Bann vizyon lo bann ki dan lesyel

ZEOVA I SA ENN KI PLI O

“Mon ti vwar en tronn dan lesyel. Sa Enn ki ti pe asize lo sa tronn ti briye parey en pyer zasp ek en pyer sardwann e toultour sa tronn, i ti annan en larkansyel ki ti briye parey en pyer emerod.”​—Revelasyon 4:2, 3.

“Sa lalimyer otour li ti parey en larkansyel dan nyaz apre en zour lapli. I ti reflekte laglwar [“Zeova,” NWT].”​—Ezekyel 1:27, 28.

Sa bann vizyon ki zapot Zan ek profet Ezekyel ti gannyen i dekrir laglwar Zeova, sa Bondye Tre O, dan en fason ki nou kapab konpran. Zot ti servi legzanp en larkansyel, bann zoli pyer presye ek en zoli tronn ki ed nou konpran ki otour Zeova i zoli, agreab e kalm. Tousala i vreman enpresyonan.

Sa bann deskripsyon konsernan Bondye i annakor avek sa ki sa psalmis ti ekri: “Zeova i gran e i merit ganny loue. I devret ganny plis respe ki okenn lezot bondye. Tou bondye lezot pep pa vo nanryen. Me Zeova i sa enn ki’n fer lesyel. Mazeste ek laglwar i o tour li. Lafors ek labote i dan son landrwa sen.”​—Psonm 96:4-6, NWT.

Menm si Zeova i sa Enn ki pli o, i envit nou pour apros avek li dan lapriyer e i asir nou ki i ekout nou. (Psonm 65:2) Bondye i sitan kontan nou e i pran swen avek nou ki zapot Zan ti kapab ekri: “Bondye i lanmour.”​—1 Zan 4:8.

ZEZI I AVEK BONDYE

“Etyenn [en disip Zezi], ranpli avek lespri sen, ti get dan lesyel e i ti vwar laglwar Bondye e Zezi lo kote drwat Bondye. I ti dir: ‘Gete! Mon vwar lesyel ouver e Garson zonm lo kote drwat Bondye.’”​—Akt 7:55, 56.

Pa bokou letan avan ki Etyenn ti ganny sa vizyon, Zezi ti’n ganny touye par bann sef Zwif. I sanmenm sa bann sef Zwif ki Etyenn ti pe koz avek. Sa vizyon ti montre ki Zezi ti vivan, ki i ti’n resisite e ki i ti’n ganny en pozisyon enportan. Zapot Pol ti ekri lo sa size: “Bondye ti resisit [Zezi] e fer li asiz lo son kote drwat dan lesyel, par lao tou gouvernman, lotorite, pouvwar, dominasyon e par lao tou sort non ki kapab ganny mansyonnen, pa zis dan sa letan, me a lavenir.”​—Efezyen 1:20, 21.

An plis ki dekrir sa pozisyon enportan ki Zezi i annan, Labib i montre ki parey Zeova, Zezi i kontan bann imen. Pandan ki Zezi ti lo later, i ti geri bann malad, bann andikape e osi resisit bann mor. Deplis, letan Zezi ti sakrifye son lavi, i ti demontre lanmour profon ki i annan pour Bondye ek bann imen. (Efezyen 2:4, 5) Zezi ki aprezan pe debout lo kote drwat Bondye, pou byento servi son lotorite pour anmenn bann gran benediksyon pour bann imen obeisan partou lo later.

BANN LANZ I SERVI BONDYE

“Mon ti kontinyen gete ziska ki bann tronn ti ganny mete pour ki Ansyen bann Zour [Zeova] ti asize. . . . I ti annan mil fwa mil ki ti kontinyen servi li e dis mil fwa dis mil ki ti debout devan li.”​—Danyel 7:9, 10, NWT.

Dan sa vizyon, Danyel pa ti vwar zis en lanz dan lesyel me plizyer milyon. Sa ti enpresyonan! Bann lanz i bann kreatir spirityel ki vreman entelizan e for. I annan bann serafen ek bann seriben ki annan diferan pozisyon. Labib i koz lo bann lanz plis ki 250 fwa.

Bann lanz pa bann imen ki’n deza viv lo later avan. Bondye ti kree bann lanz bokou letan avan ki i ti kree zonm. Zot ti pe obzerve e kriye avek lazwa letan Bondye ti kree later.​—Zob 38:4-7.

En fason ki bann lanz i servi Bondye, i dan sa travay pli enportan ki pe ganny fer lo later ozordi. Sa i sa travay pour anons sa bon nouvel lo Rwayonm Bondye. (Matye 24:14) Zapot Zan ti ganny en vizyon lo ki mannyer bann lanz i partisip dan sa travay. I ti ekri: “Mon ti vwar en lot lanz pe anvole anler dan lesyel e i ti annan en bon nouvel eternel pour anonse avek tou bann ki reste lo later, avek tou nasyon, tribi, langaz ek pep.” (Revelasyon 14:6) Menm si bann lanz nepli koz avek bann imen parey zot ti fer par ler dan lepase, zot gid bann ki pe anons sa bon nouvel pour rod bann ki annan en leker senser.

SATAN PE TRONP PLIZYER MILYON DIMOUN

“Lager ti deklare dan lesyel: Mikael [Zezi Kri] ek son bann lanz ti lager avek dragon e dragon ek son bann lanz ti lager, me zot pa ti ranport laviktwar e i ti nepli annan okenn plas pour zot dan lesyel. Alor sa gro dragon ti ganny zete lo later, li menm sa premye serpan, sa enn ki ganny apele Dyab e Satan ki pe anbet dimoun lo later antye. Li ek son bann lanz ti ganny zete lo later.”​—Revelasyon 12:7-9.

I pa’n toultan annan lape dan lesyel. O konmansman listwar imen, en lanz ki ti anvi ganny adore, ti rebel kont Zeova. Sa lanz ti vin Satan ki vedir “Opozan.” Pli tar, lezot lanz ti osi pran kote avek Satan e zot ti vin bann demon. Bann demon i vreman move e zot opoz Bondye. Zot in osi enfliyans laplipar imen pour rezet gidans Zeova.

Satan ek son bann demon i visye e kriyel. Zot anvi fer ditor bann imen e zot responsab pour bokou soufrans ki nou pas ladan. Par egzanp, Satan ti touy bann zannimo ek serviter Zob, en zonm ki ti fidel avek Bondye. Apre i ti touy tou le dis zanfan Zob par servi “en gro divan” pour kraz lakaz ki zot ti ladan. Apre sa, Satan ti frap Zob avek en “move maladi lapo, depi son plak lipye ziska son lapo latet.”​—Zob 1:7-19; 2:7.

Me byento, Satan pou ganny detrir. Depi ki i’n ganny zete lo later, i konnen ki “i reste li zis en ptigin letan.” (Revelasyon 12:12) Satan in fini ganny kondannen e sa i en bon nouvel!

BANN KI SORTI LO LATER

“Ou’n [setadir Zezi] aste bann dimoun pour Bondye sorti dan tou tribi, langaz, pep ek nasyon, ou’n fer zot vin lerwa ek pret pour nou Bondye e zot pou diriz lo later antye konman lerwa.”​—Revelasyon 5:9, 10.

Zis parey Zezi ti resisite sorti lo later pour al dan lesyel, i osi annan lezot dimoun ki pou al dan lesyel. Zezi ti dir son bann zapot fidel: “Mon pe ale pour prepar en plas pour zot. Deplis, . . . mon pou retournen e mon pou resevwar zot kot mwan, pour ki la kot mon ete zot osi zot pou lanmenm.”​—Zan 14:2, 3.

I annan en rezon akoz serten i al dan lesyel. Ansanm avek Zezi, zot pou form parti Rwayonm Bondye, ki en gouvernman ki pou diriz later dan lavenir e ki pou anmenn bann benediksyon pour tou dimoun lo later. I sa menm Rwayonm ki Zezi ti ansenny son bann disip pour priye pour ki i ganny etablir. I ti dir: “Nou Papa ki dan lesyel, ki ou non i ganny sanktifye. Ki ou Rwayonm i vini. Ki ou lavolonte i ganny fer lo later parey dan lesyel.”​—Matye 6:9, 10.

KI BANN KI DAN LESYEL POU FER?

“Mon [zapot Zan] ti tann en lavwa for sorti kot tronn dir: ‘Gete! Latant Bondye i avek bann imen. . . . I pou eswiy tou larm dan zot lizye, i pou nepli annan ni lanmor, ni dey, ni leokri, ni douler ankor. Sa bann keksoz avan in fini disparet.’”​—Revelasyon 21:3, 4.

Sa vizyon i en profesi ki montre ki dan lavenir, Rwayonm Bondye ki enkli Zezi ek bann ki’n resisite sorti lo later, pou detri lemonn Satan e fer later vin en paradi. Bann keksoz ki’n fer imen soufer pou ganny tire e menm lanmor pou nepli egziste.

Me ki pou arive avek sa plizyer bilyon dimoun ki’n mor e ki pa pou resisite pour al dan lesyel? Pli tar dan lavenir, zot pou resisite e zot pou annan sa posibilite pour viv pour touzour dan Paradi lo later.​—Lik 23:43.