ ​ ᑮ ᐸᒁᑌᐘᐠ᙮

ᐃᐢᐲ ​ ᑳ ᑮᓯᐦᑖᐟ ​ ᑳ ᒥᓵᐠ ​ ᓈᐱᐦᒁᐣ, ​ ᓄᐊ ​ ᑮ ᐲᐦᑎᑿᐦᐁᐤ ​ ᑲᐦᑭᔭᐤ ​ ᐱᓯᐢᑭᐘ᙮