Ansenny avek konviksyon
1. Pour ansenny Parol Bondye avek efikasite dan predikasyon, kwa ki enplike?
1 Bann Kretyen ki ansenny avek efikasite parey zapot Pol, i konpran ki pour “anons byen mesaz laverite” i enplik plis ki zis sit bann verse Labib. (2 Tim. 2:15) Ler nou pe servi Parol Bondye, ki mannyer nou kapab “esey konvenk” lezot dan nou lansennyman?—Akt 28:23.
2. Ki mannyer nou kapab ed lezot devlop plis respe pour Parol Bondye?
2 Servi Labib: Premyerman si nou atir latansyon bann dimoun lo Labib sa pour fer zot devlop respe pour sa lasazes ki sorti kot Bondye. Nou konfyans dan Parol Bondye i kapab motiv bann ki ekout atantivman sa verse ki nou pe lir. (Ebr. 4:12) Nou kapab zis dir: “I enteresan pour konn pwennvi Bondye lo sa size. Remarke ki Parol Bondye i dir.” Kan i posib, les Parol Bondye reponn par lir direkteman dan Labib.
3. Apre ki nou’n lir en verse Labib, ki nou kapab fer pour ed sa dimoun konpran sinifikasyon sa verse?
3 Dezyenmman, eksplik sa verse ki ou’n lir. Bokou dimoun i vwar li difisil pour konpran en verse ler zot tann li pour premye fwa. Souvan nou bezwen eksplik sa verse pour montre ki rapor i annan avek sa topik ki nou pe diskite. (Lik 24:26, 27) Fer resorti bann pwen prensipal. Nou kapab demann en kestyon pour nou asire si sa dimoun in byen konpran sa pwen ki nou pe fer resorti dan sa verse.—Prov. 20:5; Akt 8:30.
4. Ki sa dernyen letap ki neseser pour nou ansenny avek konviksyon?
4 Rezonn lo Lekritir: Trwazyenmman, fer bokou zefor pour rezonn avek sa dimoun e tous son leker. Ed sa met lakour pour vwar ki mannyer sa verse i aplik pour li personnelman. Nou kapab konvenk en dimoun pour sanz son fason panse si nou rezonn lo Lekritir. (Akt 17:2-4; 19:8) Par egzanp, apre ki nou’n lir Psonm 83:18 nou kapab rezonn avek sa dimoun pour fer li vwar akoz i enportan pour aprann konn non en dimoun pour kapab devlop en relasyon personnel avek li. Petet apre demann li: “Eski ou krwar konn non Bondye pour fer ou lapriyer annan plis valer?” Si nou montre sa met lakour ki mannyer i kapab aplik sa verse dan son lavi personnel, sa pou fer li vwar valer pratik sa verse. Sa lansennyman konvenkan ki sorti dan Parol Bondye i fer bann dimoun senser ador sa vre Bondye vivan, Zeova.—Zer. 10:10.