Pou nepli annan dezas!
SI EN dimoun i dir ou: “Byento, pou nepli annan dezas.” Ki mannyer ou pou reazir? Petet ou kapab dir: “Ou pe reve ou, kwa? Dezas i form parti lavi tou le zour.” Ouswa ou kapab mazinen: ‘Lekel i krwar i pe anbete?’
Menm si dezas natirel i paret konman en keksoz ki pa pou zanmen fini en zour, i annan en lespwar ki sa pou sanze. Me, imen pa pou kapab fer sa sanzman. Bann imen pa antyerman konpran ki mannyer e akoz serten keksoz i arive dan lanatir, zot pa ni menm kapab kontrol zot ouswa anpes zot arive. Lerwa Salomon, en zonm saz ki ti kontan fer bann lobzervasyon ti ekrir: “Imen pa arive dekouver tou travay ki’n ganny fer partou lo later; menm si laplipar imen in travay dir, me zot pa arive vwar. E menm si zot dir ki zot ase saz pour konnen, zot pa pou kapab trouv li.” —Eklezyast 8:17.
Si imen pa kapab kontrol dezas natirel, lekel ki kapab? Labib i idantifye nou Kreater konman sa enn ki kapab kontrol dezas natirel. Li ki’n etablir bann prosesis dan lanatir, parey sirk delo. (Eklezyast 1:7) Kontrerman avek imen, Bondye i annan en pouvwar ekstraordiner. Pour donn laprev sa realite, profet Zeremi ti dir: “O Souvren Senyer Zeova! Ou menm, ki’n kre lesyel ek later par ou gran pwisans e ler ou ti anvoy ou lanmen. Tou sa bann keksoz pa tro merveye pour ou.” (Zeremi 32:17) Vi ki Bondye ki ti kree later ek tou son bann eleman, i normal ki i konnen konman pour kontrol zot pour ki bann dimoun i reste lo later anpe e an sekirite. —Psonm 37:11; 115:16.
Alor, ki mannyer Bondye pou fer sa? Petet ou konnen ki sa kantite keksoz efreyan ki pe arive lo later ozordi i form par sa “siny” ki endik “lafen” oubyen konklizyon sa sistenm. Deplis, Zezi ti dir: “Kan zot war tou sa bann keksoz pe arive, konnen ki Rwayonm Bondye i pros.” (Matye 24:3; Lik 21:31) Se Rwayonm Bondye, en gouvernman dan lesyel ki Bondye in etablir ki pou anmenn sa bann gran sanzman lo later e menm kontrol bann eleman natirel. Menm si Zeova i annan sa pouvwar pour fer sa li menm, i’n swazir son Garson pour fer sa travay. Profet Danyel ti dir sa lo li: “I ti ganny dominasyon, dinyite ek rwayonm, pour ki bann pep, kominote nasyonal ek bann langaz, zot tou zot devret servi li.” —Danyel 7:14.
Zezi Kri, Garson Bondye in ganny sa pouvwar neseser pour anmenn bann sanzman ki merite pour fer later vin en landrwa agreab. De mil an pase, kan Zezi ti lo later, i ti demontre lo en pti lanpler sa abilite ki i annan pour kontrol bann eleman natirel. En fwa, letan i ti dan en kannot avek son bann disip lo Lanmer Galile, “en gro divan ti leve e laroul ti tap avek kannot e delo ti konmans ranpli kannot.” Son bann disip ti panik. Zot ti per pangar zot mor e zot ti al kot Zezi. Ki Zezi ti fer? I ti zis “koz severman avek divan e dir avek lanmer, ‘Silans. Reste trankil.’ Divan ti tonbe, e partou ti kalmi.” Son disip ti sirprann e dir antre zot: “Lekel sa, ki menm divan ek lanmer i obei li?” —Mark 4:37-41.
La konmela, Zezi i dan lesyel e i’n ganny en gran pouvwar ek lotorite. Konman Lerwa Rwayonm Bondye, i annan sa responsabilite ensi ki abilite pour fer tou sa bann sanzman neseser pour ki tou dimoun i viv anpe e an sekirite lo later.
Me i evidan ki zonm i lakoz bokou problenm ek dezas ki arive. Sa bann dezas i vin pli pir akoz serten endividi egois e voras in eksplwat later. Ki Rwayonm Bondye pou fer avek bann dimoun ki kontinyen fer sa bann keksoz? Labib i dir ki Senyer Zezi pou vini sorti “dan lesyel avek son bann lanz pisan, avek laflanm dife, pour tir vanzans lo bann ki pa konn Bondye ek bann ki pa obei levanzil ki konsern nou Senyer Zezi.” I pou osi “detrir bann ki detrir later.” —2 Tesalonisyen 1:7, 8; Revelasyon 11:18.
Apre sa, Zezi Kri sa “Rwa-de-rwa” pou pran kontrol lo tou bann eleman later. (Revelasyon 19:16) I pou fer sir ki bann sitwayen Rwayonm Bondye pa pou soufer ankor avek okenn maler. I pou servi son pouvwar pour kontrol bann eleman lanatir pour ki letan ek bann sezon pa pou en danze pour bann imen. Sa promes ki Zeova ti fer avek son pep en bon pe letan pase pou ganny realize: “Mon pou osi donn zot lapli dan son letan apropriye e sa pei pou donn son prodwi e pye dibwa pou raport son fri.” (Levitik 26:4) Bann dimoun pou kapab konstri zot lakaz san ki zot per okenn maler: “Zot pou konstrir lakaz e zot pou reste ladan; wi, zot pou plant pye rezen e zot pou manz son fri.”—Izai 65:21.
Ki ou devret fer?
Parey bokou lezot dimoun ankor, petet ou ti pou kontan viv dan en lemonn kot napa dezas. Me, ki ou pou bezwen fer pour kapab la? Vi ki “bann ki pa konn Bondye ek bann ki pa obei levanzil” pa pou reste dan en lemonn kot pou napa dezas, i kler ki en dimoun i bezwen aprann konn Bondye depi la konmela e siport son dominasyon. Bondye i oule ki nou konn li e obeir levanzil lo Rwayonm ki i’n etablir atraver son Garson.
Pli bon fason pour aprann fer sa i atraver en letid Labib o profon. Dan Labib i annan detay lo sa ki en dimoun i devret fer pour kapab viv dan en lanvironnman stab ki pou egziste anba dominasyon Rwayonm Bondye. Akoz ou pa demann Temwen Zeova led pour konn sa ki Labib i dir? Zot pou kontan pour ed ou. Selman, en keksoz ou kapab asire se ki si ou fer zefor pour konn Bondye e obeir levanzil, savedir sa parol dan Proverb 1:33 pou ganny akonplir dan ou ka. Sa proverb i dir: “Sa enn ki pe ekout mwan, pou reste an sekirite e i pou viv dan trankilite san per maler.”