En bon kominikasyon i sa pon ki fer ou reste pre avek ou zanfan
POUR BANN PARAN
5 Kominikasyon
KI I VEDIR
En bon kominikasyon i ler paran ek zanfan i kapab koz avek kanmarad e dir sa ki zot panse e santi.
AKOZ I ENPORTAN
Ler en zanfan i vin adolesan, i kapab pli difisil pour koz avek li. Ler i ankor pti, i koz avek son paran lo tou keksoz me anmezir i grandi sa i diminyen e paran nepli konnen ki sa zanfan pe mazinen oubyen santi. I konmsi tou le de pe debout anfas kanmarad lo lot kote en gran larivyer. Menm si i paret ki sa zanfan pa anvi koze, la i sa moman kot paran ek zanfan i bezwen annan en bon kominikasyon.
SA KI OU KAPAB FER
Pare nenport ler. Fer ou disponib, menm si ou zanfan i anvi koz avek ou dan milye lannwit.
“Petet ou kapab anvi dir li, ‘Prezan ki ou anvi koze? Depi bomaten mon avek ou!’ Me akoz nou bezwen konplent ler nou zanfan i anvi koz avek nou? Pa sanmenm ki tou paran i anvi?”—Lisa.
“Menm si mon kontan dormi boner, bann pli bon konversasyon ki mon’n annan avek mon zanfan adolesan in pas apre minwi.”—Herbert.
PRENSIP LABIB: “Fodre pa ki sakenn i rod son prop lentere, me lentere lezot.”—1 Korentyen 10:24.
Pa les ou ganny distrer. En papa i dir: “Parfwa ler mon zanfan pe koz avek mwan, mon lespri i lo en lot keksoz. Mon pa kapab anbet zot, zot konnen ki mon lespri pa la!”
Si ou fasilman ganny distrer par televizyon, mobayl oubyen lezot keksoz, tenny zot oubyen met zot laba. Konsantre lo sa ki ou zanfan pe dir e menm si sa ki i pe dir pa paret enportan, montre li ki i merit tou ou latansyon.
“Nou bezwen montre nou zanfan ki zot santiman i enportan pour nou. Si zot vwar ki nou pa enterese avek zot santiman, zot pa pou koz avek nou oubyen zot pou rod led en lot landrwa.”—Maranda.
“Pa sot anler si sa ki ou zanfan pe mazinen pa fer sans.”—Anthony.
PRENSIP LABIB: “Vey byen ki mannyer zot ekoute.”—Lik 8:18.
Profit tou lokazyon. Parfwa i pli fasil pour en zanfan koz avek son paran ler i pe fer en lot keksoz dan plas asize zis zot de pour koze.
“Nou profite ler nou dan loto. Nou’n fer bann bon konversasyon ler nou o bor kanmarad.”—Nicole.
I kapab bon pour koze pandan repa.
“Ler nou pe dinen, sakenn i rakont bann bon ek move keksoz ki’n arive pandan lazournen. Sa in fer nou vin pli pros avek kanmarad e in montre nou ki nou pa bezwen fer fas avek problenm nou tousel.”—Robin.
PRENSIP LABIB: “Pare pour ekoute, me . . . pran letan avan koze.”—Zak 1:19.