Konpar ou krwayans avek sa ki Labib i dir

ESKI ou konsider ou lekor konman en Kretyen? Si sa i leka, ou form parti sa plis ki de bilyon dimoun lo later ki Kretyen. Preski 1 dan 3 dimoun i dir ki i pe swiv Kris. Pourtan, i annan plizyer milye larelizyon Kretyen e zot annan diferan krwayans ek pwennvi. Alor, i kapab ki ou krwayans i diferan avek krwayans en lot Kretyen. Eski sa ki ou krwar ladan i vreman enportan? Wi, si ou vreman anvi pratik sa larelizyon ki Labib i ansennyen.

Bann premye disip Zezi Kri ti ganny apele “Kretyen.” (Akt 11:26) I pa ti neseser pour donn zot lezot non vi ki i ti annan en sel larelizyon Kretyen ki ti egziste sa letan. Tou bann Kretyen ti swiv bann lansennyman ek lenstriksyon Zezi Kri, sa enn ki Fondater larelizyon Kretyen. Ki ou pou dir konsernan ou legliz? Eski ou krwar ki i ansenny sa ki Kris ti ansennyen e sa ki bann premye Kretyen ti krwar ladan? Ki mannyer ou kapab vreman konnen? I annan zis en fason. Servi Labib konman en referans.

Reflesir: Zezi Kri ti annan en gran respe pour Labib konman Parol Bondye. I pa ti dakor avek bann ki ti pli kontan tradisyon zonm olye aksepte sa ki Labib i dir. (Mark 7:9-13) Alor, nou kapab dir ki bann vre disip Zezi pou bezwen baz zot krwayans lo Labib. I ti pou byen si sak Kretyen i demann son lekor, ‘Eski bann lansennyman mon legliz i annakor avek Labib?’ Pour reponn sa kestyon, akoz ou pa konpar sa ki ou legliz i ansennyen avek sa ki Labib i dir?

Zezi ti dir ki nou ladorasyon i bezwen baze lo laverite ki ganny trouve dan Labib. (Zan 4:24; 17:17) Zapot Pol ti dir ki nou delivrans i depan lo si nou “ariv konn laverite.” (1 Timote 2:4) Alor, i enportan ki sa ki nou krwar ladan i baze lo laverite ki egzakt sorti dan Labib, akoz sa i sel fason pour ganny lavi eternel.

KONPAR OU KRWAYANS AVEK SA KI LABIB I DIR

Nou envit ou pour lir sa sis kestyon e not larepons ki Labib i donnen. Get bann verse ki’n ganny site e reflesir lo bann larepons. Apre demann ou lekor, ‘Eski sa ki mon legliz i ansennyen i parey sa ki Labib i dir?’

Sa pti kwiz i kapab ed ou konpar sa ki ou legliz i ansennyen avek sa ki Labib i dir. Eski ou anvi konpar lezot lansennyman ou legliz avek sa ki Labib i dir? Temwen Zeova pou kontan ed ou pour egzamin sa ki Labib i vreman dir. Akoz ou pa demann en Temwen Zeova pour en letid Labib gratwit? Oubyen ou kapab al lo nou sit Enternet, jw.org.

1 KESTYON: Lekel Bondye?

LAREPONS: Zeova, Papa Zezi i Bondye eternel e Kreater tou pwisan tou keksoz.

KI LABIB I DIR:

“Kan nou priy pou zot, nou touzour remersye Bondye, e Papa nou Senyer Zezi-Kri.”—Kolosyen 1:3.

“Senyer, nou Bondye! Ou merit resevwar laglwar, loner ek pwisans. Ou ki’n kree tou keksoz.”—Revelasyon 4:11.

Vwar osi Romen 10:13; 1 Timote 1:17.

2 KESTYON: Lekel Zezi Kri?

LAREPONS: Zezi i lene oubyen premye ne Bondye. I ti ganny kree e alor i annan en konmansman. Zezi i obei son Papa e i pare pour fer Son lavolonte.

KI LABIB I DIR:

“Mon Papa i pli gran ki mwan.”—Zan 14:28.

“Kris i zimaz vizib Bondye ki envizib. I lene dan kreasyon antye.”—Kolosyen 1:15.

Vwar osi Matye 26:39; 1 Korentyen 15:28.

3 KESTYON: Kisisa lespri sen?

LAREPONS: Lespri sen i en lafors ki Bondye i servi pour akonpli son lavolonte. I pa en dimoun. Dimoun i kapab ganny lespri sen e lespri sen i kapab donn lafors.

KI LABIB I DIR:

“Kan Elizabet ti antann salitasyon Mari, son baba ti bouze dan son vant. Elizabet, [ti] ranpli avek Lespri Sen.”—Lik 1:41, 42.

“Kan Lespri Sen pou desann lo zot, zot pou resevwar en lafors.”—Akt 1:8.

Vwar osi Zenez 1:2; Akt 2:1-4; 10:38.

4 KESTYON: Kisisa Rwayonm Bondye?

LAREPONS: Rwayonm Bondye i en gouvernman dan lesyel. Zezi i Lerwa dan Rwayonm Bondye. Byento, sa Rwayonm pou akonpli lavolonte Bondye partou lo later.

KI LABIB I DIR:

“Setyenm lanz ti soufle dan son tronpet. Dan lesyel, bann lavwa tre for ti rezonnen. Zot ti dir: Aprezan, rwayonm lemonn in vin pour nou Senyer, e pour son Kris. I pou rennyen pour touzour.”—Revelasyon 11:15.

Vwar osi Danyel 2:44; Matye 6:9, 10.

5 KESTYON: Eski tou bon dimoun i al dan lesyel?

LAREPONS: Non. En pti group dimoun fidel ki apel en “pti troupo” in ganny swazir par Bondye pour al dan lesyel. Zot pou diriz ansanm avek Zezi konman lerwa lo limanite.

KI LABIB I DIR:

“Pa bezwen per, pti troupo! Zot Papa in pran plezir donn zot son Rwayonm.”—Lik 12:32.

“Zot pou vin pret pour Bondye e pour Kris. Zot pou renny avek li.”—Revelasyon 20:6.

Vwar osi Revelasyon 14:1, 3.

6 KESTYON: Ki plan Bondye pour later ek limanite?

LAREPONS: Anba Rwayonm Bondye, later pou vin en paradi e bann dimoun fidel pou annan en lasante parfe, lape dirab ek lavi eternel.

KI LABIB I DIR:

“Bann pov ki pou posed pei [oubyen “later,” NW]. Zot ava viv dan lape total.”—Psonm 37:10, 11.

“I pou eswiy tou larm dan zot lizye. Lanmor pou nepli egziste. Pou nepli annan ni dey, ni larm, ni soufrans, akoz lemonn ansyen in disparet.”—Revelasyon 21:3, 4.

Vwar osi Psonm 37:29; 2 Pyer 3:13.