Ler dezas natirel i arive

“O konmansman nou ti dezespere. Nou ti’n perdi tou sa ki nou ti annan dan deboulir later ek linondasyon.”—Andrew, Syera Leonn.

“Apre en siklonn, nou ti retourn kot nou. Nou ti’n perdi tou keksoz. Nou ti dan sok. Mon fiy ti zis tonm azenou e plere asodlarm.”—David, Virgin Islands.

SI OU’N deza sirviv en dezas natirel, ou kapab konpran ki mannyer bann sirvivan ki’n pas ladan i santi. Zot ti dan sok, konfize, enkyet e menm ganny kosmar. Bokou i dekouraze, fatige e pa ni menm anvi fer fas avek sa sityasyon.

Si ou’n ganny afekte avek dezas natirel, petet ou santi ki ou nepli kapab siporte. Ou menm kapab konmans santi ki i pa vo lapenn kontinyen viv. Me Labib i eksplike ki i vo lapenn kontinyen viv e ki ou annan bon rezon pour annan lespwar pour en meyer lavenir.

LABIB I DONN NOU LESPWAR

Eklezyast 7:8 i dir: “Plito lafen en keksoz ki son konmansman.” Ler ou fek pas dan en dezas natirel i kapab paret ki ou napa okenn lespwar. Me anmezir ki ou fer zefor pour refer ou lavi, keksoz i kapab amelyore.

Labib i predir ki en zour nou “pou nepli antann tapaz plere, ni bann kri detres.” (Izai 65:19) Sa pou vin vre ler later pour vin en paradi anba Rwayonm Bondye. (Psonm 37:11, 29, NWT) Dezas natirel pou nepli egziste. Bann move souvenir ek bann move keksoz ki nou’n pas ladan pou disparet pour touzour parski Bondye Tou Pwisan i dir: “Dimoun pou oubliy letan pase. Zot souvenir pa pou zanmen retourn dan lespri.”—Izai 65:17.

Zis mazinen! Nou Kreater in fer laranzman pour ‘donn nou en lavenir ranpli avek lespwar,’ ler nou pou anpe anba Rwayonm Bondye. (Zeremi 29:11) Ler nou konn sa, i pou ed nou vwar ki i vo lapenn kontinyen viv. Sally ki nou’n koz lo la dan sa lartik avan i dir: “Ler ou rapel tou sa bann zoli keksoz ki Rwayonm Bondye pou fer pour nou a lavenir, sa i kapab ed ou oubliy lepase e ed ou fer fas avek difikilte ki ou pe rankontre ozordi.”

Akoz ou pa aprann plis lo sa ki Rwayonm Bondye pou fer pour bann imen a lavenir? Si ou fer sa, ou kapab annan konfyans ki malgre bann dezas, i vo lapenn kontinyen viv anmezir ou esper en lavenir kot pou napa okenn dezas natirel. Antretan, Labib i donn bann bon konsey ki kapab ed nou fer fas avek konsekans bann dezas natirel. Annou vwar detrwa legzanp.

Bann verse Labib ki kapab ed ou

Dormi byen.

“En pti ponnyen repo i pli bon ki de ponnyen travay ki zis i en lakours deryer divan.”—Eklezyast 4:6.

Bann resers i montre ki dimoun ki pas dan en sityasyon ki tromatiz zot, pou santi zot pli pir e zot pou ganny bann problenm emosyonnel si zot pa dormi ase. Alor i ti a bon si ou dormi byen.

Koz lo ou santiman.

“En leker ki trakase i fer en zonm tonm dan depi [oubyen depresyon], me en bon parol i donn li lazwa.”—Proverb 12:25.

Koz avek en manm fanmir oubyen zanmi ki ou annan konfyans ladan. Ler ou koz lo ou santiman, ou manm fanmir oubyen zanmi pros i kapab dir ou bann keksoz ki kapab ankouraz ou e ed ou.a

Mazin lavenir kot tou keksoz pou byen.

“Dapre promes [Bondye], nou pe esper en nouvo lesyel ek en nouvo later kot i pou annan ladrwatir.”—2 Pyer 3:13.

a Petet en dimoun ki strese pour bokou letan i bezwen vwar dokter.