Akoz viv dapre standar Labib?

ESKI sa ki Labib i dir konsernan sèks i aryere oubyen tro strik? Non, i tou lekontrer. Pwennvi Labib lo sèks i kapab ed nou pour evit:

▪ Bann maladi ki ganny transmet par sèks

▪ Ganny zanfan an deor maryaz

▪ Move konsekans ki en maryaz kase i anmennen

▪ En konsyans sarze

▪ Imilyasyon akoz lezot in servi nou zis pour satisfer zot dezir seksyel

Zeova nou Kreater i anvi ki ou ganny bokou byenfe atraver sa kado ki i’n donn ou.a Bondye i “sa Enn ki pe ansenny ou pour ou prop byenfe.” (Izai 48:17) En dimoun ki swiv konsey ki Labib i donnen lo sèks pou annan:

▪ En bon relasyon avek Bondye

▪ Lape lespri

▪ En bon relasyon dan son fanmir

▪ En bon repitasyon

▪ Respe pour son lekor

Me si ou pa pe viv dapre bann standar moral ki dan Labib, eski i posib pour ou sanz ou fason viv? Eski Bondye pou toultan remontrans ou pour sa ki’n ou’n fer dan lepase?

Annou egzamin sa pwen: Parmi bann dimoun ki ti dan sa premye kongregasyon Kretyen, i ti annan bann ki oparavan ti bann adilter, omoseksyel ek bann ki ti fer sèks an deor maryaz. Zot ti deside pour sanz zot fason viv e sa ti benefisye zot en kantite. (1 Korentyen 6:9-11) I annan en kantite dimoun dan lemonn antye ki pe fer sa menm swa. Zot in kapab reste fidel avek zot konzwen e pe eksperyans sa byenfe ki en dimoun i gannyen kan i viv dapre bann standar Labib. Enn bann legzanp se Sarah, sa fiy ki ganny mansyonnen o konmansman premye lartik.

“Mon ti santi mwan soulaze en sel kou”

Sarah ti realize ki sa kalite lavi ki i ti pe viv pa ti pe donn li sa laliberte ek satisfaksyon ki i ti pe rode. I ti dir: “I ti konmsi mon konsyans ti’n ganny marke avek en feray so. Mon ti onte e mon ti per ki mon ti pou tonm ansent oubyen anmas kek maladi. Mon’n toultan krwar dan Bondye e mon ti konnen ki i pa ti kontan ki mannyer mon ti pe anmenn mon lavi. Mon ti santi mwan sal e sa ti manz mwan anndan parey en kanser.”

Finalman Sarah ti ganny sa lafors pour sanz son lavi. I ti rod led son paran ki Temwen Zeova. I ti osi demann led bann ansyen kalifye dan son kongregasyon. I ti dir: “Mon ti sirprann par lafason ki mon paran ek bann ansyen ti tret mwan avek labonte ek lanmour. Mon ti santi mwan soulaze en sel kou.”

Ozordi Sarah i annan de zanfan. I dir: “Mon pa kasyet nanryen avek mon bann zanfan. Mon koz avek zot lo bann swa ki mon ti fer. Mon anvi ki zot konpran ki mannyer i ti vreman afekte mwan kan mon pa ti pe pran kont sa ki Labib i dir. Mon anvi ed zot vwar valer sa bann byenfe ki viv dapre bann standar Bondye lo sèks i kapab annan lo zot fizikman, mantalman e emosyonnelman. Mon plis ki sir ki Bondye in donn nou sa bann standar moral akoz i pa anvi ki nou sibir okenn ditor.”

Ou osi ou kapab ganny sa bann byenfe si ou swiv bann gidans Bondye. Labib i fer sa promes: “Bann lord Zeova i drwat, i fer leker rezwir. Komannman Zeova i prop, i fer lizye briye. . . .  Obeir zot i anmenn en gran rekonpans.”​—Psonm 19:8, 11.b

[Not anba lo paz]

[Ekstre lo paz 8]

Souvan bann ki inyor bann standar Labib i ganny trai e sa i koz bokou soufrans

[Ekstre lo paz 9]

Bann ki viv dapre standar Labib i annan en konsyans kler e zot annan en bon relasyon dan zot fanmir