Montre Lentere senser—par get sa Dimoun
1 Ler nou pe pres dan landrwa piblik e osi port an port, souvannfwa nou get sa bann dimoun avan nou konmans koz avek zot. La dapre lekspresyon lo zot figir, nou kapab zize konman zot santi dan nou prezans e menm ki limer zot ladan. Zot osi zot kapab remark en kantite keksoz lo nou. En madanm ti dir sa konsernan vizit en Temwen: “Sa ki mon rapel lo son figir souriyan ti sa lape lespri. Mon ti enpresyonnen.” Sa ti ouver semen pour sa madanm ekout sa bon nouvel.
2 Get lezot i en bon fason pour konmans donn en temwannyaz ler nou pe pres dan semen oubyen dan lezot landrwa piblik. En frer i kontan get bann dimoun ki pe apros li dan zot figir. Ler i fer sa, i fer en sourir apre i prezant bann magazin. Par servi sa lapros i ganny bann bon konversasyon e i plas en kantite magazin.
3 Disteng Santiman lezot: Ler nou get bann dimoun, sa pou ed nou disteng zot santiman. Par egzanp, si en dimoun pa konpran nou oubyen i pa dakor avek en keksoz ki nou’n dir, nou pou vwar lo son figir. Si i okipe oubyen i konmans annwiye, nou pou konnen ler nou get son figir. Nou kapab alor sanz nou prezantasyon oubyen fer li vin pli kourt. Ler nou konnen ki lezot i santi, sa i en bon fason pour demontre nou lentere senser pour zot.
4 Senserite ek Konviksyon: Dan bokou kiltir, ler ou get en dimoun dan son figir i montre ki ou en dimoun senser. Remarke konman Zezi ti reazir ler son bann disip ti demann li: “Lekel ki kapab ganny sove?” Labib i dir: “Zezi ti get zot, e dir, ‘Pour en zonm, sa i pa posib, me pour Bondye tou i posib.’” (Mat. 19:25, 26, nou ki’n met an italik.) San dout sa konviksyon ki ti annan dan lizye Zezi ti fer son parol vin pli konvenkan. Dan menm fason ler nou get en dimoun, sa pou ed nou pour prezant mesaz Rwayonm avek senserite ek konviksyon.—2 Kor. 2:17; 1 Tesa. 1:5.