Entrodwir Verse dan en Fason efikas

SE LABIB ki fourni fondasyon pour lenstriksyon ki ganny prezante dan nou bann renyon kongregasyon. Bann verse Labib i pwen santral sa ki nou dir dan predikasyon. Sepandan, lakantite lefe ki sa bann verse i kontribye dan nou diskisyon, i depan enpe lo si zot in ganny byen entrodwir.

I neseser fer plis ki zis diriz latansyon lo en verse e apre envit en dimoun pour lir li avek ou. Ler pe entrodwir en verse, esey akonpli de lobzektif: (1) Eksit antisipasyon, e (2) Fikse latansyon lo rezon pour servi sa verse. Sa bann lobzektif i kapab ganny akonpli dan plizyer kalite fason.

Demann en Kestyon. Sa i pli efikas si larepons pour sa kestyon i pa deza evidan pour ou lodyans. Esey demann ou kestyon dan en fason ki fer dimoun reflesir. Zezi ti fer sa. Ler bann Farizyen ti apros li dan tanp e piblikman teste son konpreansyon lo Lekritir, Zezi ti demann zot en kestyon: “Ki zot mazinen lo Mesi? I garson lekel?” Zot ti reponn li, “Garson David.” Zezi ti demann zot, “Alor akoz David enspire par Lespri ti apel li ‘Senyer.’?” E avek sa i ti kontinyen an sitan Psonm 110:1. Bann Farizyen pa ti kapab dir li en mo. Toutfwa, lafoul, ti ekout Zezi avek plezir.—Mat. 22:41-46.

Dan predikasyon, ou kapab servi bann kestyon lentrodiksyon parey: “Mwan ek ou nou annan nou prop non. Eski Bondye i annan en non personnel li osi? Nou kapab trouv larepons dan Psonm 83:18.” “Eski en zour pou annan selman en gouvernman pour tou limanite? Remarke konman ki Danyel 2:44 i reponn sa kestyon.” “Eski Labib i vreman koz lo bann kondisyon ki egziste dan nou lepok modern? Konpar sa ki ganny dir dan 2 Timote 3:1-5 avek kondisyon ki ou konnen.” “Eski en zour pou annan en lafen avek soufrans ek lanmor? Larepons ki Labib i fourni i ganny trouve dan Revelasyon 21:4, 5.”

Dan en diskour, ler ou servi byen bann kestyon pour entrodwir bann verse sa i kapab motiv ou lodyans pour get sa bann verse avek en nouvo lentere, menm si i bann verse ki zot konn tre byen. Me eski zot pour fer sa? Sa i depan lo si ou soulev bann kestyon ki vreman konsern zot oubyen non. Menm ler sa topik i konsern lodyans, zot kapab pa konsantre ler ou pe lir bann verse ki zot in deza antann plizyer fwa. Pour anpes sa arive, ou bezwen reflesir bokou lo sa topik pour fer ou prezantasyon tous zot.

Prezant en Problenm. Ou kapab prezant en problenm e apre diriz latansyon lo en verse ki annan rapor avek son solisyon. Pa fer lodyans ekspekte plis ki sa ki zot pou vreman gannyen. Souvan en verse i fourni selman en bout solisyon. Sepandan, ou kapab demann lodyans pour reflesir, pandan ki ou lir sa verse, ki gidans sa verse i fourni pour fer fas avek sa sitiasyon.

Pareyman, ou kapab mansyonn en prensip konsernan kondwit ki Bondye i aprouve e apre servi en resi Labib pour montre akoz i saz pour swiv sa prensip. Si en verse i kontyen de (oubyen petet plis) pwen spesifik ki relye avek sa ki pe ganny diskite, serten orater i demann lodyans pour vey sa bann pwen. Si en problenm i paret tro difisil pour en serten lodyans, ou kapab fer zot reflesir par prezant plizyer posibilite e apre les sa verse ek son laplikasyon fourni larepons.

Mansyonn Labib konman Lotorite. Si ou’n deza fini stimil lentere dan ou topik e donn serten pwenn-vi lo serten laspe sa topik, ou kapab entrodwir en verse par senpleman dir: “Remarke sa ki Parol Bondye i dir lo sa pwen.” Sa i montre akoz sa lenformasyon ki ou pe al lir i annan lotorite.

Zeova ti servi bann tel zonm parey Zan, Lik, Pol ek Pyer pour ekrir serten porsyon Labib. Me zot ti selman ekrir, Zeova ki Loter. Sirtou ler pe koz avek dimoun ki pa etidyan Labib, entrodwir en verse an dizan “Pyer ti ekrir” oubyen “Pol ti dir” i kapab napa sa menm lafors parey avek en lentrodiksyon ki idantifye sa verse konman Parol Bondye. I vo lapenn note ki dan serten sirkonstans, Zeova ti enstri Zeremi pour entrodwir bann deklarasyon an dizan: “Antann parol Zeova.” (Zer. 7:2; 17:20; 19:3; 22:2) Ki swa nou servi non Zeova pour entrodwir bann verse oubyen non, avan ki nou konklir nou diskisyon nou devret esey fer resorti ki sa ki dan Labib i son Parol.

Pran an Konsiderasyon Konteks. Ou devret konn konteks ler pe deside konman pour entrodwir en verse. Dan serten ka ou pou direkteman mansyonn sa konteks; sepandan, konteks i kapab dan lezot fason enfliyans sa ki ou dir. Par egzanp, eski ou pou entrodwir bann parol Zob ki ti en serviter fidel dan menm fason avek en deklarasyon enn son bann fo zanmi? Liv Akt ti ganny ekrir par Lik, me i sit, Zak, Pyer, Pol, Filip, Etyenn, bann lanz, osi byen ki Gamalyel ek lezot Zwif ki pa ti Kretyen. Avek ki ou pou relye sa teks ki ou site? Mazinen, par egzanp, ki pa David ki’n konpoz tou bann Psonm e pa Salomon ki’n ekrir antyerman liv Proverb. I osi itil pour konnen avek lekel ki sa ekriven Labib ti adres sa lekritir e ki topik zeneral ki ti pe ganny diskite.

Servi Lenformasyon siplemanter. Sa i sirtou efikas si ou kapab montre ki sa sirkonstans ki ti egziste dan letan ki Labib ti ganny ekrir ti parey avek sa bann ki ou pe diskite. Dan lezot ka lenformasyon lo sirkonstans i neseser pour kapab konpran en serten verse. Par egzanp, si ou ti pou servi Ebre 9:12, 24 dan en diskour lo ranson, ou kapab trouv li itil pour entrodwir ou lektir lo sa verse avek en leksplikasyon bref lo parti pli enteryer dan tabernak, ki lekritir i endike, i reprezant landrwa ki Zezi ti antre ler i ti mont dan lesyel. Me pa enkli tro bokou lenformasyon siplemanter ki sa verse ki ou pe entrodwir i vin mwen enportan.

Pour amelyor lafason ki ou entrodwir bann verse, egzamin sa ki bann orater eksperyanse i fer. Remark bann diferan metod ki zot servi. Analiz lefikasite sa bann metod. Ler ou pe prepar ou prop ekspoze, idantifye bann verse kle, e mazin byen ki sak verse i devret akonpli. Avek latansyon plàn en lentrodiksyon pour sak verse afen ki zot pou ganny servi avek pli gran lefe. Anmezir ki ou ganny leksperyans servi sa menm metod pour tou bann verse ki ou entrodwir. Anmezir ki sa laspe ou prezantasyon i amelyore, ou pou met plis lanfaz lo Parol Bondye.