Tou Dimoun i kapab zwe en Rol pour fer bann nouvo Disip
1 En dimoun pa vin en nouvo disip akoz zefor zis en dimoun. Zeova i kapab servi tou sa ki ‘pe travay ansanm avek li’ pour ed bann etidyan Labib progrese spirityelman. (1 Kor. 3:6-9) Nou tou endividyelman nou kapab ed bann nouvo pa zis avek nou bann komanter dan renyon ki sorti ofon nou leker, me osi par nou bon kondwit, ki donn levidans ki lespri sen i azir dan nou lavi. (Zan 13:35; Gal. 5:22, 23; Efe. 4:22, 23) Ki nou kapab fer ankor pour ed bann nouvo?
2 Konman en Kongregasyon: Nou tou nou kapab montre en lentere dan sa bann ki konmans asiste renyon par pran linisyativ pour byen akey zot e koz avek zot avan e apre renyon. Ler en msye ti mazin sa premye fwa ki i ti vin renyon, i ti dir: “Mon ti zwenn plis dimoun ki annan vre lanmour, bann dimoun ki mon pa ti konnen, dan en zour ki mon’n deza zwenn depi tou sa letan ki mon’n al legliz depi pti pti. I ti kler ki mon ti’n trouv laverite.” Set mwan plitar apre ki i ti’n asiste son premye renyon, i ti batize.
3 Ou kapab senserman felisit en etidyan Labib anmezir ki i fer progre. Eski i annan en etidyan Labib ki pe fer fas avek lopozisyon? Eski i asiste bann renyon regilyerman? Eski i’n ganny sa kouraz pour reponn? Eski i’n antre dan Lekol Minister Teokratik oubyen i’n konmans prese? Felisit li pour progre ki i’n fer. Sa pou ankouraz e fortifye li.—Prov. 25:11.
4 Konman en Kondikter Letid Labib: Serten proklanmater in reisi ed zot etidyan Labib konn bann frer ek ser dan kongregasyon par demann bann lezot proklanmater pour vin avek zot lo zot letid Labib. Envit sa etidyan pour asiste bann renyon osito posib. Ler i konmans asiste bann renyon, fer sir ou entrodwir li avek lezot. Eski i pe lite pour sirmont en move labitid, parey fimen? Eski i annan en dimoun dan son fanmiy ki pe anpes li etidye? Si i koz avek en proklanmater ki’n fer fas avek menm sitiasyon e ki’n reisi sirmont sa problenm sa i kapab en lankourazman pour li.—1 Pyer 5:9.
5 Spirityelman bann nouvo i bezwen ganny sa sipor ki sorti kot kongregasyon. Tou dimoun i kapab ed zot pour progrese par montre en lentere senser dan zot.