“Come Be My Follower”
1. Ki loportinite nou pou gannyen atraver Letid Labib Kongregasyon dan sa detrwa mwan ki pou vini?
1 I annan bokou lenformasyon detaye lo Garson Bondye dan sa kat Levanzil ki baze lo son lavi ler i ti lo later. Vi ki bann Kretyen i sipoze “swiv” son legzanp, nou pou anvi prepar byen e port bokou latansyon letan nou pou konsider sa liv “Come Be My Follower” dan Letid Labib Kongregasyon konmansman semenn 1 Mars. (1 Pyer 2:21; Mark 10:21) Enn bann keksoz enportan ki nou pou konsidere se bann laspe dan lavi Zezi ki kapab ankouraz nou dan minister.
2. Ki mannyer legzanp Zezi lo landirans i kapab ed nou?
2 Legzanp ki Zezi in lese: Eski ou’n deza ganny mal resevwar letan ou ti pe pres kaz-an-kaz? Letan nou fer fas avek en tel sityasyon nou kapab pli byen konpran sinifikasyon parol Zezi: “Si zot in persekit mwan, zot osi, zot pou ganny persekite.” (Zan 15:20) I pa vedir ki sak fwa nou ganny mal resevwar ki nou pe ganny persekite. Toutfwa, sa ki ti fer Zezi kapab andir tou kalite leprev ek tes ti sa lazwa ki i ti pou gannyen. Nou osi nou kapab fer nou mye pour ganny laprouvasyon Zeova ek sa rekonpans ki nou pou gannyen si nou reste fidel. Sa pou ed nou pour pa “dekouraze, ni dezespere.” (Ebr. 12:2, 3; Prov. 27:11) Anmezir nou persevere dan nou minister, nou kapab osi asire ki nou pou ganny sipor Zezi Kri.—Mat. 28:20.
3. Ki mannyer nou kapab imit Zezi dan lafason ki i ti konsider son minister?
3 “Se pour sa ki Bondye in anvoy mwan”: Pres lo sa Rwayonm ti aktivite ki ti okip premye plas dan lavi Zezi. (Lik 4:43) I ti donn bokou son letan dan minister dan en fason zenere. I ti konsider sa travay konman en travay irzan e i ti toultan rod bann loportinite pour li koz lo Rwayonm. Vi ki nou pe swiv legzanp Zezi, kote sa pou anmenn nou? Eski i annan dimoun ki nou kapab partaz sa bon nouvel avek letan nou pe fer bann aktivite dan nou lavi tou le zour? Annou les sa lanmour ki Kris in demontre pous nou pour partaz sa bon nouvel avek plis dimoun posib!—2 Kor. 5:14.
4. Ki mannyer nou kapab amelyor nou minister?
4 “Personn pa’n zanmen deza koz parey sa zonm”: Bann dimoun ki ti ekout Zezi ti etonnen par lafason i ti ansennyen. (Zan 7:46; Mat. 7:28, 29) Kwa ki ti fer li diferan avek lezot ansennyan? I ti kontan sa laverite ki i ti ansenny bann dimoun, i ti kontan sa bann dimoun ki i ti ansennyen, e i ti annan sa abilite pour servi diferan metod lansennyman. Kalite nou minister pour amelyor en kantite si nou imit sa Gran Ansennyan.—Lik 6:40.
5. Ki nou lobzektif anmezir nou etidye sa liv “Come Be My Follower”?
5 Sa i serten bann trezor ki nou kapab gannyen ler nou aprann lo lavi Zezi. Ki lezot trezor ou kapab dekouver? Anmezir ki ou egzamin lavi Zezi dan Letid Labib Kongregasyon, fer li ou lobzektif pour “konn lanmour Kris” par imit son bann parol ek aksyon.—Efe. 3:19.