Lentrodiksyon ki stimil Lentere

DAN nenport ekspoze lentrodiksyon i en parti enportan. Si ou vreman stimil lentere ou lodyans, i annan plis posibilite ki zot pou ekout avek konsantrasyon sa ki swiv apre. Dan predikasyon, si ou lentrodiksyon pa arive stimil lentere, petet ou pa pou kapab kontiny ou prezantasyon. Ler ou donn en diskour dan Lasal Rwayonm, sa lodyans pa pou kit lasal, me zot kapab konmans mazin lezot keksoz si ou pa’n kaptir zot lentere.

Ler pe prepar ou lentrodiksyon, gard antet sa bann lobzektif swivan: (1) ganny latansyon ou lodyans, (2) klerman idantifye ou topik, e (3) montre akoz ki sa topik i enportan pour ou lodyans. Dan serten sirkonstans, sa trwa lobzektif i kapab ganny akonpli preski anmenmtan. Sepandan, parler, zot kapab resevwar latansyon separeman, e lafason ki zot in ganny aranze i kapab varye.

Konman pour ganny Latansyon ou Lodyans. Lefe ki dimoun in rasanble pour antann en diskour i pa vedir ki zot pare pour met tou zot latansyon lo sa topik. Akoz non? Zot lavi i ranpli avek bokou keksoz ki demann zot latansyon. Petet zot trakase konsernan en problenm kot lakour oubyen en lot lenkyetid lavi. Ou konman sa orater ou annan sa latas difisil pour kaptir e mentenir latansyon sa lodyans. I annan plis ki en fason ki ou kapab fer sa.

Enn parmi bann diskour pli byen koni ki’n deza ganny prezante se Sermon lo Montanny. Konman i ti konmanse? Dapre resi Lik, Zezi ti dir: “Byennere, zot ki pov, . . . Byennere, zot ki lafen konmela, . . . Byennere, si zot ki pe plere konmela, . . . Byennere, zot, si zonm i ay zot.” (Lik 6:20-22) Akoz sa ti stimil lentere? Dan detrwa mo, Zezi ti rekonnet serten problenm grav ki sa bann ki ti pe ekout li ti pe fer fas avek. Prezan, olye pran bokou letan pour diskit lo sa bann keksoz, i ti montre ki bann dimoun ki annan bann tel problenm zot kapab toudmenm ere, e i ti fer sa dan en fason ki ti fer sa bann ki ti ekoute anvi pour antann plis.

Bann kestyon i kapab ganny servi efektivman pour stimil lentere, me zot devret apropriye. Si ou bann kestyon i endike ki ou pe senpleman al koz lo keksoz ki sa lodyans in deza tande avan, lentere i kapab diminyen vitman. Pa demann bann kestyon ki anbaras ou lodyans oubyen ki prezant zot dan en fason pa favorab. Plito, esey prepar ou bann kestyon dan en mannyer ki pou stimil refleksyon. Apre sak kestyon fer en pti poz afen ki dimoun dan ou lodyans i ganny letan pour prepar en larepons dan zot lespri. Ler zot santi ki zot pe angaz dan en dyalog mantal avek ou, ou annan zot latansyon.

Servi en leksperyans i en lot bon fason pour kaptir latansyon. Me senpleman rakont en zistwar i kapab pa fer ou akonpli ou bi si sa leksperyans i anbaras en dimoun dan ou lodyans. Si zot rapel sa zistwar me oubliy sa leson ki al avek li, ou pa’n akonpli ou lobzektif. Ler en leksperyans i ganny servi dan lentrodiksyon, i devret etablir en baz pour serten laspe enportan dan parti prensipal ou diskour. Kantmenm serten detay i kapab itil pour fer sa zistwar vivan, fer atansyon pour pa initilman fer sa bann leksperyans tro long.

Serten orater i konmans en diskour avek en nouvel resan, en sitasyon dan en zournal, oubyen en deklarasyon par en lotorite respekte. Sa bann keksoz i kapab osi efikas si zot vreman al avek sa topik e apropriye pour sa lodyans.

Si ou diskour i form parti en diskour an plizyer parti oubyen en porsyon dan en Renyon Servis, dan sa ka i normalman meyer pour fer ou lentrodiksyon bref e spesifik. Si ou pe donn en diskour piblik, pa depas letan ki’n ganny dezinyen pour seksyon lentrodiksyon. Se parti prensipal sa diskour ki pou transmet lenformasyon ki annan pli gran valer pour ou lodyans.

Parfwa ou kapab trouv ou pe koz devan en lodyans ki doute oubyen menm ostil. Konman ou kapab ganny zot latansyon? Etyenn, en Kretyen premye syek ki ganny dekrir konman “ranpli avek Sent-Espri e ki annan bokou lasazes,” ti ganny anmennen devan Sannedren Zwif. La i ti donn en defans pwisan lo Kristyanism. Konman i ti konmanse? Dan en fason respektab e avek en referans lo en keksoz ki lezot ti dakor avek. “Mon bann frer, ek mon bann papa, ekout mwan. Bondye dan son laglwar ti aparet avek nou zanset, Abraam.” (Akt 6:3; 7:2) Dan Lareopaz an Atenn, zapot Pol ti adapte son lentrodiksyon avek en lot lodyans tre diferan, an dizan: “Atenyen, mon remarke ki dan tou sans zot en bann dimoun byen relizye.” (Akt 17:22) An rezilta lentrodiksyon efikas, tou le de lodyans ti pare pour antann plis.

Ler ou dan predikasyon, ou osi bezwen ganny latansyon dimoun. Si ou vizit pa’n ganny progranmen, sa dimoun i kapab okipe avek lezot keksoz. Dan serten parti lemonn, bann viziter ki pa’n ganny envite i bezwen deklar vitman rezon zot vizit. Dan lezot landrwa, koutim i demande ki serten formalite i ganny obzerve avan ou deklar rezon pour ou vizit.—Lik 10:5.

Dan tou le de ka, en bon latitid amikal i kapab ede pour kree en latmosfer ki ede annan en konversasyon. I souvan itil pour konmans avek serten keksoz ki direkteman relye avek sa ki lo lespri sa dimoun. Konman ou kapab determinen sa ki ou pou servi? Byen, ler ou aprose, eski sa dimoun ti pe okipe dan serten aktivite? Petet i ti dan son plantasyon, pe okip son lakour deor, pe repar en loto, pe kwi manze, lav lenz, oubyen pe okip zanfan. Eski i ti pe get en keksoz—en zournal oubyen en aktivite lo semen? Eski son lanvironnman i reflekte lentere spesyal dan lapes, sport, lanmizik, vwayaze, konpiter, oubyen lezot keksoz? Souvan dimoun i konsernen avek sa ki zot in tande resaman lo radyo oubyen vwar lo televizyon. En kestyon oubyen en komanter bref lo nenport sa bann topik i kapab anmenn ver en konversasyon amikal.

Sa lokazyon kot Zezi ti koz avek en madanm Samariten kot pi obor Sikar i en legzanp remarkab lo konman pour konmans en konversasyon avek en lentansyon pour donn en temwannyaz.—Zan 4:5-26.

Ou bezwen prepar ou lentrodiksyon avek swen, sirtou si ou kongregasyon i travay son teritwar souvan. Sankwa, ou kapab pa arive donn en temwannyaz.

Idantifye ou Topik. Dan kongregasyon Kretyen, tyermenn oubyen sa frer ki avan ou lo progranm pou ordinerman anons tit ou diskour e entrodwir ou. Sepandan, i kapab itil pour ou rapel ou lodyans ou topik dan ou lentrodiksyon. Ou kapab repet sa tenm mo pour mo, me i pa devret neseserman koumsa. Toudmenm, sa tenm i devret gradyelman ganny devwale anmezir ki sa diskour i progrese. Dan en fason ou en lot ou devret fikse latansyon lo ou topik dan ou lentrodiksyon.

Ler i ti pe anvoy son bann disip pour al prese, Zezi ti klerman idantifye sa mesaz ki zot ti pou prezante. “Ale, e prese ki, ‘Rwayonm lesyel i pros!’” (Mat. 10:7) Konsernan nou letan, Zezi ti dir: “Sa Bonn Nouvel Rwayonm pou ganny anonse.” (Mat. 24:14) Nou ganny ankouraze pour “anons Laparol,” sa i vedir, ki ler nou pe rann temwannyaz sa i bezwen an akor avek Labib. (2 Tim. 4:2) Toudmenm, avan ouver Labib oubyen diriz latansyon lo Rwayonm, souvan-d-fwa i neseser idantifye serten keksoz ki dimoun pe mazinen. Ou kapab koz lo krim, mank lanplwa, lenzistis, lager, konman pour ed zenn dimoun, maladi, oubyen lanmor. Me pa pas tro bokou letan lo bann keksoz negatif; ou mesaz i enn ki pozitif. Esey diriz sa konversasyon ver Parol Bondye ek lesperans Rwayonm.

Montre akoz sa Topik i enportan pour ou Lodyans. Si ou pou koz dan kongregasyon, zeneralman ou kapab asire ki sa bann ki dan ou lodyans pou enterese dan sa ki ou pe al diskite. Me eski zot pou ekoute parey en dimoun i fer ler i pe aprann en keksoz ki definitivman enplik li? Eski zot pou port latansyon akoz zot realize ki sa ki zot pe antann i adapte avek zot sitiasyon dan lavi e parski ou pe stimil dan zot en dezir pour fer serten keksoz konsernan sa? Sa pou arive si ler ou pe prepar ou diskour ou mazin byen ou lodyans—zot sirkonstans, zot konsern, zot labitid. Si ou’n fer sa, alor dan ou lentrodiksyon enkli serten keksoz ki endik sa.

Ki swa ou pe koz lo lestrad oubyen pe rann temwannyaz avek en dimoun, en meyer fason pour stimil lentere dan en topik se pour enplik ou lodyans. Montre konman zot problenm, zot bezwen, oubyen kestyon ki zot pe mazinen i relye avek sa topik ki ou pe diskite. Si ou fer kler ki ou pa pe al zis koz an zeneral me ki ou pe al diskit bann laspe spesifik sa topik, zot pou ekout avek en pli gran konsantrasyon. Pour fer sa, ou bezwen prepar byen.

Lafason ou prezant li. Sa ki ou dir dan ou lentrodiksyon i annan lenportans mazer, me lafason ki ou dir li i kapab osi stimil lentere. Pour sa rezon ou preparasyon i devret enplik pa zis sa ki ou pe al dir me osi konman ou pou dir li.

Servi bann mo apropriye i enportan pour akonpli ou lobzektif, alor ou kapab trouv li itil pour prepar sa de oubyen trwa premye fraz ase byen. Bann fraz kourt, senp i normalman pli bon. Pour en diskour dan kongregasyon, ou kapab anvi ekrir zot dan ou not oubyen ou kapab aprann zot parker pour ki ou bann premye parol i annan sa lenpak neseser. Prezant en lentrodiksyon efikas san depese i kapab ed ou pour ganny sa kalm ki neseser pour donn larestan ou diskour.

Kan pour prepar li. Lopinyon i varye lo sa size. Serten orater eksperyanse i krwar ki preparasyon en diskour i devret konmans avek son lentrodiksyon. Lezot ki’n etidye lar oratwar i annan sa lopinyon ki lentrodiksyon i devret ganny prepare apre ki parti prensipal in ganny konplete.

Ou devret sertennman konn ou topik e ki bann pwen prensipal ou deside devlope avan ou kapab travay lo bann detay pour en lentrodiksyon apropriye. Ki ou pou fer si ou pe prepar ou diskour apartir en plan enprimen? Apre ki ou’n lir sa plan, si ou ganny en lide pour lentrodiksyon, napa nanryen ki anpes ou ekrir li. Rapel osi, ki pour ou lentrodiksyon vin efikas, ou devret pran an konsiderasyon ou lodyans osi byen lenformasyon dan sa plan.