Obeir bann berze Zeova

“Obei zot bann dirizan e swiv zot lord; parski zot pe kontinyelman vey lo zot lam.”​—EBR. 13:17.

KI OU POU REPONN?

Ki mannyer bann ansyen i pran swen avek troupo Bondye?

Akoz nou devret ekout bann berze dan kongregasyon?

Akoz lenperfeksyon bann berze dan kongregasyon pa en rezon pour pa ekout zot konsey baze lo Labib?

1, 2. Akoz i fer sans pour Zeova konpar son lekor avek en berze?

ZEOVA i konpar son lekor avek en berze. (Ezek. 34:11-14) Sa i enteresan akoz i ed nou konpran ki mannyer Zeova i ete. En bon berze i santi li responsab pour pran swen e protez bann mouton ki anba son responsabilite. I anmenn zot kot i annan zerb ek delo (Ps. 23:1, 2), i vey lo zot lizour konman aswar (Lik 2:8), i protez zot avek bann predater (1 Sam. 17:34, 35), i anmenn zot bann pti piti (Iza. 40:11), i rod sa bann ki’n perdi e i pran swen avek bann mouton ki’n ganny blese.​—Ezek. 34:16.

² Vi ki pep Zeova dan letan lontan ti en pep ki ti fer lagrikiltir e sonny zannimo, zot ti konpran deswit ler Zeova ti konpar son lekor avek en bon berze. Zot ti konnen ki mouton i bezwen latansyon ek swen pour ki zot kapab byen devlope. Dan en sans spirityel, i parey pour bann imen. (Mark 6:34) San en bon direksyon ek nouritir spirityel, bann imen i soufer. Zot vilnerab e zot kapab perdi, andotmo pa konn diferans ant byen ek mal, zis parey en “mouton ki napa berze.” (1 Rwa. 22:17) Par kont, Zeova i kontan pour donn son pep sa ki zot bezwen.

3. Ki nou pou diskite dan sa lartik?

³ Menm dan nou letan, lefet ki Zeova i ganny konpare avek en berze, sa i annan en sinifikasyon pour nou. Zeova i ankor pe pran swen avek son bann mouton. Annou vwar ki mannyer i diriz zot e pran swen avek bezwen son pep ozordi. Nou pou osi vwar ki mannyer bann mouton i benefisye avek swen ki Zeova i donn zot.

SA BON BERZE IN DONN BANN BERZE ANBA SON DIREKSYON

4. Ki rol Zezi i zwe pour pran swen avek mouton Zeova?

⁴ Zeova in apwent Zezi konman Sef kongregasyon Kretyen. (Efe. 1:22, 23) Konman sa “bon berze,” Zezi i reflekte lentansyon, lentere ek bann kalite Zeova. Zezi ti menm ‘donn son lavi pour son bann mouton.’ (Zan 10:11, 15) Pa i en benediksyon lefet ki Zezi in donn son lavi konman en sakrifis pour limanite! (Mat. 20:28) I dan plan Zeova ki “nenport ki, ki krwar dan [Zezi], pa pou mor, me i a ganny lavi eternel.”​—Zan 3:16.

5, 6. (a) Lekel ki Zezi in apwente pour pran swen avek son bann mouton e ki bann mouton i devret fer pour benefisye avek sa laranzman? (b) Pour ki rezon nou devret obeir bann ansyen dan kongregasyon?

⁵ Ki mannyer bann mouton i montre ki zot aksepte gidans sa Bon Berze, Zezi Kri? Zezi ti dir: “Mon bann mouton i ekout mon lavwa, mon konn zot e zot swiv mwan.” (Zan 10:27) Ekout lavwa sa Bon Berze i vedir swiv son gidans dan tou keksoz. Sa i enkli korpere avek bann berze ki anba lotorite Zezi. Zezi ti dir ki son bann zapot ek disip ti devret kontiny sa travay ki li menm ti konmanse. Zot ti devret “ansenny” e “pran swen” oubyen “donn manze” (NW) bann pti mouton Zezi. (Mat. 28:20; lir Zan 21:15-17.) Anmezir ki sa bon nouvel ti propaze e lakantite disip ti ogmante, Zezi ti fer laranzman pour bann Kretyen matir pran swen avek kongregasyon parey bann berze.​—Efe. 4:11, 12.

⁶ Ler zapot Pol ti pe koz avek bann sirveyan kongregasyon dan lavil Efez, i ti rapel zot ki lespri sen ki ti’n apwent zot konman sirveyan pour ‘pran swen kongregasyon Bondye.’ (Akt 20:28) Sa i osi le ka pour bann Kretyen ki sirveyan dan kongregasyon ozordi akoz zot osi zot in ganny apwente konman ansyen dapre bann kalifikasyon ki ganny mansyonnen dan Labib e enspire par lespri sen. Alor, ler nou obeir bann sirveyan Kretyen, nou demontre respe pour Zeova ek Zezi sa de pli gran Berze. (Lik 10:16) Sa i en rezon pli enportan akoz nou devret soumet anba lotorite bann ansyen. Me i osi annan lezot rezon akoz i bon pour fer sa.

7. Ki mannyer bann ansyen i ed ou gard en bon relasyon avek Zeova?

⁷ Ler zot pe donn gidans zot bann frer ek ser Kretyen, bann ansyen i donn zot lankourazman ek konsey baze lo Labib li menm ouswa lo bann prensip Labib. Zot pa donn sa bann gidans avek bi pour domin lo lavi zot bann frer ek ser. (2 Kor. 1:24) Plito, zot donn bann manm kongregasyon konsey ki sorti dan Labib pour gid zot kan zot annan desizyon pour fer e pour promouvwar lord ek lape dan kongregasyon. (1 Kor. 14:33, 40) Pa oubliye, bann ansyen pe ‘vey lo nou’ dan sa sans ki zot anvi ed sak manm kongregasyon pour annan en bon relasyon avek Zeova. Dan sa fason, zot pa tarde pour ofer led si zot vwar ki en frer oubyen ser i pros pour fer en keksoz mal oubyen i deza pe “fer en keksoz mal.” (Gal. 6:1, 2; Zid 22) Eski pa sa i bann bon rezon pour nou obei bann ki pe diriz kongregasyon?​—Lir Ebre 13:17.

8. Ki mannyer bann ansyen i defann troupo Bondye?

⁸ Zapot Pol ki li menm ti en berze spirityel ti ekri son bann frer Kolos: “Fer atansyon ki zot pa tonm dan pyez personn avek zot bann fo largiman [ek] filozofi, ki pa baze lo Kris, me lo lasazes imen, e ki fonde lo tradisyon zonm, ek bann lespri ki kontrol lemonn.” (Kol. 2:8) Sa lavertisman i fer nou konpran en lot rezon akoz nou devret ekout konsey sorti dan Labib ki bann ansyen i donn nou. Zot defann kongregasyon par averti zot si okenn dimoun i esey kontamin zot lafwa. Zapot Pyer ti averti ki i ti pou annan “bann fo profet” ek “bann fo ansenyan” ki ti pou esey “atir bann ki feb dan zot pyez” pour fer sa ki mal. (2 Pyer 2:1, 14) Bann ansyen konmela i devret donn bann lavertisman en pe parey ler i neseser. Sa bann Kretyen i bann zonm matir ki annan leksperyans dan lavi. Deplis, avan ki zot ganny apwente zot montre ki zot annan en bon konnesans dan Labib e ki zot kalifye pour ansenny sa ki bon pour byennet kongregasyon. (1 Tim. 3:2; Tit 1:9) Zot matirite, lekilib ek lasazes baze lo Labib i fer ki zot kapab donn en bon gidans troupo Bondye.

SA BON BERZE I NOURI E PROTEZ SON BANN MOUTON

9. Ki mannyer Zezi i diriz e nouri kongregasyon Kretyen ozordi?

⁹ Atraver son lorganizasyon, Zeova in donn bann Kretyen swazir ensi ki lezot frer ek ser dan lemonn nouritir spirityel annabondans. Dan nou bann piblikasyon, i annan bokou konsey ki ganny donnen. Deplis, par ler lorganizasyon i donn gidans bann ansyen dan kongregasyon atraver bann let oubyen lenstriksyon ki bann sirveyan rezyonal i donnen. Dan sa bann diferan fason, bann mouton Zeova i ganny en direksyon kler.

10. Ki responsabilite bann berze spirityel i annan vizavi bann ki’n egare avek troupo?

¹⁰ Dan en sans spirityel, bann sirveyan i annan responsabilite pour protez, okip e pran swen avek lasante spirityel kongregasyon, sirtou bann ki’n ganny blese oubyen tonm malad spirityelman. (Lir Zak 5:14, 15.) Serten sa bann frer ek ser i kapab in egare avek troupo e in aret partisip dan bann aktivite spirityel. Dan sa ka, eski pa en bon ansyen ti pou fer tou sa ki i kapab pour rod sa mouton ki’n perdi e ankouraz li pour retourn dan berkay, setadir kongregasyon? Byensir! Zezi ti dir: “Zot Papa ki dan lesyel pa oule ki okenn sa bann pti zanfan [i] perdi.”​—Mat. 18:12-14.

KI MANNYER NOU DEVRET KONSIDER DEFO BANN ANSYEN?

11. Akoz i kapab difisil pour serten aksepte gidans bann ansyen?

¹¹ Zeova ek Zezi i bann Berze parfe. Bann berze ki zot etabli pour pran swen avek kongregasyon pa parfe. Sa i kapab fer li difisil pour serten aksepte zot gidans. Bann dimoun koumsa i kapab mazinen: ‘Tou fason zot enparfe parey nou. Akfer nou bezwen ekout zot konsey?’ I vre, bann ansyen i enparfe. Par kont, nou bezwen annan en pwennvi ekilibre konsernan zot bann defo ek febles.

12, 13. (a) Ki nou kapab dir konsernan serten zonm ki Zeova ti donn bann responsabilite? (b) Akoz fot bann zonm responsab in ganny enkli dan Labib?

¹² Labib i onnetman koz lo bann fot ki sa bann zonm ki Zeova ti servi pour diriz son pep ti annan. Par egzanp, David ti ganny swazir konman lerwa e gid Izrael. Pourtan, i ti tonm dan tantasyon e i ti komet adilter ek mert. (2 Sam. 12:7-9) Mazin osi legzanp Pyer, menm si i ti annan bann gran responsabilite dan kongregasyon dan premye syek, i ti fer bann fot grav. (Mat. 16:18, 19; Zan 13:38; 18:27; Gal. 2:11-14) Apard Zezi, napa okenn imen depi Adan ki parfe.

¹³ Akoz dan Labib Zeova in enkli fot bann zonm ki li menm i ti swazir pour fer en serten travay? En rezon i akoz Bondye ti anvi montre ki i kapab servi bann imen enparfe pour diriz son pep. Anfet, i’n toultan fer sa. Alor, nou pa devret servi lenperfeksyon sa bann frer ki responsab konman en leskiz pour koz an mal oubyen pa swiv zot gidans. Zeova i ekspekte nou demontre respe anver sa bann frer e obei zot.​—Lir Egzod 16:2, 8.a

14, 15. Ki nou kapab aprann avek lafason ki Zeova ti koz avek son pep dan lepase?

¹⁴ I vreman enportan ki nou obei bann ansyen. Reflesir lo konman Zeova ti kominik avek son pep pandan bann letan difisil dan lepase. Ler bann Izraelit ti kit Lezip, Zeova ti donn zot bann lord atraver Moiz ek Aaron. Pour sirviv sa dizyenm fleo, bann Izraelit ti bezwen obei bann lenstriksyon pour annan en repa spesyal e pour fann disan en mouton lo lankadreman zot laport. Zot pa ti ganny sa lenstriksyon atraver en lavwa sorti dan lesyel. Me, zot ti bezwen ekout bann ansyen Izrael, ki zot osi zot ti’n ganny bann lenstriksyon spesifik avek Moiz. (Egz. 12:1-7, 21-23, 29) Dan sa ka, Moiz ek bann ansyen ti donn lepep bann lenstriksyon ki zot ti gannyen avek Zeova. Denozour, bann ansyen i zwe preski menm rol.

¹⁵ Tre probab ou kapab mazin plizyer lezot legzanp dan Labib kot Zeova ti donn bann lenstriksyon atraver bann imen oubyen lanz pour sov lavi bann dimoun. Dan tou sa bann sityasyon, Bondye ti vwar li byen pour egzers son lotorite atraver bann imen oubyen lanz. Bann mesaze ti koz pour li e dir lepep sa ki zot ti devret fer pour kapab sirviv dan sa bann moman difisil. Eski Zeova ti a kapab fer en keksoz parey zour Armagedon? I kapab fer li. Alor, i normal ki nenport ki ansyen ki ganny sa responsabilite pour reprezant Zeova oubyen son lorganizasyon, i devret vreman vreman fer atansyon ki i pa zanmen abiz son lotorite.

“EN SEL TROUPO E EN SEL BERZE”

16. Ki “parol” nou devret ekoute?

¹⁶ Pep Zeova i form “en sel troupo” anba gidans “en sel berze,” Zezi Kri. (Zan 10:16) Zezi ti montre ki i ti pou avek son bann disip “toulezour, ziska lafen.” (Mat. 28:20) Konman Lerwa dan lesyel, i annan kontrol lo tou sa ki pou arive ziska lafen lemonn Satan. Pour ki nou reste ini e an sekirite dan troupo Bondye, nou bezwen ekout ‘en parol deryer nou’ ki dir nou kot pour ale. Sa “parol” i enplik sa ki lespri sen Bondye i dir, parey sa ki dan Labib e sa ki Zeova ek Zezi i dir atraver sa bann ki zot in apwente konman berze.​—Lir Izai 30:21;b Revelasyon 3:22.

17, 18. (a) Ki danze ki menas troupo Bondye, me ki konfyans nou kapab annan? (b) Ki nou pou egzaminen dan lot lartik?

¹⁷ Labib i dir ki Satan pe pas partou “konman en lyon ki kriye, pe rode ki i pou devore.” (1 Pyer 5:8) Parey en predater sovaz ki lafen, i pe misouk troupo, i pe rod en loportinite pour plann lo sa bann ki fatige ouswa bann ki’n egare. Sa i donn nou plis rezon ankor pour reste pli pros avek leres troupo ek “berze, ki gardyen [nou] lam.” (1 Pyer 2:25) An rapor avek bann sirvivan gran ladetres, Revelasyon 7:17 i dir: “Parski Lanyo [Zezi] . . . pou vin zot berze e i pou gid zot kot sours delo ki donn lavi, e Bondye pou eswiy tou larm dan zot lizye.” Eski i annan en promes ki pli meyer ki sa enn?

¹⁸ Apre ki nou’n egzamin rol enportan bann ansyen dan kongregasyon konman bann berze, i byen ki nou demann nou lekor, Ki mannyer sa bann zonm ki’n ganny apwente i kapab fer sir ki zot pe tret mouton Zezi dan sa bon fason? Sa lot lartik pou reponn sa kestyon.

[Not anba lo paz]

[Portre lo paz 21]

[Portre lo paz 23]

Parey en berze i protez troupo, bann ansyen i protez kongregasyon (Vwar paragraf 8)

[Portre lo paz 25]

Bann berze spirityel i travay dir pour protez troupo (Vwar paragraf 17, 18)