Eski ou defann Parol Bondye?
1 Dan en lemonn kot souvan bokou dimoun pa krwar dan Labib, bann vre Kretyen avek devouman pe piblikman defann Parol Bondye. Nou konvenki ki “tou Lekritir i enspire par Bondye,” e alors nou dakor avek sa ki Zezi Kri ti afirmen dan en lapriyer avek Zeova: “Ou parol i laverite.” (2 Tim. 3:16; Zan 17:17) Ki mannyer nou kapab defann Parol Bondye avek efikasite?
2 Aprann bann Verse Labib: San dout Zezi ti seryezman etidye Parol Bondye. Sa ti permet li ansenny lezot dapre Labib toudilon son minister. (Lik 4:16-21; 24:44-46) Ki mannyer nou kapab aprann bann verse Labib e gard kantite ki nou kapab dan nou lespri? Nou fer sa par lir Labib sak zour e apre reflesir lo en verse ki nou’n sirtou vwar ankourazan oubyen itil dan predikasyon. Ler nou pe prepare pour bann renyon, nou devret get bann verse Labib ki’n ganny site e lir zot direkteman dan Labib e petet servi zot pour prepar en komanter. Pandan bann renyon, nou devret swiv dan nou Labib anmezir ki sa orater i lir bann verse. Ler nou aprann bann verse Labib, sa pou prepar nou pour “anons byen mesaz laverite.”—2 Tim. 2:15.
3 Servi Labib: Ler nou pe prese, nou devret servi Labib. Par egzanp si sirkonstans i permet, nou devret esey lir en verse Labib avek sa met lakour. Si i demann en kestyon oubyen i soulev en lobzeksyon, i pli bon pour servi Labib pour reponn. Si sa met lakour i okipe, nou kapab kantmenm fer resorti en panse Labib par dir, “Avan mon ale, permet mwan pour lir avek ou zis sa enn verse.” Kan i posib, lir en verse direkteman dan Labib, e les sa dimoun swiv ansanm avek ou anmezir ki ou pe lir.
4 Kan en met lakour ti ganny montre bann teks Labib ki pa siport Trinite, sa msye ti dir, “Tou mon lavi mon’n al legliz, me vreman mon pa ti konnen si Labib i dir sa!” I ti aksepte en letid Labib. Zezi ti dir ki son bann mouton pou ekout son lavwa. (Zan 10:16, 27) Pli bon fason pour bann dimoun senser rekonnet laverite se pour zot vwar li direkteman dan Labib. Alors annou defann Parol Bondye ki laverite!