EN LEMONN DAN BOULVERS

3 | Protez ou bann relasyon

AKOZ I ENPORTAN

Anmezir ki problenm i ogmante dan sa lemonn, dimoun i kontinyen enkyet e zot pa gard sa relasyon pros avek bann dimoun ki zot kontan.

Zot izol zot lekor e reste lwen avek zot bann zanmi.
Bann koup pa tonm dakor avek kanmarad.
Bann paran i port en pti gin latansyon ouswa zot pa port okenn latansyon lo lenkyetid zot zanfan.

Sa ki ou devret konnen

Bann zanmi i enportan akoz i ed ou pour reste an bonn sante emosyonnelman e fizikman sirtou dan bann moman difisil.
Sa stres ki ou gannyen ler lemonn i dan boulvers i kapab afekte ou fanmir dan bann fason ki ou pa ekspekte.
Ler ou bann zanfan i tande ouswa vwar bann move nouvel, sa i kapab fer zot pli per ankor.

Sa ki ou kapab fer la konmela

Labib i dir: “En vre zanmi i demontre lanmour toultan e i en frer ler ou pas dan problenm.”—Proverb 17:17.

Mazin en zanmi ki pare pour siport ou e donn ou bann bon konsey. Sa kalite zanmi pou kapab ed ou pour ganny kouraz e andir bann problenm ki ou gannyen dan lavi tou le zour.

KI OU KAPAB FER? Sizesyon

Dan bann letan vreman difisil, swiv sa bann letap pour protez ou relasyon avek bann dimoun ki ou kontan

FER OU MARYAZ VIN PLI SOLID

Fer ou maryaz vin pli solid

Labib i dir: “De dimoun i pli bon ki en dimoun . . . Parski si enn i tonbe, sa lot i kapab lev li.” (Eklezyast 4:9, 10) Bann koup marye i devret azir parey en pilot ek en kopilot ki pe al dan menm direksyon me pa parey de avyon lager ki pe al fer kolizyon.

Determinen pour pa tret kanmarad dan en move fason akoz ou santi ou strese. Esey annan pasyans avek kanmarad.
Omwen en fwa par semenn, diskit avek ou konzwen lo bann problenm ki ou annan. Konsantre lo fason pour rezourd sa bann problenm me pa akiz kanmarad.
Pas letan ansanm e fer bann keksoz ki zot tou le de zot kontan.
Petet zot kapab get zot portre maryaz ouswa lezot portre bann bon moman ki zot in pase ansanm e mazin sa bann bon moman.

“En koup i kapab pa dakor lo tou keksoz, me sa pa vedir ki zot pa kapab travay ansanm konman en tim. En koup i kapab fer en desizyon ansanm e travay ansanm pour fer ki sa desizyon ki zot in pran i reisi.”—David.

GARD OU RELASYON AVEK OU BANN ZANMI

Gard ou relasyon avek ou bann zanmi

An plis ki sipor ki ou gannyen avek ou bann zanmi, mazin bann fason ki ou kapab donn zot ou sipor. Ler ou ankouraz lezot, ou osi ou ganny ankouraze.
Tou le zour, pran kontak avek serten ou bann zanmi pour konnen ki mannyer zot ete.
Demann ou bann zanmi ki mannyer zot in fer fas avek bann difikilte ki parey avek sa ki ou pe fer fas avek.

“Ler ou dan difikilte, ou bann zanmi i kapab soulaz ou. Zot kapab ed ou pour al dan sa bon direksyon menm si zot dir ou keksoz ki ou deza konnen. Ou bann zanmi i enterese avek ou e zot konnen ki ou osi ou enterese avek zot.”—Nicole.

MONTRE LENTERE PERSONNEL ANVER OU ZANFAN

Montre lentere personnel anver ou zanfan

Labib i dir: “Pare pour ekoute . . . pran letan avan koze.” (Zak 1:19) O konmansman, ou zanfan i kapab ezite pour eksprim zot lafreyer ek zot konsern me ler ou ekout zot avek pasyans ou pou ed zot pour koz lo zot santiman.

Fer ou zanfan santi zot konfortab pour koz lo zot santiman. Serten zanfan i koz pli fasilman ler zot pe rilaks, par egzanp ler zot pe pronmnen dan loto oubyen ler zot pe marse olye ki ler zot pe asize avek zot paran fas a fas.
Fer sir ki ou zanfan pa get tro bokou bann move nouvel.
Les ou zanfan konnen ki mezir ou’n pran pour kit ou fanmir an sekirite.
Fer en plan pour bann ka irzan e practice avek ou zanfan.

“Koz avek ou zanfan e les zot eksprim zot santiman. I kapab ki zot pe kasyet zot lafreyer, zot lenkyetid ouswa zot lakoler. Fer zot konnen ki ou osi ou pe lalit avek sa menm santiman e dir zot ki mannyer ou pe fer fas avek.”—Bethany.