Eski i enportan lekel ki remark ou travay?
BETSALEL ek Ooliyab ti konn byen travay konstriksyon. Ler zot ti lesklav Lezip, zot ti’n telman fer blok ki zot pa ni menm anvi rapel tousala. Me sa ti en bann letan pase. Aprezan zot ti’n ganny demande pour ansarz konstriksyon tabernak e sa ti pou fer zot vin bann pli gran artizan. (Egz. 31:1-11) Kantmenm sa, pa bokou dimoun ki ti vwar bann zoli travay ki zot ti fer. Me eski zot ti pou fristre akoz sa? Eski i ti vreman enportan lekel ki ti remark zot travay? Eski i enportan lekel ki remark ou travay?
BANN ZOLI TRAVAY KI PA BOKOU DIMOUN KI’N VWAR
Serten meb dan tabernak ti bann masterpiece. Pran par egzanp, sa bann seriben annor ki ti lo lars lalyans. Zapot Pol ti dekrir zot konman en keksoz ki rann “laglwar.” (Ebr. 9:5) Zis mazin labote enkrwayab sa bann seriben ki ti’n ganny fer avek lor forze!—Egz. 37:7-9.
Si sa travay ki Betsalel ek Ooliyab ti fer ti ganny dekouver ozordi, i ti pou merite ganny met an ekspozisyon dan sa pli gran mize, kot bokou dimoun ti pou kapab apresye zot. Me dan sa letan ki zot ti’n ganny fer, konbyen dimoun ki ti vreman vwar zot labote? Zis gran pret ki ti pou kapab vwar sa de seriben ler i ti antre dan Tre Sen enn fwa par an Zour Propisyasyon. (Ebr. 9:6, 7) Alor, pa bokou dimoun ki ti vwar zot.
TROUV SATISFAKSYON KANTMENM LEZOT PA FELISIT OU
Si ou ti Betsalel oubyen Ooliyab e ou ti’n travay dir pour fer sa bann zoli travay lar, ki mannyer ou ti pou santi pour konnen ki pa bokou dimoun ki’n vwar ou louvraz? Denozour, bann dimoun i santi serten lakontantman kan zot ganny felisite e admire par lezot pour travay ki zot in fer. Zot santi ki sa i en fason pour konnen ki valer zot travay i annan. Me bann serviter Zeova i diferan. Parey Betsalel ek Ooliyab nou ganny satisfaksyon ler nou fer lavolonte Zeova e ganny son laprouvasyon.
Dan letan Zezi, souvan bann sef relizye ti fer lapriyer ki ti pou enpresyonn lezot. Par kont, Zezi ti donn en lot fason fer: Priye senserman e pa avek sa lanvi pour ki dimoun ki vwar zot i felisit zot. Ki ti pou arive si zot ti fer sa? “Ou Papa ki war sa ki ou fer an sekre i a rekonpans ou.” (Mat. 6:5, 6) I kler, sa ki pli enportan, se pa sa ki dimoun i panse lo nou lapriyer, me sa ki Zeova i panse. I son lopinyon ki fer nou lapriyer annan en gran valer. I menm zafer avek tou sa ki nou fer dan nou servis sakre. Nou pa santi ki nou travay i enportan akoz lezot i felisit nou, o kontrer, i fer plezir Zeova “ki war sa ki [nou] fer an sekre.”
Kan tabernak ti fini ganny konstrir, en nyaz “ti konmans kouver latant renyon e laglwar Zeova ti ranpli tabernak.” (Egz. 40:34) Sa ti montre laprouvasyon Zeova. Ki mannyer ou krwar Betsalel ek Ooliyab ti santi sa letan? Menm si zot non pa ti’n ganny grave lo sa bann travay ki zot ti’n fer, i bezwen ki zot ti santi zot satisfe lefet ki zot ti konnen ki Zeova ti beni zot zefor. (Prov. 10:22) Dan bann lannen apre sa, sirman zot ti kontan pour vwar ki sa travay ki zot ti’n fer ti pe kontinyen ganny servi dan servis Zeova. Kan zot pou resisite dan nouvo lemonn, san dout Betsalel ek Ooliyab pou kontan pour konnen ki tabernak ti ganny servi pour vre ladorasyon pour apepre 500 an!
Ozordi dan lorganizasyon Zeova, bann animater, artis, mizisyen, fotografer, tradikter ek ekriven, zot tou zot fer zot travay me personn pa konnen ki travay sakenn in fer. Dan sa sans, personn pa vwar sa ki zot fer. I menm parey avek travay ki pe ganny fer dan plis ki 110,000 kongregasyon dan lemonn. Lekel ki vwar serviter kont ranpli bann form tou le lafen dimwan? Lekel ki vwar sekreter prepar rapor predikasyon kongregasyon? Lekel ki vwar sa frer oubyen sa ser ki fer bann travay reparasyon ki bezwen ganny fer kot Lasal Rwayonm?
A lafen zot lavi, Betsalel ek Ooliyab pa ti zanmen ganny okenn lakoup oubyen meday pour demonstre ki zot ki’n fer sa bon travay. Me zot ti’n ganny en keksoz ki bokou pli enportan, sa se laprouvasyon Zeova. Nou kapab asire ki Zeova ti remark zot travay. Annou imit zot legzanp limilite ek bonn volonte.