Ankouraz lezot servi Labib

NOU dezir se pour diriz latansyon tou dimoun anver Parol Bondye, Labib. Sa liv sakre i fondman pour sa mesaz ki nou prese, e nou anvi dimoun realize ki sa ki nou dir i, pa sorti dan nou menm, me sorti kot Bondye. Dimoun i bezwen devlop konfyans dan Labib.

Dan Predikasyon. Ler pe prepar pour predikasyon, toultan swazir enn oubyen detrwa verse pour partaz avek dimoun ki pare pour ekoute. Menm si ou pe deside pour fer en pti prezantasyon lo en piblikasyon, i souvan itil pour lir en verse Labib ki adapte. Labib i annan pli gran pouvwar pour diriz bann dimoun senser ki okenn lezot keksoz ki nou personnelman kapab dir. Kot i pa vreman posib pour lir Labib, ou kapab swazir pour repet sa ki Labib i dir. Dan premye syek, bann kopi roulo Lekritir pa ti telman disponib. Kantmenm sa, Zezi ek son bann zapot ti repet bokou verse Labib. Nou osi nou devret fer en zefor pour aprann parker bann verse e servi zot dan en fason apropriye dan nou minister, parler zis repet zot.

Ler ou kapab lir Labib, atrap li dan en fason ki sa dimoun i kapab swiv anmezir ki ou lir. Si sa dimoun i swiv dan son prop Labib, son reaksyon anver sa ki i lir i kapab pli favorab.

Sepandan, ou devret realize, ki serten tradikter Labib in fer serten pti sanzman avek Parol Bondye. Lafason ki zot in tradwir i kapab pa an armoni dan tou laspe avek sa ki ti dan langaz orizinal Labib. Plizyer tradiksyon modern in retir non personnel Bondye, kasyet sa ki bann verse dan langaz orizinal i dir konsernan kondisyon bann mor, e kouver sa ki Labib i dir konsernan lavolonte Bondye pour later. Pour kapab montre en dimoun kwa ki’n ganny fer, ou kapab konpar bann verse kle dan plizyer Labib oubyen dan bann tradiksyon pli ansyen dan sa menm langaz. Lo plizyer topik, liv Comment raisonner à partir des Écritures i fourni en konparezon lo lafason ki diferan tradiksyon i tradwir bann lekspresyon kle ki ganny servi souvan. Nenport dimoun ki kontan laverite pou rekonesan pour konn realite.

Dan Renyon Kongregasyon. Tou dimoun i devret ganny ankouraze pour servi Labib dan bann renyon kongregasyon. Sa i fer dibyen dan plizyer fason. I ede pour gard latansyon lodyans lo sa ki pe ganny diskite. Vwar avek lizye sa ki zorey pe tande i annan plis lafors. E i fer bann nouvo vwar ki se vreman Labib ki sours nou bann krwayans.

I pou depan bokou lo lankourazman ki ou donnen pour ki sa bann dan ou lodyans i vreman swiv dan zot prop Labib ler ou pe lir bann verse. Lenvitasyon direk i enn bann pli bon metod.

I depan lo ou, orater, pour deside ki verse ou anvi aksantye par fer lodyans ouver zot Labib e get zot. I pli bon pour lir bann verse ki pou ed ou devlop ou bann pwen prensipal. Apre, si letan i permet, azout ennde lezot ki siport ou largiman.

Byensir, senpleman mansyonn sa verse oubyen envit lodyans pour get en verse i normalman pa sifi. Si ou lir en verse e apre al lo en lot avan ki ou lodyans i ganny letan pour trouv sa enn premye, zot pou dekouraz vitman e zot pou aret esey swiv ansanm avek ou dan Labib. Obzerv byen. Ler lamazorite in trouv sa verse, lir li.

Reflesir davans. Dir referans verse ki ou deside lir byen davans. Sa pou evite perdi letan ler pe esper lodyans pour trouv sa verse. Menm si ou kouver mwens lenformasyon par donn letan lodyans pour rod bann verse, bann benefis ki zot pou gannyen pou fer li vo lapenn.