Kontakt vizyel

NOU lizye i kominik bann latitid ek lemosyon. Nou lizye i kapab endike si nou sirprann oubyen annan lafreyer. Zot kapab transmet konpasyon oubyen lanmour. Parler, zot kapab demontre dout oubyen donn levidans latristes. Konsernan son bann konpatriyot ki’n soufer bokou, en zonm aze ti dir: “Nou koz avek nou lizye.”

Lezot i kapab tir konklizyon lo nou e lo sa ki nou dir depandan lo kwa ki nou fikse nou lizye. Dan bokou kiltir, dimoun i annan tandans pour met konfyans dan en endividi ki mentenir en regar amikal avek zot. Parkont, zot kapab dout senserite oubyen konpetans en dimoun ki get son lipye oubyen en keksoz plito ki sa enn ki i pe koz avek. Dan serten lezot kiltir, fikse en dimoun dan son lizye, i ganny konsidere konman en latitid malelve, agresif, oubyen ki met odefi sa lot dimoun. Sa i sirtou leka ler en zonm pe koz avek en madanm oubyen lekontrer ouswa avek en sef oubyen lezot dimoun o plase. E dan serten landrwa, si ler en zenn pe koz avek en dimoun pli aze i get sa dimoun fran dan son figir, sa pou ganny konsidere konman en mank respe.

Sepandan, dan bann landrwa kot sa bann keksoz pa en problenm, fikse en dimoun ler pe fer en deklarasyon enportan i kapab azout lanfaz avek sa ki pe ganny dir. I kapab ganny konsidere konman levidans ki sa orater i annan konviksyon. Remarke konman Zezi ti reazir ler son bann disip ti vreman etonnen e ti dir: “Alor, lekel ki kapab ganny sove?” Labib i raporte: “Zezi ti get zot e dir, ‘Pour en zonm, sa i pa posib, me pour Bondye tou i posib.’” (Mat. 19:25, 26) Labib i osi montre ki zapot Pol ti obzerv avek bokou lentere reaksyon bann dimoun ki ti ekout li. Dan en lokazyon en zonm paralize depi son nesans ti prezan ler Pol ti pe koze. Akt 14:9, 10 i raporte: “I ti pe ekout sa ki Pol ti pe dir. Pol ti fikse li e ti war ki sa zonm ti posed lafwa pour li geri, alor, avek en lavwa for Pol ti dir, ‘Leve, e debout drwat lo ou lipye.’”

Sizesyon pour Predikasyon. Ler ou partisip dan predikasyon, apros dimoun dan en fason amikal e zantiy. Kot i apropriye, servi bann kestyon ki fer reflesir pour konmans en konversasyon lo en keksoz ki kapab konsern zot tou le de. Anmezir ki ou fer sa, esey etablir kontakt lizye—oubyen omwen get sa dimoun dan son figir dan en fason amikal e avek respe. En sourir akeyan lo figir en dimoun ki son lizye i transmet lazwa ki i annan, i atir lezot. En tel lekspresyon i kapab dir sa endividi bokou konsernan sa kalite dimoun ki ou ete e ed li pour santi li alez anmezir ki ou koze.

Par obzerv bann lekspresyon dan lizye en dimoun, kot i apropriye, i kapab donn ou lendikasyon lo konman pour fer fas avek en sitiasyon. Si sa dimoun i ankoler oubyen si i pa vreman enterese, petet ou kapab vwar sa. Si i pa konpran ou, ou kapab rekonnet sa. Si i pe vin enpasyan, laplipar-di-tan ou pou kapab konnen. Si i vreman enterese, sa osi pou evidan. Lekspresyon dan son lizye i kapab endik ou nesesite pour aziste vites ki ou koze, fer plis zefor pour li partisip dan sa konversasyon, pour termin sa konversasyon oubyen, posibleman, pour kontinyen avek en demonstrasyon lo konman pour etidye Labib.

Ki swa dan predikasyon port-an-port oubyen pe diriz en letid Labib, esey mentenir en kontakt lizye dan en fason ki montre respe pour sa enn ki ou pe koz avek. Sepandan, pa fikse li pour tro bokou letan, akoz sa i kapab anbarasan. (2 Rwa. 8:11) Me dan en fason natirel, amikal, tanzantan get sa dimoun dan son figir. Dan bokou pei, sa i transmet en santiman lentere senser. Byensir, ler ou pe lir Labib oubyen serten lezot piblikasyon, ou lizye pou fikse lo papye. Me pour aksantye en pwen, ou kapab anvi get direkteman sa dimoun, kantmenm pa pour lontan. Si detanzaot ou get sa dimoun, sa pou osi permet ou obzerv son reaksyon anver sa ki pe ganny lir.

Si timidite i fer kontakt lizye difisil pour ou okonmansman, pa abandonnen. Avek letan, kontakt vizyel apropriye pou vin natirel, e i kapab amelyor ou lefikasite pour koz avek lezot.

Ler pe donn en Diskour. Labib i dir nou ki avan Zezi ti konmans son Sermon lo Montanny, “Zezi ti lev son lizye e get son bann disip.” (Lik 6:20) Aprann atraver son legzanp. Si ou pe al koz devan en lafoul, get zot e apre poz pour detrwa segonn avan ki ou konmans koze. Dan bokou landrwa sa pou enkli fikse serten dan lodyans. Sa pti poz i kapab ed ou pour sirmont ou lafreyer. I pou osi ed lodyans adapte zot avek latitid oubyen lemosyon ki annan lo ou figir. Deplis, an fezan sa i pou permet lodyans pour vin silans e pare pour donn ou zot latansyon.

Pandan ou ekspoze, get ou lodyans. Pa kontant ou pour zis get dan direksyon sa group. Esey get bann endividi dan sa group. Dan preski tou kiltir, i normal pour en orater piblik annan omwen en serten kontakt lizye avek lodyans.

Get ou lodyans i vedir plis ki senpleman konmans get en kote ziska lo lot kote. Fer kontakt vizyel dan en fason respektab avek en dimoun dan lodyans, e si i apropriye, dir en fraz konplet avek sa endividi. Apre get en lot e dir enn oubyen de fraz avek sa dimoun. Pa get en dimoun pour tro bokou letan ziska ki i anbarase, e pa konsantre lo selman detrwa dimoun dan lodyans. Kontinyen get partou dan sa lodyans dan sa fason, me ler ou koz avek en dimoun, vreman koz avek sa dimoun e remark son reaksyon avan ki ou get en lot.

Ou not i devret lo pipit, dan ou lanmen, oubyen dan ou Labib afen ki ou kapab get ou not vitman par fer zis en mouvman lizye. Si i neseser pour bouz ou latet pour vwar ou not, sa pou afekte ou kontakt avek lodyans. Ou devret port latansyon lo lakantite fwa ki ou get ou not e kan ki ou fer li. Si ou pe get ou not pandan ki ou pe ariv lo en moman for dan ou ekspoze, ou pa pou selman pa vwar reaksyon ou lodyans me ou prezantasyon pou perdi serten son lafors. Pareyman, si ou pe konstaman konsilte ou not, ou pou perdi kontakt avek lodyans.

Ler ou anvoy en boul avek en dimoun, ou gete pour vwar si sa dimoun in gob sa boul. Sak lide dan ou ekspoze ki ou prezante i parey konmsi ou pe anvoy en boul avek lodyans. Zot reaksyon pou fer ou konnen si zot in gob sa lide. I ganny endike par swa—en sakouy latet, en sourir, en regar atantif. Si ou mentenir bon kontakt vizyel, sa i kapab ed ou pour fer sir ki ou bann lide pe ganny “gobe.”

Si ou ganny demande pour lir avek kongregasyon, eski ou devret esey get lodyans pandan lektir? Si lodyans pe swiv ou lektir dan Labib, laplipar zot pa pou konnen si ou pe get zot ou non. Me get ou lodyans i kapab ed ou pour fer ou lektir vivan akoz ou pou kapab konstaman vwar zot reaksyon. E pour bann ki pa pe servi zot Labib e ki pa pe konsantre, kontakt vizyel avek orater i kapab ed zot pour remet zot latansyon lo sa ki pe ganny lir. Byensir, ou pou selman kapab get pour en pti moman, e i pa devret ganny fer dan en fason ki fer ou ezite dan ou lektir. Pour sa rezon, i pli bon pour tenir ou Labib dan ou lanmen e pour kit ou latet anler, pa bes ou manton anver ou pwatrin.

Parler, bann ansyen i ganny demande pour prezant en diskour lasanble ki zot bezwen lir apartir en maniskri. Pour byen kapab fer sa i demann leksperyans, preparasyon avek swen, e fer bokou repetisyon. Byensir, servi en maniskri i limit kontakt vizyel avek lodyans. Me si sa orater in byen prepare, i devret kapab get son lodyans detanzaot san perdi landrwa kot i ti pe lir. An fezan sa, sa orater pou ede mentenir latansyon lodyans e permet zot benefisye plennman avek sa lenstriksyon spirityel enportan ki pe ganny prezante.