Vin “lesklav” Zeova

“Zot . . . lesklav Bondye.”​—ROM. 6:22.

KI OU PANSE?

Kwa ki enplike dan sa kalite lesklavaz ki ganny dekrir dan Romen 6:22?

Ki mannyer nou kapab evite vin lesklav Satan ek son lemonn?

Ki rekonpans Zeova i ofer son bann lesklav?

1. Eksplik diferans ant lafason ki dimoun i konsider lesklavaz ek lafason ki Romen 6:22 i dekrir lesklavaz.

LAFASON ki bann Kretyen i lesklav i diferan avek lafason ki bokou dimoun i konsider lesklavaz. Bokou dimoun i mazinen ki en lesklav i normalman ganny abize, oprimen e maltrete dan en fason enzis. Par kont, Parol Bondye i koz lo lesklavaz dan en lot fason, ki enplik en leta lespri volonter pour servi en bon Met. Anfet, kan zapot Pol ti pe dir ki bann Kretyen dan premye syek ti “lesklav Bondye,” i ti pe montre ki zot ti pe antreprann en servis sakre ki ganny motive par lanmour pour Bondye. (Rom. 6:22) Ki sa kalite lesklavaz i enplike? Ki mannyer nou kapab evite vin lesklav Satan ek son lemonn? Ki rekonpans bann lesklav ki fidel avek Zeova pou gannyen?

“MON VREMAN KONTAN MON MET”

2. (a) Kwa ki ti kapab pous en Izraelit pour les pase sa loportinite pour revin lib? (b) Kwa ki enteresan avek pers zorey en lesklav ki ti pare pour kontinyen servi son met?

² Dapre Lalwa ki Bondye ti donn bann Izraelit, nou kapab aprann ki savedir vin lesklav Zeova. En lesklav Ebre ti kapab revin lib apre ki i ti’n servi son met pour set an. (Egz. 21:2) Me, pour en lesklav ki ti vreman kontan son met e ki ti anvi kontinyen servi li, Zeova ti fer en provizyon spesyal. Sa met ti pou bezwen anmenn son lesklav kot laport ouswa lankadreman laport e pers son zorey avek en keksoz pwent. (Egz. 21:5, 6) I enteresan pour note ki sa prosedir ti enplik zorey. Dan langaz Ebre, lobeisans i relye avek en mo ki vedir tande ouswa ekoute. Sa lesklav ki ti kontan son met ti pou vreman anvi kontinyen servi li. Sa i ed nou pour apresye sa ki i enplike pour dedye nou lavi avek Zeova, andotmo, nou pare pour obei li volonterman akoz nou kontan li.

3. Kwa ki pous nou pour dedye nou lavi avek Bondye?

³ Kan nou ti batize, nou ti’n deza fini deside pour servi Zeova, andotmo pour vin son lesklav. Nou ti dedye nou lavi avek li akoz nou ti anvi obei li e fer son lavolonte. Personn pa ti fors nou pour fer sa. Anfet, menm bann zenn ki batize i fer li apre ki zot in dedye zot lavi personnelman avek Zeova e pa zis pour fer plezir zot paran. Lanmour pour Zeova, nou Met ki dan lesyel ki pous nou pour dedye nou lavi avek li. Zapot Zan ti ekrir: “La lanmour Bondye: ki nou obei son konmannman.”​—1 Zan 5:3.

LIB, ME LESKLAV KANTMENM

4. Kwa ki neseser pour nou vin “lesklav lazistis”?

⁴ Pa nou vreman rekonesan ki Zeova in donn nou sa loportinite pour vin son lesklav! Nou lafwa dan sakrifis Kris i fer li posib pour nou sorti anba kondannasyon pese. Menm si nou enparfe, nou’n pare pour vin lesklav Zeova ek Zezi. Pol ti eksplik sa klerman dan enn son let enspire: “Zot devre konsider zot konman mor pour pese me vivan pour Bondye dan Kris Zezi.” Apre sa, i ti donn sa lavertisman: “Eski zot pa konnen ki si zot soumet zot avek en dimoun pour obei li, zot vin lesklav sa dimoun ki zot obei? E sa met i swa pese ki anmenn lanmor, ouswa lobeisans ki anmenn lazistis. Me nou remersi Bondye, ki zot ki avan ti lesklav pese, zot aprezan obei avek tou zot leker sa ki trouv dan lansennyman ki zot in resevwar. Zot in ganny libere avek pese e zot in vin lesklav lazistis.” (Rom. 6:11, 16-18) Remarke ki sa zapot i fer referans avek “obei avek tou zot leker.” Savedir, nou dedikasyon avek Zeova i fer nou vin “lesklav lazistis.”

5. Ki lalit nou tou nou bezwen fer e akoz?

⁵ Kantmenm sa, i annan bann lobstak nou bezwen sirmonte pour arive viv an armoni avek nou dedikasyon. I annan de lalit pour nou fer. Premyerman, sa lalit ki Pol li menm ti bezwen fer. I ti ekrir: “Dan mwan menm, mon ganny plezir dan lalwa Bondye. Me mon trouv en lot lalwa dan mwan ki lit kont lalwa ki mon lespri i aprouve e ki fer mwan prizonnyen lalwa pese ki dan mwan.” (Rom. 7:22, 23) Lenperfeksyon ki nou’n erite i en defi pour nou osi. Anfet, nou bezwen kontinyen lite kont nou bann dezir natir imen. Zapot Pyer ti sipliy nou: “Fer konman bann zonm lib, me pa itiliz zot liberte konman en tapi pour kouver sa ki mal, me azir konman bann serviter [oubyen “lesklav,” NW] Bondye.”​—1 Pyer 2:16.

6, 7. Ki mannyer Satan i fer sa lemonn paret pli atiran?

⁶ Dezyenm lalit ki nou bezwen fer se avek sa lemonn ki dan pouvwar bann demon. Satan, dirizan sa lemonn, i target nou avek son bann misil pour fer nou kas nou fidelite avek Zeova ek Zezi. I anvi fer nou vin son lesklav e i anvi ki nou tonm dan son bann pyez. (Lir Efezyen 6:11, 12.) En fason ki Satan i fer sa se par fer son lemonn paret pli atiran e enteresan. Zapot Zan ti averti nou: “Si en dimoun i kontan lemonn, i napa lanmour pour nou Papa dan li. Tou sa ki dan lemonn: dezir natir imen, dezir atraver nou lizye ek lorgey dan lavi toulezour, tousala pa sorti kot nou Papa me i sorti dan lemonn.”​—1 Zan 2:15, 16.

⁷ Bokou dimoun dan lemonn i anvi ganny plis keksoz materyel. Satan i promot sa krwayans ki larzan i anmenn vre boner. I annan bokou gran magazen partou kote. Bann piblisite i met lanfaz lo sa ki en dimoun i posede ensi ki bann moman lwazir. Bann lazans vwayaz i ofer bann vwayaz ver bann destinasyon egzotik kot ou pou dan konpanni bann dimoun lemonn. Wi, toultour nou, mesaz ki pe ganny pase se ki nou bezwen annan sa ki “meyer,” me selman, fodre dapre standar sa lemonn.

8, 9. Ki pli gran danze ki egziste e akoz?

⁸ Kan i ti pe koz lo bann Kretyen dan kongregasyon premye syek ki ti’n fasilman adopte en pwennvi lemonn, Pyer ti donn sa lavertisman: “Zot pran gran plezir satisfer zot prop dezir an plen zour. Zot fer onte, ler zot partaz menm repa avek ou, alor ki zot pe kontinyen pran plezir dan zot tronpri. Zot pronons bann gran diskour vid e bet, zot servi dezir imoral zot prop natir pour met dan zot pyez bann ki apenn fek sape parmi bann ki viv dan lerer. Zot promet laliberte tandis ki zotmenm, zot lesklav bann move labitid koronpi; parski sak dimoun i lesklav sa ki domin li.”​—2 Pyer 2:13, 18, 19.

⁹ En dimoun ki satisfer son “dezir atraver [son] lizye” i pa lib. Plito, i vin lesklav Satan, met envizib sa lemonn. (1 Zan 5:19) Lesklavaz materyalizm i en pli gran danze ankor akoz i difisil pour sorti ladan.

EN KARYER SATISFEZAN

10, 11. Lekel ozordi ki Satan i target plis e akoz sistenm edikasyonnel sa lemonn i kapab en pyez?

¹⁰ Parey i ti fer Edenn, ozordi osi Satan i target sa bann ki mank leksperyans. I plifere target bann zenn. Satan pa kontan kan en zenn ouswa nenport ki i swazir pour vin lesklav Zeova. Lennmi Zeova i anvi ki tou sa bann ki dedye zot lavi avek li pa reisi gard zot devosyon ek fidelite anver li.

¹¹ Annou retourn lo legzanp sa lesklav ki ti aksepte pour ki son zorey i ganny perse. Sirman sa lesklav ti pou’n santi en pe douler e sa douler ti pou tanporer, me sa trou ki ti pou reste ti montre ki sa lesklav ti pare pour servi son met tou son lavi. Pareyman, i kapab vreman difisil e fermal pour en zenn fer en desizyon ki lekontrer avek sa ki lamazorite dimoun son laz i fer. Satan i promot sa lide ki en bon karyer dan son lemonn pou fer en dimoun annan en lavi satisfezan, me bann Kretyen i devret rapel lenportans pour satisfer zot bezwen spirityel. Zezi ti ansennyen: “Byennere bann ki pov an-espri, [oubyen “konsyan zot bezwen spirityel,” NW] akoz Rwayonm Lesyel i pour zot.” (Mat. 5:3) Bann Kretyen batize i viv pour fer lavolonte Zeova, pa lavolonte Satan. Zot pran plezir dan lalwa Zeova e zot medit lo la lizour konman aswar. (Lir Psonm 1:1-3.a) Me, bokou kors edikasyonnel ki egziste konmela pa pe donn en serviter Zeova ase letan pour medite e satisfer son bezwen spirityel.

12. Ki desizyon bokou zenn i annan pour fer ozordi?

¹² En met ki annan pwennvi sa lemonn i kapab fer lavi difisil pour en lesklav Kretyen. Dan son premye let pour bann Korentyen, Pol ti demande: “Eski ou ti en lesklav ler Bondye ti apel ou?” Apre, i ti konsey zot: “Pa fer nanryen! Me si ou kapab ganny ou laliberte, profit ou sans.” (1 Kor. 7:21) Plito en zonm i lib ki i en lesklav. Ozordi, dan plizyer pei, i en lobligasyon pour al lekol ziska en serten laz. Apre sa, en zelev i annan en swa. I pou difisil pour en dimoun pourswiv servis a plen tan si i fer bann letid avanse pour ki i ganny en bon karyer dan sa lemonn.​—Lir 1 Korentyen 7:23.

EN LEDIKASYON PLI O NIVO OUSWA PLI SIPERYER?

13. Ki kalite ledikasyon ki pou pli byen benefisye en serviter Zeova?

¹³ Pol ti averti bann Kretyen Kolos: “Fer atansyon ki zot pa tonm dan pyez personn avek zot bann fo largiman [ek] filozofi, ki pa baze lo Kris, me lo lasazes imen, e ki fonde lo tradisyon zonm, ek bann lespri ki kontrol lemonn.” (Kol. 2:8) “Bann fo largiman [ek] filozofi, . . . ki fonde lo tradisyon zonm” i komen dan sa lemonn ozordi e i ganny promote par bokou dimoun entelizan. Bann zelev ki termin letid akademik pli o nivo i souvan napa ase oubyen ditou abilite pratik, e laplipar di tan zot pa ankor pare pour fer fas avek bann realite lavi. De lot kote, bann serviter Zeova i swazir en nivo ledikasyon ki pou ed zot devlop bann abilite neseser pour ki zot kapab annan en lavi senp e servi Bondye a plen tan. Zot pran aker konsey Pol pour Timote ki dir: “Sertennman ki lafwa dan Bondye i en gran sours larises pour en dimoun si i kontant li avek sa ki i annan. Alor si nou annan manze ek lenz sa i ase.” (1 Tim. 6:6, 8) Plito ki ganny bann gran kalifikasyon oubyen tit, bann vre Kretyen i anvi ganny “bann let rekonmandasyon” par partisip pli plennman posib dan predikasyon.​—Lir 2 Korentyen 3:1-3.

14. Dapre Filipyen 3:8, ki mannyer Pol ti konsider son privilez konman en lesklav Bondye ek Kris?

¹⁴ Egzamin legzanp zapot Pol. I ti ganny ansennyen avek Gamalyel, en ansenyan Lalwa Zwif. Sa nivo ledikasyon ki Pol ti resevwar i kapab ganny konpare avek en degre liniversite ozordi. Me, ki mannyer Pol ti konsider sa kan i ti konpar li avek sa privilez ki i ti annan pour vin lesklav Bondye ek Kris? I ti ekrir: “Mon konsider tou keksoz konpletman konman en pert, akoz sa valer bokou pli siperyer ki annan dan konnesans mon Senyer, Kris Zezi.” Apre i ti azoute: “Akoz li, mon’n rezet tou, mon konsider tousala konman salte, pour mwan kapab ganny Kris.” (Fili. 3:8) Sa evalyasyon pou ed bann zenn ek zot paran Kretyen pour fer en bon desizyon an sa ki konsern nivo ledikasyon. (Vwar bann portre.)

BENEFISYE AVEK SA LEDIKASYON PLI SIPERYER

15, 16. Ki ledikasyon lorganizasyon Zeova i ofer e ki son bi?

¹⁵ Ki kalite latmosfer i annan dan bokou lenstitisyon skoler dan nou letan? Eski pa i souvan ranpli avek bann aktivite politik e sosyal? (Efe. 2:2) De lot kote, lorganizasyon Zeova i ofer sa ledikasyon pli siperyer dan lape dan kongregasyon. Nou tou nou annan sa loportinite pour benefisye avek Lekol Minister Teokratik ki ganny fer tou le semenn. Epi i annan bann formasyon spesyalize pour bann frer selibater (Lekol pour bann frer selibater) ek koup marye ki pionye (Lekol pour bann koup Kretyen). Sa bann formasyon teokratik i ed nou pour obeir Zeova, nou Met ki dan lesyel.

¹⁶ Nou kapab fouy dan Watch Tower Publications Index ouswa Watchtower Library lo CD-ROM pour ganny plis trezor spirityel. Bi prensipal nou formasyon baze lo Labib se pour ador Zeova. I ansenny nou konman pour ed lezot rekonsilye avek Bondye. (2 Kor. 5:20) An retour, sa pou ed zot pour ansenny lezot ankor.​—2 Tim. 2:2.

REKONPANS SA LESKLAV

17. Ki rekonpans ou kapab gannyen si ou pourswiv sa ledikasyon pli siperyer?

¹⁷ Dan parabol Zezi konsernan bann talan, de lesklav oubyen serviter fidel ti ganny felisitasyon zot met e rezwir ansanm avek li e i ti rekonpans zot avek plis travay ankor. (Lir Matye 25:21, 23.) Sa ledikasyon pli siperyer ozordi i donn lazwa ek rekonpans. Get legzanp Michael. I ti fer telman byen lekol ki son bann ansenyan ti envit li en miting pour diskit lo en plan pour al liniversite. Zot pa ti oule krwar kan Michael ti swazir en pti kour vokasyonnel ki ti pou pli tar permet li siport son lekor konman en pionye. Eski i santi ki i ti’n gat son sans? I rakonte: “Sa formasyon teokratik ki mon’n gannyen konman en pionye e la aprezan konman en ansyen i enkonparab.” I azoute: “Sa bann benediksyon ek privilez ki mon’n gannyen i annan bokou plis valer ki sa kantite larzan ki mon ti pou’n gannyen. Mon vreman kontan ki mon ti pourswiv sa ledikasyon pli siperyer.”

18. Kwa ki pous ou pour swazir sa ledikasyon pli siperyer?

¹⁸ Sa ledikasyon pli siperyer i ansenny nou lavolonte Bondye e i ed nou vin lesklav Zeova. I met devan nou sa lespwar pour ganny “libere en zour avek pouvwar destrikter” e finalman ganny “laliberte ek laglwar bann zanfan Bondye.” (Rom. 8:21) Deplis, nou aprann konman pour pli byen demontre ki nou vreman kontan Zeova, nou Met dan lesyel.​—Egz. 21:5.

[Not anba lo paz]

[Portre lo paz 12]

[Portre lo paz 14, 15]

Ki met ou pou servi?