Paran—Edik ou Zanfan depi son Nesans
1 “Edik en garson dapre semen ki i devret marse, menm si i vin vye i pa pou detourn kont li.” (Prov. 22:6) Paran, si ou pa oule ou zanfan “detourn kont” semen laverite, kan ki ou devret konmans edik li? Byen boner dan son lanfans!
2 Kan Pol ti dir ki ledikasyon spirityel Timote ti ‘depi lanfans,’ i ti oule dir depi ki Timote ti ankor en pti baba. (2 Tim. 3:14, 15) An rezilta, Timote ti vin en zonm spirityel ekselan. (Fili. 2:19-22) Paran, ou osi ou devret konmans ‘depi lanfans’ pour donn ou zanfan sa ledikasyon ki zot bezwen pour “grandi avek Zeova.”—1 Sam. 2:21.
3 Fourni Delo ki zot bezwen pour grandi: Zis parey bann pti pye dibwa i bezwen ganny delo konstaman pour vin bann gro pye dibwa, bann zanfan diferan laz i bezwen ganny aroze avek delo laverite dan Labib pour vin bann serviter Bondye ki matir. Premye fason pour ansenny bann zanfan laverite e ed zot pour annan en relasyon avek Zeova se par mwayen en letid Labib an fanmiy regilyerman. Me paran, ou bezwen tenir kont kapasite konsantrasyon sak zanfan. Petet, paran pou ganny en pli bon rezilta kan zot antretenir bann sesyon lenstriksyon ki pli kourt e regilye avek zot bann pli pti zanfan plito ki enn rar me ki long.—Det. 11:18, 19.
4 Pa zanmen sou estim potansyel ki ou zanfan i annan pour aprann. Rakont zot zistwar lo bann personnaz Biblik. Les zot desin portre bann senn dan Labib oubyen zwe bann senn dan Labib. Servi bann video ek kaset, enkli bann dram Biblik. Adapte letid familyal avek laz ek abilite ou zanfan pour aprann. Okonmansman lenstriksyon pou senp, dan bann pti porsyon; me anmezir ki zanfan i grandi, son lenstriksyon i devret pli detaye e adapte avek son progre. Fer bann lenstriksyon Labib vivan e varye. Si ou oule ki ou zanfan i “kontan” Labib, alor fer sa letid pli enteresan ki ou kapab.—1 Pyer 2:2.
5 Fer zot enplike dan Kongregasyon: Fikse bann lobzektif progresif pour ou zanfan afen ki zot kapab antyerman enplike dan kongregasyon. Kwa ki kapab vin zot premye lobzektif? Paran de zenn zanfan ti dir: “Zot tou le de zot ti konmans resevwar formasyon pour asiz trankil dan Lasal Rwayonm.” Plitar, ed bann zanfan pour fer komanter dan renyon dan zot prop mo, e pour fer li zot lobzektif pour partisip dan Lekol Minister Teokratik. Pli bon lobzektif pour akonpli dan predikasyon se pour ofer en trak devan laport, lir en verse, fer en prezantasyon magazin, e angaz sa dimoun dan bann konversasyon edifyan.
6 Donn en Legzanp vivan: Eski toulezour ou zanfan i antann ou pe koz lo Zeova e pe priy li? Eski zot vwar ou pe etidye son Parol, asiste bann renyon, partisip dan predikasyon, e trouv plezir dan fer lavolonte Bondye? (Ps. 40:8) I vreman enportan ki zot vwar ou pe fer sa bann keksoz e ki zot fer sa bann keksoz ansanm. En zenn fiy ti dir sa lo son manman, ki ti’n elev sis zanfan pour vin bann Temwen fidel: “Sa ki’n enpresyonn nou plis, se legzanp manman—son legzanp fidelite ti transmet en mesaz pli pwisan ki parol.” En paran ki ti annan kat zanfan ti dir: “Sa lekspresyon ‘Zeova i premye dan nou lavi’ pa ti zis en lekspresyon dan vid me i ti nou fason viv.”
7 Paran, konmans endik ou zanfan boner, ansenny zot laverite dan Parol Bondye, etabli bann lobzektif progresif, e donn pli bon legzanp posib. Ou pou kontan ki ou’n fer sa bann keksoz!