Me

Ler Zezi ti ankor zenn, i ti swazir pour obei son paran. I pa ti krwar i pli konnen ki son paran e i pa ti zanmen dezobei zot. Zezi ti premye zanfan, ki vedir i ti annan serten responsabilite. San dout, i ti fer son mye pour desarz byen son bann responsabilite. I ti travay dir pour aprann sarpantye avek Zozef pour li kapab ede siport son fanmir. I tre probab ki Zozef ek Mari ti koz avek Zezi lo son nesans e lo sa ki bann mesaze Bondye ti’n dir lo li. (Lik 2:8-19, 25-38) Zezi pa ti zis ekout sa ki zot ti dir me i ti osi etidye Lekritir pour li menm. Ki mannyer nou konnen Zezi ti etidye byen Parol Bondye? Parski ler i ti ankor zenn, bann ansenyan Zerizalenm ti “vreman etonnen par son larepons ek son lentelizans.” (Lik 2:46, 47) Osi, ler Zezi ti annan 12 an, i ti’n fini konvenki ki Zeova i son Papa.​—Lik 2:42, 43, 49. w20.10 29-30 ¶13-14

Nou lafwa dan rezireksyon Zezi i rezon akoz nou krwar ki lezot dimoun pou ganny resisite. Ler Pol ti konmans koz lo rezireksyon, i ti mansyonn trwa laverite. Sa i ki (1) “Kris in mor pour nou pese.” (2) “I ti ganny antere.” (3) “Dapre Lekritir, trwazyenm zour, i ti ganny resisite.” (1 Kor. 15:3, 4) Pol ti dir ki Zezi ti mor, ganny antere e ganny resisite. Ki sa trwa keksoz i vedir pour nou? Profet Izai ti predir ki Mesi ti pou “ganny tire lo later parmi bann vivan” e zot ti pou fer “son latonm parmi bann malfeter.” Me i annan en lot keksoz ki ti pou arive. Izai ti osi dir ki Mesi ti pou “anmenn pese bokou dimoun.” Zezi ti fer sa ler i ti donn son lavi konman en ranson. (Iza. 53:8, 9, 12, NWT; Mat. 20:28; Rom. 5:8) Lefet ki Zezi ti mor, ganny antere e resisite, sa i fer nou annan lespwar ki nou pou ganny libere avek pese ek lanmor e ki nou pou vwar nou bann defen ankor. w20.12 2-3 ¶4-6; 5 ¶11

Zapot Pol ti souvan anons sa bon nouvel dan bann sinagog Zwif. Par egzanp, “pour trwa saba, i ti rezonn avek [bann Zwif] lo Lekritir,” dan sinagog Tesalonik. (Akt 17:1, 2) I tre probab ki Pol ti santi li konfortab dan sa sinagog. Pol ti grandi konman en Zwif. (Akt 26:4, 5) I ti kapab konpran bann Zwif, alor avek konfidans i ti kapab anons sa bon nouvel avek zot. (Fili. 3:5) Apre ki Pol ti bezwen kit Tesalonik ek Bere akoz i ti pe ganny persekite, i ti ariv lavil Atenn. Ankor enn fwa, “i ti konmans rezonn avek bann Zwif ek lezot dimoun ki ti ador Bondye dan sinagog.” (Akt 17:17) Me ler i ti pe anons sa bon nouvel dan bazar, i ti annan en lot lodyans. Parmi sa bann ki ti pe ekout li, i ti annan bann filozof ek bann dimoun lezot nasyon ki ti vwar mesaz Pol konman en “nouvo lansennyman.” Zot ti dir li: “Ou pe dir bann nouvo keksoz ki paret drol pour nou.”​—Akt 17:18-20. w20.04 9 ¶5-6

Si ou pe lalit avek en move labitid, pa kondann ou lekor. Parski nou tou nou fer fot e nou tou nou bezwen labonte ekstraordiner Bondye ki i donn nou atraver sa ranson. (Efe. 1:7; 1 Zan 4:10) Nou osi kapab al kot nou bann frer ek ser dan kongregasyon pour ganny lankourazman. Zot kapab ekout nou ler nou bezwen koze e zot kapab ankouraz nou. (Prov. 12:25; 1 Tesa. 5:14) Joy, en ser ki reste Nizerya e ki soufer akoz dekourazman i dir: “Ki mon ti pou fer san led mon bann frer ek ser! Zot en laprev ki Zeova i reponn mon bann lapriyer. Mon’n menm aprann avek zot ki mannyer pour ankouraz lezot ki dekouraze.” Kantmenm sa, nou bezwen gard antet ki nou bann frer ek ser pa toultan konnen ler nou bezwen lankourazman. Alor, petet nou pou bezwen al kot en frer oubyen ser matir e dir zot ki nou bezwen led. w20.12 23-24 ¶7-8

Normalman pour reisi batir en bon lanmitye avek en dimoun, ou bezwen pas letan avek li. Anmezir ki zot partaz zot bann panse ek leksperyans avek kanmarad, sa i fer zot vin zanmi. Me i kapab difisil pour batir en bon lanmitye avek Zezi. En premye defi i ki nou pa’n zanmen rankontre Zezi. En kantite Kretyen ki ti viv dan letan bann zapot pa’n zanmen rankontre li zot osi. Kantmenm sa, zapot Pyer ti dir: “Menm si zot pa’n zanmen vwar li, zot kontan li. Menm si zot pa vwar li la konmela, zot demontre lafwa dan li.” (1 Pyer 1:8) Alor, i posib pour fer zanmi avek Zezi menm si nou pa’n zanmen rankontre li. Osi, nou pa kapab koz avek Zezi. Ler nou priye nou koz avek Zeova. I vre ki nou priy lo non Zezi me nou pa koz avek li. Anfet, Zezi pa anvi ki nou priy li. Akoz non? Parski lapriyer i en form ladorasyon e zis Zeova ki devret ganny adore. (Mat. 4:10) Kantmenm sa, nou kapab montre ki nou kontan Zezi. w20.04 20 ¶1-3

Bann atlet Lagres ti bezwen sirmont bann difikilte, parey lafatig ek douler. Me zot ti bezwen depan zis lo zot lantrennman ek zot prop lafors. Parey sa bann atlet, nou ganny antrennen lo ki mannyer pour tay sa lakours ki nou ladan. Me nou annan en lavantaz lo sa bann atlet. Nou kapab ganny lafors avek Zeova e napa okenn limit lo kantite i kapab ed nou. Si nou depan lo Zeova, i pa zis promet pour ed nou me pour osi fer nou for! Zapot Pol ti bezwen fer fas avek bokou difikilte. An plis ki ganny ensilte e persekite par lezot, parfwa i ti santi li feb e i ti bezwen andir sa ki i ti apel “en pikan ki pe pik [li].” (2 Kor. 12:7) Me dan plas vwar sa bann difikilte konman bann rezon pour aret servi Zeova, i ti vwar zot konman en loportinite pour depan lo Zeova. (2 Kor. 12:9, 10) Vi ki Pol ti annan sa fason panse, Zeova ti ed li dan tou son bann difikilte. w20.04 29 ¶13-14

En lot kado presye ki nou annan me ki nou pa vwar, i sa privilez pour “travay ansanm” avek Zeova, Zezi ek bann lanz. (2 Kor. 6:1) Nou travay ansanm avek zot sak fwa ki nou partisip dan sa travay predikasyon. Pol ti dir ki li ansanm avek lezot dimoun ki partisip dan sa travay, i “travay ansanm avek Bondye.” (1 Kor. 3:9) Ler nou partisip dan sa travay predikasyon, nou osi pe travay ansanm avek Zezi. Rapel sa ki Zezi ti dir son bann disip apre ki i ti’n donn zot lord pour fer disip, Zezi ti dir zot: “Mon avek zot.” (Mat. 28:19, 20) Me ki nou pou dir lo bann lanz? Nou vreman apresye ki bann lanz i gid nou ler nou pe anons sa “bon nouvel eternel . . . avek tou bann ki reste lo later”! (Rev. 14:6) Ki sa sipor ki sorti dan lesyel i kapab ed nou fer? Anmezir ki nou senm lagrenn laverite, serten sa bann lagrenn ki tonm dan bann bon leker i konmans raport fri. (Mat. 13:18, 23) Lekel ki fer sa bann lagrenn pouse e raport fri? Zezi i eksplik sa dan teks pour ozordi. w20.05 30 ¶14-15

En kantite paran ozordi in divorse. Menm bann fanmir ki reste dan menm lakaz napa en bon relasyon antre zot. Par egzanp, en konseyer lafanmir ti dir: “Manman, papa ek zanfan pa koz avek kanmarad. Zot pas laplipar zot letan lo konpiter, tablet, telefonn oubyen pe zwe bann zwe video. Menm si zot reste dan menm lakaz zot pa vreman konn kanmarad.” Nou pa anvi vin parey bann dimoun dan sa lemonn ki napa lanmour pour lezot. O kontrer, nou bezwen devlop tandres ek lafeksyon pour nou bann manm fanmir e osi pour nou bann frer ek ser dan lafwa. (Rom. 12:10) Kisisa tandres ek lafeksyon? Sa term i dekri sa lanmitye ki i annan ant bann fanmir pros. Sa i sa kalite lanmour ki nou devret devlope pour nou bann frer ek ser dan lafwa. Ler nou demontre tandres ek lafeksyon, nou kapab servi Zeova ansanm avek lezot dan lazwa.​—Mik. 2:12, NWT. w21.01 20 ¶1-2

I pou pli fasil pour en lekip sport ki ini fer plis sikse ki enn ki pa ini. Ou leker i kapab parey sa lekip ki fer sikse si ou servi Zeova avek tou ou panse, tou ou dezir ek tou ou santiman. Rapel ki Satan pa anvi ki ou servi Zeova avek tou ou leker. I anvi ki ou bann panse, dezir ek santiman pa annakor avek sa ki fer plezir Zeova. Par kont ou, ou bezwen servi Zeova avek tou ou leker. (Mat. 22:36-38) Pa zanmen les Satan anpes ou fer sa! Parey David, demann Zeova: “Fer mwan annan gran respe pour ou non avek tou mon leker.” Fer tou sa ki ou kapab pour ou viv an armoni avek sa lapriyer. Sak zour, fer sir ki tou ou bann desizyon, ki swa pti oubyen gran, i montre ki ou annan gran respe pour non Zeova ki sen. Konman en Temwen Zeova, ler ou fer sa ou pou anmenn loner lo non Zeova. (Prov. 27:11, NWT) Parey profet Mika, nou tou nou pou kapab dir: “Nou pou mars o non Zeova nou Bondye pour touzour e touzour.”​—Mik. 4:5, NWT. w20.06 13 ¶17-18

Ler lerwa nor ek lezot gouvernman pou atak pep Bondye, sa pou fer Bondye Tou Pwisan ankoler e lager Armagedon pou konmanse. (Rev. 16:14, 16) Sa letan lerwa nor ansanm avek lezot nasyon ki form parti Gog ki sorti Magog, pou ganny detrir e “personn pa pou vin ed li.” (Dan. 11:45, NWT) Sa lot verse ki swiv dan Danyel i donn nou plis lenformasyon konsernan lafason ki lerwa nor ek son bann alye pou ganny detrir e ki mannyer nou pou ganny sove. (Dan. 12:1) Ki sa verse i vedir? Mikael i en lot non pour nou lerwa Zezi Kri. I’n “defann” pep Bondye depi 1914 ler i ti vin Lerwa dan Rwayonm Bondye dan lesyel. Byento, i “pou leve” oubyen detri son bann lennmi pandan lager Armagedon. Danyel i dir ki sa lager pou sa dernyen levennman e i pou en “letan langwas” ki pou pli pir ki’n deza arive.​—Rev. 6:2; 7:14. w20.05 15-16 ¶15-17

Zozef pa ti kapab sanz son sityasyon ler i ti en lesklav e ler i ti dan prizon. Me kwa ki ti ed li pour reste pozitif? Dan plas konsantre lo sa ki i pa ti kapab fer, i ti fer son mye dan sa travay ki i ti’n ganny demande pour fer. Zozef ti reste konsantre lo fer plezir Zeova. Akoz sa, Zeova ti beni tou sa ki Zozef ti fer. (Zen. 39:21-23) Leksperyans Zozef i fer nou rapel ki lemonn i kriyel e ki dimoun pou tret nou dan fason ki enzis. Menm en frer oubyen en ser i kapab tret nou dan en fason ki enzis. Me si Zeova i nou Ros, nou pa pou dekouraze oubyen aret servi li. (Ps. 62:6, 7; 1 Pyer 5:10) Rapel ki i kapab ki Zozef ti annan apepre 17 an ler i ti ganny sa bann rev. Sa i montre ki Zeova i annan konfyans dan bann zenn ki servi li. Ozordi i annan bokou zenn ki parey Zozef. Zot osi zot annan lafwa dan Zeova. Serten parmi zot in menm ganny anprizonnen dan en fason enzis akoz zot fidelite anver Bondye.​—Ps. 110:3. w20.12 16 ¶3; 17 ¶5, 7

Zapot Pyer ek zapot Zan ti vwar li konman en loner pour ganny persekite akoz zot pe swiv lansennyman Zezi e pe ansenny dimoun konsernan Zezi. (Akt 4:18-21; 5:27-29, 41, 42) Bann disip ti napa okenn rezon pour zot onte. Menm si bann dimoun ti napa respe pour bann Kretyen dan premye syek, sa bann Kretyen ti fer bokou plis pour ed dimoun ki sa bann ki ti opoz zot. Par egzanp, bann liv Labib ki serten sa bann Kretyen in ekri, i ankor pe ed e donn lespwar plizyer milyon dimoun. Sa Rwayonm ki zot ti koz lo la, i aprezan pe dirize dan lesyel e byento i pou diriz later antye. (Mat. 24:14) Me sa gouvernman pwisan ki ti egziste Ronm e ki ti persekit bann Kretyen dan premye syek, nepli egziste. Tandis ki sa bann Kretyen fidel ki zot ti persekite, pe dirize konman lerwa dan lesyel. Osi, sa bann dimoun ki ti ay e opoz bann Kretyen, in mor. Si zot ganny resisite, zot osi zot pou sitwayen sa Rwayonm ki bann Kretyen ti koz lo la.​—Rev. 5:10. w20.07 15 ¶4

Abraam ti sitan annan lafwa dan bann promes Bondye ki i ti konmsi i ti vwar Mesi, sa enn ki ti pou vin Lerwa dan Rwayonm Bondye. I pour sa rezon ki Zezi ti dir bann Zwif dan son letan: “Zot papa Abraam ti telman anvi vwar sa letan kot mon ti pou vini e i ti rezoui ler i ti pe reflesir lo la.” (Zan 8:56) Alor, i kler ki Abraam ti konnen ki serten son desandans ti pou form parti en Rwayonm ki ti pou ganny etablir par Zeova e i ti pare pour espere ziska ki Zeova i akonpli son promes. Ki mannyer Abraam ti montre ki i ti pe esper sa lavil oubyen Rwayonm, ki son arsitek i Bondye? Premyerman, Abraam pa ti vin sitwayen okenn rwayonm lo later. Menm si i ti al diferan landrwa, i pa ti zanmen etabli li dan en landrwa e i pa ti siport okenn lerwa imen. Osi, Abraam pa ti esey fer son prop rwayonm. O kontrer, i ti kontinyen obei Zeova e i ti espere ziska ki Zeova i akonpli Son promes. Par fer sa, i ti montre ki i ti annan en gran lafwa dan Zeova. w20.08 3 ¶4-5

Zeova in promet ki dan Paradi personn pa pou dir: “Mon malad!” (Iza. 33:24) Alor, bann ki resisite pou annan en lekor an bonn sante. Par kont, zot pa pou vin parfe deswit. Si non, zot fanmir ek zanmi pa pou rekonnet zot. I paret ki pandan Renny Mil an Kris, bann imen pou ptitapti vin parfe. A lafen sa mil an, Zezi pou redonn son Papa sa Rwayonm. Sa letan, sa Rwayonm pou’n fini fer tou sa ki Zeova i anvi i fer e sa i enkli fer bann imen vin parfe. (1 Kor. 15:24-28; Rev. 20:1-3) Imazinen ki mannyer i pou ete pour akeyir nou bann defen. Eski sa lazwa ki ou pou santi pou fer ou riye oubyen plere? Eski ou pou sitan zwaye ki ou pou sant bann kantik pour loue Zeova? Nou kapab asire ki nou leker pou deborde avek lanmour pour Zeova ek Zezi parski zot in fer li posib pour nou bann defen reviv ankor. w20.08 16-17 ¶9-10

Zapot Pol ti ankouraz bann Kretyen ki pa marye pour reflesir lo si zot kapab kontinyen servi Zeova konman selibater. (1 Kor. 7:8, 9) Nou asire ki Pol pa ti krwar ki bann Kretyen selibater ti bann dimoun enferyer. Anfet, i ti swazir Timote, en zenn frer selibater, pour fer bann travay enportan. (Fili. 2:19-22) Alor, i ti pou mal pour gete si en frer in marye oubyen i selibater pour deside si i kalifye pour en responsabilite dan kongregasyon. (1 Kor. 7:32-35, 38) Zezi ek Pol pa ti ansennyen ki bann Kretyen i devret marye oubyen ki zot devret reste selibater. Alor, ki nou kapab dir konsernan maryaz e konsernan reste selibater? Latour Veyer le 1 Oktob 2012 an Angle, i dir: “Anfet, tou le de [maryaz ek selibater] i kapab ganny vwar konman en kado sorti kot Bondye. . . . Zeova pa krwar ki bann dimoun selibater i devret onte oubyen sagren akoz zot pa marye.” Alor, nou bezwen demontre respe pour nou bann frer ek ser selibater dan kongregasyon. w20.08 28 ¶8-9

Dan serten pei, dimoun i reazir byen ler zot tann sa bon nouvel. I sanmenm sa ki zot ti pe espere! Dan lezot pei, dimoun pa vreman enterese avek Bondye oubyen Labib. Ki mannyer dimoun dan ou pei i reazir ler zot tann sa bon nouvel? Nenport fason ki dimoun i reazir, Zeova i ekspekte ki nou kontinyen anons sa bon nouvel ziska ki i dir sa travay in fini. Zeova in fini deside kan sa travay predikasyon pou fini. Apre sa, “lafen pou arive.” (Mat. 24:14) Zezi ti dir son bann disip ki i ti pou arive pandan bann dernyen zour e ki mannyer dimoun ti pou ete sa letan. I ti konnen ki sa bann keksoz ti kapab fer son bann disip aret konsantre lo sa travay predikasyon. Alor, i ti dir son bann disip “kontinyen veye.” (Mat. 24:42) Dan letan Noe, i ti annan en kantite keksoz ki ti fer dimoun pa port latansyon lo lavertisman ki Noe ti donnen. Sa bann menm keksoz i kapab distrer nou ozordi. (Mat. 24:37-39; 2 Pyer 2:5) I pour sa rezon ki nou bezwen reste konsantre lo sa travay ki Zeova in donn nou pour fer. w20.09 8 ¶1-2, 4

Satan i annan “en gran lakoler” e nou ti pou bet pour krwar ki nou pou kapab sap son lakoler. (Rev. 12:12) Byento, nou tou nou lafwa pou ganny teste. I pou annan “en gran ladetres, enn ki pa’n zanmen arive depi konmansman lemonn ziska prezan.” (Mat. 24:21) I kapab ki sa letan nou fanmir i vir lo nou e nou travay i ganny enterdi. (Mat. 10:35, 36) Personnelman, eski ou pou fer parey Lerwa Aza e annan konfyans ki Zeova pour ed e protez ou? (2 Kron. 14:11) Zeova pe deza prepar nou pour sa ki pou arive byento. I pe servi “sa lesklav fidel e pridan” pour donn nou “manze dan sa moman apropriye” pour ki nou annan tou sa ki nou bezwen pour reste for. (Mat. 24:45) Me nou tou nou devret fer tou sa ki nou kapab pour annan en lafwa for dan Zeova.​—Ebr. 10:38, 39. w20.09 18 ¶16-18

Ler i an armoni avek Son lavolonte, Zeova i kapab servi son lespri sen pour fer bann dimoun ki annan lotorite fer sa ki I anvi. Bann imen i kapab fouy en transe pour fer delo dan en larivyer al kot zot oule i ale. Pareyman, Zeova i kapab servi son lespri sen pour enfliyans bann dirizan pour fer bann keksoz dapre son plan. Ler sa i arive, bann dimoun ki annan lotorite i ganny motive pour fer bann desizyon ki benefisye pep Bondye. (Konpar Ezra 7:21, 25, 26.) Ki nou kapab fer? Nou kapab priy “pour bann lerwa ek tou bann ki annan en o pozisyon” ler zot pe fer bann desizyon ki annan pour fer avek nou ladorasyon. (1 Tim. 2:1, 2; Nee. 1:11) Parey bann Kretyen dan premye syek ti fer, nou osi nou priy Bondye pour nou bann frer ek ser ki dan prizon.​—Akt 12:5; Ebr. 13:3. w20.11 15 ¶13-14

Si ou sa enn ki’n fer letid en dimoun ki fek batize, ou vreman eksite e kontan ler i batize! (1 Tesa. 2:19, 20) Bann ki fek batize i parey “bann let rekomandasyon,” pa zis pour zot ansenyan me osi pour kongregasyon. (2 Kor. 3:1-3) Nou vreman kontan pour vwar ki dan lespas kat-r-an, bann proklanmater partou dan lemonn in fer apepre 10,000,000 letid Labib tou le mwan. Pandan sa bann menm lannen, apepre 280,000 dimoun in batize tou le lannen. Ki mannyer nou kapab ed plis dimoun parmi sa plizyer milyon ki pe etidye pour batize? Zeova i ankor pe donn dimoun loportinite pour vin son Temwen. Sanmenm sa rezon nou fer nou mye pour ed bann etidyan Labib progrese ziska batenm pli vit posib. Letan ki reste i kourt!​—1 Kor. 7:29a; 1 Pyer 4:7. w20.10 6 ¶1-2

Lerwa Sail pa ti obei Zeova. Ler Samyel ti koz avek li konsernan sa ki i ti’n fer, Sail pa ti oule admet ki i ti’n fer en fot. O kontrer, i ti esey zistifye son aksyon e blanm lezot. (1 Sam. 15:13-24) Pli boner, Sail ti’n fer en keksoz parey. (1 Sam. 13:10-14) Malerezman, i ti les lorgey devlope dan son leker. I pa ti sanz son fason panse alor Zeova ti reprimann li e rezet li. Vi ki nou pa anvi vin parey Sail, nou devret demann nou lekor sa bann kestyon swivan: ‘Ler mon lir Parol Bondye, eski mon rod leskiz pour pa aplik sa ki mon’n lir? Eski mon krwar ki sa ki mon pe fer pa sitan mal? Eski mon blanm lezot pour sa ki mon pe fer?’ Si nou larepons pour sa bann kestyon i wi, nou devret sanz nou fason panse. Si nou pa fer sa, nou kapab vin sitan arogan ki Zeova i rezet nou konman son zanmi. w20.11 20 ¶4-5

Zenn, deside lekel ki ou pou servi. Ou menm ou bezwen asire lekel Zeova, ki son plan e ki sa i annan pour fer avek ou. (Rom. 12:2) Apre ou pou kapab fer sa desizyon pli enportan dan ou lavi e sa i pour servi Zeova. (Zoz. 24:15) Si ou lir e etidye Labib regilyerman, ou lanmour pour kontinyen ogmante e ou lafwa dan li pou vin pli for. Swazir pour fer lavolonte Zeova premye dan ou lavi. Lemonn Satan i promet ki si ou servi ou bann abilite pour ou prop byenfe ou pou ere. Me nou konnen ki bann ki konsantre lo bann keksoz materyel i ganny “en kantite douler.” (1 Tim. 6:9, 10) De lot kote, si ou ekout Zeova e swazir pour fer son lavolonte premye, ou pou “azir avek lasazes” e ou pou ere.​—Zoz. 1:8, NWT. w20.10 30-31 ¶17-18

Dan premye syek, sa mesaz ki Zezi ti anonse ti donn dimoun lespwar. I ti donn son bann disip lord pour kontinyen sa travay ki i’n konmanse. I ti dir zot rann temwannyaz “dan bann landrwa pli elwannyen lo later.” (Akt 1:8) Byensir, zot pa ti pou kapab fer sa travay avek zot prop lafors. Zot ti pou bezwen lespri sen, “sa led” ki Zezi ti’n promet zot. (Zan 14:26; Zek. 4:6) Bann disip ti ganny lespri sen Lapannkot lannen 33. Avek led lespri sen, zot pa ti tarde pour konmans anons sa bon nouvel e dan en ptigin letan, plizyer milye dimoun ti aksepte sa bon nouvel. (Akt 2:41; 4:4) Ler dimoun ti konmans persekit sa bann disip, zot pa ti per. O kontrer zot ti demann Zeova led e zot ti kontinyen anons sa bon nouvel. Zot ti priye: “Ed ou bann lesklav pour kontinyen anons ou parol avek lardyes.” Apre sa, zot ti ganny led lespri sen e zot ti kontinyen “anons parol Bondye avek lardyes.”​—Akt 4:18-20, 29, 31. w20.10 21 ¶4-5

Akoz nou asire ki Zeova ti resisit Zezi? I annan plizyer dimoun ki ti vwar Zezi apre ki i ti’n resisite e zot ti koz lo la avek lezot. (1 Kor. 15:5-7) Premye dimoun ki zapot Pol i mansyonnen i zapot Pyer (Sefas). En group disip ti konfirmen ki Pyer ti’n vwar Zezi apre ki i ti’n resisite. (Lik 24:33, 34) Apre, Pol ti dir ki “sa 12 zapot” ti osi vwar Zezi apre ki i ti’n resisite. Apre sa, Kris “ti aparet avek plis ki 500 frer an menm tan,” petet sa ti ariv Galile pandan sa levennman ki ganny mansyonnen dan Matye 28:16-20. Zezi ti osi “aparet avek Zak” e i tre probab ki Zak ti son demi frer, ki oparavan pa ti’n krwar ki Zezi ti Mesi. (Zan 7:5) Apre ki Zak ti’n vwar Zezi, i ti konvenki ki Zezi ti Mesi. I enteresan pour note ki apepre lannen 55, ler Pol ti ekri son let, en kantite dimoun ki ti’n vwar Zezi apre ki i ti’n resisite ti ankor vivan. Alor okenn dimoun ki ti annan dout ki Zezi ti’n resisite ti’n kapab koz avek sa bann ki ti’n vwar Zezi. w20.12 3 ¶5, 7-8

Ler nou pa santi nou byen e sirtou ler nou malad pour en kantite letan, i kapab difisil pour nou reste pozitif. Alor, rod led avek Zeova. Menm si Zeova pa fer mirak pour geri nou, i rekonfort nou e donn nou sa lafors ki nou bezwen pour andire. (Ps. 94:19) Par egzanp, i kapab motiv nou bann frer ek ser pour ed nou fer serten travay kot nou lakour. I kapab osi motiv nou bann frer pour priy ansanm avek nou. Oubyen i kapab fer nou rapel bann verse rekonfortan dan Labib, parey bann verse ki koz lo sa lespwar ki nou annan pour viv dan en nouvo lemonn kot napa maladi ek soufrans. (Rom. 15:4) Par kont, nou kapab santi ki nou pa kapab anons sa bon nouvel parey nou ti ava kontan. En ser ki apel Laurel ti bezwen reste alonze pour 37 an dan en masin ki ed li respire. I ti osi ganny kanser, maladi lapo e i ti fer plizyer loperasyon. Me sa pa ti anpes li anons sa bon nouvel. I ti rann temwannyaz avek bann ners ek lezot travayer lasante ki ti vin kot son lakour e i’n ed omwen 17 dimoun pour aprann konn Zeova! w20.12 24 ¶9; 25 ¶12

Zapot Pol ti bezwen led. Ver lannen 56, en lafoul ti trenn li an deor tanp Zerizalenm e zot ti esey touy li. Son lannmen, ler Pol ti ganny anmennen devan Sannedren, son bann lennmi ti pros pour touy li. (Akt 21:30-32; 22:30; 23:6-10) I kapab ki dan sa moman Pol ti demann son lekor: ‘Konbyen letan mon pou kapab siport sa kalite labi?’ Ki led Pol ti gannyen? Sa zour swar apre ki Pol ti’n ganny arete, “Senyer,” setadir Zezi, ti vin dir li: “Pran kouraz! Parski zis parey ou’n rann temwannyaz afon Zerizalenm konsernan mwan, ou osi devret rann temwannyaz Ronm.” (Akt 23:11) Sa promes ti sirman ankouraz Pol! Zezi ti felisit Pol pour sa travay ki Pol ti’n fer Zerizalenm e i ti promet ki Pol ti pou ariv Ronm sen e sof, kot i ti pou kontinyen rann temwannyaz. Pol ti’n bezwen santi li sen e sof, parey en zanfan ki dan lebra son papa. w20.11 12 ¶1; 13 ¶3, 4

Nou lespwar i “parey lank en bato dan nou lavi” parski i ed nou reste kalm malgre nou pas dan bann sityasyon difisil oubyen nou annan bann problenm ki fatig nou. Mazin lo sa lavenir ki Zeova in promet. Sa letan, i pou napa nanryen ki pou fer nou enkyet. (Iza. 65:17) Imazin ou dan sa nouvo lemonn kot i annan lape e kot napa bann move keksoz ki pe arive. (Mik. 4:4) Osi, ler ou koz avek lezot konsernan nouvo lemonn sa pou fer ou pli asire konsernan ou lespwar. Alor, fer tou sa ki ou kapab dan sa travay pour fer disip. Si ou fer sa, ou lespwar pou “konpletman asire ziska lafen.” (Ebr. 6:11) Anmezir ki lafen sa lemonn i aprose, nou pou fer fas avek plis problenm ki kapab fer nou enkyet. Nou pou kapab reste kalm ler nou fer fas avek sa bann problenm e pour nou pa pou depan lo nou prop lafors me pour annan konfyans dan Zeova. Annou montre par nou aksyon ki nou annan lafwa dan sa promes Zeova ki dir: “Zot pou annan lafors si zot reste kalm e annan konfyans.”​—Iza. 30:15, NWT. w21.01 7 ¶17-18

Remarke ki Zak 5:11 i koz lo tandres ek lafeksyon ki Zeova i annan e osi son mizerikord. (Egz. 34:6) En fason ki Zeova i demontre mizerikord oubyen pran pitye pour nou, i ler i pardonn bann fot ki nou’n fer. (Ps. 51:1) Dapre Labib, en dimoun ki pran pitye pour en lot i fer plis ki zis pardonn li pour bann fot ki i’n fer. I osi enplik en santiman for ki en dimoun i annan ler i vwar en lot dimoun pe soufer e sa i pous li pour esey ed sa dimoun. Zeova i dir ki ler i vwar nou pe soufer i vreman anvi ed nou e sa santiman i pli for ki santiman ki en manman i annan pour son zanfan. (Iza. 49:15) Ler nou dan problenm Zeova i pran pitye pour nou e sa i motiv li pour ed nou. (Ps. 37:39; 1 Kor. 10:13) Nou pran pitye pour nou bann frer ek ser ler nou pardonn zot e pa gard rankin ler zot dezapwent nou. (Efe. 4:32) En lot fason enportan ki nou kapab fer sa, i ler nou siport nou bann frer ek ser ler zot pas dan problenm. Ler lanmour i motiv nou pour demontre mizerikord anver lezot, nou pe swiv legzanp Zeova parski napa personn ki demontre plis tandres ek lafeksyon ki Zeova.​—Efe. 5:1. w21.01 21 ¶5

En sef fanmir pa devret pas tro bokou letan dan travay ki sa i anpes li demontre lafeksyon pour son fanmir e i pa arive ed son fanmir pour annan en bon lanmitye avek Zeova. I devret osi ansenny e disiplin son zanfan. Zeova i ansenny e disiplin nou parski i anvi ed nou. (Ebr. 12:7-9) Zezi i ansenny e disiplin bann ki anba son lotorite parey son Papa. (Zan 15:14, 15) I donn bann konsey ferm avek labonte. (Mat. 20:24-28) I konnen ki nou enparfe e ki nou souvan fer fot. (Mat. 26:41) En sef fanmir ki swiv legzanp Zeova ek Zezi i gard antet ki son madanm ek zanfan i enparfe. I pa “pran lakoler” avek son madanm ek zanfan. (Kol. 3:19) O kontrer i aplik sa prensip ki dan Galat 6:1 e i esey redres zot “avek ladouser” akoz i rapel ki li osi i enparfe. Parey Zezi, i realize ki sa pli bon fason pour ansenny zot i atraver son legzanp. w21.02 6-7 ¶16-18

Atraver ranson, Zeova in aste lavi tou dimoun dan kongregasyon. I’n osi aste lavi tou lezot dimoun ki met zot lafwa dan Zezi. (Mark 10:45; Akt 20:28; 1 Kor. 15:21, 22) Alor, i apropriye pour Zeova apwent Zezi konman sef kongregasyon parski i’n sakrifye son lavi pour nou. I pour sa rezon ki Zezi i annan sa lotorite pour fer bann lalwa konsernan sa ki bann dimoun, bann fanmir ek kongregasyon i devret fer. I osi annan sa lotorite pour fer sir ki nou obei sa bann lalwa. (Gal. 6:2) Me Zezi pa zis fer bann lalwa. I pran swen avek nou e i kontan sakenn ant nou. (Efe. 5:29) Bann ser i demontre respe pour Kris ler zot swiv bann gidans ki ganny donnen par bann zonm ki Kris in apwente pour pran swen avek zot. Ler bann frer i demontre respe pour bann ser, zot montre ki zot konpran sa laranzman ki Zeova in fer pour donn bann msye ek bann ansyen serten lotorite. Ler tou dimoun dan kongregasyon i konpran e demontre respe pour sa laranzman ki Zeova in fer pour donn Zezi, bann ansyen ek bann sef fanmir serten lotorite, i pou annan lape dan kongregasyon. Pli enportan ankor, nou loue Zeova, nou Papa ki dan lesyel, ki kontan nou. w21.02 18-19 ¶14-17.

Ler David ti pe kasyet dan pei bann Filisten, li avek son bann zonm, ti kit zot fanmir kot lakour pour al lager. Ler zot ti’n ale, zot bann lennmi ti pran tou zot bann keksoz ek zot fanmir konman prizonnyen. Vi ki David ti en gerye eksperyanse, i ti’n kapab mazinen ki i kapab fasilman fer en bon plan pour al sers zot fanmir. O kontrer, David ti demann Zeova pour ed li. David ti demann Zeova: “Eski mon devret tay deryer sa group bandi?” Zeova ti dir David ki i devret ale e i pou delivre son bann dimoun. (1 Sam. 30:7-10, NWT) Ki ou kapab aprann avek sa resi? Rod konsey lezot avan ou fer en desizyon. Zenn, koz avek ou paran. Ou osi kapab ganny bann bon konsey avek bann ansyen eksperyanse. Zeova i annan konfyans dan sa bann zonm e ou osi ou kapab annan konfyans dan zot. Zeova in donn kongregasyon sa bann zonm konman “kado.” (Efe. 4:8) Ou pou fer bann bon desizyon si ou imit zot lafwa e ekout zot bann konsey saz. w21.03 4-5 ¶10-11

Zezi ti dir ki si nou pa aplik sa ki nou aprann, nou parey en zonm ki fer son lakaz lo disab. I travay dir me son zefor i anven. Akoz sa? Parski ler tanpet i vini e delo i monte, son lakaz pou ganny detrir. (Mat. 7:24-27) Pareyman si nou pa aplik sa ki nou aprann, nou zefor pou anven. Ler nou pas dan problenm oubyen nou ganny persekite, nou lafwa pa pou ase for. Me ler nou etidye e aplik sa ki nou aprann, nou pou fer bann pli bon desizyon, nou pou annan lape lespri e nou lafwa pou vin pli for. (Iza. 48:17, 18 NWT) Pour nou reste fidel avek Zeova ler nou dan problenm, nou bezwen kontinyen priye e etidye son Parol regilyerman. Nou devret toultan mazinen ki enn bann keksoz pli enportan ki nou kapab fer i pour glorifye Zeova. Nou kapab asire ki Zeova pa pou zanmen abandonn nou e ki personn pa pou kapab anpes li kontan nou.​—Ebr. 13:5, 6. w21.03 15 ¶6; 18 ¶20