Zeova i beni en kantite bann ki annan en leta lespri volonter

NOU Kreater in donn nou imen sa liberte pour swazir. An plis, i beni en kantite bann ki servi zot liberte dan en fason zenere pour fer avanse vre ladorasyon e ki fer zot par pour sanktifye son non sen e siport son plan merveye. Zeova pa oule ki nou obeir li zis akoz i’n demann nou pour fer li akoz nou per pangar nou pou ganny pini oubyen obeir li pardfors. O kontrer, i annan en gran valer pour Zeova kan en dimoun i pare pour servi li akoz i vreman kontan e apresye li.

Par egzanp, kan bann Izraelit ti dan dezer Sinai, Zeova ti dir zot konstri en landrwa pour ador li. I ti dir: “Anmenn en kontribisyon pour Zeova. Ki bann ki anvi donn avek tou zot leker i anmenn en kontribisyon pour Zeova.” (Egz. 35:5) Sak Izraelit ti kapab donn dapre sa ki i ti kapab e sak kontribisyon volonter, nenport kwa ki zot ti anmennen oubyen nenport ki kantite, ti kapab ganny servi dan en fason apropriye pour ki plan Bondye i ganny akonplir. Ki mannyer zot ti reazir?

“Tou dimoun ki son leker ti pous li” e “tou dimoun ki son lespri ti motiv li” ti ofer en lofrann volonter, “sakenn ti fer li avek tou zot leker.” Bann msye ek bann madanm ti volonterman anmenn en keksoz pour travay Zeova. Zot ti anmenn: bros ki met lo lenz, zanno, bag, lor, larzan, kwiv, difil ble, lalenn mov, latwal rouz, linenn fen, pwal kabri, lapo mal mouton ki ti ganny tenn rouz, lapo fok, dibwa akasya, pyer presye, lesans, ek delwil. Avek letan, “bann keksoz ti ase pour tou sa travay ki ti annan pour fer e i ti menm annan tro bokou.”—Egz. 35:21-24, 27-29; 36:7.

Zeova ti apresye sa bann kontribisyon, me sa ki ti donn li plis plezir ti sa leta lespri volonter ki bann Izraelit ti’n demontre pour siport vre ladorasyon. Zot ti osi motive pour donn zot letan ek lenerzi. Sa resi i dir ki “tou bann madanm kalipa ti fer difil avek zot lanmen . . . tou bann madanm kalipa ki zot leker ti pous zot ti fer difil avek pwal kabri.” Deplis, Zeova ti donn Betsalel “lasazes, konprenezon e konnesans pour fer tou kalite travay en artizan.” Anfet, Bondye ti donn Betsalel ek Ooliyab abilite ki zot ti bezwen pour fer tou travay ki i ti’n donn zot.—Egz. 35:25, 26, 30-35.

Ler Zeova ti demann bann Izraelit pour donn en kontribisyon, i ti annan konfyans total ki “bann ki anvi donn avek tou zot leker” ti pou siport vre ladorasyon. An retour, Zeova ti beni en kantite sa bann ki ti’n demontre sa leta lespri par gid zot e donn zot bokou lazwa. Alor, Zeova ti demontre ki ler i beni son bann serviter ki annan en leta lespri volonter, i fer sir ki napa nanryen ki manke, ki swa bann materyo oubyen abilite ki neseser pour akonplir son lavolonte. (Ps. 34:9) Anmezir ki ou fer tou pour servi Zeova, sirman i pou beni ou leta lespri volonter.

KI MANNYER SERTEN I KONTRIBYE ANVER SA TRAVAY MONDYAL

Parey dan letan zapot Pol, bokou dimoun ozordi i “met dekote” en pti larzan pour met dan bwat kontribisyon “Travay Mondyal.” (1 Kor. 16:2) Sak mwan, bann kongregasyon i anvoy sa bann kontribisyon kot biro brans Temwen Zeova ki okip sa pei. I osi posib pour ou anvoy bann donasyon direkteman kot en lasosyasyon ki Temwen Zeova i servi dan ou pei. Pour konn son ladres, silvouple pran kontak avek biro brans ki okip ou pei. Lo www.jw.org, ou kapab trouv ladres biro brans. I annan diferan kalite donasyon:

DONASYON

Donasyon larzan, bizou ouswa lezot keksoz personnel ki annan valer. Anvoy en let ki endike ki sa larzan ouswa keksoz i en donasyon.

BANN DONASYON KONDISYONNEL

Donn larzan avek en kondisyon ki si ou bezwen, ou kapab repran.
Anvoy en let ki endike ki sa donasyon i kondisyonnel.

CHARITABLE PLANNING

Apard larzan ek keksoz ki annan valer, i annan lezot metod pour fer bann donasyon pour lentere Rwayonm dan lemonn antye. Zot ganny endike pli ba. Nenport metod ki ou servi, silvouple premyerman kontakte biro brans Temwen Zeova pour vwar ki metod ki kapab ganny servi dan ou pei. Vi ki rekomandasyon ek lalwa pour taks i varye, i vreman enportan pour demann en zofisye taks ouswa en avoka konsernan sa pli bon fason pour fer kontribisyon.

Lasirans: En donasyon kot ou spesifye en lasosyasyon konman benefisyer sa lasirans lavi ouswa pansyon ki Temwen Zeova i servi.

Kont labank: Nou kapab fer laranzman pour ki ler nou mor, sa larzan ki lo nou kont labank, depozit ouswa okenn lezot reveni i ganny donnen avek en lasosyasyon ki Temwen Zeova i servi dapre regilasyon labank dan sa pei.

Stocks ek Bonds: Bann stocks ek bonds (lenvestisman) i kapab ganny donnen avek en lasosyasyon ki Temwen Zeova i servi, swa direkteman ouswa an ekrir atraver en Transfer on Death agreement.

Propriyete: Later oubyen lakaz ki kapab ganny revann i kapab ganny donnen avek en lasosyasyon ki Temwen Zeova i servi swa direkteman, ouswa donn sa propriyete me i annan drwa viv ladan ziska son lanmor.

Gratwite: Bann gratwite, larzan sekirite sosyal oubyen pansyon i kapab ganny donnen tou le-z-an diran zot lavi avek en lasosyasyon ki Temwen Zeova i servi dapre laranzman sa donater ouswa dimoun ki sa donater in swazir. Sa donater i kapab resevwar en rediksyon taks sak lannen dapre lakantite ki i pe donnen.

Testaman ouswa Trusts: Par fer en testaman legal, en propriyete ouswa larzan i kapab ganny donnen avek en lasosyasyon ki Temwen Zeova i servi ouswa sa lasosyasyon i kapab benefisye avek bann reveni en trust. Sa laranzman i kapab donn serten lavantaz lo kote taks.

Sa bann diferan fason pour fer donasyon i apel “charitable planning” an Angle, sa i montre ki en dimoun ki anvi fer en donasyon i devret planifye davans konsernan kalite donasyon ki i anvi fer. Si en dimoun i oule fer en donasyon, i annan en brosir avek tit Charitable Planning to Benefit Kingdom Service Worldwide ki’n ganny prepare an Angle ek Espanyol. Sa brosir ti ganny ekrir pour donn lenformasyon lo diferan fason ki bann donasyon i kapab ganny fer la konmela oubyen pli tar ler sa dimoun i mor, par egzanp par fer en testaman. Lenformasyon dan sa brosir i kapab pa totalman aplikab pour ou sityasyon akoz taks ouswa lezot lalwa dan ou pei. Alor, apre ki ou’n lir sa brosir, ou devret diskit avek ou avoka ouswa en zofisye taks. An servan sa metod pour fer donasyon, bokou in kapab ede siport nou bann aktivite relizye e imaniter dan lemonn e pa pey sa kantite taks. Si i disponib dan ou pei, ou kapab demann en kopi avek sekreter kongregasyon.

Pour plis lenformasyon ou kapab kontakte biro brans ki okip ou pei.