Kwen Kestyon

◼ Akoz i itil pour lodyans rod bann teks Labib pandan diskour kan orater i envit zot pour fer li?

Bann fakter tel konman sa size ki pe ganny diskite e si sa diskour i enkli egzaminasyon en porsyon Parol Bondye verse par verse, pou determin lakantite teks Labib ki lodyans i kapab ganny envite pour rode.

I enportan pour kit antet ki en rezon pour rod bann teks Labib, se pour konfirmen ki sa ki pe ganny dir i sorti dan Labib. (Akt 17:11) En lot lobzektif se pour egzamin bann laprev Biblik an rapor avek sa ki pe ganny diskite afen ki lafwa tou dan lodyans i ganny fortifye. Vwar sa ki Labib pe vreman dir kan en teks kle i ganny lir, pou fer en doub lenpresyon lo lespri. Anplis ki rod bann teks, pran not e swiv bann lide ki pe ganny eksprimen i tre itil.

Menm si Lasosyete i sit plizyer teks dan plan pour devlop sa size, sa bann teks in ganny fourni pour benefisye sa orater, pour ed li dan son preparasyon. Zot donn lenformasyon lo konteks, si non i ed sa orater pour gard byen antet bann prensip Biblik debaz e konpran devlopman sa size. Sa orater i determinen ki teks ki esansyel pour devlopman son diskour e envit lodyans pour swiv ansanm avek li anmezir ki sa bann teks i ganny lir e eksplike. Lezot teks ki siport sa lenformasyon i kapab ganny mansyonnen e reformile, me dan tel ka i pa forseman neseser pour lodyans rod sa bann teks.

Kan orater i lir sa bann teks ki i’n selekte, i lir direkteman dan Labib, non pa lo en papye apar enprimen lo konpiter. Kan sa orater i envit lodyans pour swiv avek li, i sit sa liv Labib, sapit ek verse dan en fason kler. Poze pour demann en kestyon oubyen dir an bref akoz sa teks in ganny site, i permet ase letan pour lodyans trouv sa teks. Repet sa sitasyon pou osi ed lodyans pour rapel sa referans. Toutfwa, i pa apropriye pour mansyonn nimero sa paz, vi ki paz i varye depandan lo sa edisyon Labib ki bann endividi dan lodyans pe servi. Rod bann teks Labib kan nou ganny envite pour fer li, i ed lodyans pour benefisye avek pouvwar Parol Bondye anmezir ki i ganny eksplike pandan diskour.—Ebr. 4:12.