EN KONVERSASYON AVEK EN VWAZEN

Eski Temwen Zeova i krwar dan Zezi?

Sa konversasyon ki swiv i enn ki Temwen Zeova i kapab gannyen avek en vwazen. Meton en Temwen ki apel Anthony in vin kot lakour en msye ki apel Tim.

LENPORTANS POUR KRWAR DAN ZEZI

Anthony: Bonzour Tim. Mon byen kontan pour revwar ou ankor.

Tim: Mwan osi mon byen kontan pour revwar ou.

Anthony: Mon’n anmenn bann nouvo kopi Latour Veyer ek Awake! pour ou. Mon krwar ou pou byen kontan bann lartik dan sa bann magazin.

Tim: Mersi. Anfet, mon kontan ki ou’n pase ozordi akoz i annan en keksoz ki mon oule demann ou.

Anthony: Oke.

Tim: Lot fwa mon ti pe koz avek en dimoun ki travay ansanm avek mwan. Mon ti pe dir li konsernan sa bann piblikasyon ki ou ti donn mwan e ki kantite zot byen enteresan. Me i ti dir ki mon pa devret lir akoz Temwen Zeova pa krwar dan Zezi. Eski sa i vre? Mon’n dir li ki ler ou pase mon ava demann ou.

Anthony: Mon byen kontan ou’n demann mwan. I byen ki ou’n demann avek Temwen Zeova menm olye en lot dimoun. Apre tou, ki lot fason ou pou kapab konnen ki en dimoun i krwar amwen ki ou senpleman demann sa dimoun li menm?

Tim: Mon dakor avek ou.

Anthony: Pour dir ou laverite, Temwen Zeova i vreman krwar dan Zezi. Anfet, nou krwar ki i enportan pour demontre lafwa dan Zezi pour arive ganny sove.

Tim: Sanmenm ki mon ti krwar, me mon’n konmans anvi konn plis ler mon koleg travay in dir mwan ki zot pa krwar dan Zezi. Petet akoz nou pa’n zanmen diskit lo la avan.

Anthony: Eski mon kapab montre ou detrwa verse Labib ki met lanfaz lo lenportans pour demontre lafwa dan Zezi? Sa i bann verse ki Temwen Zeova i abitye servi dan predikasyon.

Tim: Oke.

Anthony: En bon fason pour konmanse se atraver parol Zezi li menm dan Zan 14:6. Sa parol i form parti en konversasyon ki Zezi ti fer avek enn son zapot. Nou lir: “Zezi ti reponn li: ‘Se mwan menm semen, laverite ek lavi. Personn pa kapab ariv kot mon Papa san pas par mwan.’” Dapre sa verse, ki sa sel fason pour apros avek nou Papa?

Tim: Atraver Zezi.

Anthony: Egzakteman. Temwen Zeova i vreman krwar sa. Permet mwan demann ou: Avek sa ki ou konnen konsernan sa ki Bondye i ekspekte avek nou, o non lekel nou devret priye?

Tim: O non Zezi.

Anthony: Mon dakor. Se pour sa rezon ki tou lapriyer ki mon fer mon priy li o non Zezi. I menm zafer pour tou Temwen Zeova.

Tim: Sa i byen pour konnen.

Anthony: En lot verse nou kapab gete i Zan 3:16. Sa verse i telman enportan ki nou kapab dir ki Levanzil antye i baze lo la. Nide se ki si nou kapab pran tou sa ki’n ganny ekrir lo lavi Zezi lo later ek son minister e nou fer li vin en sel verse, sa enn ki la i ase. Petet ou ti pou kontan lir sa verse.

Tim: Oke. I dir “Parski Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.”

Anthony: Mersi. Eski ou familye avek sa verse?

Tim: Wi, mon’n tann li plizyer fwa e souvan mon vwar in ganny ekrir lo bann poster ek plakar.

Anthony: I en verse ki byen popiler. Get li byen menm e remarke ki Zezi ti dir. I ti dir ki lanmour Bondye in fer li posib pour bann imen rezouir lavi eternel, me si zis nou fer kwa?

Tim: Krwar dan li, andotmo, demontre lafwa.

Anthony: Wi. I menm spesifye lafwa dan son sel Garson, Zezi Kri. Sa pwen ki montre ki lafwa dan Zezi i anmenn ver lavi eternel, i ganny trouve la lo paz 2 dan sa magazin ki mon’n anmennen pour ou. Konsernan bi Latour Veyer, i dir ki parmi tou lezot keksoz, sa magazin i “promot lafwa dan Zezi Kri, ki ti mor pour ki nou kapab ganny lavi eternel e ki pe dirize konman lerwa dan Rwayonm Bondye.”

Tim: Oke, la i montre. Dan zot magazin i montre ki Temwen Zeova i krwar dan Zezi.

Anthony: Egzakteman.

Tim: Alor, akoz dimoun i dir ki zot pa krwar dan Zezi?

Anthony: I annan bokou rezon akoz dimoun i dir sa. Dan serten ka, dimoun i dir sa akoz zot in tann lezot pe dir. Oubyen zot pret in ansenny zot sa mal konprenezon.

Tim: Mon pe esey reflesir en kou, petet serten dimoun i dir sa akoz zot apel zot lekor Temwen Zeova me pa Temwen Zezi.

Anthony: Sa i kapab en rezon osi.

Tim: Akoz ki zot koz bokou lo Zeova?

MON’N FER TOU DIMOUN KONN OU NON

Anthony: En rezon se ki nou krwar ki i enportan pour servi non Bondye, Zeova, zis parey son Garson Zezi ti fer. Remark sa ki Zezi ti dir dan son lapriyer avek son Papa. I’n ganny rikorde dan Zan 17:6. Eski ou ti pou kontan lir sa verse?

Tim: Oke. “Mon’n fer tou bann ki ou’n tir dan lemonn e ki ou’n donn mwan, konn ou non. Zot ti pour ou e ou’n donn mwan zot. E zot in obei ou parol.”

Anthony: Mersi bokou. Remarke ki Zezi ti dir ki i’n fer dimoun konn non Bondye. Akoz ou krwar i ti fer sa?

Tim: Mm. Mon pa asire.

Anthony: Petet nou kapab get en lot verse ki donn plis leklersisman lo la. Mon pe mazin Akt 2:21. I dir: “Sa ki pou kriy Senyer [oubyen, “kriy non Zeova”], pou ganny sove.” Alor, mon sir ou pou dakor ki si kriy o non Zeova i en nesesite pour ganny sove, san dout Zezi ti konn sa.

Tim: Wi, byensir.

Anthony: Alor, Zezi ti fer son bann disip konn e servi non Bondye pour zot kapab ganny sove. I osi enn bann rezon prensipal akoz nou koz bokou lo Zeova. Nou santi ki i enportan pour fer lezot konn sa non e ed zot pour servi sa non.

Tim: Be menm si dimoun pa konn non Bondye oubyen servi li direkteman, zot konnen lo lekel zot pe koze kan zot pe refer avek Bondye.

Anthony: Sa i kapab vre. Me selman, par dir nou son non, Bondye in fer li fasil pour nou apros avek li.

Tim: Ki ou pe esey dir?

Anthony: Met li koumsa: Nou pa ti bezwen konn non Moiz. Nou ti senpleman kapab konn li konman sa zonm ki ti ouver Lanmer Rouz oubyen sa zonm ki ti ganny donnen sa Dis Komannman. Pareyman avek Noe, akfer konn son non? Nou ti kapab konn li konman sa zonm ki ti konstri lars e sov son fanmir ek bann zannimo. Pareyman, menm Zezi ti’n kapab senpleman ganny rekonnet konman sa enn ki’n sorti dan lesyel e mor pour nou pese. Pa i vre?

Tim: Mon krwar byen.

Anthony: Me Bondye in fer sir ki nou konn non sa bann dimoun. Ler nou konn zot non, sa i fer sa resi baze lo zot pli tousan. Menm si nou pa’n zanmen zwenn Moiz, Noe oubyen Zezi, zis par konn zot non sa i fer zot vin reel pour nou.

Tim: Mon pa’n zanmen mazin li koumsa avan, me i fer sans!

Anthony: Sanmenm rezon akoz ki Temwen Zeova i servi non Bondye bokou. Nou anvi ed dimoun pour devlop lafwa dan Zeova konman en Personnaz reel ki nou kapab vin pros avek. An menm tan, nou met en gran lanfaz lo rol ki Zezi i zwe konman nou sover. Petet nou kapab lir en lot verse ki fer resorti sa pwen.

Tim: Oke.

Anthony: Pli boner nou ti lir Zan 14:6. Rapel byen ki Zezi ti dir ki i “semen, laverite ek lavi.” Annou get en verse pli devan e remark son parol ki ganny trouve dan Zan 14:1. Eski ou ti a kontan lir sa ki Zezi ti dir dan dernyen parti sa verse?

Tim: Oke. I dir: “Krwar dan Bondye e krwar dan mwan osi.”

Anthony: Mersi. Alor, eski ou pou dir ki vre lafwa i devret dan enn ant le de? Eski i vedir ki ou swa krwar dan Zezi, swa krwar dan Zeova?

Tim: Non. Zezi ti dir ki nou bezwen annan lafwa dan tou le de.

Anthony: Egzakteman. Mon asire ki ou pou dakor ki i pa ase zis pour dir ki nou annan lafwa dan Bondye ek Zezi. Nou bezwen viv nou lavi dan en fason ki montre ki nou annan lafwa dan zot.

Tim: Definitivman.

Anthony: Me, ki mannyer en dimoun i kapab montre ki i vreman annan lafwa dan Bondye ek Zezi? Petet nou kapab diskit lo sa kestyon en lot ler.a

Tim: Mon ti pou byen kontan.

Eski ou annan okenn kestyon konsernan en size dan Labib? Eski ou ti a kontan konn lo okenn krwayans oubyen pratik relizye Temwen Zeova? Si wi, pa ezite pour demann en Temwen Zeova. I pou kontan pour diskit lo sa size avek ou.

[Not anba lo paz]

[Ekstre lo paz 8]

Demontre lafwa dan Zezi i enportan pour ganny sove