Eski Ou en Dimoun Timid?
1 Nou pa sirprann kan nou vwar en zanfan pe get nou an misouk deryer son manman oubyen son papa. Timidite i normal boner dan staz lanfans. Menm dan staz adilt, bokou i en pe timid par natir. Si timidite i afekte ou partisipasyon dan minister, ki ou kapab fer?
2 Fer Fas Avek Timidite: I enportan pour port latansyon lo sa dimoun “enteryer, dan leker.” (1 Pyer 3:4) Fortifye ou lanmour pour Zeova e pour ou prosen. Annan en konviksyon profon ki akonpli sa misyon pour prese, i enn bann meyer fason pour demontre ou lanmour dezenterese. Pourswiv en bon routin pour letid personnel ek lasistans renyon. Priy regilyerman e spesifikman pour led Zeova. Lafwa for ek konfyans dan li pou batir ou lasirans e ou a “vin pli brav pour pres mesaz Bondye san okenn lafreyer.”—Fili. 1:14.
3 Lit kont bann santiman lensifizans. I sanble ki Timote ti bezwen fer sa. Pol ti ankouraz Timote pour ‘pa les personn mepriz li akoz i ankor zenn,’ e rapel li ki “Bondye pa’n donn [nou] en lespri timidite, me okontrer, en lespri ki ranpli nou avek lafors.” (1 Tim. 4:12; 2 Tim. 1:7) Timote ti ganny servi plennman par Zeova, i pou osi servi ou si ou avans devan avek konfyans total dan Li.—Ps. 56:11.
4 En ser ki son timidite ti fer li per son mari, ki ti opoz li, ti vwar li itil pour reflesir lo en teks Labib, tel ki Matye 10:37. Ofiramezir ki i ti persevere, predikasyon ti vin pli fasil pour li, e avek letan son mari, son manman, ek son bann frer ti aksepte laverite zot tou!
5 Preparasyon I Esansyel: Ou konfyans pou agrandi plis ankor kan ou prepar oprofon pour predikasyon. Swazir en senp prezantasyon dan liv Raisonner oubyen dan bann nimero presedan Nou Minister Rwayonm, etidye li e egzers li. Olye akimil bann gran lenkyetid initil, pans pozitivman. Rod kouraz an travayan byen pre avek lezot. Kit antet ki plizyer dimoun ki ou zwenn kot lakour i timid, zis parey ou. Tou dimoun i bezwen sa mesaz Rwayonm.
6 Si ou timid, pa dezespere. Ofiramezir ki ou sey ou mye, Zeova pou ed ou pour vin en predikater efikas sa bon nouvel. Apre ou pou eksperyans lazwa dan ou minister.—Prov. 10:22.