3 Ed ou fer fas avek problenm

MALADI KRONIK

Rose i dir: “Mon annan en maladi ki toultan fer mwan ganny douler for. Sa ti fer mon lavi difisil.” En keksoz ki ti pli fatig li se ki i pa ti kapab reste konsantre lo son letid Labib ek son aktivite spirityel. Me sa parol ki Zezi ti dir dan Matye 19:26 ti ed li. Sa verse i dir: “Pour Bondye, tou keksoz i posib.” Rose ti aprann ki i annan plizyer fason pour etidye. Vi ki i ti dan douler, par ler i ti preski enposib pour li lir. Alor i ti konmans ekout bann lanrezistreman odyo lo Labib ek bann piblikasyon baze lo Labib.a I dir: “Si ti napa sa bann lanrezistreman odyo, mon pa konnen ki mannyer mon ti pou gard mon lanmitye avek Zeova for.”

Ler Rose i dekouraze akoz i pa kapab fer sa ki i ti abitye fer avan, i trouv rekonfor dan sa ki 2 Korentyen 8:12 i dir: “Si zot pare pour donnen, sa i byen devan Bondye akoz i ekspekte ki en dimoun i donn dapre sa ki i annan, pa dapre sa ki i napa.” Sa bann parol i fer Rose rapel ki Bondye i pran plezir dan sa ki i fer parski i fer tou sa ki i kapab dapre son abilite.

DAN DEY

Delphine ki nou’n koz lo la pli boner i rapel: “Apre ki mon fiy 18 an ti mor, sa douler ti sitan for ki mon pa ti krwar ki mon ti pou kapab kontinyen viv. Tou keksoz ti sanze.” Me i ti trouv rekonfor dan sa parol ki dan Psonm 94:19 kot sa psalmis i dir avek Bondye: “Ler mon leker i ranpli avek traka, ou vin rekonfort mwan.” Delphine i dir: “Mon ti priy Zeova pour ed mwan trouv bann keksoz pour fer ki ti pou ed mwan kalme sa douler.”

I ti reste okipe dan travay volonter. Avek letan, i ti konpar son lekor avek kreyon kouler ki bann zanfan i servi. Menm si sa bann kreyon i kase, zot ankor kapab ganny servi pour penn avek. Pareyman, menm si i ti santi konmsi i ti parey sa kreyon, i ti aprann ki i ti ankor kapab ed lezot. I dir: “En sel kou mon ti vwar ki ler mon ti servi bann prensip Labib ek bann rezonnman sorti dan Labib pour rekonfort mon bann etidyan, sa ti fason ki Zeova ti pe soulaz e rekonfort mwan.” I ti fer en lalis bann dimoun dan Labib ki ti dan dey pour en pe letan. Delphine ti dir: “Mon ti vwar ki zot tou zot ti bann dimoun ki ti kontan priye.” I ti osi aprann ki “ou pa pou zanmen ganny en solisyon si ou pa ouver Labib.”

Ler Delphine ti etidye Labib, i ti osi aprann ki nou devret konsantre lo lavenir me non pa lo lepase. Sa lespwar ki ganny mansyonnen dan Akt 24:15 i rekonfort li, parski i dir: “Dimoun bon konman move pou resisite.” Eski i vreman asire ki Zeova pou resisit son fiy? Annou les Delphine reponn: “I konmsi mon pe vwar mon fiy dan lavenir. Mon’n fini konnen ki nou pou zwenn sa zour ki Bondye pour resisit bann dimoun. Mon pe vwar nou ansanm dan nou zarden e mon ankor kontan li zis parey ler i ti fek ne.”