Gard ou Lizye senp
1. Ki savedir annan en lizye senp, e akoz i enportan?
1 Dan son Sermon lo montanny, Zezi ti fer resorti sa gran lenfliyans ki lizye senbolik oubyen spirityel i kapab annan lo nou lavi. I ti dir: “Si ou lizye i [senp, NW], ou lekor antye pou dan lalimyer, me si ou lizye i malad, ou lekor antye pou dan fernwanr.” (Mat. 6:22, 23) En lizye senp i en lizye ki konsantre lo en sel bi—fer lavolonte Bondye—pa ganny distrer par tro bokou traka konsernan bann keksoz materyel. (Mat. 6:19-21, 24-33) Kwa ki kapab ed nou pour gard en lizye senp?
2. Ki pwennvi konsernan keksoz materyel Parol Bondye i ankouraze?
2 Kontant avek sa ki nou annan: I en lobligasyon biblik pour nou pran swen avek bezwen nou lakour. (1 Tim. 5:8) Me sa pa pe vedir ki nou bezwen rod zanmen fini bann keksoz pli meyer e pli modern. (Prov. 27:20; 30:8, 9) Okontrer, Labib i ankouraz nou pour kontant nou avek “manze ek lenz,” ki bann keksoz debaz dan lavi. (1 Tim. 6:8; Ebr. 13:5, 6) Par pran aker sa konsey i kapab ed nou pour gard nou lizye fikse dan sa bon direksyon.
3. Kwa ki kapab ed nou evite met bann fardo lo nou?
3 Nou byen fer ler nou evite met bann fardo lo nou par bann det ki pa neseser e avek bann keksoz ouswa bann aktivite ki demann bokou letan ek latansyon. (1 Tim. 6:9, 10) Ki mannyer nou kapab fer sa? Ler nou pe mazin pour fer en keksoz, priy avek bokou latansyon lo sa keksoz e kalkile onnetman si sa pou afekte nou bann lobzektif spirityel. Determinen pour gard bann keksoz spirityel premye dan nou lavi.—Fili. 1:10; 4:6, 7.
4. Akoz nou devret rod fason pour senplifye nou fason viv?
4 Senplifye ou Fason viv: Senplifye ou fason viv i en lot keksoz ki kapab ede anpes ou ganny atire par keksoz materyel. En frer ki ti vwar ki son fanmiy ti kapab viv san en kantite keksoz materyel ti dir: “Aprezan mon kapab fer plis dan kongregasyon pour servi mon bann frer ek ser. Mon konvenki ki Zeova i beni tou son bann serviter ler zot met vre ladorasyon avan bann lentere personnel.” Eski ou kapab rezwir bann pli gran benediksyon par senplifye ou fason viv?
5. Akoz nou bezwen kontinyen fer zefor pour gard nou lizye senp?
5 Nou bezwen kontinyen fer zefor pour reziste lenfliyans Satan, son lemonn ki annan lanmour pour keksoz materyel, ek nou lekor enparfe. Olye ki les nou lizye get partou kote, annou gard zot fikse lo fer lavolonte Bondye e lo lavi eternel ki nou lesperans presye.—Prov. 4:25; 2 Kor. 4:18.