Akoz i bon pour aprann konn Bondye?
Ziska aprezan dan sa magazin, nou’n aprann en pe lo lekel Bondye? Nou’n aprann ki dapre Labib, Bondye i apel Zeova e son kalite prensipal i lanmour. Nou’n osi vwar sa ki i’n fer e ki i pou fer pour ed tou dimoun. Me menm si i annan bokou plis pour aprann lo Bondye, ou kapab demande akoz ou bezwen kontinyen aprann plis lo Bondye.
Zeova i promet ki “si ou rod li, ou pou trouv li.” (1 Kronik 28:9) Zis mazin sa zoli kado ki pe esper ou anmezir ou aprann konn Bondye setadir devlop “en bon lanmitye avek Zeova”! (Psonm 25:14, NWT) Ki mannyer en bon lanmitye avek Bondye i kapab ed ou?
Vre lazwa. Labib i dir ki Zeova i “sa Bondye ere.” (1 Timote 1:11) Ler ou apros avek li e imit son bann kalite, sa pou donn ou vre lazwa ki kapab ed ou emosyonnelman, mantalman e fizikman. (Psonm 33:12) Ou pou osi kapab annan en lavi ere par montre ou ki mannyer pour evit bann move fason viv, pour annan bann bon labitid e bann bon lanmitye avek lezot. Ou pou dakor avek sa ki sa psalmis i dir: “Me pour mwan, kan mon apros avek Bondye, mon dan lazwa.”—Psonm 73:28.
En bon lanmitye. Zeova in promet son bann serviter: “Mon pou konsey ou; mon lizye pa pou kit ou.” (Psonm 32:8) Sa i vedir ki Zeova i enterese avek sak son serviter e i donn zot led dapre zot bezwen. (Psonm 139:1, 2) Enn fwa ki ou’n devlop en bon lanmitye avek Zeova, ou pou vwar ki i toultan la pour ou.
En zoli lavenir. An plis ki ed ou annan en bon lavi la konmela, Zeova i osi fer li posib pour ou annan en lavenir merveye. (Izai 48:17, 18) Labib i dir: “Pour ganny lavi eternel, zot bezwen aprann konn ou, sa sel vre Bondye e sa enn ki ou’n anvoye Zezi Kri.” (Zan 17:3) Dan sa letan difisil, sa lespwar ki Bondye i donnen i parey en lank ki gard nou “sir e ferm.”—Ebre 6:19.
Sa i zis detrwa parmi plizyer rezon enportan pour aprann konn Bondye pli byen e devlop en lanmitye avek li. Ou kapab koz avek nenport Temwen Zeova oubyen vizit jw.org pour plis lenformasyon.