Abraam en zonm ki ti annan limilite
Abraam i asiz anba son latant kot i ganny proteze avek sa gro ker soley. Anmezir ki i get lo lorizon, Abraam i vwar trwa zonm ki pe vizit sa landrwa.a San okenn ezitasyon, i taye pour al zwenn zot, i ensiste ki zot repoz en pti kou e pas en pe letan avek li. I ofer zot “en bout dipen,” me apre i deside pour fer en gran repa pour zot. I ofer zot dipen ki’n fek fer, diber, dile ek sa pli bon lavyann ki i annan. Par ofer son bann viziter sa kalite manze, Abraam pa zis demontre lospitalite anver zot me parey nou pou vwar i osi demontre vre limilite. —Zenez 18:1-8.
KI SI SA LIMILITE? En dimoun ki annan limilite pa orgeye oubyen arogan. I rekonnet ki lezot i pli bon ki li dan en fason ou en lot. (Filipyen 2:3) I ekout sizesyon lezot e i pare pour servi lezot.
DAN KI FASON ABRAAM TI DEMONTRE LIMILITE? Abraam ti pare pour servi lezot. Parey nou’n vwar anler, ler Abraam ti vwar sa trwa zonm, deswit i ti konmans met pare bann keksoz pour servi zot. Son madanm Sara ti vitman konmans prepar manze. Me remarke sirtou lekel ki ti pe fer laplipar keksoz: Abraam ti taye pour zwenn bann viziter, i ti ofer pour donn zot en keksoz pour manze, i ti tay kot troupo pour rod en zannimo pour touye e i ti donn zot tou sa ki ti’n ganny prepare. Olye demann son bann serviter pour fer tou sa la, avek limilite Abraam ti pare pour fer tou sa bann louvraz li menm. I pa ti konsider li tro enportan pour servi lezot.
Abraam ti ekout sizesyon bann ki ti anba son lotorite. Labib pa koz bokou lo bann konversasyon ki ti arive ant Abraam ek Sara. Pourtan, i montre ki Abraam ti ekout e azir de fwa dapre bann nide Sara. (Zenez 16:2; 21:8-14) Enn fwa, sizesyon Sara pa “ti fer plezir Abraam ditou.” Me ler Zeova ti koz avek Abraam e dir li ki sa ki Sara ti’n sizere ti en bon nide, avek limilite Abraam ti sede e i ti met sa sizesyon an pratik.
KI LESON NOU TIRE? Si nou vreman annan limilite, nou pou kontan pour servi lezot. Nou pou trouv lazwa dan tou sa ki nou fer pour fer zot lavi pli konfortab.
Nou kapab osi demontre limilite par lafason ki nou azir kan lezot i donn nou bann sizesyon. Olye pa ekout en sizesyon senpleman akoz pa nou ki’n mazinen, nou kontan pour aksepte sizesyon lezot. (Proverb 15:22) I byen pour bann ki annan en serten lotorite lo lezot annan en leta lespri koumsa. John en soupervayzer eksperyanse ti dir: “Mon’n remarke ki en bon sirveyan i kre en latmosfer kot dimoun i santi zot alez pour eksprim zot santiman. Ou bezwen annan ase limilite pour rekonnet ki en dimoun ki anba ou lotorite i kapab konn en pli bon fason pour fer keksoz ki ou. Deplis napa personn, ni menm en sirveyan ki kapab dir ki zis li ki annan bann bon nide.”
Nou pou ganny faver Zeova, ler nou imit Abraam par ekout sizesyon lezot e pare pour servi zot. Apre tou, “Bondye i opoz sa ki annan lorgey, me i donn son lagras sa ki annan limilite.” —1 Pyer 5:5.
[Not anba lo paz]