I posib pour nou ere ozordi

EN ZOUR personn pa pou malad, vye e mor. Ou osi ou kapab viv dan en lemonn koumsa! Me ou pou dakor ki ozordi lavi i ranpli avek problenm ek difikilte. Kwa ki kapab ed ou annan en pli bon lavi la konmela? Gidans sorti dan Labib i kapab ed ou annan en lavi ere. Annou vwar serten sa bann difikilte e ki mannyer Labib i kapab ed ou.

KONTANT NOU AVEK SA KI NOU ANNAN

Konsey Labib: “Montre dan zot fason viv ki zot pa kontan larzan e kontant zot avek sa ki zot annan.”—Ebre 13:5.

Ozordi lemonn pe bonbard nou avek bokou divertisman ki dapre zot i bann keksoz ki nou bezwen. Me Labib i dir nou ‘kontant nou avek sa ki nou annan.’ Ki mannyer nou kapab fer sa?

Evite “kontan larzan.” Dimoun ki “kontan larzan” i pa fer diferans ant sa ki byen ek sa ki mal, zot pare pour sakrifye zot lasante, zot fanmir, zot zanmi e zot dinyite. (1 Timote 6:10) Eski i vo lapenn sakrifye tousala? Non, parski a lafen di zour “larzan pa zanmen ase pour sa enn ki kontan larzan.”—Eklezyast 5:10.

Dimoun i pli enportan ki keksoz materyel. I vre ki serten keksoz materyel i vreman itil. Me sa bann keksoz pa kapab demontre lanmour oubyen lapresyasyon, zis imen ki kapab fer sa. “En vre zanmi” i kapab ede anmenn serten lazwa dan nou lavi.—Proverb 17:17, NWT.

NOU KAPAB ANNAN EN PLI BON LAVI LA KONMELA LER NOU SWIV KONSEY LABIB

ANDIRE LER OU MALAD

Konsey Labib: “En leker zwaye i en bon [latizann].”—Proverb 17:22.

Parey en “bon latizann,” lazwa i kapab ed nou fer fas avek nou maladi. Me ki mannyer nou kapab zwaye ler nou pe soufer avek en maladi?

Demontre lapresyasyon. Si nou zis konsantre lo nou problenm, “tou le zour” lavi pou paret difisil. (Proverb 15:15) O kontrer, Labib i dir: “Montre zot rekonesans.” (Kolosyen 3:15) Aprann pou apresye menm bann pti keksoz dan lavi. En zoli soley kose, en pti labriz, sourir en dimoun ki nou kontan, tousala i kapab amelyor nou lavi.

Fer keksoz pour lezot. Menm si nou lasante pa tro bon, “i annan plis lazwa pour donnen ki pour resevwar.” (Akt 20:35) Ler lezot i remersye nou pour sa ki nou fer, nou santi nou ere e nou pa tro mazin nou problenm. Nou kapab fer nou lavi vin pli meyer ler nou ed lezot annan en meyer lavi.

RANFORSI NOU MARYAZ

Konsey Labib: “Verifye sa ki pli enportan.”—Filipyen 1:10.

Bann koup ki pa pas bokou letan ansanm i riske gat zot relasyon. Alor bann msye ek bann madanm i devret vwar zot maryaz konman en keksoz pli enportan dan zot lavi.

Fer keksoz ansanm. Dan plas fer keksoz ki ou kontan ou tousel, akoz zot pa plàn pour fer keksoz ansanm? Labib i dir: “De i pli bon ki enn.” (Eklezyast 4:9) Zot kapab kwi manze, fer legzersis, pran en pti labwason oubyen fer en keksoz ki zot kontan ansanm.

Montre ou konzwen ki ou kontan li. Labib i ankouraz en msye ek en madanm pou kontan e annan respe pour kanmarad. (Efezyen 5:28, 33) En zoli sourir, en pti anmaye oubyen en pti kado i kapab ranforsi en maryaz. Byensir, bann konzwen pa devret annan dezir seksyel anver lezot dimoun apard ki kanmarad.—Ebre 13:4.

“ALAFENDEFEN MON ANNAN EN BI DAN LAVI”

—Rakonte par Ryoko Miyamoto, Zapon.

Lavi ti difisil pour mwan. Mon msye ti bwar bokou e personn pa ti oule aksepte li pour travay. I pa ti anvi pran swen avek son fanmir. Menm si mon ti travay dir, sa pa ti ede pour amelyor sityasyon nou fanmir. Mon ti demann mon lekor ‘Eski sa ti mon desten oubyen i annan en keksoz ki mon’n fer dan en lot lavi e prezan mon pe ganny pini?’

Apre sa, en Temwen Zeova ti pas kot mwan. Avek en zoli sourir i ti koz avek lantouzyazm lo Rwayonm Bondye ek lavi eternel. I ti ofer mwan en Letid Labib. Deswit mon ti aprann ki Bondye i egziste, ki i saz, i zis e i kontan nou. Mon ti osi aprann ki arive avek nou ler nou mor e ki mon pa pe soufer akoz sa i mon desten.

Finalman mon ti realize ki sel fason pour annan vre satisfaksyon dan lavi i ler ou annan en bon lanmitye avek Bondye. Ler monn konn bann laverite dan Labib, sa in donn mwan lankourazman, i’n fer mwan santi mon lib e santi mon byen. Alafendefen mon annan en bi dan lavi.